Basileia Haroro Ripoti
Train Ura Henia Tauna be Hereva Momokani Ia Kamonai Henia
BEMA kudou-maoro tauna ta be kara maoromaoro ia ura henia, vadaeni Iehova Dirava be Keriso Iesu bona guba aneru dekena amo, dala do ia kehoa bena ta ese unai mamoe bamona tauna dekenai Basileia ena sivarai namona do ia harorolaia ia kamonai totona. Bena, reana murinai, unai tauna be Iesu ena lalo-namo do ia davaria totona, ena idibana kahana ai do ia gini. (Mataio 25:31-33) Unai be ia momokani train ia ura henia momo Austria tauhauna ta dekenai, ia be dala idauna ta ai hereva momokani ia diba.
Unai tauhau ia ura henia dikadika karana be train taria daiutuna dekenai ia helai, train biagudia ese edia gwaumaoro idia henia unai ia karaia diba totona. Train lalonai ia loaloa neganai iena video kamera dekenai piksa ia abia bona ena ruma dekenai ia giroa lao neganai, unai piksa ia raraia diba. Nega ta Vienna amo ia lao Salzburg ai, bona train ia taria tauna be Iehova ena Witness tauna ta. Ia ese unai nega ia gaukaralaia train ura henia tauna dekenai Basileia ena sivarai ia kikilaia totona. Unai tauhau be ia hoa sisina train taria tauna be Dirava bona Baibel edia sivarai ia kikilaia hamatamaia neganai, to unai laolao lalonai, train taria tauna ena hereva ia kamonai namonamo lasi, to idia heau hanai tanona ia raraia momo.
Ena ruma dekenai ia ginidae neganai, unai tauhau be ena video be nega tamona lasi to nega 10 ia raraia, badina idia laolao gabuna ia ura henia bada. Unai video dekenai edia hereva ia rekoda danu, unai dainai Witness tauna ena hereva ia dekenai ia kamonai loulou. Unai video ia raraia momo dainai, Witness ena hereva ia kamonai momokani. Bona ia lalohadailaia momo, bona gabeai unai Baibel ena sivarai ia moalelaia bada. Ia ura hereva ma haida do ia kamonai.
Train taria tauna ena ladana ia laloatao bona ia diba ia be Vienna dekenai ia noho. Unai dainai, ia lao pos opesi dekenai bona telefon buka lalonai unai ladana momo badinai ia noho telefon namba idauidau ia rini henidia. Telefon idia abia isi neganai ia gwau: “Oi be train taria tauna ta, a?” Bema idia gwau lasi, telefon ia atoa diho bona namba ma ta ia rini henia. Murinai, train taria tauna ia davaria. Ia dekenai dahaka ia vara ia sivarailaia bona ia hamaoroa video dekenai ia kamonai Baibel sivaraina ia ura henia bada.
Witness tauna be branch opesi amo dala ia hegaegaelaia unai tauhau kahirakahira dekenai ia noho tauna ta do ia vadivadi henia totona. Ena noho gabuna kahirakahira kongregesen lalonai train taria tauna ma ta ia noho. Unai train taria tauna iharuana be train ia ura henia dikadika tauhauna ia vadivadi henia bona ia dekenai Baibel stadi ia hamatamaia. Lagani 1991 ena siahu negana lalonai, unai tauhau be bapatiso ia abia.
Iehova, iboudiai edia kudouna ia tahua Diravana, ia diba unai tauhau be kara maoromaoro ia ura henia. Unai dainai, dala ia kehoa Baibel ena hereva momokani ia kamonai diba totona—ena be dala idauna dekenai ia kamonai.—1 Sisiga 28:9; Ioane 10:27.
[Picture Credit Line on page 9]
Courtesy of the Austrian Railways