Mataganigani Ena Idoa Dekenai Oi Moru Lasi

“Kohu momo idia ura henia taudia be hedibagani [bona idoa] dekenai idia moru diba.”​—1 TIMOTEO 6:9.

1. Dahaka dainai idoa idauidau ita laloa be namo?

UNAI hereva “idoa” dainai sedira labana tauna ta oi laloa, idoa ta ia karaia bona ia hunia animal ta ia abia totona. To, Dirava ese ia hahedinaraia goevagoeva ita dekenai idoa dikadia be idoa korikoridia lasi, to lauma dalana ai ita idia hadikaia idoa bona iseda kara namo idia hadikaia gaudia. Diabolo be unai bamona idoa gaukaralaia dalana ia diba momo.​—2 Korinto 2:11; 2 Timoteo 2:​24-26.

2. (a) Iehova be edena dala ai ita ia durua idoa dikadia ita dadaraidia totona? (b) Hari ita be edena bamona idoa do ita lalodia?

² Iehova ese ita ia durua dalana be Satana ena idoa idauidau momo ia gwauraidia hedinarai. Inai bamona, Dirava ese ita ia sisiba henia, bema aonega lasi dalanai ita hereva, eiava ita hereva haraga, eiava namo lasi ita herevalaia gaudia ita herevalaia, unai neganai, iseda udu-bibinadia, eiava uduna, be idoa bamona. (Hereva Lada-isidia 18:7; 20:25) Hekokoroku be idoa ta, bona badu taudia ita bamodia neganai be idoa ta danu. (Hereva Lada-isidia 22:​24, 25; 29:25) To, namona be ma idoa ta ita laloa: “Kohu momo idia ura henia taudia be hedibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura taudia do idia koia bona hadikaia.” (1 Timoteo 6:9) Unai idoa ia havaraia gauna eiava ena badina be “mataganigani.” Ena be nega momo mataganigani ia hedinarai taga tahua karana dekenai, to dala momo dekenai mataganigani be idoa ta bamona.

Iehova Ia Sisiba Ita ese Dika Ita Davaria Garina

³ Mataganigani anina be ta ia ura ia dekenai ia noho gauna ia habadaia, herevana unai be moni, kohu, siahu, mahuta hebou karana, eiava ma gau haida. Guna, haida be mataganigani karana ena idoa dekenai idia moru. Idaunegai Eden umana lalonai, Eva ia mataganigani, bena gabeai Adam ia mataganigani. Ena adavana ena mauri laganidia ese Eva ena mauri laganidia ia hanaia dainai Adam ena diba ia bada, bona Iehova ese ia hadibaia. Dirava ese paradaiso gabuna ia henidia. Aniani namodia idauidau idia moalelaia diba, bona miro lasi tanona dekenai idia hatubua diba. Goevadae natudia idia abia diba, idia ida idia noho diba bena ela bona hanaihanai Dirava idia hesiai henia diba. (Genese 1:​27-31; 2:15) Taunimanima dekenai unai be namo herea momokani, ani?

3, 4. Idaunegai tanobada sivarai dekenai dahaka mataganigani sivaraidia amo diba ita abia?

⁴ To, ita gwau lasi ta ia noho namo dainai mataganigani karana ena idoa ese do ia abia lasi. Eva ia ura Dirava bamona ai ia lao dainai idoa ese ia abia, ia ura sibona ena lalohadai ia tahua bona sibona ena taravatu ia atodia. Ia hedinarai Adam ia ura iena hairai adavana ia bamoa noho, herevana dahaka do ia vara. Mataganigani karana ena idoa ese unai goevadae taudia ia abia diba dainai, oi lalo-parara diba dahaka dainai mataganigani karana be hekwakwanai dikana ita dekenai.

5. Dahaka dainai mataganigani kara ena idoa ita dadaraia be gau badana?

⁵ Ita naria namonamo mataganigani karana ena idoa ese ita ia abia garina badina aposetolo Paulo be ita ia sisiba henia, ia gwau: ‘Umui diba lasi, a, kara dika taudia be Dirava ena Basileia do idia davaria lasi? Umui sibona umui koia lasi, lebulebu taudia, kaivakuku idia tomadiho henia taudia, heudahanai taudia, eiava lebulebu hahine edia kara idia tohotohoa tatau, eiava tatau ese tatau danu hemarai karadia idia karaia taudia. Eiava henaoa taudia, mataganigani taudia. . . . Inai bamona taudia ta lasi be Dirava ena Basileia do ia davaria diba. ’ (1 Korinto 6:​9, 10) Paulo be ita ia hadibaia danu: “Heudahanai bona matabodaga bona kohu ura dikadika kara, be do umui herevalaia lasi.” (Efeso 5:3) Unai dainai, namo lasi mataganigani karana ita herevalaia iseda goevadae lasi tauanina ita hamoalea totona.

6, 7. (a) Dahaka Baibel sivaraidia amo ita diba mataganigani kara ena siahu ena bada be dahaka? (b) Dahaka dainai unai sivarai be sisiba namodia ita dekenai?

⁶ Danu, Iehova ese sivarai haida ia toredia bena mataganigani karana ena dika dainai ita naria namonamo diba. Akan ena mataganigani karana oi laloa. Dirava ia gwau Ieriko do idia hadikaia ore, to unai hanua ena golo, siliva, copper, bona auri be Iena kohu rumana totona do idia haboua. Sedira Akan be unai bamona ia karaia gwauraia, to mataganigani karana ena idoa ese ia abia. Ieriko ai ia vareai neganai, unai be hegeregere ia lao sitoa namona dekenai, unuseniai davana bada gaudia ia itaia, bona ia ura henia dabua namona ta ia davaria. Davana bada golo bona siliva ia dogoatao neganai, reana ia laloa, ‘Inai be davana bada herea momokani! Ta ese ia henaoa be auka lasi.’ Gauna unai! Unai gaudia ia hadikaia ore eiava Iehova totona ia haboudia be namo, to ia mataganiganilaidia, Dirava ena amo ia henaoa, unai dainai Akan ena mauri ia boio. (Iosua 6:​17-19; 7:​20-26) Danu, Gehasi bona Iuda Iskariote edia kara oi lalodia.​—2 Hanua Pavapavadia 5:​8-27; Ioane 6:64; 12:​2-6.

⁷ Ita laloaboio lasi ita gwauraidia taudia toi be Iehova ena taravatu idia diba, idia be Dirava idia diba lasi taudia bamona lasi. To, idia be Dirava idia gwauhamata henia taudia. Idia iboudiai be hoa karadia idia itaia vadaeni, bona namona be Dirava ena siahu dainai idia gari, bona idia ura ia moale noho idia dekenai. To, mataganigani karana ena idoa ese ia hamorudia. Ita danu be iseda turana karana Dirava dekenai ita hadikaia diba bema mataganigani karana ta ena idoa dekenai ita moru. Ita idia hadikaia diba mataganigani karadia haida be dahaka?

Taga Eiava Kohu Mataganigani Henia Karana Ena Idoa

⁸ Keristen taudia momo be Baibel ena sisiba idia kamonai vadaeni, unai sisiba ia gwau moni ura henia bada karana, eiava taga habadaia momo karana be dika. Unai sisiba haida ita laloa lou be namo, ani? Ita davaria diba Mataio 6:​24-33; Luka 12:​13-21; bona 1 Timoteo 6:​9, 10 dekenai. Ena be oi laloa unai sisiba oi abia dae bona oi badinaia, to sedira guna Akan, Gehasi, bona Iuda idia gwau idia abia dae danu, ani? Ia hedinarai namonamo, namona be iseda harana sibona dekenai ita abia dae lasi. Iseda mauri dina iboudiai lalonai ita naria namonamo, namo lasi moni eiava kohu mataganigani henia karana ena idoa ese ita ia hadikaia.

9. Dahaka dainai sitoa lao henia karana dekenai iseda lalohadai ita tahua be namo?

⁹ Dina iboudiai, nega momo gau haida ita hoidia​—aniani, dabua, bona ruma kohu. (Genese 42:​1-3; 2 Hanua Pavapavadia 12:​11, 12; Hereva Lada-isidia 31:​14, 16; Luka 9:13; 17:28; 22:36) To bisinesi taudia be iseda lalona idia ania toho ita be ma gau matamatadia ita tahua totona. Niuspepa, magasin, bona televisen dekenai, hoihoi herevadia be mataganigani karana dekenai ita idia veria. Sitoa dekenai, hahine edia dabua idauidau, tamaka matamatadia, paua masinidia, bona kamera gaudia, ese ita idia veria diba. Namona be Keristen taudia be sibodia idia henanadai henia, ‘Lauegu mauri dekenai sitoa lao henia karana be egu moale gauna badana ta, a?’ ‘Lau itaia gau matamatadia lau abia be namo, eiava bisinesi taudia be lauegu lalona dekenai mataganigani kara ena uhe idia hatubua, a?’​—1 Ioane 2:16.

10. Tatau dekenai dahaka mataganigani kara be idoa bamona?

¹⁰ Hahine momo dekediai, sitoa lao henia karana be idoa ta bamona, bona tatau momo dekediai moni habadaia karana be idoa ta bamona. Iesu be unai idoa ia haheitalaia inai hereva amo: Taga tauna ta be mai ena moni bada to ia ura ‘iena aniani haboua rumadia do ia kokidia, badadia haida do ia haginidia totona, vadaeni iena uma aniani bona ena kohu ibounai be unuseniai do ia haboua.’ Iesu be unai kara ena dika ia gwauraia hedinarai namonamo: “Do umui naria namonamo, kohu dekenai do umui ura henia dikadika” eiava mataganigani henia “garina.” (Luka 12:​15-21) Herevana ita taga o lasi, unai sisiba ita abia be namo.

11. Edena dala ai Keristen tauna be moni mataganigani henia kara ena idoa dekenai ia moru diba?

¹¹ Nega momo, moni habadaia, eiava moni ese ia hoidia diba gaudia, mataganigani henia karana be hehuni gauna ta. Sedira ena dala ta be taga oi abia haraga diba, sedira nega tamona sibona dekenai moni oi negea haragaharaga gabeai moni bada herea oi abia, eiava oi haboioa totona. Eiava ta be hedibagani ia abia dala kererena eiava taravatu utua karana amo moni ia habadaia totona. Oibe, mataganigani karana be ita ia abia diba; unai idoa dekenai ita moru diba. (Salamo 62:10; Hereva Lada-isidia 11:1; 20:10) Keristen kongregesen lalonai haida be bisinesi idia haginidia, bona idia laloa edia abidadama tadikakadia be edia gau do idia hoidia. Namona be ‘gaukara namona edia imana dekena amo do idia karaia,’ bena unai amo ma haida idia tahua gauna idia karaia diba eiava idia hesiai henidia diba, to bema lasi, to idia ura edia Keristen tadikakadia amo moni idia habadaia haraga sibona, unai be mataganigani karana. (Efeso 4:28; Hereva Lada-isidia 20:21; 31:​17-19, 24; 2 Tesalonika 3:​8-12) Moni idia mataganigani henia dainai, haida be idia kasi, raffle tiketi idia hoia, win moni, eiava laki tiketi, idia hoia. Ma haida be hebogahisi bona laloa namonamo karana idia laloaboio, bona taunimanima idia kota henidia haraga, gabeai moni bada herea eiava compensation idia abia totona.

12. Edena bamona ita diba taga totona mataganigani henia karana ita hanaia diba?

¹² Ita gwauraidia daladia dekenai ita sibona eda kara ita tahua diba, bena do ita diba ita mataganigani eiava lasi. Bema ita mataganigani, iseda kara ita haidaua diba. Namona be Sakaio ita laloatao, iena kara ia haidaua. (Luka 19:​1-10) Bema ta ia davaria ia be taga eiava kohu ia mataganigani henia, namona be Sakaio bamona ia ura momokani unai idoa amo ia siri.​—Ieremia 17:9.

Mauri Lalonai Mataganigani Kara Ma Haida

¹³ Haida be moni eiava kohu mataganigani henia ena dika idia diba, mataganigani ena dala idaudia haida idia itaia lasi. Greek gado diksenari ta ia gwau unai herevadia “mataganigani” eiava “mama” idia hahanaidia neganai edia anina be “siahu bona kohu ‘idia tahua momo.’ ” Oibe, sedira ita ura ma haida ita lohiadia, vadaeni unai be mataganigani karana ena idoa, sedira ita ura ma haida be iseda siahu dainai idia gari.​—Salamo 10:18.

14. Edena negai iseda siahu ita habadaia toho ese dika ia havaraia?

¹⁴ Idaunegai ema bona hari goevadae lasi taudia idia moale ma haida idia lohiadia dainai. Dirava ia diba taunimanima edia kara dika ia havaraia gauna ta be tatau momo be edia adavadia do idia “biagua.” (Genese 3:16) To, unai kerere be headava dekenai sibona lasi to ma dala haida dekenai ia hedinarai. Gabeai, lagani tausen momo murinai, Baibel toretore tauna ta ia gwau “taunimanima haida ese edia bamodia idia biagudia dainai idia hahisidia.” (Kohelete 8:9) Sedira oi diba unai be momokani politikol bona tuari karadia dekenai, to reana iseda mauri lalonai, iseda siahu eiava ma haida biagudia karana ita habadaia toho, a?

15, 16. Edena daladia ai Keristen ta be siahu habadaia ena idoa dekenai ia moru diba? (Filipi 2:3)

¹⁵ Ita ibounai be ma taunimanima haida ita kara henidia​—iseda ruma bese lalonai eiava varavara haida dekenai, iseda moni gaukara gabunai eiava sikuli dekenai, iseda turadia dekenai, bona iseda kongregesen lalonai. Sedira nega haida, eiava reana nega momo, ita dekenai diba idia tahua dahaka idia karaia totona, bona edena dala ai eiava edena nega ai do idia karaia. Unai be kerere lasi eiava dika lasi. To, iseda biagua siahuna ita moalelaia momo, a? Ita ura iseda hereva sibona idia abia dae, bona unai ita tahua momo, a? Tanobada biagudia eiava bisinesi tau badadia be nega momo unai kara idia hahedinaraia, badina edia hereva idia abia dae taudia mo sibodia dekenai dagi idia henia, unai taudia ese edia biagudia edia lalohadai idia haidaua toho lasi, bona edia biagudia be vaia tanobada ena siahu tahua (mataganigani henia) karana idia koudia lasi.

¹⁶ Keristen tadikakadia ita kara henidia neganai, namona be unai bamona idoa dekenai ita moru lasi. Iesu ia gwau: “Umui diba lohia taudia be mai siahu danu edia taunimanima idia biagua karaia, bona gunalaia taudia be do idia lohia edia taunimanima dekenai. To umui be unai bamona umui laloa lasi. Bema ta ia ura be do ia lohia gwauraia, ia be umui emui hesiai gaukara do ia karaia.” (Mataio 20:​25, 26) Namona be unai bamona manau karana ia hedinarai Keristen elda taudia be idia kara heheni neganai, hesiai taudia, bona mamoe orea taudia idia kara henidia neganai danu. Bema kongregesen naria tauna be gau maragidia dekenai sibona ma elda taudia ida ia herevahereva, to gau badadia dekenai sibona ena lalohadai hegeregerena ia karaia neganai, sedira iena siahu habadaia karana ia tahua, ani? Momokani ia ura ma haida ese gaukara haida idia naria, a? Hekwakwanai ia vara diba bema hesiai tauna ta be haroro totona hebouna ia gunalaia neganai, tadikaka idia hametaudia daladia ia karaia, bona reana taravatu aukadia ia atoa.​—1 Korinto 4:21; 9:18; 2 Korinto 10:8; 13:10; 1 Tesalonika 2:​6, 7.

17. Dahaka dainai mataganigani kara ena idoa ita laloa neganai aniani ita herevalaia danu be namo?

¹⁷ Aniani dekenai momo be mataganigani ena idoa dekenai idia moru. Momokani, aniani bona inua karana ita moalelaia diba; Baibel danu ese unai ia gwauraia namo. (Kohelete 5:18) To, nega momo, nega ia lao noho lalonai, iseda ura ia bada noho, aniani ita moalelaia sibona karana ia hanaia, bona ita boga kunu murinai, ita ura ita aniani noho. Bema Dirava ena hesiai taudia be do idia hekwakwanai diba lasi unai kara dekenai, dahaka dainai Iehova ena Hereva be Hereva Lada-isidia 23:20 dekenai inai bamona ia hereva: “Uaina idia inua momo taudia ida do umui inuinu hebou lasi, bona idia aniani momo taudia ida do umui aniani hebou lasi.” To, edena dala amo unai idoa dekenai ita moru lasi?

18. Aniani bona inua karana dekenai edena dala ai ita sibona eda kara ita tahua be namo?

¹⁸ Dirava ia gwau lasi iena bese taudia be digara lasi aniani sibona idia ania. (Kohelete 2:​24, 25) To ia ura lasi nega ibounai aniani bona inua gaudia be ita herevaherevalaia bona ita hegaegaelaia. Sedira namona be ita sibona ita henanadai henia, ‘Nega momo lau ania gauna ta eiava do lau ania gauna ta lau herevalaia neganai, lau moalelaia momo, a?’ ‘Egu herevahereva dekenai, hanaihanai aniani bona inua gaudia lau herevalaidia, a?’ Bema ita hegaegaelaia lasi eiava ita hoia lasi anianina ta ita ania neganai, sedira ma ta ena ruma dekenai ita aniani neganai eiava Keristen hebouhebou ta dekenai aniani idia abia neganai, dahaka ita karaia? Unai negadiai ita aniani bada, a? Ita laloatao, Esau dekenai aniani be anina bada gauna ai ia lao, bona unai amo dika ia davaria.​—Heberu 12:16.

19. Mahuta hebou karana dekenai mataganigani karana be edena dala ai ita hekwakwanai diba?

¹⁹ Paulo be idoa ma ta be ita dekenai ia hadibaia, ia gwau: “Heudahanai bona matabodaga bona kohu ura dikadika kara, be do umui herevalaia lasi.” (Efeso 4:​17-19; 5:3) Momokani, mahuta hebou karana ena moale dekenai mataganigani ia vara diba. To unai kara be headava taudia sibodia ese idia moalelaia be maoro. Unai kara idia moalelaia neganai, edia helalokau heheni karana ese tau bona adavana ia durudia idia be headava lagani momo lalodiai idia tabekau heheni totona. To, taunimanima momo idia diba hari inai negai, taunimanima momo be mahuta hebou karana idia laloa bada, Paulo ese ia gwauraia mataganigani karana idia gwauraia vaia taunimanima edia kara. Muvini piksa, video, magasin, bona gadara gabudia momo amo lalohadai kererena idia abia mahuta hebou moalelaia karana dekenai, badina unai gaudia ese sihari kava bona kopi kavakava taudia edia kara idia haheitalaia momo.

20. Keristen taudia be edena dala ai idia hahedinaraia mahuta hebou karana mataganigani henia ena dika dekenai idia naria namonamo?

²⁰ David be Bataseba ida ia kara dika ena sivarai ese ia hahedinaraia Dirava ena hesiai tauna ta be mahuta hebou mataganigani henia kara ena idoa dekenai ia moru diba. Ena be sibona ena headava lalonai unai moale ia abia diba, to David be ma ta dekenai mahuta hebou urana ia koua lasi. Ia itaia Uria ena adavana ena hairai be bada, bona ia ida moale kererena ia lalohadailaia momo​—ena ura ia koua lasi. (2 Samuel 11:​2-4; Iakobo 1:​14, 15) Momokani, unai bamona mataganigani karana ita dadaraia be namo. Headava lalonai danu mataganigani ita dadaraia be namo. Anina be mahuta hebou karadia idaudia idia dadaraia danu. Mataganigani unai kara dekenai ia dadaraia tauna be iena adavana ena namo do ia tahua, bena unai amo idia ruaosi ese idia abia hidi famili planin dalana dekenai iena adavana ena goada hari bona gabeai danu ia laloa guna, sibona ena moale ia laloa gabeai.​—Filipi 2:4.

Mataganigani Oi Dadaraia Noho

²¹ Ita laloa lasi Iehova ese sisiba ita ia henia badina ia laloa ita ese dika ita tahua. Ia diba iena abidadama hesiai taudia idia ura idia tabekau henia bona idia hesiai henia, bona ia diba idia momo be unai bamona do idia karaia noho. Dirava ese Satana dekenai Iobu ia gwauraia hegeregerena iena bese taudia momo ia gwauraidia, ia gwau: “Egu hesiai tauna Iobu oi itaia vadaeni, a? Tanobada dekenai ia bamona tauna ta be lasi; ia be kerere lasi tauna bona kara maoromaoro tauna; Dirava garina ia gari bona kara dika amo ia raka oho, ani?” (Iobu 1:8) Iseda lalokau, abidadama guba Tamana be idoa dikadia dainai ita ia hadibaia, hegeregerena mataganigani amo moru daladia, badina ia ura ita kerere lasi bona ia dekenai ita abidadama noho.

22. Bema iseda stadi dekenai ita davaria ita moru sisina eiava ita manoka, namona be dahaka ita karaia?

²² Ita ta ta iboudiai be vara negana amo dala haida dekenai ita mataganigani sisina eiava tanobada dikana ena siahu dainai unai bamona kara ese ita ia veria sisina. Bema moni, kohu, siahu bona dagi, aniani, eiava mahuta hebou moalena mataganigani henia karana ita stadilaia neganai, bona oi davaria unai kara ta dekenai oi manoka, edena bamona? Namona be Iesu ena sisiba oi laloa namonamo: “Bema oiemu imana ese karadika ia karaia, oi utua negea, namo oi be imana tamona tauna bona mauri oi davaria. Badina ia namo lasi oiemu imana rua idia noho to oi vareai lao [Gehena] dekenai, lahi habodoa diba lasi gabuna.” (Mareko 9:43) Namona be oiemu lalohadai, eiava oi laloa bada gaudia, oi hamaoromaorodia. Mataganigani ena idoa oi dadaraia. Unai amo Dirava ena heduru amo, oi be “mauri oi davaria.”

Dahaka Lau Diba?

◻ Dahaka dainai mataganigani kara ena idoa dainai ita naria namonamo?

◻ Edena daladia ai taga eiava kohu mataganigani henia ena idoa ese ita ia abia diba?

◻ Mauri ena dala ma haida dekenai mataganigani karana be edena bamona dika ia havaraia diba?

◻ Mataganigani kara haida dekenai ita manoka neganai, namona be iseda lalohadai be dahaka?

8. Baibel be taga dekenai dahaka sisiba ia henia?

13. Salamo 10:18 ese dahaka mataganigani kara ena idoa ma ta ia herevalaia?

21. Dahaka dainai mataganigani sivarai ita herevalaia neganai ita lalo-manoka lasi be namo?