Inai Oi Laloatao, A?

Gima Kohorona, vanegai gaudia, edia hereva ese oi idia durua a? Vadaeni, inai henanadai amo emu laloatao karana oi tohoa:

▫ Bema sihari kava lalohadaina be eda lalona ai ia vara kava, dahaka ita karaia be namo?

Namona be gau idauna ta ita laloa, ita raka loaloa sisina, buka ita duahia, eiava ruma gaukarana ta ita karaia. Guriguri danu be heduru badana. (Salamo 62:8)​—4/15, rau 17.

▫ Dahaka dainai memero kekeni ese miusik idia abia hidi namonamo be namo?

Miusik be mai ena siahu taunimanima doridia, hamoaledia, bona edia lalodia anidia totona. Taunimanima momo ese idia ura henia anedia momo ai matabodaga karadia idauidau idia anelaidia, unai dainai namona be idia naria namonamo, rekodi, teipi, bona disk idia abidia hidi negadiai.​—4/15, rau 20-1.

▫ Inai hereva, “iseda Lohiabada ena noho negana,” ena anina be dahaka? (1 Tesalonika 5:23)

Ena anina be, lagani 1914 ai guba ai Lohiabada Iesu Keriso be Dirava ese terona latanai ia hahelaia negana amo Pavapava hegeregerena ia noho. (Salamo 110:​1, 2)​—5/1, rau 11.

▫ Dahaka dainai Iehova ese ena lauma dubuna ia hagoevaia? (Malaki 3:​1-4)

Ia ura ena dubu do ia goeva, bena tanobada helarona do idia abia taudia hutuma be unuseniai do idia mailaidia neganai, do idia davaria ena lohia siahuna idia matauraia, ena ladana idia hahelagaia, bona ena taravatu idia badinadia gabuna be unai.​—5/1, rau 16.

▫ Keriso Iesu ese ia abia hidi hesiai tauna ia henia ‘kohuna’ be dahaka? (Mataio 24:​45-47)

Ia be guba ai Iesu be Pavapava ai ia lao dainai tanobada ai ia abia gaudia iboudiai. Unai gau ta be taunimanima tanobada besedia iboudiai amo na Keriso ena hahediba taudia ai halaodia gaukarana. (Mataio 28:​19, 20)​—5/1, rau 17.

▫ Keristen elda taudia be edena dala amo idia hahedinaraia Dirava ena mamoe idia naridia ‘mai edia ura namona ida’? (1 Petero 5:2)

Keristen elda tauna, mamoe edia namo ia tahua tauna, be sibona ena ura dainai ena gaukara ia karaia, Mamoe Naria Tauna namona, Iesu Keriso, ese ia hakaua hegeregerena. Mai ena ura namona ida ia gaukara, ena anina ma ta be, Iehova ena siahu henunai ia gaukara bona iena dala ia matauraia.​—5/15, rau 20.

▫ Inai hereva, Iesu murinai ia raka tauna ese “sibona ena ura do ia laloa lasi,” ena anina be dahaka? (Mataio 16:24)

Anina be ena tauanina be Iehova do ia henia, do ia biagua totona. (1 Korinto 6:​19, 20) Bona sibona dekenai do ia mauri lasi, to Dirava dekenai do ia mauri. (Roma 14:8)​—6/1, rau 9.

▫ Dahaka ese taunimanima ta ia hamoalea diba?

Iehova tura henia karana bona Iena hesiai gaukarana goadalaia karana ese ia hamoalea momokani.​—6/1, rau 22.

▫ Iehova ia gwau Sodoma do ia hadikaia ore. Abraham ese ena kara ia herevalai henia gari lasi neganai, dahaka dainai Iehova ese ia koua lasi? (Genese 18:​22-32)

Badina ta be Abraham be Dirava ena turana. (Iakobo 2:23) Bona Iehova ia diba Abraham ia lalohisihisi. Ia diba Abraham ena kakana ena natuna Lota be Sodoma ai ia noho bona Abraham ese Lota ena mauri ia laloa. Unai dainai Abraham ese Iehova ena palani, Sodoma do ia hadikaia ore palanina, ia nanadailaia neganai, Iehova ena lalona be hegeregere do ia haere henia.​—6/15, rau 16.

▫ Lagani 1500 C.E. murinai, Protestan Refomeisen ia vara neganai, Keristen tomadiho momokanina idia lou henia, a?

Lasi! Refomeisen ese Keristen tomadiho momokanina lou henia dalana ia havaraia lasi, to tano idauidau ai tomadiho oreadia momo ia havaradia, bena idia ese gavamani idia tura henidia bona edia tuari ai idia durudia.​—7/1, rau 10-11.

▫ ‘Kohu guba ai’ Iesu ese Mataio 6:20 ai ia gwauraia be dahaka?

Idia be do idia ore lasi kohudia​—ta be Dirava vairanai ia abia ladana namona bona ena Keristen hesiai gaukarana sivaraina; Iehova ese ia laloaboio diba lasi gaudia unai. (Heberu 6:10)​—7/1, rau 32.

▫ Petro ia gwau iseda abidadama dekenai dahaka ita atoa kau be namo? (2 Petero 1:​5-7)

Ia gwau kara namona, diba, tauanina ena ura biagua karana, haheauka, Dirava badinaia karana, tadikaka bogadia hisi karana, bona lalokau do ita atodia.​—7/15, rau 13.

▫ David be Bataseba ida idia kara dika sivaraina ese Dirava ena hesiai taudia dahaka ia hadibadia? (2 Samuel 11:​2-4)

Ena be David be sibona ena headava lalonai moale ia abia diba, to Uria ena adavana ena hairai bada ia itaia neganai ia gahusia; sibona ena lalona ia biagua lasi, to ia ida idia heudahanai. Bema Dirava ena hesiai tauna ta ese unai bamona mataganigani ia dadaraia lasi, reana ia danu be unai bamona do ia kara kerere. (Iakobo 1:​14, 15)​—8/1, rau 14.