Iona Ia Hadonoa Eiava?

BAIBEL ia gwau Iona, Iehova ena idaunega peroveta tauna ta, be ena gaukara ia heautania bona lagatoi ta ai ia gui. Mediterranean Davarana ai guba ta ia vara neganai, kuru taudia ese idia negea davara lalonai. “Bena Iehova ese gwarume badana ta ia siaia, ia ese Iona do ia hadonoa; bena Iona be dina toi hanuaboi toi unai gwarume ena bogana ai ia noho.”​—Iona 1:​3-17.

Haida idia gwau, ‘Lasi! Davara gauna ta lasi ese taunimanima ta ia hadonoa diba.’ To lakaradonodono haida ese idia hadonoa diba bona kwalaha kurokurodia badadia danu ese. National Geographic magasin (December 1992) ia gwau reana gauna be whale shark (lakaradonodono kwalahana). Hari kwalaha haida edia lata be mita 20 bona edia metau be ton 70.

“Hari kwalaha edia bogadia idau hereadia edia oromadia ese Iona sivaraina idia hamomokania diba. Ta ena uduna bada hereana oi itaia neganai, oi laloa oi do ia hadonoa diba . . . Ena uduna ena bada be hegeregere Iona rua nega tamona do ia hadonodia haraga.”

Lakaradonodono kwalahana ese davara avadia maragimaragidia bona pai maragimaragidia ia anidia, unai gau be “ena gadona amo idia aru diho, ena bogana ena lalona, daiutu badana ta bamona gauna, ai idia aru vareai.” To, taunimanima ta be unai gabu amo edena bamona do ia raka lasi? National Geographic ia gwau: “Kwalaha ese gau badadia, edia bogadia ese idia hamanokadia diba lasi gaudia, be idia hadonodia murinai, unai gau idia negedia lou diba . . . Kwalaha ese ena bogana ena lalona na ena uduna amo ia halasia. . . . Unai dainai, ta be taba ese ia koua gedana dedikadedikana latanai do ia dedi lasi diba.”

Hari inai negai lakaradonodono kwalahadia be Mediterranean Davarana ai idia davaridia lasi. Iona ena nega lalonai unuseniai idia noho eiava? Daika ia diba? Iehova ese ia siaia gwarumena ena oromana be Baibel ese ia gwauraia lasi, to Iesu ese Iona ena sivarai ia hamomokania.​—Mataio 12:​39, 40.

[Picture Credit Line on page 32]

Norbert Wu/Peter Arnold Inc.