Mauri Ranuna

“INAI hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) “Mauri ranuna”​—unai anina be Iesu Keriso ia karaia boubou davana amo Dirava ese ia karaia daladia iboudiai hahemauri ita abia totona. Unai daladia idia noho, bona idia be davana lasi. Unai be iseda Dirava ena hariharibada! To, dahaka dainai ranu amo idia laulaulaia?

Ranu dainai tubutubu gaudia be tano dekenai idia tubu, bona taunimanima idia mauri diba. Ranu be lasi neganai, tubutubu gaudia, bona taunimanima, idia mauri diba lasi. Ma danu, emu tauanina ena kahana 100 100 amo 65 65 be ranu. Tauanina ena goada idia diba momo taudia idia gwau namona be dina iboudiai ranu ena 2.4 liter ita inua. Oiemu tauanina lalonai idia gaukara daladia​—aniani ania bona tauanina miro kokia​—idia vara badina ranu ia noho. Ia lao ela bona wiki tamona bona ranu oi inua lasi neganai, do oi mase.

Unai hegeregerena, “mauri ranuna” dainai lauma dalanai ita mauri diba bona ita goada diba. Bema mauri ranuna ita dadaraia, gabeai ita noho diba lasi. (Ioane 3:36) Bema ita abia dae, ita be mauri hanaihanai ita abia diba. Ita hoa lasi Samaria hahinena be mai moale ida ia haere Iesu be inai bamona ia hamaoroa neganai: “Lau ese do lau henia ranuna do ia inua tauna be do ia ranu mase lasi ia lao bona hanaihanai. Lau ese do lau henia ranuna be inai tau lalonai sinavai bamona do ia aru noho, bona mauri ranuna do ia henia. Ma mauri hanaihanai danu do ia henia.” (Ioane 4:14) Namona be ita moale bada bona davana lasi mauri ranuna ita abia.

[Picture Credit Line on page 32]

Garo Nalbandian