Dahaka Dainai Dekena Taudia Oi Lalokau Henidia be Namo?
MAURI hanaihanai do ita abia totona, Dirava bona iseda dekena taudia ita lalokau henidia be gau badana. Lagani 2,000 bamona gunanai hereva ta ese unai ia hamomokania.
Mose ena Taravatu ia diba momo Iuda tauna be Iesu Keriso dekenai ia gwau: “Lau be edena bamona do lau karaia mauri hanaihanai abia totona?” Iesu ia haere henia, ia gwau: “Taravatu ena buka lalonai edena bamona ia torea? Edena bamona oi duahia?” Unai tau ese Taravatu ia duahia, ia gwau: “ ‘[Iehova] oiemu Dirava dekenai do oi lalokau henia mai emu lalona ibounai, mai emu lauma ibounai, mai emu goada ibounai, mai emu laloa ibounai. Bona, oiemu badibadinai tauna dekenai oi lalokau henia, oi sibona dekenai oi lalokau henia hegeregerena.’ Iesu ia gwau: ‘Oiemu haere be ia maoro. Unai bamona do oi karaia be do oi mauri.’ ”—Luka 10:25-28.
Bena unai tau be Iesu dekenai ia gwau: “Lau badibadinai tauna be daika?” Iesu be ia haere henia lasi, to parabole ta ia gwauraia, unai sivarai lalonai Iuda tauna ta ena kohu idia henaodia, idia botaia dikadika, kahirakahira ia mase. Iuda taudia rua idia mai—ia mai guna tauna be hahelaga tauna, murinai Levi tauna ta ia mai. Idia ruaosi ese edia dekena tauna ia dika momokani idia itaia, to idia durua lasi. Murinai, Samaria tauna ta ia mai. Ia hebogahisi bada dainai, unai Iuda tauna ena bero dekenai muramura ia atoa, ruma ta dekenai ia abia lao, bona ruma taudia dekenai moni ia henia do idia naria totona.
Iesu ese ia henanadai tauna dekenai ia gwau: “Oi be dahaka oi gwau? Idia toiosi [amo] daika be dadia taudia ese idia haberoa tauna ena badibadinai tauna do ita gwauraia?” Ia hedinarai goevagoeva, ia be mai ena hebogahisi Samaria tauna. Unai sivarai amo Iesu ese ia hahedinaraia dekena tauna lalokau henia momokani karana ita karaia diba, herevana idia be edena bese taudia.—Luka 10:29-37.
Dekena Taudia Lalokau Lasi Karana
Hari inai nega lalonai, bese idauidau taudia huanai hepapahuahu karana ia bada ia lao noho. Inai oi laloa, vanegai, Germany lalonai, neo-Nazi taudia be tau ta idia negea diho tano dekenai bona edia tamaka metaudia amo idia moia tao, ena rudu turia kahirakahira iboudiai idia hamakohidia. Murinai, alcohol bada kekero muramurana ia dekenai idia bubua bona idia gabua. Idia laloa ia be Iuda tauna, unai dainai idia heatu henia bona idia rakatania ia mase totona. Sivarai ma ta be inai, Hamburg kahirakahira dekenai, ruma ta dekenai bomu idia negea, bona Turkey taudia toi idia gabua mase—idia ta be lagani 10 kekenina.
Balkan bona unai gabu ena atai kahana dekenai, bese idauidau taudia idia tuari heheni, bona idia tausen momo idia mase. Bangladesh, India, bona Pakistan dekenai taunimanima edia gado bona kara idia idau dainai, idia tuari heheni. Bona Africa dekenai, bese tamona taudia bona bese idauidau taudia idia tuari heheni dainai taunimanima momo idia mase.
Taunimanima momo be mai gari danu idia hoa unai dagedage karadia idia vara dainai, badina idia ura lasi edia dekena taudia idia haberoa. Oibe, Germany lalonai, taunimanima momo idia raka hebou karana amo idia hahedinaraia unuseniai bese idauidau idia dagedage heheni karana idia gwauraia dika. To, The New Encyclopædia Britannica bukana ia gwau: “Kahirakahira tanobada ena bese ta ta iboudiai edia taunimanima idia laloa idia sibodia edia mauri dalana be bese ma haida edia mauri dalana, idia kahirakahira idia noho besedia danu, ia hereadia.” Unai bamona lalohadai dainai, dekena taudia lalokau henia karana ia koua. Unai kara haidaua totona gau ta idia karaia diba, a? Badina Iesu ia gwau Dirava bona dekena taudia lalokau henidia karana amo mauri do ita davaria.
[Picture Credit Line on page 2]
Cover: Jules Pelcog/Die Heilige Schrift
[Picture Credit Line on page 3]
The Good Samaritan/The Doré Bible Illustrations/Dover Publications, Inc.