Hitolo Ia Perovetalaia

VANEGAI niuspepa bona TV ai hitolo sivaraidia be nega momo idia gwauraidia. Hisihisi bada idia ania taudia edia laulau be Ethiopia bona ma tano haida amo idia siaidia. Lagani 1992 ai tanobada besedia iboudiai ese Somalia taudia idia lalodia, medu lasi bona tuari dainai hitolo ese ia hadikadia bada. International Herald Tribune be September 1992 ai ia gwau: “Ta ia diba lasi Somali taudia hida idia mase vadaeni, to Red Cross oreana ia gwau 100,000 mai kahana idia mase.”

Unai namba ese taunimanima edia lalohisihisi bona idia ania hisihisina ia hahedinaraia lasi. Yvette Pierpaoli, Refugees International oreana ena ladanai ia gaukara hahinena Europe ai, be UN magasin ladana Refugees ai ia gwau: “New York eiava Geneva ai, noho-kau taudia edia hekwarahi idia herevalaia be auka lasi; edia momo edia namba badadia edia anina idia lalo-pararalaia be auka. To gabu daudaudia ai, heiriheiri bada ia vara tanodia ai, taunimanima edia hisihisi bada lau itaia neganai, lau dara doko, lau ura do lau tai lolo.”

Red Cross oreana ia gwau Somalia taudia ia durudia badabada, to unai heduru idia itaia taudia idia gwau toana be nega momo ia be hegeregere lasi bona nega korikori ai idia henia lasi. Pierpaoli ia gwau: “Heduru idia henia vadaeni besedia idia ura lasi do idia henia noho; ia dika ia lao Africa tanona durua karana idia hesikulaia. . . . Idia gwau kerere be Africa taudia edia, badina be edia gau idia naridia namonamo lasi, edia gunalaia taudia idia mataganigani, bona idia tuari doko lasi.”

Baibel ese nega ta ia perovetalaia, ia gwau unai neganai gabu idauidau ai hitolo bada do ia vara. Hitolo, tuari, tano-laga, bona dai-hanai goreredia bona ma gau haida danu idia vara be toa ta, ia hahedinaraia Dirava ena Basileia be kahirakahira. (Luka 21:​11, 31) Baibel be ma ia gwau, Dirava ena Basileia henunai taunimanima iboudiai ese aniani momo do idia abia. “Aniani reidia be tano ai do idia vara momomomo; ororo edia doridia ai aniani momo herea do ia vara.”​—Salamo 72:16.