Dirava Ena Hebogahisi Oi Laloa Maoromaoro

DOKETA be hebogahisi tauna bona gorere hahinena ia laloa momo. Ia laloa ena gorere be bada dainai do ia ivaia be namo, do ia hamauria totona. To hahine ese rara ia nanadailaia neganai, ia hoa. Hahine ese ia hamaoroa bema ia ura rara do ia henia, Baibel ena hereva dainai gwaumaoro do ia henia diba lasi do ia ivaia. Unai neganai doketa ia hoa maragi lasi. Vadaeni, durua dalana ta ia tahua. Bena ta ia laloa, ia gwau: “Oi diba, bema rara oi abia lasi, do oi mase. Unai oi ura lasi, ani?”

Hahine ia gwau: “Oibe.”

Doketa ia gwau: “Toana be bema rara oi abia, emu tomadiho ena taravatu do oi utua, bona unai be mai anina bada oi dekenai, ani? Vadaeni, lauegu lalohadai be inai. Rara do oi abia, do oi mase garina. Bena emu kerere be Dirava vairanai do oi gwauraia hedinarai bona do oi helalo-kerehai. Unai dala amo, emu tomadiho oreana ese oi do ia abia dae lou.”

Doketa ia laloa dala namona be unai. Ia diba gorere hahinena ia abia dae Dirava be mai ena hebogahisi. Ia laloa unai be nega korikorina unai hahine ese Dirava ena hebogahisi do ia tahua! To ena lalohadai be maoro a?

Nega Haida Inai Bamona Ita Laloa A?

Reana nega haida ita laloa, doketa ia laloa bamona. Sikuli ai eiava gaukara gabuna ai bema ta ese ita ia inai henia, reana ita gari. Eiava reana ta ese ita ia doria toho, eda lalona ena mamina do ia hadikaia karana ta do ita karaia totona, bena ia vairanai ita hemarai. Edia kara dainai reana ita hoa, bena dala haragana ita abia hidi; ita laloa do ita kara kerere bena Dirava do ita noia iseda dika do ia gwauatao.

Eiava ta be sibona ena lalohadai dikana ese ia dibagania reana. Reana tauhau ta ena lalona ese ia doria matabodaga karana ta do ia karaia totona. Unai lalohadai dikana ia tuari henia lasi, to ia laloa unai kara do ia karaia bena gabeai Dirava do ia hamaoroa ia sori, bena ia ese ena dika do ia gwauatao. Reana haida ese kara dika rohorohona ta idia karaia, herevana idia diba edia kara dainai Keristen kongregesen murimurinai do idia atodia reana. Inai bamona idia laloa: ‘Do lau naria sisina, bena do lau helalo-kerehai bena orea lalonai lau do idia havareaia lou.’

Unai taunimanima edia kara rua be hegeregere. Ginigunana be, idia boga-auka lasi, idia hekwarahi lasi do idia kara maoro totona. Iharuana be, idia laloa do idia kara dika murinai, bema Dirava do idia noia, ia ese edia dika do ia gwauatao.

Lalohadai Maorona be Dahaka?

Unai kara amo idia hahedinaraia Dirava ena hebogahisi idia laloa maoromaoro, a? Dirava ena hebogahisi mani oi laloa. Iesu ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Aposetolo Ioane ese Dirava ena hebogahisi dalana ia gwauraia, ia gwau: “Tau ta bema ia kara dika, ita be mai iseda durua tauna, iseda Tamana vairanai. Ia be Iesu Keriso, kara maoromaoro tauna.” (1 Ioane 2:1) Unai dainai, bema ita goevadae lasi dainai ita kara dika, Dirava ita noia diba, iseda dika do ia gwauatao, Iesu ena boubou gauna dainai.

Unai ena anina be inai a, ita kara dika be herevana, to gau badana be ita kara dika murinai Dirava ita noia iseda dika do ia gwauatao, a? Lasi momokani. Ioane ena hereva ginigunadia 1 Ioane 2:1 ai be inai: “Inai hereva umui dekenai lau torea noho, be umui ese do umui kara dika lasi totona.” Ena hereva oredia ese Iehova be ita goevadae lasi taudia durua totona ena hebogahisi dainai ia karaia dalana be idia gwauraia. To, namona be ita hekwarahi bada, kara dika dadaraia totona. Bema lasi, ita hahedinaraia Dirava ena lalokau ita matauraia lasi, Iuda ese ia gwauraia taudia idia karaia bamona; idia ese Dirava ena hariharibada be lebulebu gauna ai idia halaoa.​—Iuda 4.

Bema ita gwau herevana dahaka do ita karaia Dirava ese ita do ia bogaia hisi, iena hebogahisi be anina lasi gauna ai ita halaoa unai, bona unai amo ita hahedinaraia ita laloa kara dika be dika momokani lasi. To unai be momokani lasi. Aposetolo Paulo ia gwau: “Dirava ese iena hariharibada ia hedinaraia vadaeni, taunimanima ibounai do ia hamauria totona. Bona inai hariharibada ese ita ia hadibaia noho, Dirava negea kara bona lebulebu kara do ita rakatania. Ita ia hadibaia danu, do ita noho namonamo, do ita kara maoromaoro, bona Dirava do ita matauraia.”​—Tito 2:​11, 12.

Paulo ese sibona ena dika ia tuari henia, unai amo ia hahedinaraia Dirava ena hebogahisi ia laloa bada. Ia gwau: “Lauegu tauanina lau botaia momokani, bona iena ura lau karaia lasi, do ia goada totona. Inai bamona lau karaia, badina be haida lau haroro henidia, to gabeai lau sibona lauegu mauri lau halusia garina.” (1 Korinto 9:27) Paulo be iena dika ia laloa maragi lasi, ia laloa lasi nega ta ta do ia kara dika be vaia ena kara hegeregerena mo. Unai bamona do ita laloa be maoro a?

Iesu Ena Lalohadai

Nega ta Iesu ese ia hahedinaraia, ia laloa hisihisi do ia ania lasi totona kara maoromaoro do ia rakatania bona dala haragana do ia badinaia be kerere. Taunimanima do idia hahisia bona do idia alaia mase herevana be ena hahediba taudia ia hamaorolaidia neganai, Petero ia gwau: “Lohiabada e, unai bamona lasi. Unai bamona do idia karaia lasi oi dekenai.” Iesu ese edena bamona ia haere henia? Ia gwau: “Satani e, lauegu murina kahana oi lao. Lau hamorua totona oi hereva, badina oiemu laloa be Dirava ena lasi, to taunimanima edia.”​—Mataio 16:​22, 23.

Iesu ese Petero unai bamona ia gwau henia ese ia hahedinaraia goevagoeva Iesu ese dala haragana, Dirava ena ura badinaia lasi karana, ia dadaraia. Baibel ese ia hahedinaraia, ena be Satana ena orea taudia ese idia hahekwarahia loulou, to dala maorona ia badinaia goevagoeva. Dokona ai idia gonagonalaia, idia dadabaia dikadika, bona idia hasatauroa neganai, hisihisi bada ia ania. To kara maoromaoro ia rakatania lasi, unai dainai ena mauri ia henia diba, ita do ia davalaia totona. Ia ese unai ibounai ia haheaukalaia, be dia hekwakwanai bona hedibagani do ita davaridia negadiai siboda eda namo do ita tahua totona!

Baibel ia gwau Iesu ese ‘kara maoromaoro ia ura henia. To kara dika be ia badu henia.’ (Heberu 1:9) Dala haragana idia abia hidi dainai, taunimanima momo idia kara dika. Unai dainai, Iesu hegeregerena, kara dika bema ita badu henia, kara maoromaoro be nega ta do ita rakatania lasi. Iehova ia gwau: “Natugu e, oi aonega, lauegu lalona oi hamoalea, lau ia gwau henia tauna do lau haere henia totona.” (Hereva Lada-isidia 27:11) Iesu ena kara, kara maoromaoro ia rakatania lasi karana, ese Iehova ena lalona ia hamoalea bada. Iesu hegeregerena, lalo-maoromaoro ai bema ita raka, Iehova ena lalona do ita hamoalea diba.​—1 Petero 2:23.

Haheauka ese Ita Ia Hadibaia

Aposetolo Petero ia gwau: “Inai nega sisina lalonai sedira hedibagani idauidau ese umui do idia hahisia. Inai hedibagani edia badina be inai: Dirava ese emui abidadama ena goada do ia tohoa. . . . Emui abidadama ena goada idia tohoa gaudia, hegeregere hisihisi o hedibagani, be namo. Badina idia ese iseda abidadama idia hanamoa bona hagoadaia noho.” (1 Petero 1:​6, 7) Ita goevadae lasi bona Satana ena tanobada ai ita noho, unai dainai hedibagani do ita davaridia loulou. Petero ia hereva hegeregerena, idia be mai edia namo. Iseda abidadama idia tohoa, idia hahedinaraia ia manoka eiava ia goada.

Ita idia hadibaia danu. “Hisihisi ese Dirava kamonai henia dalana [be Iesu] ia hadibaia.” (Heberu 5:8) Hedibagani ai bema ita haheauka, Iehova kamonai henia bona ia dekenai tabekau karana do ita dibaia. Do ita dibaia noho ela bona Iehova ese ita do ia hadibaia guguru; ‘ita do ia hanamoa momokani, ita do ia haginia goada, bona badina korikori latanai ita do ia haginia.’​—1 Petero 5:10.

To, hedibagani neganai bema kara maoromaoro ita badinaia lasi, ita hahedinaraia ita gari eiava ita manoka, Iehova bona kara maoromaoro ita ura henidia momokani lasi eiava ita boga-auka diba lasi. Unai bamona manokana ese Dirava ita tura henia karana ia hadikaia. Paulo ena sisiba be inai: “Keriso ena hereva momokani ita diba murinai, bema iseda ura dekenai kara dika ita karaia noho, boubou gauna ta lasi ese unai dika do ia gwauatao diba.” (Heberu 10:26) Ita kara dika lasi be namo, ita boga-auka lasi dainai ita kara dika bena mauri hanaihanai abia dalana ita reaia be dika bada!

Lalo-Maoromaoro Momokani

Peroveta tauna Daniel ena negai, king ese Heberu uhaudia toi ia hamaorodia, kaivakuku ta bema idia tomadiho henia lasi, lahi ai do idia aradia mase. Idia haere henia, idia gwau: “Emai Dirava, ena hesiai ai lao henia Diravana, bema ia ura ai do ia hamauria, . . . ai do ia hamauria. To bema ia ura lasi danu, pavapava e, oi diba vadaeni, ai ese emu dirava edia hesiai do ai lao henia lasi, bona hari golo kaivakukuna, oi ese oi haginia vadaeni gauna, be do ai tomadiho henia lasi.”​—Daniel 3:​17, 18.

Idia gini auka, badina be idia ura do idia kara maoromaoro. Edia lalodia be hegeregere unai dainai do idia mase. Toreisi-lou idia laroa. To, bema Dirava ese do ia hamauridia, unai do idia moalelaia. Edia lalohadai aukana idia haidaua diba lasi. Dirava ena hesiai taudia iboudiai be unai bamona be namo.

Iseda negai idia ura lasi kara maoromaoro do idia rakatania taudia haida be dibura rumadia ai idia koudia, idia hahisidia, bona idia aladia mase. Ma haida ese edia lalodia idia hadaidia do idia ogogami noho be namo, do idia taga totona Dirava ena taravatu do idia utua be dika. Inai hereva ena matamanai ai gwauraia Keristen hahinena be edena bamona? Ia ese doketa ia tanikiu henia iena hereva dainai, to Dirava ena taravatu ia matauraia dainai, gwaumaoro ia henia lasi do ia ivaia. Gabeai ia namo lou bona Iehova ena hesiai ia lao henia lou. To guna, rara ia dadaraia neganai, ena be ia diba lasi dahaka do ia vara, to ena lalona be hegeregere do ia vara gauna be Iehova imanai do ia atoa.

Dahaka ese ia durua, bena hekwarahi neganai ia gini auka? Sibona ena goada dekenai ia tabekau lasi, bona Dirava ena hesiai taudia iboudiai be unai bamona idia karaia be namo. Mani oi laloatao, “Dirava be iseda roho-mauri gabuna, bona eda goada, heduru namo herea hisihisi negadia ai.” (Salamo 46:1) Hedibagani neganai Dirava ena heduru do ita tahua be namo, do ita kara dika bena iena hebogahisi do ita tahua be dika!

Oibe, namo lasi Dirava ena hebogahisi bada do ita laloa kerere. To, namona be do ita ura momokani do ita kara maoromaoro, hekwakwanai negadiai danu. Unai ese Iehova ita tura henia karana do ia hagoadaia, ita do ia hadibaia mauri hanaihanai do ita abia totona, bona do ia hahedinaraia Dirava ena hebogahisi ita matauraia mai eda momokani ida. Unai bamona aonega karana ese iseda Tamana guba ai ena lalona do ia hamoalea.

[Picture on page 24]

Toreisi-lou helarona idia abia dae vaitani dainai, Heberu uhaudia toiosi be edia lalo-maoromaoro ai idia boga-auka