Daniel ese Ia Perovetalaia Negadia Bona Iseda Abidadama

“Ia naria noho ela bona dina 1,335 idia ore tauna be do ia moale!”​—DANIEL 12:12.

1. Dahaka dainai taunimanima momo be moale korikorina idia davaria lasi, bona moale korikorina be dahaka karadia amo ia vara?

TAUNIMANIMA iboudiai idia ura idia moale. To, hari inai nega lalonai taunimanima haida sibona idia moale. Badina be dahaka? Badina ta be idia momo be gabu kereredia ai moale idia tahua. Idia laloa edukeisini, taga, moni gaukara, eiava dagi siahuna dekenai moale idia davaria diba. To, Ororo dekenai ia haroro hamatamaia neganai, Iesu ia gwau bema lauma dalanai idia dabu dalana idia hanamoa, bema idia hebogahisi, bema idia kudou-goeva, bona unai bamona kara idia karaia neganai do idia moale. (Mataio 5:​3-10) Iesu ese ia herevalaia moalena be moale korikorina bona ia noho hanaihanai.

2. Peroveta hereva hegeregerena, nega dokona lalonai dahaka ese moale ia havaraia, bona unai dekenai dahaka henanadai idia vara?

² Nega dokona lalonai, horoa orena taudia edia moale be ma gau ta dekenai idia haboua. Daniel bukana lalonai ita duahia, ia gwau: “Daniel e, oi lao; badina hereva idia hehuni bona idia koua ela bona dokona negana. Ia naria noho ela bona dina 1,335 idia ore tauna be do ia moale!” (Daniel 12:​9, 12) Unai dina 1,335 be edena nega ai idia hamatamaia bona idia doko? Dahaka dainai unai dinadia ai idia noho taudia idia moale? Hari inai negai unai be mai anina iseda abidadama dekenai, a? Unai henanadai ita haerelaidia diba bema Daniel ese unai hereva ia torea negana ita laloa, unai be Babulono ena igui hesiaina amo Israel taudia idia ruhadia negana sisina murinai bona Parasa ena king Kurese ia lohia laganina ihatoina lalonai.​—Daniel 10:1.

Idia Giroa Lou Dainai Idia Moale

³ Iuda taudia be Babulono amo idia ruhadia neganai unai be moale bada negana. Idau hanua ai kahirakahira lagani 70 idia noho murinai, Kurese Badana ese ia boiridia Ierusalem dekenai idia giroa Iehova ena dubu idia haginia lou totona. (Esera 1:​1, 2) Idia giroa lao taudia idia ura gau momo idia karaia, bona lagani 537 B.C.E. neganai edia tano dekenai idia ginidae. To, Kurese ese ia boiridia lasi King David ena tubuna ta henunai edia basileia idia haginia lou totona.

4, 5. (a) David ena basileia be edena negai idia hamorua? Badina be dahaka? (b) Iehova be dahaka gwauhamata ia gwauraia David ena basileia be do ia gini lou totona?

⁴ Unai be mai anina bada. Lagani 500 bona ma haida unai nega gunanai, Iehova be David dekenai ia gwauhamata, ia gwau: “Oiemu iduhu bona oiemu basileia do idia gini auka hanaihanai oi vairanai, bona oiemu terona do ia gini auka hanaihanai.” (2 Samuel 7:16) Madi, badina David ena iduhu lohia taudia momo idia gwau-edeede, bona unai bese ena rara bubua kara ia bada herea dainai, lagani 607 B.C.E. lalonai, Iehova ese David ena basileia hamorua karana ia koua lasi. Nega sisina sibona lalonai Maccabee taudia idia lohia, to ela bona nega iharuana Ierusalem idia hadikaia ore, 70 C.E. neganai, idau bese taudia ese idia lohiadia. Unai dainai, lagani 537 B.C.E. neganai, “idau bese edia nega” ia matamaia; unai nega lalonai David ena natuna ta be do ia lohia lasi.​—Luka 21:24.

⁵ To, Iehova ese iena gwauhamata David dekenai ia laloaboio lasi. Matahanai bona nihi amo, iena peroveta tauna Daniel dekenai ia hahedinaraia dahaka do ia vara Babulono ese tanobada ia lohiaia negana amo ela bona David ena bese tauna ta be Iehova ena taunimanima do ia lohiadia lou negana. Unai peroveta herevadia, Daniel karoa 2, 7, 8, bona 10-12 dekenai, ese abidadama Iuda taudia ia hadibadia, gabeai, David ena terona be momokani “do ia gini auka ela bona hanaihanai.” Unai hereva momokani ia hedinarai dainai, lagani 537 B.C.E. ai, edia tano korikori dekenai idia giroa Iuda taudia be idia moale bada herea!

6. Edena dala ai ita diba Daniel ena peroveta herevadia haida be iseda nega lalonai do idia guguru?

⁶ Baibel ena toretore idia herevalaia taudia momo idia gwau Daniel ese ia perovetalaia herevadia be idia guguru vadaeni, Iesu Keriso ia do vara lasi neganai. To ia hedinarai namonamo unai be momokani lasi. Daniel 12:4 dekenai, aneru ta ese Daniel ia hamaoroa, ia gwau: “Hari hereva oi hunidia bona buka oi koua momokani, ela bona dokona negana. Momo do idia loaloa, bona diba momokani do ia bada.” Bema dokona negana lalonai sibona Daniel bukana ena anina ia hedinarai momokani​—anina be ena hereva ena anina iboudiai idia hahedinaraia​—ita gwau diba ena peroveta hereva haida be unai negana lalonai do idia guguru.​—Daniel 2:28; 8:17; 10:14 itaia.

7. (a) Idau bese taudia edia nega be edena nega ai idia doko, bona unai neganai dahaka henanadai ena haere idia abia be namo? (b) Daidia be “hesiai tauna mai ena kamonai bona mai ena kara maoromaoro” lasi?

⁷ Lagani 1914 lalonai idau bese taudia edia nega idia ore, bona hari tanobada ena dokona negana ia matamaia. David ena Basileia be tanobada Ierusalem dekenai lasi, to ita itaia diba lasi “guba ena ori” dekenai idia haginia lou. (Daniel 7:​13, 14) Unai negana lalonai, Keristen koikoi oreana ena “ava dikadia” idia tubu momo, Keristen momokani dalana ia do hedinarai namonamo lasi tanobada taudia dekenai. To, namona be henanadai badana ta ena haere idia abia: “Hesiai tauna mai ena kamonai bona mai ena kara maoromaoro . . . tauna be daika?” (Mataio 13:​24-30; 24:45) Tanobada dekenai daika ese David ena Basileia do ia haginia lou? Daniel ena bese taudia, Iuda taudia unai, ese idia karaia diba lasi. Dirava ese idia ia dadaraia vadaeni badina idia abidadama lasi bona Mesia dekenai idia hekwakwanai. (Roma 9:​31-33) Unai hesiai tauna mai ena kamonai be Kerisendom oreadia dekenai idia davaria lasi! Edia kara dikadia ese idia hamomokania Iesu be idia ia diba lasi. (Mataio 7:​21-23) Unai dainai, unai hesiai tauna be daika?

8. Daidia be nega dokona ai “hesiai tauna mai ena kamonai bona mai ena kara maoromaoro” taudia momokani? Edena bamona ita diba?

⁸ Ita daradara lasi, ia be Iesu ena horoa tadikakadia edia orea maragina ta, lagani 1914 ai idia gwauraidia Bible Student taudia, to lagani 1931 murinai edia ladana be Iehova ena Witness taudia. (Isaia 43:10) Idia sibodia be David ena bese amo Basileia haginia lou sivaraina idia harorolaia. (Mataio 24:14) Idia sibodia be tanobada amo idia gini siri bona Iehova ena ladana idia habadaia. (Ioane 17:​6, 14) Bona Baibel ese ia perovetalaia herevadia, dina dokodia ai Dirava ena taunimanima dekenai dahaka do ia vara, be idia sibodia dekediai idia guguru. Unai peroveta herevadia haida be Daniel karoa 12 lalonai ia perovetalaia negadia; unai nega ta be dina 1,335 lalodiai moale negana.

Dina 1,260

⁹ Daniel 12:7 dekenai ita be perovetalaia nega ginigunana ena sivarai ita duahia, ia gwau: “Ia be nega ta bona nega rua bona nega kahana ai do ia lao. Bona bese helagana ena siahu idia hadikaia ore murinai, inai gau iboudiai edia anina do idia vara.”a Unai nega be Apokalupo 11:​3-6 dekenai ia herevalaia danu, unuseniai ia gwau Dirava ena witness taudia be puse dabua do idia atoa bona lagani toi bona kahana dekenai do idia haroro, bena unai murinai haida ese do idia hamasedia. Ma danu, Daniel 7:25 dekenai ita duahia, ia gwau: “Atai Herea Diravana danu do ia gwau dika henia, bona Atai Herea Diravana ena helaga taudia do ia hahisidia hanaihanai. Nega bona taravatu haidaua daladia do ia haidaua, bona iena imana dekenai do idia henia nega ta bona nega rua bona nega kahana ta ai.”

9, 10. Daniel 7:25 ese ia gwauraia “nega ta bona nega rua bona nega kahana ta” lalonai dahaka gau idia vara, bona edena siri ma haida dekenai unai nega ia herevalaia?

¹⁰ Unai peroveta dekenai, Babulono murinai amo ia mai tanobada ena basileia namba 5 be “ia.” Ia be “doana, maragina ta,” bona iena nega lalonai taunimanima Natuna dekenai “lohia siahuna idia henia, hairai bona basileia danu.” (Daniel 7:​8, 14) Unai laulau doana, guna unai be Britain edia lohia taudia, be tanobada ibounai tuarina ginigunana negana lalonai Anglo-America ena tanobada lohiana ai ia lao, hari United States be unai lohia dalana ia biagua. Nega, eiava lagani, toi bona kahana dekenai, unai lohia siahuna ese helaga taudia ia hahisidia bona nega bona taravatu idia haidaua toho. Gabeai, helaga taudia be ena imana dekenai idia henia.​—Apokalupo 13:​5, 7 itaia danu.

11, 12. Dahaka gau idia vara bena idia perovetalaia dina 1,260 idia matamaia?

¹¹ Unai peroveta herevadia be edena dala ai idia guguru? Lagani momo Tanobada Ibounai Tuarina Ginigunana vairanai, Iesu ena horoa tadikakadia idia haroro, idia gwau lagani 1914 neganai idau bese taudia edia nega do ia ore. Tuari ia vara neganai, ia hedinarai unai haroro idia kamonai lasi. Satana ese iena “dagedage gauna” ia gaukaralaia, unai be Britain Basileiana ese ia gunalaia tanobada ibounai politikol oreana, idia ura “nega bona taravatu idia haidaua,” bona unai dala ai Dirava ena Basileia ia lohia negana idia koua toho. (Apokalupo 13:​1, 2) To ia kwalimu lasi. Dirava ena Basileia be guba dekenai idia haginia, taunimanima ese ia dekenai gau ta idia karaia diba lasi.​—Apokalupo 12:​1-3.

¹² Tuari negana be Bible Student taudia tohoa negana. January 1914 negana amo idia be Photo-Drama of Creation idia hahedinaraia, unai be Baibel herevadia edia laulau bona Daniel ena peroveta herevadia idia hahedinaraia. Unai lagani ena siahu negana ai tuari be tanobada ena Not Kahanai ia vara. October neganai, idau bese taudia edia nega ia ore. Unai lagani ia doko neganai, horoa orena taudia idia diba dagedage do idia abia, unai ita diba badina lagani 1915 totona idia abia hidi siri badana be Mataio 20:22 amo, Iesu ena hahediba taudia dekenai ia henia henanadai, ia gwau: “Do lau inua kapusi be do umui inua diba, a?”

13. Bible Student taudia be edena dala ai puse dabuana ai idia haroro unai dina 1,260 lalodiai, bona unai nega ena dokona ai dahaka ia vara?

¹³ Unai dainai, December 1914 murinai, unai witness taudia orea maragina be ‘puse dabuadia ai idia haroro,’ mai manau ida idia haheauka Iehova ena hahemaoro herevadia idia harorolaia neganai. Lagani 1916 neganai, Watch Tower Bible and Tract Society ena presiden ginigunana, C. T. Russell, ia mase neganai, momo idia hoa. Taunimanima momo idia ura tuari idia vareai dainai, idia be witness taudia idia dagedage henidia bada. Idia haida be dibura rumana dekenai idia lao. Haida be dagedage siahu taudia amo hisihisi bada idia davaria, England dekenai Frank Platt bona Canada dekenai Robert Clegg ese idia davaria bamona. Gabeai, June 21, 1918 neganai, samani koikoi herevadia dainai kota taudia idia gwau presiden matamatana, J. F. Rutherford, bona Watch Tower Bible and Tract Society ena dairekta taudia danu, be dibura rumana ai do idia lao. Unai dainai, unai peroveta negana ena dokona ai, “doana maragina” ese unai orea ena haroro gaukarana ia hadokoa.​—Daniel 7:8.

14. Lagani 1919 lalonai bona unai murinai, horoa orena taudia edia noho be edena bamona ia idau?

¹⁴ Apokalupo bukana ese unai murinai ia vara gauna ia perovetalaia. Nega sisina lalonai gaukara ta do idia karaia lasi​—peroveta herevana lalonai ia gwau dina toi bona kahana dekenai, dala dekenai do idia hekure mase​—bena unai murinai horoa orena taudia idia toreisi lou bona idia gaukara lou. (Apokalupo 11:​11-13) March 26, 1919 neganai, Watch Tower Bible and Tract Society edia presiden bona dairekta taudia be dibura rumana amo idia raka lasi, bona kota taudia ese samani koikoi herevadia idia negedia. Dibura amo idia raka lasi neganai, horoa idia abia orena taudia be maoromaoro idia gaukara lou. Unai dainai, Apokalupo ese ia perovetalaia hisihisi ginigunana idia hagugurua totona, lauma dalana ai kwadi bamodia, gaukara diba lasi ena guri dobuna amo idia daekau mai, idia be kwalahu badana dekenai idia mai, anina be tomadiho koikoi dekenai dibura negadia do idia vara. (Apokalupo 9:​1-11) Unai murinai laganidia lalodiai, lauma dalana ai aniani bada idia abia bona gabeai negadia totona idia hegaegae. Lagani 1921 lalonai buka matamatana ta, The Harp of God, idia printaia, matamata taudia bona natudia idia durudia toho Baibel ena hereva badadia idia diba totona. (Apokalupo 12:​6, 14) Unai gau iboudiai be ma nega badana ta ai idia vara.

Dina 1,290

¹⁵ Aneru be Daniel dekenai ia gwau: “Karaia hanaihanai gauna idia kokia bona gau dikana, gau iboudiai hadikaia gauna idia atoa, ena nega amo dina 1,290 do idia lao.” (Daniel 12:11) Mose ena Taravatu henunai, “karaia hanaihanai gauna” be Ierusalem dubuna ena boubou patana ai idia gabua. Keristen taudia be boubou gaudia idia gabua lasi, to lauma dalana ai boubou gauna idia karaia hanaihanai. Paulo ese unai ia herevalaia inai bamona: “Inai hanamoa Dirava do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.” (Heberu 13:15; Hosea 14:2 itaia danu.) June 1918 neganai unai karaia hanaihanai boubou gauna idia kokia. Unai dainai, “gau dikana”​—do idia itaia toana iharuana​—be dahaka? Ia be League of Nations, Tanobada Ibounai Tuarina Ginigunana ai idia kwalimu gavamani taudia ese idia abia isi gauna.b Ia be gau dikana badina Kerisendom ena gunalaia taudia be Dirava ena Basileia ena gabu ai idia atoa, idia gwau unai League oreana sibona ese taunimanima dekenai maino ia havaraia diba. January 1919 ai unai League ena gaukara dalana idia gwauraia. Bema dina 1,290 (lagani toi, bona hua 7) be unai nega amo ita duahia, ita be September 1922 dekenai ita ginidae.

16. Dina 1,290 idia ore neganai, edena dala ai ia hedinarai horoa orena taudia be gaukara totona idia hegaegae vadaeni?

¹⁶ Unai murinai dahaka ia vara? Bible Student taudia idia goada lou, Babulono Badana ese ia guidia lasi, bona idia hegaegae vadaeni idia gaukara totona. (Apokalupo 18:4) September 1922 neganai, Cedar Point, Ohio, U.S.A., ena hebouhebou ta dekenai, idia be gari lasi dekenai Dirava ena hahemaoro herevadia Kerisendom dekenai idia harorolaia hamatamaia. (Apokalupo 8:​7-12) Kwadi edia koria hisihisina idia davaria! Unai sibona lasi, to Apokalupo ese ia gwauraia hisihisi iharuana ia matamaia. Keristen hutuma bada be hosi bamona tanobada ibounai dekenai idia lao​—guna unai be horoa orena taudia bona gabeai hutuma bada taudia ai idia lao. (Apokalupo 7:9; 9:​13-19) Oibe, dina 1,290 idia doko neganai Dirava ena bese taudia idia moale bada.c To ma gau haida idia vara.

Dina 1,335

¹⁷ Daniel 12:12 ia gwau: “Ia naria noho ela bona dina 1,335 idia ore tauna be do ia moale!” Ia hedinarai unai dina 1,335, eiava lagani toi, hua 8 bona kahana, be perovetalaia dina 1,290 negana ena dokona ai ia matamaia. September 1922 amo ita duahia neganai, ita mai 1926 ena medu hamatamaia negana ai (tanobada ena Not Kahanai). Unai dina 1,335 neganai dahaka ia vara?

18. Dahaka ese idia hahedinaraia lagani 1922 lalonai gau momo idia do hanamoa noho be namo?

¹⁸ Ena be lagani 1922 lalonai anina bada gaudia idia vara, to haida be nega gunadia gaukara dalana idia ura henia momo. C. T. Russell ese ia torea Studies in the Scriptures bukadia be idia do stadilaia, edia hereva badadia bamona. Ma danu, Millions Now Living Will Never Die buklet idia hariharilaia momo, unai buklet ia gwau Dirava ena ura, tanobada Paradaisona do ia haginia lou bona idaunegai abidadama taudia do idia toreisi lou, be lagani 1925 neganai do ia guguru matamaia. Idia laloa horoa taudia edia haheauka negana be kahirakahira ia ore. To, Bible Student taudia idia bamodia taudia haida idia ura lasi ma haida dekenai sivarai namona idia harorolaia.

19, 20. (a) Unai dina 1,335 lalodiai edena dala ai Dirava ena bese taudia edia gaukara ia idau? (b) Unai dina 1,335 negana ena dokona ai dahaka gau idia vara, bona Iehova ena taunimanima dekediai dahaka idia hahedinaraia?

¹⁹ Dina 1,335 idia lao noho neganai, edia lalohadai idia idau. Tadikaka idia goada totona, buka stadi daladia idia karaia bona The Watch Tower magasin idia stadilaia. Haroro gaukarana idia gwauraia bada. May 1923 negana amo, iboudiai idia boiridia hua ta ta iboudiai Tuesday ginigunana ai idia lao haroro totona, bona wiki ta ta iboudiai edia huanai idia karaia kongregesen hebouna dekenai, hereva idia karaia unai gaukara dekenai tadikaka idia hagoadadia totona. August 1923 neganai, Los Angeles, California, U.S.A. ena hebouhebou dekenai, idia hahedinaraia Iesu ia gwauraia mamoe bona nanigosi parabole herevana be Lagani 1,000 Lohia Negana ia do mai lasi neganai do ia guguru. (Mataio 25:​31-40) Lagani 1924 neganai reidio siteisini WBBR idia kehoa, unai dala ai reidio amo sivarai namona idia harorolaia. March 1, 1925, ena The Watch Tower magasin lalonai, “Birth of the Nation” sivaraina dekenai edia lalohadai matamatana Apokalupo karoa 12 dekenai idia gwauraia. Vadaeni, abidadama Keristen taudia be 1914-19 neganai idia vara gau badadia dekenai idia lalo-parara maoro diba.

²⁰ Lagani 1925 ia ore, to dokona ia do mai lasi! Lagani 1870 negana amo, Bible Student taudia be edia hesiai lalonai nega ta idia laloa bada​—guna 1914 idia laloa, ma gabeai 1925 idia laloa. To idia davaria namona be ela bona Iehova ia hereva neganai idia hesiai noho. January 1, 1926, ena The Watch Tower magasin lalonai, anina bada sivarai ta “Who Will Honor Jehovah?” ia hahedinaraia Dirava ena ladana be gau badana. Bona gabeai, May 1926 neganai, London, England, ena hebouhebou ta dekenai, edia gwaubou herevana “A Testimony to the Rulers of the World” idia abia dae. Gari lasi dekenai unai hereva lalonai Dirava ena Basileia ena maoro bona Satana ena tanobada do ia ore sivaraina idia gwauraia. Unai hebouhebou dekenai, hereva auka bukana Deliverance idia halasia, Studies in the Scriptures ena gabu ia abia, murinai unai bamona bukadia ma haida idia karaia. Hari, Dirava ena bese taudia be gabeai negadia idia laloa, idia be nega gunadia idia lalodia lasi. Dina 1,335 idia ore.

21. Unai neganai Dirava ena taunimanima be dina 1,335 lalodiai idia haheauka ena anina be dahaka, bona unai nega dekenai peroveta herevadia idia guguru ena anina be dahaka ita dekenai?

²¹ Haida idia ura lasi unai kara matamatadia idia karaia, to idia haheauka taudia idia moale bada. Ma danu, unai perovetalaia negadia idia guguru dalana ita laloa neganai, ita danu ita moale badina ita diba momokani unai negadia ai idia mauri noho horoa Keristen taudia be momokani hesiai tauna mai ena abidadama bona mai ena aonega oreana. Unai murina laganidia lalodiai, Iehova ena orea ia bada momokani, to hesiai tauna mai ena abidadama bona mai ena aonega be unai orea ena bogaraginai ia gaukara noho, ia ese ia gunalaia noho. Unai dainai, moale bada gauna be horoa taudia bona mamoe haida taudia be moale bada do idia davaria danu! Unai do ita itaia Daniel ena peroveta hereva ma ta do ita laloa neganai.

[Footnotes]

Anina Oi Gwauraia Diba, A?

◻ Edena dala ai ita diba Daniel ena peroveta herevadia haida be iseda nega lalonai do idia guguru?

◻ Dahaka dainai ita diba momokani horoa orena taudia be “hesiai tauna mai ena kamonai bona mai ena kara maoromaoro” oreana?

◻ Dina 1,260 idia matamaia bona idia ore negana be dahaka?

◻ Dina 1,290 lalodiai horoa orena taudia be dahaka mamina matamatana bona hamauria lou gaukarana idia abia?

◻ Dahaka dainai unai dina 1,335 lalodiai idia haheauka taudia idia moale?

3. Lagani 537 B.C.E. neganai, King Kurese be dahaka ia karaia dainai abidadama Iuda taudia idia moale, to Kurese ese dahaka totona Iuda taudia ia boiridia lasi?

15. Dina 1,290 be edena nega amo ita duahia hamatamaia diba? Unai nega be edena negai ia ore?

17. Dina 1,335 be edena negai idia matamaia bona edena negai idia doko?

[Picture on page 8]

Lagani 1919 ema bona hari ia hedinarai horoa orena taudia be “hesiai tauna mai ena kamonai bona mai ena kara maoromaoro” oreana

[Picture on page 10]

League of Nations edia hedikwota, Geneva, Switzerland dekenai

[Credit Line]

UN photo

[Box on page 11]

DANIEL ESE IA PEROVETALAIDIA NEGADIA

Dina 1,260:

December 1914 ia lao June 1918

Dina 1,290:

January 1919 ia lao September 1922

Dina 1,335:

September 1922 ia lao May 1926