Spain Lalonai Hanua ta Hanua ta ai Idia Haroro

“IESU be Ierusalema dala dekenai ia lao neganai be hanua badadia bona hanua maragidia lalonai ia hadibaia karaia.” (Luka 13:22) Edia gaukara hagugurua totona, Iesu bona ena hahediba taudia be “hanua badadia” ai sibodia lasi, to “hanua maragidia” ai danu idia haroro. Ena be hanua badadia mo sibodia ai idia haroro be haraga, to hanua maragidia idia hanaidia lasi.a

Iehova ena Witness taudia Spain ai be mai edia hekwarahi, Iesu ena hekwarahi bamona. Gunika kahanai teritori ena anina ia mage vadaeni, gogoa negana hegeregerena, to unuseniai idia haroro lasi ela bona lagani 1970. (Mataio 9:​37, 38) Medu bada ia diho ororo gabudia ai, medu ia diho lasi taoradia ai, bona kone kahanai, hanua maragidia handred handred idia noho, Basileia sivaraina idia do kamonai lasi.

Iehova ena Witness taudia Spain ai ese edia lalodia idia hadaidia do idia gaukara goadagoada, sivarai namona be unai gabu ai do idia harorolaia totona. To dahaka dainai nega daudau ia ore guna bena unai gabu taudia ese Basileia sivaraina idia kamonai? Unai sivarai idia abia dae eiava?

Gavamani ena Gwaumaoro Idia Abia Bena Gunika ai Idia Haroro

Lagani 1939 ai Spain ena gavamani ese Iehova ena Witness taudia edia gaukara ia taravatua. Unai dainai, lagani 1951 ela bona 1969 Witness taudia goadadia be taoni ai idia haroro neganai idia naria namonamo. Lagani 1970 ai gavamani ese taravatu ia kokia neganai, Spain ai Basileia harorolaia taudia be 10,000 bamona. Kahirakahira iboudiai be taoni ai idia noho, to hanua maragidia danu ese Basileia sivaraina idia kamonai be namo. Daidia do idia haroro henidia?

Lagani 1973 ela bona 1979 dala idia lailaia Spain ena gabu ibounai lalonai sivarai namona do idia harorolaia. Unai lagani lalodiai hua kahirakahira iboudiai Iseda Basileia Gaukara pepana, Iehova ena Witness taudia edia haroro gaukarana pepana, ai idia gwau edena gabu ai haroro taudia ai idia dabu bada. Ruma bese momo be unai gabu idia lao mai edia ura ida, haroro gaukarana karaia totona.

Idia rua be Rosendo bona ena adavana, Luci. Society ese ia siaidia lao Spain ena notwest kahana, haoda taudia edia hanua ta ai special pioneer gaukarana (nega ibounai Basileia harorolaia gaukarana) do idia karaia totona, bena gabeai edia bese idia havaraia neganai, edia lalodia idia hadaidia unuseniai do idia noho. Rosendo ia gwau: “Momokani, unai be nega aukana. Moni gaukarana davaria be auka, to Iehova ena heduru ai tahua bena nega ta lasi ai hitolo eiava ai be mahuta gabuna lasi. Emai hekwarahi be mai anina namona.” Unuseniai idia noho laganidia lalodiai, kongregesen 4 haginidia gaukarana ai idia heduru.

‘Kara Namona Taudia Tahudia’

Iesu ese ena hahediba taudia ia hamaorodia hanua badadia ai bona hanua maragidia ai kara namo taudia do idia ‘tahudia.’ (Mataio 10:11) Tadikaka ta ladana Ángel, Alcoy (Alicante) amo, ese ia davaria Spain ena hanua maragidia ai taunimanima ia tahudia namonamo be namo. Masías hanuana ai ruma haida ia lao henidia vadaeni, bena kokoroku ena tai ia kamonai. Ia laloa, “Bema kokoroku ta ia noho, anina be ruma danu ia noho​—ai do davaria lasi rumana ta.” Ángel ia loaloa sisina bena dala ta ia davaria. Ia gavaia, ela bona ororo maragina unai kahanai ruma tamona ia davaria.

Ruma ai idia noho taudia be biru tauna José bona ena taihuna Dolores; idia ruaosi edia lagani be 60 idia hanaia. Idia hakala namonamo bona idia gwau idia ura Baibel stadi do idia abia. To, ia stadi henidia be mai ena hekwarahi, badina be idia duahiduahi diba lasi bona Spain gado idia diba lasi, unai dainai buka ai idia noho herevadia iboudiai be idia diba gadona, Valencia gado, ai ia hahanaia. Bona edia dekena taudia ese idia badu henidia danu. Ena be unai hekwakwanai idia davaria bona hebou idia lao henidia dalana be daudau, to José bona Dolores be hereva momokani ai idia goada idia lao. Gabeai, idia hegeregere bapatiso do idia abia, bona hari idia ruaosi be Iehova ena hesiai idia lao henia noho mai edia kamonai ida.

Rosendo bona Luci, guna ai gwauraidia taudia, ese hahine ta ladana Maria be hereva momokani ia abia dalana idia gwauraia. Maria ena tauanina ena kahana ta ia mase bona ena ruma be sibona ia noho Moaña hanuana kahirakahira dekenai, Spain ena notwest kahanai. Witness taudia ese idia davaria neganai, ia duahiduahi diba lasi bona ena mahuta patana ia rakatania diba lasi, badina be ia maragi neganai polio gorerena ese ia hadikaia. Dala badana bona ena ruma edia padana be kilomita rua bamona. To, ia ura dikadika Baibel do ia stadilaia, bona ia hedinarai haraga ia ura Iehova ena hesiai do ia lao henia. María be duahiduahi bona toretore ia dibadia bona hebou ia lao henidia, kongregesen taudia edia heduru dainai. Tadikaka ese idia huaia lao 200 mita ela bona dala maragina ta bena motuka ai idia udaia. Ena be matamanai ena famili ese idia badu henia, to ia goada ia lao bona bapatiso ia abia. Lauma dalanai ia goada ia lao dainai ena lalona danu ia goada ia lao, bena motuka idauna ta taria dalana ia dibaia bona sikuli kosina ta ia karaia guguru. Rosendo ia gwau: “María bamona taudia durudia totona sibogu egu ura lau dadaraia be mai anina bada.”

Baibel Duahia Taudia Idia Kamonai Haraga

Lagani 1970 murinai be nega ginigunana Spain taudia iboudiai ese Baibel idia abia diba. Idia momo ese Baibel idia hoia, bona haida ese idia duahia matamaia. Hahine ta ladana Pilar, Medina del Campo (Valladolid) ai, ese Baibel ia duahia matamaia vadaeni, Iehova ena Witness taudia be lagani 1973 ai ena hanua idia lao neganai. Ia be Katolik hahinena, unai dainai ia ura lasi buka be Witness taudia edia amo do ia abia, to ia ura Baibel ena hereva edia anina do ia lalo pararalaia. Unai dainai, ena lalona be hegeregere pura iboudiai Witness taudia be ia dekenai do idia lao ena Baibel henanadaidia haere henidia totona.

Pioneer hahinena ta ese Pilar ia vadivadi henia neganai, Watch Tower Society ena buka ia gaukaralaidia, iena henanadai haerelaidia totona. Pilar ese ia dibaia herevadia ia hoalaidia dainai, pura haida murinai ena lalona be hegeregere, Baibel do ia stadilaia negadiai Mauri Ia Lao Henia Hereva Momokanina bukana do ia gaukaralaia. Buka ia do stadilaia ore lasi neganai, Baibel ibounai ia duahia vadaeni bona ia gwau hereva momokani ia davaria vadaeni. Ia be Witness hahinena ginigunana Medina del Campo ai, bona hari, Kingdom Hall ta be unuseniai bona kongregesen taudia be 63.

Spain ai, “idia diba lauma dalanai idia dabu” bona Dirava ena ura do idia diba totona Baibel idia duahia loulou taudia, be Witness taudia ese idia do davaridia noho. (Mataio 5:​3, NW) Pepi, guna Katolik tomadiho be Zumaia (Spain ena not kahana) ai ia hahedibalaia hahinena, be hanua ta ai ia haroro neganai fada ta ia davaria.

Fada ia gwau: “Pepi e, emu nega oi haorea kava. Inai hanua Itziar ai, taunimanima rua mo​—tau ta bona ena adavana​—ese lauma gaudia idia lalodia. Taunimanima oredia be dubu idia lao kava.”

Pepi ia gwau: “Vadaeni, bema taunimanima rua ese lauma gaudia idia lalodia, idia be Iehova ena Witness taudia ai do idia lao.”

Pepi be Witness taudia ma haida ida idia haroro ela bona hanua ena ruma iboudiai idia lao henidia vadaeni. Bona momokani, fada ese ia gwauraidia taudia ruaosi be sibona ia noho rumana ta ai idia davaridia. Baibel idia duahia to ena anina idia diba lasi. Baibel stadi idia abia dae mai edia ura ida, bena idia goada idia lao haraga, bona April 1991 ai bapatiso idia abia.

Lalo-momokani taudia haida ese hereva momokani idia dibaia, idia sibodia ese Watch Tower Society ese ia karaia bukadia, Baibel idia gwauraia bukadia unai, idia duahidia neganai. Almadén (Ciudad Real) ena Witness taudia be taoni maragina Ciruelas (Badajoz) ai idia haroro neganai hahine ta idia davaria, edia hereva ia hakala henia namonamo. Unai dainai idia hamaoroa bema ia ura, ia ida Baibel stadi do idia karaia. Ia gwau ia hegeregere lasi, badina be tau burukana ta ese Baibel stadi be ia ida idia karaia noho. Unai taoni ai idia noho taudia ma haida danu be unai bamona idia hereva. Tadikaka ese hari tau burukana ena noho gabuna be ta idia nanadailaia bena idia lao itaia.

Idia hoa, badina be idia davaria hari tau ladana Felipe ese buka ta ladana Mauri Hanaihanai Paradaiso Lalonai be Madrid ai ia abia vadaeni. Ibounai ia duahia murinai, ena lalona ia parara ena maduna be sivarai namona be ena dekena taudia do ia hamaorolaidia. Unai dainai buka ia gaukaralaia, taunimanima be Baibel do ia hadibalaidia totona. Tadikaka ese dala idia lailaia ia ida do idia stadi. Ia stadi henia hahinena ta danu ia ura Baibel stadi do ia abia. Ena be Felipe ena lagani be 80 bona ia gorere, to hereva momokani ai ia goada ia lao noho.

Edia Lalo-Dika Idia Kokia

Hanua maragidiai ai hekwakwanai idaudia idia davaridia. Unuseniai, tomadiho karadia gunadia bona gari kava karadia ese taunimanima momo idia guidia bona “tomadiho matamatana” idia lalo dika henia. Hanua taudia haida idia laloa momo, bema edia tomadiho do idia haidaua edia dekedia taudia bona edia varavara ese edena bamona do idia lalodia. To Dirava ena Hereva ena siahu ese unai bamona hekwakwanaidia ia hanaidia diba bona ta ena noho dalana ia haidaua diba. Unai ia vara haoda taudia edia hanua ta ladana Cangas de Morrazo ai, Spain ena notwest kahanai.

Unai hanua tauna ta ladana Roberto ena lagani be 14 neganai kada ena kuru tauna ta ai ia lao. Kuru taudia ma haida, idia inuinu kekero bona drag idia ania taudia, be ia bamodia. Nega daudau lasi Roberto danu ia inuinu kekero bona drag ia ania hanaihanai.

Gabeai, Roberto be ena hanua ia lou lao, to ena kara dikadia ia hadokodia diba lasi bona ia ura lasi do ia hadokodia. Drag hoidia totona, ia henaohenao bena nega 6 dibura rumana ai idia koua. Ena lagani be 18 neganai, uaina bona kwinin ia inudia hebou dainai kahirakahira ia mase. Doketa ese idia hamauria, to ena imana bona ena aena idia mase. Ena be uilisea ai ia helai, to drag ania karana ia hadokoa lasi. Ia laloa tomadiho ia koikoi, bona drag mo sibodia ia moalelaidia —ela bona lagani toi murinai Iehova ena Witness taudia ese idia davaria.

Baibel ena peroveta herevadia, edia anina idia vara vadaeni herevadia, ia diba neganai, unai ese Roberto ena daradara ia kokia. Kingdom Hall ai idia abia dae mai edia momokani ida neganai, ia diba tomadiho momokani ese taunimanima edia noho ia hanamoa. Hua 9 murinai Roberto ese drag ania karana ia hadokoa vadaeni bona bapatiso ia abia. Ena be ena tauanina ia dika, to lagani 8 lalodiai pioneer gaukarana ia karaia vadaeni. Lagani rua gunanai, kongregesen ena elda ta ai ia lao. Ena noho ia haidaua vaitani dainai, ena bamona gunana ta ladana Francisco ia hoa, bena ia danu be Witness tauna ta ai ia lao bona hari ia be kongregesen ena hesiai tauna ta. Roberto, drag ania hanaihanai tauhauna, ese ena kara ia haidaua dainai, unai gabu ai idia noho taudia ese Witness taudia edia gaukara ena anina idia lalo pararalaia. Hahine ta ese ena natuna merona ta, drag ia ania hanaihanai merona, ia hakaua lao Kingdom Hall, Witness taudia ese do idia hanamoa totona.

Baibel ena Hereva Momokani Idia Tahua

Gunika taudia momo ese hereva momokani idia laloa bada dainai nega momo unai ese tanobada ena aonega idia abia taudia ia hahemaraidia. (1 Korinto 1:​26, 27) Adelina, hahine badana ta, ese hereva momokani ia laloa bada. Guna, ia ese ena Katolik tomadiho ia laloa bada. Daba daba iboudiai ia tui diho, ia guriguri; Lohiabada ena Guriguri bona Maria Hanamoa guriguridia momo ia gwauraidia. Dina ta ta ai “helaga taudia” ta ta ia guriguri henia.

Adelina ese Baibel ia stadilaia matamaia neganai, ena tomadiho matamatana be unai bamona ia goadalaia. Ena be ia be hemarai hahinena to unai ese ia koua lasi; ia bona ena adavana be Kingdom Hall idia lao negana ginigunana ai, murimuri ai idia gini miniti 10 ela bona edia lalodia idia goada bena idia vareai. Lalonai, ia hakala namonamo. Nega ta, Keriso ena Lohia Laganidia 1,000 herevana ia kamonai. Unai hereva ia ura henia, unai dainai ena ruma ia lou henia neganai, ia ura ena sivarai ma haida do ia duahia Baibel lalonai. Ia bona ena adavana idia diba lasi unai hereva be edeseniai, to idia laloa Apokalupo ai ia noho. Unai dainai, unai hanuaboi ai Adelina ese Apokalupo be matamana amo ia duahia ela bona daba matanai karoa 20 ai ia davaria.

Nega ta, Adelina ia kamonai tau ese ena adavana dainai ia guriguri be maoro. Ena be ena tau ena lalona be hegeregere do ia guriguri, to guriguri herevana ia diba lasi. Unai hanuaboi ai, Adelina ese guriguri dalana herevadia Baibel lalonai ia tahua. Daba kahanai, 2 okaloka ai, Mataio karoa 6 ai ia davaria bena ena adavana ia haoa bona ia hadibaia. Iesu ena hahediba herevana ia duahia murinai, ena tau be idia ruaosi dainai ia guriguri. Hari, Adelina bona ena adavana be Iehova ena Witness taudia.

Anina Momo Idia Gogoa

Lagani 25 bamona ai Iehova ena hesiai taudia be Spain ena hanua maragidia ai idia haroro mai goadadia ida, unai dainai Spain ena gabu iboudiai lalodiai sivarai namona idia kamonai vadaeni. Aposetolo edia negai Asia Maragina ai hegeregerena, ‘Lohiabada ena hereva ia lao noho unai tano ena kahana ibounai dekenai.’ (Kara 13:49) Unai dainai hanua taudia daha daha ese hereva idia abia dae.

Spain ai eiava ma gabu ta ai, ta be hanua maragidia ai do ia haroro namonamo totona, haheauka bona sibona ena ura dadaraia be mai anina bada. Dirava ena ura be “taunimanima ibounai ese mauri do idia davaria,” unai dainai Iehova ena Witness taudia ese lalo-namo taudia idia tahudia mai edia moale ida. (1 Timoteo 2:4) Oi duahia vadaeni sivaraidia ese idia hahedinaraia hegeregerena, Spain lalonai hanua ta hanua ta ai idia haroro bona Iehova ese edia hekwarahi ena davana namona ia henidia.

[Footnotes]

[Map on page 23]

(For fully formatted text, see publication)

FRANCE

PORTUGAL

SPAIN

BALEARIC ISLANDS

CANARY ISLANDS

[Picture Credit Line on page 24]

Vilac, Lérida

[Picture Credit Line on page 24]

Puebla de Sanabria, Zamora

[Picture Credit Line on page 25]

Casarabonela, Málaga

[Picture Credit Line on page 25]

Sinués, Huesca

[Picture Credit Line on page 26]

Lekeitio, Vizcaya