Namona be Iseda Matana Ia “Namo” Basileia Gaukarana Dekenai

GERMAN Democratic Republic (G.D.R.), eiava guna idia gwauraia East Germany gabuna, be lagani 40 bona ma haida sibona ia noho. Unai ladana be lagani 41 murinai ia ore, October 3, 1990 dekenai; unai gabu ena bada be Liberia eiava United States ena Tennessee gabuna ena bada hegeregerena, bona unai dina ai unai gabu be Federal Republic of Germany, guna idia gwauraia West Germany, ida idia hatamonaia.

Unai Germany gabudia rua idia hatamonaia dainai gau momo idia haidaua. Unai gabu rua idia hapararaia gauna be tano hetoana gauna sibona lasi, to taunimanima edia lalohadai idauidau ese danu. Unai gabu taudia dekenai unai ena anina be dahaka, bona Iehova ena Witness taudia edia mauri dalana be edena bamona ia idau?

November 1989 lalonai, lagani 40 lalodiai gavamani aukana ia lohia murinai, unai gabu rua hatamonaia dalana, idia gwauraia Wende, ia vara haraga. Unai lagani lalodiai, Iehova ena Witness taudia edia gaukara idia taravatua, bona nega haida idia dagedage henidia auka.a G.D.R. dekenai ruhaia mauri namona idia abia neganai, taunimanima idia moale bada herea. To edia moale ia boio neganai, idia momo idia daradara, idia lalohisihisi, bona idia laloa gavamani ena hereva be ia koikoi. Unai Germany gabudia ruaosi be noho hebou dalanai, politikol dalanai, bona moni gaukaralaia dalanai hatamonaia karana ia auka momokani.

Der Spiegel magasin lalonai, “162 Tage Deutsche Geschichte” (Dina 162 Germany Histori Dekenai) sivaraina ia gwau, Germany gabudia rua idia hatamonaia murinai, taunimanima momo idia laloa edia moni gaukara do idia haboioa, gau iboudiai edia davana do idia bada, bona ruma rentaia davana do idia habadaia. Guna idia gwauraia G.D.R. gabuna ai, taunimanima momo idia henanadai, idia gwau, “Gavamani amo lau abia heduru monina be do ia hegeregere noho, eiava?” Bona noholaia rumadia be edena bamona? “G.D.R. gabudia iboudiai dekediai, ruma gunadia idia dika vadaeni, hanua ena dala momo dekenai ruma iboudiai idia noholaidia diba lasi.” Hodahoda mirona bona tanobada ena momoru ia bada herea.

Taunimanima idia noho hebou dalana ai bona moni gaukaralaia dalana ai idia hekwarahi bada dainai, guna idia gwauraia G.D.R. gabunai Iehova ena Witness taudia be edena bamona?

Matana ese Gau Ia Raraia Namonamo Dalana

Iehova ena Witness taudia be lalohadai dekenai idia parara lasi. Herevana East eiava West kahana amo idia mai, to idia iboudiai edia abidadama tamona be Baibel amo. Herevana taunimanima ida idia noho hebou dalana ia idau, to Witness taudia momo be lauma dalana ai idia hegeregere noho badina Iehova hesiai henia gaukarana idia laloa bada. Badina be dahaka unai be mai anina bada?

Badina “inai tanobada, hari ia noho toana bamona, be kahirakahira do ia ore.” (1 Korinto 7:31) Keristen elda ta ia gwau Wende ia do vara lasi eiava gavamani idia do hamorua lasi negana lalonai, haroro gaukara be taravatu bona idia karaia totona idia gari lasi be gau badana; unai neganai Witness taudia idia diba namona be Iehova dekenai idia tabekau bona Baibel gaukaralaia dalana idia diba. To hari, “ai naria namonamo be gau badana badina kohu ura henia karana bona mauri ena lalo-metau dainai ai raka kerere diba.”

Taunimanima momo idia laloa ruhaia mauri namona bona mauri ia namo dalana be tanobada ena kohu amo idia abia. Unai G.D.R. gabu taudia momo idia laloa, guna edia mauri be namo lasi eiava idia moale lasi dainai, hari unai idia tahua momo be namo. Unai ia hedinarai bema motuka amo saut kahanai Thuringia bona Saxony edia taoni bona hanuadia edia nadi daladia ai oi heau lao neganai. Ena be dala idia hanamoa be namo, bona ruma idia bada lasi, to televisen ena satelait disi momo herea oi itaia! Ia auka lasi tau ta ia laloa matana ese ia itaia gaudia iboudiai ia abia neganai, noho namo bona moale do ia abia diba. Unai be idoa dikana ta!

Ororo dekenai ia haroro neganai, Iesu be kohu bona mauri ena lalo-metau laloa momo karana ena dika ia herevalaia. Ia sisiba, ia gwau: “Inai tanobada dekenai kohu do umui haboua lasi.” Ma danu ia gwau: “Tauanina ena lamepa be matana, unai dainai bema oiemu matana ia namo, oiemu tauanina ibounai do ia mai diari danu.” (Mataio 6:​19, 22) Iena hereva ena anina be dahaka? Matana namona ese ia itaia gauna ia raraia namonamo, bena darana ese unai gauna ena toana ia abia namonamo. Lauma dalana ai matana namona ese Dirava ena Basileia toana ia itaia namonamo. Unai dainai, bema Keristen ta ia ura momokani iena matana ia namo, bona Dirava ena Basileia ia itaia namonamo noho, bona lalo-metau gaudia ia lalodia momo lasi, unai ese ia durua lauma dalana ai ia hegeregere totona.

Zwickau, Saxony dekenai, tau ta bona ena adavana edia sivarai amo unai ai haheitalaia diba, idia be Wende karana negana ai Baibel idia tahua. Edia bisinesi be nega bada ia ania, to lauma gaudia idia atoa guna, bona Keristen hebou iboudiai dekenai idia lao. Idia gwau: “Aiemai bisinesi dainai, ai be nega bada lasi, to lauma dalanai ai goada noho totona nega ai atoa hebou dekenai ai lao be namo.” Unai be aonega karana!

Namona be Plauen ruma besena ta oi laloa danu, idia be Saxony dekenai danu. Ruma bese tauna be dina gaudia ia hanamodia, iena bisinesi lalonai ia be diba momo tauna. Wende karana negana murinai, iena sitoa rentaia davana ia bada momokani. Dahaka ia karaia be namo? “Unai renta davana be bada herea, bona hereva momokani lau diba, bona unai be anina bada gauna egu mauri lalonai.” Unai dainai ia namo momokani lasi gabuna ai ruma ia abia, to renta davana ia maragi sisina. Oibe, dina gaudia ia hanamoa tauna be haraga momokani ia diba, namona be iena matana ia namo.

To, haida be unai idia diba haraga lasi. Keristen elda ta ia gwau bisinesi karaia dalana ia kehoa dainai, bona bisinesi be do idia goada diba, unai dainai sibona ena bisinesi ia hamatamaia. Loaloa naria tauna be mai hebogahisi ida ia hagoadaia, ia gwau namo lasi bisinesi dainai iena maduna lauma daladia ai ia laloaboio. To madi, unai ia vara. Hua haida murinai, unai tadikaka be iena elda dagina ia rakatania. Gabeai ia torea, ia gwau: “Lau dekenai ia vara gauna dainai, orea dekenai dagi gaukarana idia tahua tadikaka iboudiai lau sisiba henidia, namo lasi ta ese sibona ena bisinesi ia haginia.” Ita gwau lasi Keristen ta be sibona ena bisinesi ia karaia be kerere. To herevana iseda bisinesi ita karaia eiava lasi, bema moni gaukaralaia dalana ai iseda hekwarahi ita laloa momo, nega haida ita be taga ena hesiai taudia ai ita lao diba. Iesu be ia vara diba gauna ia herevalaia, ia gwau: “Tau ta lasi biaguna rua edia hesiai gaukara ia karaia diba. Badina be ta do ia badu henia, to ta be do ia lalokau henia, o ta be do ia abia dae, ma ta be do ia abia dae lasi.” (Mataio 6:24) Germany ena ane toretore tauna ta Goethe ia gwau: “Bema ta ia laloa ia be ruhaia mauri namona ai ia noho to unai be momokani lasi, ia be hesiai tauna, bona ruhaia dalana ena helaro be lasi.”

Bema medu bada lalonai ita raka iseda matana ita koua sisina ita itaia namonamo totona, eiava ita itaia noho totona iseda matana be imana amo ita koua sisina. Politikol dalanai, moni gaukaralaia dalanai, eiava taunimanima edia noho hebou dalanai dika ita abia garina, namona be ita hekwarahi bada lauma dalana ai ita itaia namonamo noho totona. Keristen taudia haida be dahaka idia karaia Basileia gaukarana dekenai edia matana ia namo noho totona?

Basileia Gaukara Idia Habadaia

Guna idia gwauraia G.D.R. ena gabu iboudiai dekenai, Witness taudia ese edia haroro gaukara idia habadaia. Idia hanaia lagani rua lalodiai, haroro dekenai hua ta ta iboudiai edia hora ena namba be 21 pesen amo ia bada. Anina be ruma dekenai idia karaia Baibel stadi be 34 pesen amo ia bada ia lao. Ma danu, regular pioneer edia namba be lagani rua gunanai ena namba amo nega hani ia bada daekau! Ma haida idia laloa momo bona idia maumau, to guna idia gwauraia G.D.R. gabuna dekenai idia noho Keristen taudia 23,000 bona ma haida be idia hegeregere noho badina edia matana idia namo. Unai dainai Basileia gaukarana ia bada momokani.​—Iosua 6:15 itaia danu.

Edia gaukara ia bada dainai saut kahana ena teritori idia naria namo herea, unuseniai Witness taudia momo idia noho. Unai gabu ladadia momo be mai anina histori dekenai. Bema porcelain oi ura henia momo, Meissen taoni do oi diba, Dresden kahirakahira ai, tanobada ena galasi kapusi bona mereki namo hereadia idia karaia. Meissen dekenai Basileia harorolaia taudia 130 idia noho. Eiava Weimar oi laloa, unai be “Germany ena diba herea taoni badana.” Unai taoni dekenai Goethe bona Schiller lalodia tao Nadina ta ese ia hamomokania, Weimar dekenai unai toretore taudia rua be guna unuseniai idia noho, bona unai taoni taudia ese idia heagilaia. Hari inai negai, Weimar ia moale badina sivarai namona harorolaia taudia 150 be unuseniai idia noho.

To not kahanai be idau momokani, unuseniai be pablisa momo lasi, bona kongregesen edia padadiai be daudau. Moni gaukara be momo lasi. Mai edia moni gaukara taudia momo idia doridia, gaukara horadia idia habadaia edia gaukara idia dogoatao totona. Not kahanai ful-taim haroro gaukara tadikakana ta ia gwau: “Haroro gaukara idia taravatua negana ai, tadikaka ta ta iboudiai idia diba haroro dekenai Iehova ese idia ia naria be namo, to moni gaukara davaria be hekwarahi lasi. To hari be idau. Hari aiemai haroro idia koua lasi, to moni gaukara dekenai iena hakaua hereva ai abia be namo. Unai dekenai ai manada be ia auka sisina.”

Pablisa taudia idia moale edia haroro negadia idia habadaia dainai, a? Wolfgang ia laloa inai bamona: “Namona be teritori tamona be pablisa tauna tamona ese ia haroro henia loulou. Taunimanima be ia dekenai do idia manada bona herevahereva dalana ia koua lasi.” Unai sibona lasi, to danu, ruma taudia idia “hemarai lasi iduara dekenai tomadiho idia herevalaia totona, taunimanima be ruma idia hanaia bona idia kamonai diba neganai danu. Hari, tomadiho kikilaia be hemarai gauna ta lasi.” Ralf bona Martina idia gwau unai be momokani. “Ai moale emai teritori dekenai ai haroro momo dainai. Taunimanima edia kara dekenai diba ai abia bona idia moale bada badina buka bona magasin idauidau ai henidia diba.”

Buka Bona Magasin Idia Moalelaidia

Ralf bona Martina ese Life​—How Did It Get Here? By Evolution or by Creation? bukana idia moalelaia bada. Guna idia gwauraia G.D.R. gabuna ai, Dirava ia noho lasi lalohadai idia abia dae taudia momo dekediai, unai buka be Baibel stadilaia heduru gauna namona. Danu, idia ura unai buka ena hereva bamona buka maragina ta idia abia. “Dresden dekenai, lagani 1992 ena ‘Diari Loalaia Taudia’ Distrik Hebouhebou dekenai Dirava ese Ita Ia Laloa Eiava? buklet idia halasia neganai ai moale bada herea. Unai be aiemai guriguri ia haerelaia gauna.”

Witness lasi taudia momo be Watch Tower magasin bona bukadia idia matauraia bada. July 1992 dekenai, taunimanima idia noho hebou totona edukeisini tisa ta be unai buka bona magasin dainai leta ia torea, ia gwau ia “matauraidia bona ia tanikiu henia”; unai gaudia ia gaukaralaidia iena hereva ia henia totona. January 1992 dekenai, Rostock hahinena ta ese Mauri Hanaihanai Paradaiso Lalonai bukana ta be iena iduara dekenai idia mai Witness rua amo ia abia. Germany brens opesi dekenai leta ia torea, ia gwau: “Lau be Lutheran Dubu hahine ta. Iehova ena Witness taudia edia orea gaukara lau matauraia bada. Idia hereva goadagoada, idia gwau bema Dirava ese ia hakaudia lasi neganai taunimanima idia noho diba lasi.”

Kerisendom edia dubu be edia memba taudia dekenai lauma dalanai hakaua herevadia idia henia ena bada be dahaka? Idia hanamoa bada niuspepa Die Zeit be December 1991 dekenai ia gwau, ena be Lutheran Dubuna be “nega sisina lalonai idia hanamoa ia be maino dalanai taunimanima edia noho dalana idia haidaua dainai, to hari taunimanima momo ese idia ura henia karana ia maragi haraga.” Lutheran Dubuna totona ia hereva tauna ta be mai lalohisihisi ida ia gwau: “Taunimanima idia laloa kerere, idia laloa bisinesi dalana ia kehoa neganai, unai be paradaiso dekenai mauri namona bamona.” Magdeburg dekenai, dubu tauna ta be Iehova ena Witness orea ia tore henia, ia ura ma gau haida ia diba. Badina be dahaka? Unai tau ia torea, ia gwau: “Lagani momo lalodiai unai hereva lau kirikirilaia. To hari lau diba inai tanobada be dina gabediai lalodiai ia noho bona nega sisina murinai hekwakwanai momo do ita abia.”​—2 Timoteo 3:​1-5.

Gaukara Habadaia Totona Ruma Idia Haginidia

Wende karana ia do vara lasi neganai, Kingdom Hall rumadia idia haginidia diba lasi G.D.R. gabuna dekenai. Hari idia ura idia momo idia haginidia; bona haginidia be idia atoa guna gauna badana. Unai tomadiho momokani dalana dekenai gau momo idia haidaua. Tadikaka ta ena sivarai ese ia hahedinaraia edena bamona unai kara idia haidaua haraga.

March 1990, G.D.R. gabuna dekenai, Iehova ena Witness taudia edia gaukara dekenai gwaumaoro idia henia, hora haida murinai sibona, tadikaka ta idia boiria Witness taudia haida ia hereva henidia totona, nega ginigunana maikrofon ia gaukaralaia unai. Lagani rua bona kahana murinai, ia lao henia kongregesen ese Kingdom Hall matamatana ta idia hahelagaia. Lagani 1992 ia ore neganai, kongregesen 16 totona Kingdom Hall 7 idia haginidia vadaeni. Kingdom Hall 30 bona ma haida, bona mai ena hairai Assembly Hall ta, edia palani idia hegaegaelaidia noho.

Matana be Dirava Ena Basileia Ia Itaia Noho

Keristen elda tauna ta ia gwau: “Wende karana negana sisina murinai, taunimanima momo ese Baibel idia dadaraia. Gavamani matamatana dekenai edia helaro idia atoa, unai gavamani ia gwauhamatalaia noho namona do ia havaraia.” Ia havaraia, eiava? “Lagani rua lalodiai gavamani taudia edia lalohadai idia haidaua. Hari, taunimanima be ai danu idia hereva, idia gwau tanobada gavamanidia be maino bona kara maoromaoro idia havaraia diba lasi.”

Taunimanima hutuma idia moale badina G.D.R. gabuna dekenai gavamani aukana idia kokia, idia laloa West kahana lalohadai idia abia dae dalana matamatana do ia namo. To idia lalohisihisi. Herevana edena gavamani ia lohia, to Iehova ena Witness taudia idia naria namonamo edia matana idia namo bona Dirava ena Basileia idia itaia noho totona, ia be guba dekenai ia diari bada hisiu ta bamona ia hururuhururu. Unai bamona helaro be do ia vara dainai taunimanima do idia lalohisihisi lasi.​—Roma 5:5.

[Footnotes]

[Pictures on page 26]

Germany ena Witness taudia be edia ruhaia mauri namona dainai edia Basileia gaukarana idia habadaia