Ist Bona West Idia Hedavari Neganai

“IST be Ist, bona West be West, bona ruaosi do idia hedavari lasi.” Ane torea tauna Rudyard Kipling be unai bamona ia hereva. Ena hereva ita laloa neganai, taunimanima hapararadia gaudia ita lalodia; unai gau dainai, idau bese taudia bona idau kopi taudia inai henidia karadia be hari inai negai idia bada idia lao. Taunimanima momo idia henanadai, idia gwau, Dirava ese unai ia hamaoromaoroa diba a? Oibe! Ia ese kara ta ia karaia hari, unai do ia hamaoromaoroa totona! Kipling ena ane ena hereva ma ta ese unai ia gwauraia, ia gwau Ist bona West do idia parara “ela bona Tanobada bona Guba be Dirava ena Hahemaoro Teronana vairanai do idia gini.”

Dirava ese hahemaoro siahuna be Iesu Keriso ia henia. (Ioane 5:​22-24, 30) Hahemaoro negana be edena negai ia matamaia? Daidia ia hahemaoro henidia, bona edia davana be dahaka? Iesu ese tanobada ibounai do idia vara tuaridia bona unai nega tamona ai do idia vara hisihisidia ia perovetalaidia. Lagani 1914 ai idia vara matamaia. Ia gwau idia be ‘toa’ ta, ia “giroa mai, bona tanobada dokona danu” edia toana.​—Mataio 24:​3-8.

Iesu be ma ia gwau iseda nega be hahemaoro negana; ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai iena vairana dekenai do ia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be ena idiba kahana dekenai do ia atoa, nanigosi be ena lauri kahana dekenai do ia atoa.” Hari, tanobada taudia iboudiai be Hahemaoro Tauna vairanai idia hebou, bona iena hahemauri herevana bema idia abia dae o bema idia abia dae lasi, unai hegeregerena edia davana do ia henidia. Nega daudau lasi murinai, hisihisi badana ai do ia henidia neganai, kamonai lasi taudia, nanigosi bamona taudia, be “davana ia dika hanaihanai gabuna dekenai do idia lao. To kara maoromaoro taudia [mamoe bamona taudia mai edia kamonai] be mauri hanaihanai gabuna dekenai do idia lao.”​—Mataio 25:​31-33, 46; Apokalupo 16:​14-16.

‘Dina Ia Daekau Kahana amo Bona Dina Ia Diho Kahana Amo’

Inai tanobada hahemaoro henia karana be Tanobada Ibounai Tuarina Ginigunana neganai ia matamaia. Unai neganai, Kerisendom ena haroro taudia ese tuari oreadia idia durudia. Unai ese ia hahedinaraia idia be inai tanobada ena bona “Dirava ena badu” do idia abia be maoro. (Ioane 3:36) To Keristen taudia, maino idia ura henia bona Dirava idia abidadama henia taudia, dekediai dahaka ia vara? Lagani 1919 ai King Keriso Iesu ese ena idiba kahana ai ia haboudia matamaia.

Dirava ese ia horodia taudia 144,000 oredia be Keriso ese tanobada ena kahana iboudiai amo ia gogodia guna. Ia ida hairai do idia abia hebou iena guba Basileiana lalonai. (Roma 8:17) Dirava ena peroveta tauna ese ia hereva henidia, ia gwau: ‘Umui gari lasi, badina be lau be umui ida. Emui garana be dina ia daekau kahana amo do lau hakaudia mai, bona dina ia diho kahana amo umui do lau haboua. Not kahana do lau hamaoroa, do lau gwau, “Oi kahudia nege!” bona saut kahana do lau hamaoroa, do lau gwau, “Oi koudia lasi. Egu natuna memerodia be daudau amo bona egu natuna kekenidia be tanobada dokona amo oi hakaudia mai; egu ladana idia henidia taudia iboudiai. Lau sibogu hahairaia totona lau havaradia.” ’​—Isaia 43:​5-7.

Unai sibona lasi! Lagani 1930 murina amo, taunimanima hutuma ia gogodia matamaia, hari idia be milion milion. Idia be Iesu ese Mataio 25:​31-46 ai ia gwauraidia ‘mamoedia.’ Horoa orena taudia hegeregeredia, idia danu ese inai hereva, “Umui be egu hereva hamomokania taudia, bona lau be Dirava,” ia gwauraia Tauna idia “abidadama henia.” (Isaia 43:​10-12) Inai hutuma bada be ‘dina ia daekau kahana amo ia lao dina ia diho kahana, not kahana amo ia lao saut kahana amo, bona tanobada dokona amo’ ia gogodia noho.

Inai maino ura henia mamoedia be orea tamona ai ia hakapudia, bona bese iboudiai lalodiai tadikaka bamona idia noho. Idia noholaidia tanodia 231 edia gado idauidau idia gadolaidia. To Baibel ena Basileia sivaraina, “gado goevadaena” bamona, idia dibaia noho mai edia lalo-tamona ida, “Iehova ena ladana do idia noinoi henia totona, bona ena hesiai do idia lao henia mai edia lalo-tamona ida totona.” (Sefania 3:9) Idia abidia dae herevadia, edia lalohadai, bona edia kara be hegeregere; unai ese ia hahedinaraia goevagoeva Ist bona West idia hedavari vadaeni bona tanobada ena kahana iboudiai danu ese, Pavapava Badana Iehova ena hesiai do idia lao henia bona ia do idia hanamoa totona.

Hereva gabena ese ia hahedinaraia, ena be tano haida lalodiai hekwakwanai be momo, to inai gogoa gaukarana ia karaia noho.