Duahia Taudia Edia Henanadai

Dirava ese Kain ia sisiba henia, ia gwau ‘kara dika ia naria noho,’ Kain “ia hadarerea totona.” Unai be hegeregerena uda boroma ese animal ta ia tahua bona ia ania karana bamona. (Genese 4:7) Bema Abata ia do vara lasi neganai, animal ese tubutubu gaudia sibona idia ania, dahaka dainai unai bamona hereva idia gaukaralaia?

Mose ia toredia buka lalodiai, siri haida edia hereva be idau sisina, badina unai negadia ai idia vara gaudia amo idia idau.

Hegeregere inai bamona, Genese 2:​10-14 ena sivarai ese Eden umana ena tano toana ia herevalaia. Mose ia torelaia sivaraina ia gwau sinavai ta be “Asuria tano ena dina ia daekau kahana dekenai ia heau lao.” To Asuria tano ena ladana be Asuru amo idia abia, ia be Sem ena natuna bona Abata negana murinai unai ladana ia abia. (Genese 10:​8-11, 22; Esekiel 27:23; Mika 5:6) Ia ese Dirava ena amo unai sivarai ia abia bona ia maoro dainai reana Mose ese unai hereva “Asuria” ia gwauraia, badina iena sivarai idia duahia taudia be unai ladana amo unai gabu idia laloa diba.

Genese ena karoa ginigunadia amo ita abia haheitalai ma ta oi laloa. Adam bona Eva idia kara dika bona uma amo ia luludia murinai, Iehova ese idia giroa dalana ia koua. Edena dala ai? Genese 3:24 ia gwau: “Dirava ese tau ia lulua, bona Eden uma gabu ena dina ia daekau kahana dekenai kerubi ia haginidia, bona lahi kaia ia atoa. Unai kaia be ia duduia kahana ibounai dekenai. Inai be mauri auna dekenai lao dalana ia koua momokani.” Unai hereva “lahi kaia” oi laloa. Dirava be kaia havaraia tauna, a?

Ita gwau lasi iseda lalokau Havaraia tauna be kaia ginigunana ia havaraia. Aneru edia vairadiai Adam bona Eva be ia giroa giroa lahi gauna ta idia itaia. Unai gauna be dahaka? Mose ese Genese buka ia torea neganai, taunimanima momo be kaia idia diba bona tuari dekenai idia gaukaralaidia vadaeni. (Genese 31:26; 34:26; 48:22; Esodo 5:21; 17:13) Unai dainai, Mose be “lahi kaia” ia torea neganai, iena sivarai idia duahia taudia idia laloa diba dahaka be Eden ena vareai gabuna dekenai ia noho. Mose ena negai idia diba gaudia dainai unai sivarai dekenai idia lalo-parara diba. Bona Mose ese ia torelaia herevadia idia maoro, badina Iehova ese Baibel dekenai ia atoa.​—2 Timoteo 3:16.

To Genese 4:7 be edena bamona? Unuseniai Dirava ese Kain ia sisiba henia, ia gwau: “Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be uda boroma bamona, ia naria noho, oi do ia hadarerea totona. Kara dika be ia ura biagua oi, to oi ese oi hadarerea be namo.” Guna ai hereva bamona, unai bamona hereva dalana be hegeregerena ia hitolo uda boroma be animal ia dogoatao bona ia ania gwauraia bamona.

To Baibel ese ia hahedinaraia Adam bona Eva be animal iboudiai ida maino dekenai idia noho. Reana animal haida be taunimanima ida idia noho namo herea. Ma haida be uda boromadia, bona sibodia edia ura hegeregerena taunimanima edia dekena amo idia noho daudau be vaia edia kara. (Genese 1:​25, 30; 2:19) To, Baibel lalonai ia gwau lasi unai boroma be ma boroma haida eiava taunimanima idia ania. Gunaguna, Dirava ese animal bona taunimanima ia henidia aniani be tubutubu gaudia. (Genese 1:​29, 30; 7:​14-16) To Abata murinai unai hahegani ia idau, Genese 9:​2-5 ese ia hahedinaraia hegeregerena.

Unai dainai, Genese 4:7 dekenai ita duahia gauna, Dirava ena sisiba Kain dekenai, ena anina be dahaka? Momokani, Mose ena nega lalonai uda boroma be do ia ania animal ia dogoatao gwauraia herevana be taunimanima ese do idia lalo-pararalaia diba, bona ita danu ita lalo-pararalaia diba. Unai hereva amo danu, Mose be Abata murinai idia noho duahia taudia ese do idia lalo-pararalaia diba. Danu, bema Kain ese unai bamona animal ia itaia lasi, unai sisiba do ia lalo-pararalaia diba, ia lalonai ia noho kara dika be ia hitolo bada, dagedage boromana ta bamona.

Namona be ita laloa bada gaudia unai sivarai dekenai be inai: Dirava ese Kain ia sisiba henia be hebogahisi karana, namona be mai manau ida sisiba ita abia dae, mama be ita ia hadikaia haraga diba, bona Revareva Helagadia dekenai Dirava ese ita ia henia sisiba hereva ma haida ita lalodia bada be namo.​—Esodo 18:20; Kohelete 12:12; Esekiel 3:​17-21; 1 Korinto 10:11; Heberu 12:11; Iakobo 1:​14, 15; Iuda 7, 11.