“Hanua Aukana Ia Hanaia”

“BEMA hari bamona idia karaia noho, edia lagani be 18 idia do abia lasi neganai, U.S. natudia 100 100 amo 40 40 be edia tama sina edia headava ena doko do idia itaia.” (Science, June 7, 1991) Unai be gari gauna! Dahaka dainai unai ia vara?

Ruma bese kota bona mase taudia edia kohu haria kota ena hahemaoro tauna Edward M. Ginsburg be The Boston Globe niuspepa dekenai ena lalohadai ia gwauraia. Ia gwau: “Ita be iseda ura ita tahua momo taudia. Ita ta ta be ‘sibona eda ura ita tahua.’ Ita gwau, ‘Dahaka lau abia diba?’ Ita ura haraga ita sibona ita hamoalea.”

Headava lalonai sibona ena ura tahua karana ese lalohisihisi bona hepapahuahu momo ia havaraia. Hahemaoro tauna Ginsburg ia gwau headava taudia be headava hadokoa totona kota dekenai idia lao neganai, tau bona hahine idia ura sibodia edia maoro idia hamomokania. Idia ura ta ese ia hamaoroa edia kara ia maoro to adavana ena kara be kerere. Idia ura ta ia gwau: “Heai dekenai oi kwalimu.”

Iena hereva dainai Dirava ese ia gwauraia aonega herevana ita laloatao, ia gwau: “Idia kerere henia tadikakana be hanua aukana ia hanaia.” (Hereva Lada-isidia 18:19) Oibe, headava lalonai hepapahuahu ia vara neganai, heai taudia be idia laloa namonamo lasi bona edia lalohadai idia haidaua lasi. Nega momo, idia ura lasi momokani sibodia edia ura idia laloaboio, idia tuari henia “hanua aukana” bamona.

Dala ma ta ia noho, eiava? Io, dala ma ta ia noho. Headava idia goada bona idia noho daudau diba bema headava idia matamaia negana amo headava taudia be aposetolo Paulo ena hereva idia badinaia, ia gwau: “Umui ibounai ta ta do umui durua, bona ibounai ta ta do umui [hebogahisi] henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” (Efeso 4:32) Unai bamona kara habadaia be ia auka, eiava? Nega haida ia auka. To headava hadokoa be ia auka danu, ani? Headava ia doko neganai taunimanima edia lalo-metau bona edia moni hekwarahi momo idia noho, ani? Bona natudia be edena bamona? Nega momo edia tama sina edia headava hadokoa karana dainai idia lalohisihisi ela bona idia bada.

Dala namona be headava taudia ruaosi idia gaukara edia headava ia noho daudau totona, bona namo lasi idia kara auka heheni, “hanua aukana” bamona. Paulo be Keristen taudia ia sisiba henidia neganai, headava taudia ia hereva henidia danu, ia gwau: “Umui lalokau henia, vadaeni do umui noho hebou namo herea, mai laloa tamona danu.”​—Kolose 3:14.

[Picture Credit Line on page 32]

The Complete Encyclopedia of Illustration/J. G. Heck