Maria be Guba ai Ia Daekau Herevana—Dirava ese Ia Hahedinaraia A?

HARI hereva, Maria, Iesu ena sinana, be ena tauanina ai guba ai ia daekau herevana, be Roman Katolik taudia milion milion ese idia laloa bada. Edia sivarai torea tauna, George William Douglas, be ia gwau: “Maria Haneulato Rami-hebouna be Dirava ese guba ai ia abia daekau karana laloa lou totona nega daudau lalonai lagani ta ta ai idia hahelagaia dinana be Dubu Oreana ena dina helagana bada hereana.”

To Katolik tomadihona hahedibalaia taudia idia gwau Baibel ia gwau lasi Maria be unai bamona ia daekau guba ai. Momokani, Katolik taudia momo lasi idia diba hari hahediba herevana be lagani handred handred lalodiai idia hepapahuahulaia vadaeni. Vadaeni, dahaka dainai unai dubu oreana ese unai hereva idia abiadae, tomadiho hahediba herevana momokanina ta bamonaa? Idia laloa Dirava ese unai hereva ia hahedinarai henidia; edia lalohadai be mai badina eiava? Inai henanadai edia haere be mai anina bada, hereva momokani idia ura henia taudia iboudiai dekediai.

Inai Hereva Ia Vara Dalana

Reana do oi hoalaia gauna be inai: Iesu ia mase bena lagani handred rua bamona lalodiai Keristen taudia ese Maria be guba ai ia daekau herevana idia laloa lasi, lasi vaitani. Katolik tomadihona hahedibalaia tauna, Jean Galot, be L’Osservatore Romano ai ia gwau: “Matamanai, Keristen oreana ese Maria ena mase idia laloa lasi.”

To, unai dubu oreana ese Toi Tamona Diravana herevana idia abia dae murinai, Maria ena dagi idia habadaia. Idia gwau ia be “Dirava ena Sinana,” “ia vara mai ena kara dika lasi,” ia be “Herohemaino Hahinena” Dirava bona taunimanima padadiai, bona “Guba Kwinina” danu. Galot ia gwau, gabeamo “Keristen taudia, idia laloa Maria ia goevadae bona tomadiho henia urana idia ura taudia, idia laloa nega gunana taudia edia amo idia abia sivaraidia idia hegeregere lasi, badina be Maria ena mase idia sivarailaia lasi. Unai dainai, Maria be guba ai ia daekau sivaraidia be sibodia edia lalohadai hegeregeredia idia havaradia.”

Lagani 300 C.E. murinai, unai bamona sivaraidia, sibodia edia lalohadai kavakavadia hegeregeredia idia lalodia davari gaudia, idia halasidia matama. Unai sivarai ta ena ladana be “Dirava Ena Sinana Helagana Ia Mahuta.” Ena be aposetolo Ioane ia mase murinai lagani 400 bamona idia ore neganai ta ese ia torea, to idia gwau torea tauna be Ioane. Hari sivarai koikoina be inai: Hoa dalanai Keriso ese aposetolo ia gogodia Maria dekenai, bena idia itaia, matakepulu taudia, taia kudima taudia, bona ae dika taudia ia hamauridia. Dokonai Lohiabada ese Maria ia hereva henia, ia gwau: “Itaia, hari inai nega amo emu tauanina namo hereana be paradaiso lalonai do lau abia vareai, bona emu lauma helagana be guba ai do ia noho.”

Unai bamona revarevadia dainai, dubu oreana taudia be edena bamona idia kara? Maria sivaraina tahua tauna, René Laurentin, ia gwau: “Unai sivarai hairaidia amo lalo-duhu taudia idia koidia, bena idia abidia dae kava. To dubu oreana taudia haida ese idia dadaraidia, badina be edia hereva be idia hakoikoia heheni bona idia be badina lasi dainai.” Unai dainai dubu oreana gunalaia taudia ese idia abia dae momokani lasi. Inai danu: Maria ena tauanina be guba ai ia abia daekau herevana idia abia dae be auka, badina be gabu haida ai turia haida idia hahelagadia bona idia tomadiho henidia, idia gwau Maria ena turiana be unai.

Lagani 1200 C.E. murinai, Thomas Aquinas be tomadiho hahedibalaia taudia ma momo hegeregeredia ia gwau, unai hereva be hahediba herevana momokanina idia gwauraia diba lasi, badina be “Buka Helaga ese ia gwauraia lasi.” To, idia abia dae taudia idia momo daekau, bona laulau toredia taudia mai ladadia bada, Raphael, Correggio, Titian, Carracci, bona Rubens, ese Maria be guba ai ia daekau karana ena laulau idia toredia.

Unai hereva idia lalo-tamonalaia lasi ema bona vanegai. Jesuit tauna Giuseppe Filograssi ia gwau, Katolik diba momo taudia haida ese “unai hereva hakoikoia herevadia” idia toredia, ema bona 1950. Pope haida danu, Leo Namba 13, Pius Namba 10, bona Benedict Namba 15, ese “idia goadalaia momokani lasi.” To November 1, 1950 ai, dubu oreana ese ia lalohadailaia auka. Pope Pius Namba 12 ia gwau: “Ai gwau hahediba herevana momokanina ta, Dirava ese ia hahedinaraia herevana, be inai: Dirava ena Sinana Goevadaena, Maria Haneulato Rami-hebouna hanaihanai, ena mauri tanobada ai ia ore neganai, Dirava ese ia abia daekau guba ena hairai lalonai, mai ena tauanina bona mai ena laumana danu.”​—Munificentissimus Deus.

Vadaeni, unai nega amo Katolik taudia ese unai hereva idia dadaraia diba lasi. Pope Pius Namba 12 ia gwau: “Ai ese ai gwauraia hedinarai herevana bema ta ese ia gorea mai ena ura ida, namona be do ia diba ia ese Katolik Tomadihona, Dirava ese Ita ia henia tomadihona, ia dadaraia vadaeni.”

Buka Helaga Ena Hereva

To dahaka dainai unai dubu oreana ese unai bamona ia goadalaia? Pope Pius Namba 12 ia gwau unai hereva “ena badina korikorina be Buka Helaga lalonai.” Idia abia dae taudia idia gwau Luka 1:​28, 42 ese ia hamomokania. Hari siri ese Maria inai bamona idia gwauraia: “Kekeni e, namo do oi davaria, badina Lohiabada be oi danu ia noho, bona oi ia hanamoa bada herea vadaeni. . . . Oi do oi havaraia merona danu be do namo bada herea!” Maria ia daekau herevana idia abia dae taudia idia gwau, Dirava ese “ia hanamoa bada herea” dainai mase ese ia hadarerea lasi. Bona Dirava ese ia “hanamoa bada,” ‘ia havaraia merona’ ia hanamoa bada hegeregerena, unai dainai, ia abidia hahenamodia be Iesu ese ia abidia hahenamodia hegeregeredia, idia ta ena anina be ia daekau guba ai. Oi laloa unai be lalohadai maorona a?

Gau ta be inai, Helene gado idia diba momo taudia idia gwau, inai hereva “Lohiabada be . . . oi ia hanamoa bada herea” idia torea be kerere, badina be gunaguna Helene gado ai idia toredia herevadia be inai bamona idia toredia hanai be maoro: “Dirava ese oi ia lalo namo henia.” Unai hegeregerena, Katolik Jerusalem Bible lalonai Luka 1:28 ai idia torea herevana be inai: “Oi moale, Dirava ese oi ia laloa namo henia bada.” Ena be Dirava ese Maria “ia lalo namo bada herea”, to unai hereva ese ia hamomokania lasi ia abia daekau guba ai. Katolik Douay Baibel lalonai Stefano danu be unai bamona idia gwauraia, to Baibel ia gwau lasi ia be ena tauanina ai ia toreisi lou.​—Kara 6:8.

To, Dirava ese Maria ia hanamoa o ia lalo namo henia, ani? Oibe, to gunaguna, Israel ena hahemaoro taudia edia nega lalonai, idia laloa hahine ta ladana Iaele be “hahine bogaragidiai . . . Dirava ese ia hanamoa bada.” (Hahemaoro Taudia 5:​24) Momokani, ta do ia gwau lasi Iaele danu be ena tauanina ai ia daekau guba ai. Inai danu, Maria ia daekau herevana ibounai ena badina be, Iesu be ena tauanina ai ia daekau guba ai. To, Baibel ia gwau Iesu be “lauma dekenai ia toreisi lou.” (1 Petero 3:​18; ma 1 Korinto 15:45 danu itaia.) Aposetolo Paulo ia gwau: “Tauanina bona rara ese Dirava ena Basileia do idia abia diba lasi.”​—1 Korinto 15:​42-50.

Momokani, Baibel ese guba toreisi-louna ia gwauraia, Keristen taudia mai edia kamonai, lauma ese ia horodia taudia, edia. To, 1 Tesalonika 4:​13-17 ese ia hahedinaraia goevagoeva, unai toreisi-lou do ia vara lasi ela bona inai nega dikana ena dina gabedia ai “Lohiabada do ia giroa mai.” Maria bona unai taudia oredia tausen tausen be mase ai idia mahuta ela bona unai nega.​—1 Korinto 15:​51, 52.

Maria​—Abidadama Hahinena

To inai hereva amo Maria ai hadikaia toho lasi. Momokani, Maria ena abidadama do ita tohotohoa be namo. Ia ese Iesu ena sinana dagina namona, mai ena hisihisi idauidau momo danu, be ia abia dae haraga. (Luka 1:38; 2:​34, 35) Ia mai Iosepa ida ese Iesu idia naria lalonai, ia be aonega ai ia tubu daekau. (Luka 2:​51, 52) Iesu be satauro ai hisihisi ia ania neganai, ia dekenai ia noho. (Ioane 19:​25-27) Bona ia be iena hahediba hahinena namona dainai, iena oda hegeregerena Ierusalem ai ia noho, bena lauma helaga ia abia, ia bubua diho neganai.​—Kara 1:​13, 14; 2:​1-4.

Maria idia lalohadailaia kerere ese Dirava ia hanamoa lasi bona Maria danu ia hanamoa lasi. Unai hahediba herevana kererena amo idia ese hereva ma ta idia hamomokania toho; herevana be inai: Maria be herohemaino hahinena Dirava bona taunimanima padadiai. To Iesu ese unai ia hamomokania a? Lasi; ia gwau: “Dala be lau, . . . Tamana dekenai do idia lao taudia ibounai edia dala ta be lasi, lau sibona. Bema gau ta lauegu ladana dekenai umui noia, lau be do lau karaia.” (Ioane 14:​6, 14; ma Kara 4:12 danu itaia.) Oibe, Iesu Keriso sibona, Maria lasi, be ita dainai Dirava ia noia loulou. Namona be Iesu ena amo​—Maria ena amo lasi​—Dirava dekenai do ita raka kahirakahira lao, “iseda metau hegeregerena” heduru do ita abia totona.​—Heberu 4:​16.

Reana haida ese Maria herevana momokanina do idia abia dae mai edia lalohisihisi ida, badina be guna idia lalodia bada lalohadaidia be do idia negedia. To dokonai hereva momokani ese ‘do ia ruhadia nege.’ (Ioane 8:32) Iesu ia gwau ena Tamana ese “mai Lauma bona mai momokani danu” do idia tomadiho henia taudia ia tahudia noho. (Ioane 4:​24) Inai hereva ese Katolik taudia mai edia momokani ia tohodia.

[Box on page 27]

MARIA IA MASE EIAVA?

Katolik taudia edia lalohadai be dahaka​—Maria be guba ai ia do daekau lasi neganai ia mase guna, eiava lasi? Edia tomadiho hahedibalaia taudia be unai idia daradaralaia. Nuovo dizionario di teologia ia gwau: “Maria ia mase diba lasi herevana idia gwauraia be auka, badina be Keriso be ia mase diba.” To, bema idia gwau Maria ia mase, hekwakwanai aukana ma ta idia davaria. Tomadiho hahedibalaia hahinena, Kari Børresen be ia gwau: “Mase be kara dika ginigunana ena davana, to idia gwau Maria be ia goevadae dainai unai ese ia hadikaia lasi.” Vadaeni, ia mase badina be dahaka? Unai dainai, Pope Pius Namba 12 ese Maria be guba ai ia daekau herevana ia harorolaia neganai, ena mase ia herevalaia lasi.

To Baibel ena hahediba lalonai unai bamona daradarana be lasi. Ia gwau lasi Maria be ena sinana ena bogana lalonai ia tubu matama negana amo ia goevadae. To ia hahedinaraia Maria be ia goevadae lasi dainai, ta ese ena mauri davana do ia karaia be namo. Unai dainai, Iesu ia vara murinai, Maria ia lao dubu, kara dika boubouna Dirava ia henia. (Levitiko 12:​1-8; Luka 2:​22-24) Gabeamo, goevadae lasi taunimanimadia iboudiai hegeregeredia, Maria ia mase.​—Roma 3:23; 6:23.

Hari hereva momokanina haragana be idau vaitani, Katolik oreana ena daradara havaraia herevana hegeregerena lasi.

[Picture on page 26]

‘Haneulato Rami-hebouna Abia Daekau,’ Titian (1488 bamona-1576) ese ia torea

[Credit Line]

Giraudon/Art Resource, N.Y.

[Picture on page 28]

Iesu ia vara murinai, Maria ia lao dubu, kara dika boubouna Dirava ia henia; unai amo ia hahedinaraia ia be mai ena kara dika