Iehova Ena Samani Herevana, Bese Idauidau Latadiai
“Rege ta be tanobada ena dokona ai do ia lao, badina Iehova be mai ena samani herevana ta bese idauidau dekenai.”—IEREMIA 25:31.
1, 2. (a) King Iosia ia mase murinai dahaka ia vara Iuda tanona dekenai? (b) Daika be Iuda ena pavapava ginigabena, bona iena abidadama lasi karana dainai edena dala ai hisihisi ia davaria?
IUDA tanona ai nega dikadia idia vara. Guna, pavapava namona tamona, Iosia, ese Iehova ena badu badana ia koua, nega kwadogi lalonai. To, lagani 629 B.C.E. ai Iosia idia alaia mase, bena unai murinai dahaka ia vara? Ia murinai idia lohia pavapavadia ese Iehova idia matauraia lasi.
2 Hanua Pavapavadia Iharuana 24:19 ena hereva hegeregerena, Iuda ena pavapava ginigabena, Sedekia, Iosia ena natuna namba 4, ese “Iehova vairanai ia kara dika, [ena kakana] Iehoiakim, ena kara iboudiai hegeregeredia ma ia karaia.” Unai dainai dahaka ia vara? Nebukadnesara ese Ierusalem ia tuari henia, Sedekia ia abia mauri, ena natudia be ia vairanai ia aladia mase, ena matana ia hakepuludia, bena Babulono ai ia laohaia. Bona Iehova ena dubu ai idia gaukaralaidia kohudia be Babulono taudia ese idia kokidia, bena dubu bona hanua idia gabudia. Idia do mauri noho taudia be Babulono ai idia abidia lao.
3. Ierusalem be 607 B.C.E. ai idia hadikaia ore neganai dahaka nega ia matamaia, bona dahaka ia vara unai nega ena dokona ai?
3 Unai lagani 607 B.C.E. ai, Ierusalem idia hadikaia ore, bona Luka 21:24 ese ia gwauraia negana, “idau bese edia nega,” be ia matamaia. Unai nega, ena daudau be lagani 2,520, be lagani 1914 C.E. ai ia doko. Nega ia ginidae unai, Iehova be ena Natuna, pavapava siahuna ia abia vadaeni tauna, Iesu Keriso, Nebukadnesara ia hereaia tauna, ena amo inai tanobada dikana do ia hahemaoro henia bona ena davana do ia henia. Ia hahemaoro henidia guna taudia be Iuda bamona oreana hari inai negai, idia be sibodia idia gwauraia Dirava bona Keriso edia gwaukau taudia tanobada ai.
4. Ieremia ena peroveta hereva dekenai dahaka henanadai idia vara?
4 Iuda ena pavapava ginigabedia edia negai ia vara heiriheirina bona hari inai negai Kerisendom bona iena badibadinai besedia ai ia vara heiriheirina be ita hahegeregeredia diba, a? Oibe! Vadaeni, Ieremia ena peroveta herevana ese ia hahedinaraia Iehova be hari inai negai edena bamona do ia karaia? Do ita itaia.
5, 6. (a) Lagani 1914 amo ema bona hari, edena dala ai Kerisendom ai idia vara gaudia be Iuda hadikaia negana vairanai idia vara gaudia bamona? (b) Hari inai negai, Ieremia oreana be Kerisendom dekenai dahaka hereva ia hamaorolaidia?
5 Britain tauna Bertrand Russell, namba karaia dalana ia diba momo tauna mai aonegana, be lagani 40 gunanai ia gwau: “Lagani 1914 amo ema bona hari, tanobada dekenai idia vara gaudia idia tahua taudia iboudiai idia lalo-hekwarahi badina taunimanima edia raka dalana ena dokona ai hekwakwanai badadia do idia vara.” Germany ena gavamani gunalaia tauna ta, Konrad Adenauer, ia gwau: “Lagani 1914 amo, noho namona bona maino be taunimanima edia mauri lalona amo idia boio vadaeni.”
6 Ieremia ena negai bese ta ena dokona be kahirakahira neganai, kerere lasi taudia hutuma edia rara idia bubua; unai hegeregerena, hari inai negai danu tanobada ena oromana ena dokona be ita vairanai ia hedinarai neganai, tanobada ibounai tuaridia ruaosi lalodiai kerere lasi taudia edia rara idia bubua. Kerisendom besedia, sibodia idia gwau Baibel ese ia gwauraia Diravana idia tomadiho henia besedia, be unai tuari ruaosi ai idia tuari. Koikoi karana bada unai! Unai dainai Iehova ese ena Witness taudia ia siaidia idia dekediai, bena Ieremia 25:5, 6 ena hereva idia hamaorolaidia, idia gwau: “Mani umui helalo-kerehai, ta ta emui dala dikadia bona emui kara dikadia amo umui raka oho . . . Bona dirava idaudia muridiai umui raka lasi, edia hesiai umui lao henia lasi bona umui tomadiho henidia lasi, emui imadia gaukara amo lau do umui habadua bena lau ese umui do lau hadikaia garina.”
7. Dahaka ese ia hahedinaraia Kerisendom ese Iehova ena sisiba ia kamonai henia lasi?
7 To, Kerisendom besedia idia helalo-kerehai lasi. Boubou gaudia ma haida be tuari diravana idia henia, Korea bona Vietnam ai. Bona idia ese tuari gaudia hoihoilaidia taudia, tuari kohudia idia karaia kampani oreadia, be moni idia henidia torehai noho. Lagani 1980 amo ela bona 1989 ai, Kerisendom tanodia ai, lagani ta ta iboudiai kina trilion tamona bamona idia negea tuari kohudia hoidia totona. Lagani 1951 amo ela bona 1991, United States ena gavamani be tuari totona ia negea monina ese America ena kampani badadia iboudiai be edia bisinesi karadia amo idia abia monidia ia hanaia. America bona Soviet Union idia inai heheni karana ia doko negana amo, niuklia tuari kohudia gunadia momo idia negedia vadaeni, to tuari kohudia matamatadia, edia hamasea siahuna ese idia negea vadaeni kohudia edia siahu ia hereaia gaudia, be idia do noho, bona matamatadia idia karadia noho. Reana nega ta unai gaudia do idia gaukaralaidia.
Kara Dika Ia Koua Lasi Dainai Kerisendom ese Hahemaoro Ia Abia
8 Kerisendom ese Keristen taravatu maoromaorodia ia badinadia lasi dainai, Iehova ena hereva Ieremia 25:8, 9 ai be mai anina ia dekenai. Ia gwau: “Unai dainai, guba tuari oreadia edia Iehova be inai bamona ia hereva, ‘Egu hereva umui badinadia lasi dainai, lau ese hereva do lau siaia, not kahana besedia iboudiai do lau abidia,’ Iehova ia gwau, ‘bona egu hesiai tauna, Nebukadnesara, Babulono pavapavana, dekenai danu hereva do lau siaia, inai tano mai ena noholaia taudia ida bona inai hegegemadai besedia iboudiai danu, hadikadia totona do lau mailaidia; bena do lau haoredia vaitani, gari bona hoa bona dika hanaihanai gaudia ai do lau halaodia.’ ” Unai dainai, hisihisi badana be sibodia Dirava ena orea idia gwauraia taudia, Kerisendom, lalonai do ia matamaia, bena “hegegemadai besedia iboudiai” lalodiai do ia vara.
9. Iseda nega ai, edena daladia ai Kerisendom ena toana lauma dalanai ia dika ia lao?
9 Guna, Kerisendom lalonai Baibel idia matauraia, idia laloa headava bona ruma bese maurina be moale havaraia gaudia, bona dabai taunimanima idia toreisi haraga bona edia gaukara idia moalelaia. Hanuaboi ai lamepa edia diari ai idia momo ese Dirava ena Hereva idia duahia bona idia stadilaia, sibodia idia hagoadaia totona. To hari inai negai, sihari kava, headava hadokoa, drag ania kava, inuinu kekero, gwau-edeede, mataganigani, gaukara hesikulaia, bona TV itaia hanaihanai karadia bona kara dikadia ma haida ese taunimanima edia noho idia hadikaia bada. Unai dika ia vara guna; bena gabeai, Iehova Dirava ese Kerisendom ena davana do ia henia, do ia hadikaia ore.
10. Iehova be ena hahemaoro karadia ia karaia murinai Kerisendom ena toana be edena bamona?
10 Ieremia karoa 25, siri 10 bona 11 ai, Iehova ia gwau: “Kiri bona moale regedia be idia edia amo do lau abidia oho, bona headava matamata tauna bona hahinena edia hereva danu, bona uiti makohia patapata regedia bona lamepa diarina danu. Inai tano ibounai be do idia hadikaia vaitani, bena taunimanima ese do idia hoalaia gauna ai do ia lao.” Kerisendom ena dubu badadia bona noho rumadia mai hairaidia do idia hadikadia neganai, taunimanima be momokani do idia hoa. Hadikadia karana ena bada be edena bamona? Ieremia ena negai, Iuda bona ia badibadinai idia noho besedia idia hadikadia bena lagani 70 lalodiai edia tano idia noho kava; Salamo 90:10 ia gwau unai be taunimanima ta ena mauri laganidia iboudiai. Hari inai negai Iehova ese ena hahemaoro hegeregerena Kerisendom ena davana do ia henia neganai, do ia hadikaia ore vaitani, ela bona hanaihanai.
Hahemaoro Herevana Babulono Badana Dekenai
11 Apokalupo 17:12-17 ena peroveta herevana hegeregerena, nega do ia ginidae, Iehova ese hoa karana ta do ia karaia, ‘doadia 10’—United Nations oreana besedia mai edia tuari oreadia unai—do ia ha-uradia, ena lalohadai do idia hagugurua totona; tomadiho koikoi basileiana tanobada hegegemadai do idia hadikaia ore. Unai be edena bamona do ia vara? Apokalupo karoa 17 ese ia gwauraidia ‘doadia 10’ be mai edia dala idauidau momo, Apo 17 siri 16 ena hereva hegeregerena “ariara hahine do idia badu henia . . . bona lahi dekenai do idia gabua.” Momokani, niuklia tuari gaudia momo idia karadia vadaeni, bona idia tuari gwauraia gabudia momo ai momo idia atodia noho. To namona be do ita naria, ela bona do ita itaia Iehova ese politikol lohiadia edena bamona do ia ha-uradia, tomadiho koikoi basileiana ena davana do idia henia totona.
12. (a) Babulono ese Ierusalem ia hadikaia ore murinai, dahaka ia vara Babulono dekenai? (b) Kerisendom hadikaia ore negana murinai, dahaka do ia vara tanobada besedia dekenai?
12 Idaunegai, Iehova ena badu, lahi bamona ia ara baduna, be gabeai Babulono latanai ia mai. Ieremia karoa 25, siri 12 ai, peroveta tauna ese unai ia herevalaia matamaia. Guna, Iehova ese Nebukadnesara bona Babulono ia gaukaralaidia bese haida edia davana henidia totona, to gabeai ia ese idia be tanobada besedia oredia ida ia hakapudia. Hari inai negai do ia vara gauna be unai hegeregerena. Apokalupo karoa 17 be ia gwauraidia ‘doadia 10’ ese tomadiho koikoi do idia hadikaia momokani, to gabeai, Apokalupo karoa 19 ia hereva hegeregerena, idia danu be do idia ore, tanobada ena “king” oredia ida. Ieremia 25:13, 14 ia gwau, Babulono bona “tanobada besedia iboudiai,” Iehova ena bese taudia idia hadikadia besedia, be Iehova ese edia davana do ia henidia. Guna, Iehova ese Nebukadnesara ia gaukaralaidia Iuda ia panisia totona. To Nebukadnesara bona Babulono ena pavapava gabedia be sibodia idia abidia isi bona Iehova idia dadaraia; unai edia lalohadai ia hedinarai, Iehova ena dubu kapusi amo idia inuinu bona dirava idaudia idia tomadiho henidia neganai. (Daniel 5:22, 23) Bona Babulono taudia ese Ierusalem idia hadikaia neganai, Iuda badibadinai besedia—Moab, Amono, Turo, Edom, bona ma haida—idia moale bona Dirava ena bese taudia idia gonagonalaidia. Idia danu be Iehova ena amo edia davana do idia abia be namo.
Hahemaoro Herevana “Tanobada Basileiadia Iboudiai” Dekenai
13 Unai dainai, Ie karoa 25, siri 15 bona 16 ai, Ieremia ia gwau: “Iehova, Israel ena Dirava, ese lau inai bamona ia hereva henia, ia gwau: ‘Inai kapusi, badu uainana ena kapusi, be lauegu imana amo oi abia, bena idia dekediai oi do lau siaia lao besedia iboudiai be do oi henidia do idia inua totona. Do idia inua, bena do idia mareremarere bona kava taudia bamona do idia karaia, idia bogaragidiai lau siaia tuari kaiana dainai.’ ” Dahaka dainai unai be Iehova ena “badu uainana ena kapusi”? Mataio 26:39, 42 bona Ioane 18:11 ai Iesu ese “kapusi” ta ia gwauraia, unai be Iehova ena ura ia dekenai ia laulaulaia gauna. Unai hegeregerena, Ieremia ese ia gwauraia kapusi ese Iehova ena ura, tanobada besedia ese iena badu do idia inua urana, ia laulaulaia. Ieremia karoa 25:17-26 ese bese ladadia ia gwauraidia, hari inai negai idia noho besedia idia laulaulaidia besedia unai.
14. Ieremia ena peroveta hereva hegeregerena, daidia be Iehova ena badu kapusi amo do idia inua, bona iseda nega totona unai ena anina be dahaka?
14 Iuda idia kara henia hegeregerena, Kerisendom be “gari bona hoa bona dika hanaihanai gaudia ai” do idia halaoa; unai murinai tomadiho koikoi basileiana tanobada hegegemadai do idia hadikaia ore. Unai murinai tanobada ibounai, Aigupito ese ia laulaulaia gauna, ese Iehova ena badu uainana ena kapusi amo do ia inuinu! Oibe, “not kahana pavapavadia iboudiai, gabu daudaudia bona kahirakahiradia, murina murina amo, bona tanobada basileiadia iboudiai tano kopina ibounai latanai danu” do idia inua. Idia murinai, Babulono pavapavana ese do ia inua. Dokonai, “idia murinai, Sisaka pavapavana do ia inua.” Bona unai “Sisaka pavapavana” be daika? Sisaka be Babulono ena ladana hehunina ta. Guna, Satana be Babulono pavapavana, taunimanima ese idia itaia diba lasi pavapavana, bona unai hegeregerena, hari inai negai ia be “tanobada ena lohia,” Iesu ia hereva hegeregerena. (Ioane 14:30) Unai hegeregerena, Ieremia karoa 25:17-26 bona Apokalupo karoa 18 ela bona 20 ese idia hahedinaraia goevagoeva, Iehova ena badu kapusi do ia henidia neganai, tomadiho koikoi basileiana tanobada hegegemadai do ia moru guna, bena politikol basileiadia do idia moru, bena unai murinai Satana be guri dobu masemasena lalonai do idia koua.—Apokalupo 18:8; 19:19-21; 20:1-3.
15. Dahaka do ia vara “maino bona noho namo” ena boiboi do idia kamonai neganai?
15 America bona Soviet Union idia inai heheni karana ia doko murinai, siahu herea gavamanina tamona mo ia noho, bona taunimanima momo ese maino bona noho namo idia herevalaia momo. Apokalupo 17:10 ena hereva hegeregerena, hari siahu herea gavamanina, dagedage gauna ena kwarana namba 7, be “nega sisina” do ia noho. To unai “nega sisina” ena dokona be kahirakahira. Nega daudau lasi, politikol dalanai “maino bona gari lasi” do idia boiboilaia, bena ‘karaharaga hisihisi dika momokani bona mase do idia ginidae.’ Aposetolo Paulo be unai bamona ia hereva.—1 Tesalonika 5:2, 3.
16, 17. (a) Bema haida be Iehova ena hahemaoro karana amo idia roho mauri toho, dahaka do ia vara? (b) Edena hadikaia dalana amo Iehova ena ura be kahirakahira tanobada dekenai do ia vara?
16 Satana ena tanobada oreadia iboudiai ese Iehova ena badu kapusina do idia inua, Kerisendom be guna. Iehova ese Ieremia ia hagania herevana, Ie karoa 25, siri 27 ela bona 29 ai, ese unai ia hamomokania; ia gwau: “Oi hamaorodia, oi gwau, ‘Guba oreadia edia Iehova, Israel Diravana, be inai bamona ia hereva: “Umui inua, umui kekero, umui mumuta, umui moru, do umui toreisi lou lasi, umui bogaraginai lau siaia tuari kaiana dainai.” ’ Bema idia ura lasi inuinu kapusina be oiemu imana amo do idia abia, oi hamaorodia, oi gwau, ‘Guba oreadia edia Iehova be inai bamona ia hereva: “Do umui inua! Badina be, itaia! lauegu ladana idia hatoa hanuana lalonai dika havaraia karana do ia matamaia, bena davana abia karana amo do umui roho mauri a?” ’ ‘Davana abia karana amo do umui roho mauri lasi, badina be tuari kaiana ta ena mai lau gwauraia, tanobada noholaia taudia iboudiai hadikadia gauna.’ Guba oreadia edia Iehova be ia hereva.”
17 Hereva mai siahudia unai—hagaria herevadia, badina be guba bona tanobada edia Pavapava Badana, Iehova Dirava, ese ia gwauraidia. Lagani daha momo lalodiai taunimanima ese iena ladana helagana idia gwauraia dika bona idia inai henia, to unai ia haheaukalaia. To nega ia ginidae vadaeni, iena Natuna lalokauna, Iesu Keriso, be ena hahediba taudia ia hadibadia gurigurina hegeregerena do ia karaia. Guriguri be inai: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:9, 10) Iehova ena ura be Iesu be Iena tuari kaiana ai do ia lao, taunimanima edia davana henidia totona.
18, 19. (a) Daika be hosi ai ia gui bena ia lao Iehova ena ladana dekenai do ia kwalimu totona, bona iena kwalimu ia do hagugurua lasi neganai, dahaka ia naria? (b) Aneru be Iehova ena badu lai-gubana idia halasia neganai, dahaka hagaria gaudia be tanobada dekenai do idia vara?
18 Apokalupo karoa 6 dekenai, ia gwau Iesu be hosi kurokurona ai ia gui bena ‘ia lao ia kwalimu totona.’ (Apo 6 Siri 2) Unai ia vara matamaia lagani 1914 lalonai, guba dekenai Pavapava dagina ia abia neganai. Ma hosi haida bona edia gui taudia be ia murinai idia lao, unai ese unai negana amo iseda tanobada idia hadikaia gaudia, tuari, doe, bona hisihisi, ia laulaulaidia. To unai heiriheiri be edena negai do ia ore? Apokalupo karoa 7 ese ita ia hamaoroa aneru hani be “lai 4 edia toa dalana idia koua” ela bona lauma Israel ena hutuma bada herea bese bona bese iboudiai amo idia haboudia idia roho mauri totona. (Apo 7 Siri 1) Bena unai murinai dahaka do ia vara?
19 Ieremia karoa 25:30, 31, siri 30 bona 31, be ia gwau: “ ‘Iehova be atai amo do ia boiboi, ena noho gabuna helagana amo iena gadona do ia habadaia. Iena noho gabuna latanai do ia boiboi. Do ia lolo, uaina huahuadia idia moimoilaia taudia bamona, tanobada noholaia taudia iboudiai latadiai. Rege do ia rege dae ela bona tanobada dokodia, badina be Iehova be mai ena samani herevana ta, bese idauidau latadiai. Ia ese taunimanima iboudiai do ia hahemaoro henidia. Kara dika taudia be tuari kaiana amo do ia aladia mase.’ Iehova be ia hereva.” Bese ta lasi ese Iehova ena badu kapusi inua karana amo do ia roho mauri. Unai dainai, namona be lalo-namo taudia be tanobada besedia edia kara dika amo do idia raka oho haraga, aneru haniosi ese Iehova ena badu badana, lai-gubana bamona, idia do kahua nege lasi neganai. Momokani, ia be lai-gubana bamona, badina be Ieremia 25 be siri 32 bona 33 ai ma ia gwau:
20. Dahaka do ia vara dainai ita diba Iehova ena hahemaoro karana be do ia auka momokani, to badina be dahaka unai ia karaia be namo?
20 “Guba oreadia edia Iehova be inai bamona ia hereva, ‘Itaia! Dika be ia lao, bese ta amo ela bona ma bese ta, bona lai-gubana badana ta do ia toa matamaia, tanobada daudaudia kahadia amo. Unai dina ai, Iehova ese do ia aladia mase taudia be tanobada dokona amo ela bona ma tanobada dokona do idia hesiriu. Ta ese do ia taitailaidia lasi, do ia haboudia lasi, o do ia guridia lasi. Idia be boromakau ena kukuri bamona ai do idia lao, tano kopina ai.’ ” Unai ena toana do ia dika herea, to tanobada ena dika ibounai haorea totona bona Dirava ese ia gwauhamatalaia Paradaisona havaraia totona, unai do ia vara be namo.
Mamoe Naria Taudia Do Idia Tai Bona Do Idia Boiboi
21 Ie 25 Siri 34 ela bona 36 ese Iehova ena hahemaoro ma idia herevalaia, idia gwau: “Mamoe naridia taudia e, umui tai, umui tai lolololo! Mamoe seridia biagudia e, kahu ai umui giroagiroa, badina be umui do idia alaia mase bona umui do idia hakarohoa dinadia idia ginidae vadaeni, bena do umui moru, kapusi namo hereana bamona! Mamoe naridia taudia do idia heau henia gabuna ta ia boio, bona mamoe seridia lohiadia edia roho mauri gabuna ta danu. Umui hakala! Mamoe naridia taudia idia tai, mamoe seridia lohiadia be idia tai badabada, badina be Iehova ese edia rei gabudia ia hadikadia noho.”
21, 22. (a) Ieremia 25:34-36 dekenai, daidia be Israel ena “mamoe naridia taudia,” bona dahaka dainai idia tai? (b) Hari inai nega lalonai, edena mamoe naria taudia dekenai Iehova ia badu be maoro?
22 Hari mamoe naridia taudia be daidia? Idia be tomadiho gunalaia taudia lasi, idia be Iehova ena badu idia inua vadaeni. Idia be tuari laloa bada taudia, Ieremia 6:3 danu ese ia gwauraidia taudia, edia tuari oreadia idia haboudia Iehova tuari henia totona. Idia be politikol lohiadia, idia lohiadia taudia edia amo sibodia edia taga idia habadaia taudia. Idia momo be bisinesi kara koikoidia idia karaia mai edia aonega ida. Ogogami tanodia ai hitolo ese taunimanima iboudiai ia hadikadia, to idia durudia haraga lasi. Idia ese “mamoe seridia lohiadia,” tuari kohudia idia karaia bisinesi tau badadia bona tanobada idia hadikaia mai mataganigani ida taudia unai, edia taga idia habadaia noho, to idia ura lasi moni sisina idia henia medikal heduruna henia totona, bona idia ura lasi aniani sisina idia henia milion momo idia mase lasi totona.
23. Iehova ese ia hadikaia ore murinai, Satana ena lohia gabuna toana be edena bamona?
23 Unai dainai Ieremia karoa 25 ena siri ginigabedia, Ie 25 siri 37 bona 38, ese sibodia hanamoa totona maino idia tahua taudia inai bamona ia gwauraidia: “Edia magu, edia maino gabudia, ia hadikadia vaitani, Iehova ena badu badana dainai. Leona bamona ia be ena komu gabuna amo ia raka lasi vadaeni, badina be edia tano be hoa gauna ai ia lao vadaeni, ia hahisihisidia tauna ena tuari kaiana dainai, bona ena badu badana dainai.” Unai be hoa gauna momokanina! To, Iehova ese ena badu badana be Apokalupo 19:15, 16 ese “king ibounai edia King, bona lohia ibounai edia Lohia” ia gwauraia tauna amo do ia hahedinaraia, bese idauidau be auri itotohina amo do ia biagudia Tauna unai. Unai murinai dahaka do ia vara?
24. Tomadiho koikoi bona Satana ena tanobada orena hadikaia ore karana dainai, kara maoromaoro taudia be dahaka hahenamo do idia abia?
24 Nega ta cyclone o lai-gubana ena mamina oi abia, a? Ia be hagaria gauna, ani? To ia doko murinai, ena be ia hadikadia gaudia iboudiai be gabu ibounai oi itadia, to hodahoda ia goeva bona lai ia ore dainai emu mamina be namo, unai dainai Iehova oi tanikiu henia, unai dina namona dainai. Unai hegeregerena, hisihisi badana ena lai-gubadia do idia doko neganai, Iehova do oi tanikiu henia, oi roho mauri dainai, bona do oi hegaegae, Iehova ena gaukara, tanobada goevana be paradaiso ai halaoa gaukarana, ai do oi heduru totona. Iehova ena samani herevana bese idauidau latadiai be ia ese do ia hagugurua, iena ladana do ia hahelagaia bona dala do ia lailaia, Mesia ena Basileia ena Lohia Laganidia 1,000 lalodiai Iena ura be tanobada ai do ia vara totona. Unai Basileia do ia mai haraga be namo!
Riviu inai sivarai ena paragraf 5-24
◻ Kerisendom ese dahaka koikoi karadia ia karadia dainai hahemaoro ia abia?
◻ Ieremia 25:12-38 dekenai dahaka hereva ma haida idia noho unai hahemaoro herevana dekenai?
◻ Tanobada besedia dekenai dahaka badu kapusi idia henia?
◻ Idia tai bona idia boiboi mamoe naridia taudia be daidia, bona dahaka dainai idia lalo-hisihisi?
8. Ieremia 25:8, 9 ena hereva be edena dala ai do idia momokani Kerisendom dekenai?
11. Iehova ese daidia edia amo Kerisendom do ia hadikaia ore? Badina be dahaka?
13. “Badu uainana ena kapusi” anina be dahaka, bona unai kapusi idia inua taudia dekenai dahaka do ia vara?
[Picture on page 18]
Iehova ese Kerisendom hadikaia ore gauna ia abia hidi vadaeni
[Picture on page 23]
Hisihisi badana ena lai-gubadia murinai, tanobada goevana do ia hedinarai