Basileia Haroro Ripoti

Baibel Ena Hereva Momokani Dainai Ruma Bese Idia Lalo-Tamona

HARI inai negai, tanobada ena kahana idauidau dekenai, ruma bese momo be idia lalo-tamona lasi. To, Baibel lalonai ruma bese idia lalo-tamona dalana ia hedinarai. Iesu ena hereva oi laloa, ia gwau: “Lauegu hereva inai ia kamonai, bona ia karaia tauna ta ta be aonega tauna bamona, ia ese ena ruma nadi latanai ia haginia.” (Mataio 7:24) Iehova ena Witness taudia edia ruma bese tausen momo ese unai hereva idia badinaia bona Baibel ena hereva idia gaukaralaia dainai, lalo-tamona idia davaria. Ma haida be unai lalo-tamona abia totona idia do hekwarahi noho; henunai ia noho ekspiriens ese unai ia hahedinaraia.

France dekenai, Daniel be ami lalonai ia noho neganai, ami ena haroro tauna ta ia gwau namona be Daniel ese Baibel ta do ia abia, vadaeni ta ia abia, bona hanaihanai ia duahia. Gabeai idia siaia Tahiti dekenai. Ami lalonai, Daniel ena turadia haida be Adventist tomadiho taudia, ma haida be Mormon tomadiho taudia. Nega momo idia ese tomadiho karana idia kikilaia. Dina ta ai, ami ena sargent tauna ese ena adavana ia mailaia bona Daniel danu idia hedavari heheni, ia be Iehova ena Witness hahinena ta. Adorahi ta ibounai lalonai ia ese Daniel ena henanadai momo ia haerelaidia, bona ia hamaoroa namona be kongregesen ta Tahiti dekenai do ia lao. Daudau lasi murinai ia dekenai Baibel stadi idia karaia.

France dekenai, Daniel ena tamana bona sinana be Katolik taudia. Katolik sikuli ta dekenai, iena tamana be sikuli natudia dekenai sisiba ia henidia bona Baibel hadibaia klas ia biagua. Daniel ese sivarai namodia ia diba bona ia ura unai sivarai haida be iena tamana bona sinana dekenai ia hadibadia, unai dainai Daniel be sisina sisina Baibel ena hereva haida be ena revareva lalodiai ia toredia.

Guna, Daniel ena sinana be ia moale, to gabeai ena natuna ese ia siaia revarevana lalonai Iehova ena ladana ia itaia dainai ia hoa. Dina haida murinai, reidio dekenai ia kamonai, idia gwau Iehova ena Witness taudia be “orea dikana.” Daniel dekenai leta ia siaia bona ia gwau namona be karaharaga Witness taudia amo do ia siri. To, Daniel ese Baibel ia stadilaia noho, bona ia goada ia lao bona daudau lasi murinai dala ia hegaegaelaia ami do ia rakatania bona France dekenai ia giroa lao totona.

Ena ruma dekenai ia giroa lao neganai, Daniel be hanuaboi ta ta iboudiai​—nega haida hanuaboi momokani dekenai​—ena sinana danu Baibel ena hereva idia kikilaia. Gabeai, ia be Daniel danu Kingdom Hall ta dekenai idia lao. Nega ginigunana hebou dekenai ia lao neganai, ena moale be bada, bona ia ura ta ese ia dekenai Baibel stadi ia karaia noho. Ia goada ia lao haraga bona daudau lasi murinai bapatiso ia abia.

Daniel ena tamana be ia badu lasi, to ena gaukara bona ena tomadiho karadia ia laloa bada. To, nega ta ai, iena hahine bona Daniel be motuka amo ia abidia lao distrik hebouhebou ta dekenai. Unai be July 14 ai, bona ia laloa siti dekenai Bastille Dinana ena moale karana do ia raraia. Ia naria noho lalonai, ia be hebouhebou gabuna dekenai ia vareai ia itaia totona. Iehova ena taunimanima be idia regerege bada lasi bona maino dekenai idia noho dainai ia hoa, bona hebouhebou ena dipatmen ta ta dekenai ia lao neganai, iboudiai ese idia gwauraia “tadikaka.” Vadaeni, Bastille Dinana ena moale karana ia laloaboio bona hebouhebou gabuna dekenai ia noho ela bona ia ore. Ia gwau ia ura ta ese ia dekenai Baibel stadi do ia karaia bona karaharaga hereva momokani dekenai ia goada ia lao. To, ena diba ia bada ia lao neganai, ena gaukara dainai ena lalona ia hekwarahi, vadaeni, ena lagani be 58 neganai, ena gaukara ia rakatania. Hari inai negai, unai ruma bese taudia toiosi idia gwauhamata bona bapatiso idia abia vadaeni, bona lalo-tamona dekenai Iehova ena hesiai gaukara idia karaia.

Baibel ena hereva momokani dainai Daniel ena ruma bese idia lalo-tamona. Bema unai hereva momokani idia diba bona mai edia kudouna ibounai ida idia badinaia, ruma bese ma haida be unai lalo-tamona idia davaria diba danu.