Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w94 4/15 rau 3-4
  • Taunimanima Edia Hahekau Ia Hegeregere Lasi A?

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Taunimanima Edia Hahekau Ia Hegeregere Lasi A?
  • 1994 Gima Kohorona Iehova Ena Basileia Ia Harorolaia
  • Inai Bamona Atikol
  • Hahekau Namona be Edeseniai Oi Davaria Diba?
    1994 Gima Kohorona Iehova Ena Basileia Ia Harorolaia
  • Baibel Henanadai Edia Haere
    Gima Kohorona Iehova Ena Basileia Ia Harorolaia (Pablik)—2016
  • Gau Ibounai Dekenai Dirava Ena Hakaua Herevadia Ita Badinaia
    2008 Gima Kohorona Iehova Ena Basileia Ia Harorolaia
  • Dahaka Dainai Mauri be Hekwakwanai amo Ia Honu?
    Dahaka Dainai Mauri be Hekwakwanai amo Ia Honu? (KN34)
Ma Haida Itaia
1994 Gima Kohorona Iehova Ena Basileia Ia Harorolaia
w94 4/15 rau 3-4

Taunimanima Edia Hahekau Ia Hegeregere Lasi A?

DAIKA ese gau iboudiai ia havaradia? Bema emu haere be “Dirava ese,” oi be Baibel ese ia gwauraia Diravana momokanina idia abidadama henia taudia milion milion hegeregeredia oi haere unai.

To Dirava idia abidadama henia taudia momo be idia abia dae diba lasi Dirava be hari ia gaukara noho taunimanima edia hekwakwanai kokidia totona. Inai hereva ita abia dae be maoro a? Momo ese hamomokania gauna ta idia davaria lasi.

Lagani daha daha lalodiai, taunimanima ese Dirava ena heduru idia tahua lasi, to sibodia edia kara idauidau momo amo edia hekwakwanai kokidia dalana idia tahua. Idia davaria vadaeni a? Eiava hekwakwanai idia dika idia lao bona kokidia dalana ia auka ia lao, a? Hari inai negai idia vara hekwakwanaidia badadia be edena bamona idia kara henidia?

Diba tauna ta ia gwau: ‘Paoa masinidia idia karadia matama negana amo, taga besedia ese tanobada ena anina, hegeregere oela, auri, bona kapa bada herea idia gaukaralaidia, masini karadia bona haheaudia totona, unai amo tanobada idia hadikaia bona ogogami tanodia idia hametaudia.’

Taunimanima ese tanobada idia hadikaia noho. Argentina ena niuspepa ta ladana Clarín ia gwau: “Lagani 1950 murinai, moni bona kohu mataganigani henidia karana, naria namonamo lasi karana, bona kara kava dainai, dikadika badadia idia vara; idia dainai taunimanima idia mase bona tanobada bona ena anina idia dika bada herea.”

Toana be ogogami do ia noho hanaihanai. Taga tanodia danu be ogogami ena metau ena mamina idia abia. Toronto, Canada, ena niuspepa ta ladana The Globe and Mail ia gwau, idia laloa “Canada taudia iboudiai toi toi lalodiai ta ta do idia ogogami, edia lagani be hegeregere moni gaukarana do idia karaia negana lalonai.” Ma ia gwau, “Ogogami ena badina badana ta be ruma bese idia dika, bona vanegai idia ore laganidia ai inai hekwakwanai be ia bada ia lao.”

Drag ania kava karana be taunimanima idia dika idia lao toana ta. Unai hekwakwanai idia koua diba, a? Reana lasi. Taunimanima milion milion be drag idia ania kava dainai, edia tauanina, edia kwarana, bona edia kara idia dika. Inai hekwakwanai be ia bada ia lao haraga.

Ena be saiens taudia be edia gau matamatadia amo idia kwalimu loulou, to toana be gorere idia haoredia diba lasi. Saiens bona doketa taudia edia kara haida dainai gorere havaraia gaigaidia (maikrobi) matamatadia idia vara, muramura ese ia hamasedia diba lasi gaudia unai.

Taunimanima edia gavamani ese taunimanima hahisidia karadia idia koudia diba lasi. Ena be hegui hesiai gaukarana koua gwauhamatadia bona taravatudia momo idia karadia, to haida idia gwau tanobada hegegemadai taunimanima 100 milion mai kahana idia gaukara, hegui hesiai taudia idia gaukara bamona.

Badina be dahaka taunimanima edia hahekau be hegeregere lasi? Badina be idia mauri daudau lasi bona edia kastom eiava edia noho daladia dainai edia hahekau be mai hetoana. Edia diba danu be mai hetoana. Dahaka dahaka sisiba idia henia neganai, unai hetoana idia hedinarai. Aposetolo Paulo ia gwau: “Ita ibounai ita kara dika vadaeni, bona Dirava ena hairaina ita abia be hegeregere lasi.”​—Roma 3:23.

Momokani, taunimanima momo ese idia davaridia hekwakwanaidia momo edia badina be Dirava ena hahekau idia dadaraia. Unai hahekau be edeseniai ita davaria diba? Hari inai negai edena dala amo Dirava ese ita ia hakaua? Hereva gabena ese haere do ia gwauraidia.

    Hiri Motu Pablikeisen (1987-2026)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia