Hahekau Namona be Edeseniai Oi Davaria Diba?

“IEHOVA e, lau diba taunimanima ena dala be ia sibona lalonai lasi. Taunimanima ena raka be ia sibona ese do ia gwauraia hidi diba lasi. Iehova e, lau oi matahakani henia.”​—Ieremia 10:​23, 24.

Lagani 2,500 bamona gunanai Baibel torea tauna Ieremia ese unai hereva ia torea. Lagani daha daha ai taunimanima edia hahekau badinaia karana ese taunimanima edia noho ia hadikaia momokani. Unai ese Ieremia ena hereva ia hamomokania. To reana oi henanadai, oi gwau, ‘Hahekau namona be edeseniai ita davaria diba?’

Ieremia 10:​23, 24 ese hahekau bona sisiba, taunimanima edia idia hanaidia gaudia, ia henidia Tauna ia gwauraia​—taunimanima ia havaradia Diravana, Iehova unai. Ia ese edia toana bona idia abidia be namo gaudia ia diba momo, idia be unai idia diba sisina. To Dirava ia ura unai sisiba bona hahekau do ia henidia, eiava? Edena dala amo ia henidia? Hari inai negai unai ese ita ia durua diba eiava?

Dirava Ena Hahekau Ita Abia be Maoro

Taunimanima bona animal edia idau badana be inai: Taunimanima edia kwara haradia edia oromadia, edia siahu, bona edia gaukara daladia be idau, animal edia hegeregeredia lasi. Animal ta ia vara neganai, ena diba kahirakahira ibounai ia abia vadaeni, to taunimanima be unai bamona lasi.​—Hereva Lada-isidia 30:​24-28.

Dirava ese taunimanima be ura-kwalimu ia henidia, edia kwara haradia be dala matamatadia ai do idia gaukaralaidia, to animal be unai bamona lasi. Taunimanima be edia lalodia idia hadaidia diba, bona lalokau, hariharibada, sibodia edia namo tahua lasi karana, kara maoromaoro, bona aonega idia hahedinaraia diba.

Bema ta ia laloa Dirava ese taunimanima be unai ura-kwalimu ia henidia to gaukaralaia dalana ia sisibalai henidia lasi, ena lalohadai be maoro a? Dirava ese taunimanima ginigunadia ia hakaudia. (Genese 2:​15-17, 19; 3:​8, 9) Idia kara dika murinai danu, Iehova ese kamonai taudia be iena Hereva, Baibel amo ia hakaudia noho. (Salamo 119:105) Unai dainai, taunimanima be edia ura-kwalimu aonega dalanai idia gaukaralaia neganai, dina dina iboudiai idia davaridia hekwakwanaidia idia kara henidia diba mai edia kwalimu ida.

Dirava ese Baibel Ia Havaraia

Dahaka dainai Baibel ena hahekau be namo? Badina be ia lalonai be gau iboudiai havaradia Diravana sibona ese ia halasia diba herevadia. Lagani momo herea idia do noho ela bona taunimanima ia karadia negana lalonai idia vara gaudia ia gwauraidia. Hegeregere, Dirava ese tanobada ia hegaegaelaia taunimanima do idia noholaia totona sivaraina ia gwauraia. (Genese, karoa 1, 2) Ena be inai sivarai be Baibel lalonai idia torea negana amo ema bona hari lagani 3,000 mai kahana idia ore, to ia be hari inai negai idia noho saiens taudia edia hereva hegeregeredia.

Nega daudau ia do noho ela bona taunimanima momo idia abia dae tanobada be kuborukuboru neganai, Baibel ia gwau: “[Dirava] ese not kahana ia haroroa, gabu gagaena ataiai; tanobada ia ese ia atoa, gau ta latanai lasi.” (Iobu 26:7) Ma ia gwau: “Tanobada kuboruna ataiai [Dirava] ia noho, bona noholaia taudia ia itadia, edia ita-itana be kwadi bamona.” (Isaia 40:22) Gau iboudiai havaradia Diravana sibona ese unai ia gwauraia diba.

Nega vairai do idia vara gaudia dibadia guna siahuna be Dirava ese taunimanima ia henidia lasi. To Baibel amo ia ese unai gau ia gwauraidia guna. Peroveta tauna Isaia ena amo ia gwau: “Lau be Dirava, Dirava idauna ta be lasi bona ta be lau hegeregerena lasi. Matamana negana ai dokona lau gwauraia, bona nega gunadia ai idia do vara lasi gaudia lau gwauraidia guna.”​—Isaia 46:​9, 10.

Baibel ese ia hahedinaraia vadaeni, matamana negana ai dokona ia gwauraia goevagoeva diba. Tanobada basileiadia mai siahudia edia matamadia, edia dokodia, bona edia toadia idauidau lagani daha daha lalodiai be ia perovetalaidia. Lagani handred handred eiava lagani daha rua bamona idia do noho ela bona inai peroveta herevadia edia anina ia vara neganai, idia toredia guna. Baibel ese hari inai negai idia vara gaudia bona edia dokona negana ia perovetalaidia goevagoeva. Aramagedono, ‘Siahu Ibounai Diravana ena Dina Badana tuarina’ ai, taunimanima edia gavamani hadikadia ore karana amo do ita roho mauri dalana be Baibel sibona ese ia gwauraia. Dirava ena Basileia, iena Natuna Iesu Keriso ena imana ai, ese unai gaukara badana do ia karaia.​—Apokalupo 16:​14, 16; 17:​9-18; Daniel‚ karoa 2‚ 8.

Nega Ibounai Ia Namo Sibona

Taunimanima edia aonega be goevadae lasi, unai dainai ena be sisiba idia henia mai edia lalo-namo ida reana, to nega haida namo ia havaraia lasi. Baibel ena sisiba be unai bamona lasi. Dirava ia gwau: “Lau inai Iehova, . . . oi be sibomu do oi hanamoa dalana be oi lau hadibalaia, emu raka dalana namona dekenai oi lau hakaua. Egu hahegani bema oi kamonai henidia be namo! Bena emu maino be sinavai ida do ia hegeregere, bona emu kara maoromaoro be davara hurehuredia ida do ia hegeregere.”​—Isaia 48:​17, 18.

Dirava ena sisiba ese ita ia durua, mai anina bada gaudia do ita tahudia bona do ita badinadia totona. Taunimanima momo ese kohu bona tauanina gaudia idia lalodia bada bona idia tahudia goadagoada, to Baibel ia gwau namona be ‘matana idia itaia gaudia be do ita laloa lasi, to matana idia itaia lasi gaudia do ita laloa. Matana idia itaia gaudia be idia noho daudau lasi, to matana idia itaia lasi gaudia be nega hanaihanai do idia noho.’ (2 Korinto 4:18) Unai ese ita ia hagoadaia, mai anina bada gaudia do ita tahudia totona; hegeregere, lauma gaudia, Dirava ena ura, bona mauri hanaihanai kara maoromaoro tanobadana lalonai.

Keristen tauna be inai mai anina bada gaudia tahudia totona ia gaukara goada neganai, Baibel ena sisiba ese ia durua, inai nega dikana lalonai do ia noho namonamo totona. Hari inai negai taunimanima momo idia laloa gaukara sisina amo moni bada do idia davaria be aonega dalana. To Baibel ia gwau: “Mai ena imana manokana ida ia gaukara tauna do ia ogogami, to mai ena imana goadana ida ia gaukara tauna do ia taga.” Aposetolo Paulo ia gwau: “Aiemai lalona be maoromaoro Dirava ena vairanai. Ai ura be nega ibounai kara maoromaoro do ai karaia.”​—Hereva Lada-isidia 10:4; Heberu 13:18.

Baibel ese danu sisiba namona be ruma bese taudia ia henidia. Tau bona hahine edia maduna korikoridia edia headava lalonai be ia gwauraidia, bona edia natudia naridia bona hadibadia dalana maorona danu. Ia gwau: “Namona be tatau ese edia adavana do idia lalokau henia, idia edia tauanina idia lalokau henia hegeregerena. . . . Hahine danu iena adavana do ia matauraia. Memero bona kekeni e, umui emui tamana bona sinana do umui kamonai henia. . . . Tamana bona sinana e, emui natuna do umui habadua lasi, to Lohiabada ena hadibaia hereva idia dekenai do umui hadibaia.” Dirava ena sisiba hereadaena badinaia karana ese ruma bese taudia edia noho namo bona edia moale ia habadaia.​—Efeso 5:​21–6:4.

Dirava Ena Hahekau Badinaia Taudia Edia Vaira Negana Do Ia Namo

Dirava ese taunimanima edia hekwakwanai iboudiai do ia kokidia dalana be Baibel ese ia gwauraia. Nega daudau lasi murinai Iehova Dirava ese inai tanobada oromana dikana mai ena hisihisi bona mai ena kara gagevagagevadia do ia haorea vaitani, bena ena gabunai tanobada oromana matamatana mai ena kara maoromaoro do ia haginia. Petero Iharuana 3:​7-10 ai unai ia gwauraia, ma 2Pe 3 siri 13 ai ia gwau: “Dirava ese ia gwauhamata vadaeni guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” Inai be sivarai namo hereana taunimanima dekenai. Inai be Baibel ena sivarai, Iehova ena Witness taudia be tano bona motumotu 200 mai kahana lalodiai idia harorolaia sivaraina.

Tanobada ibounai lalonai Dirava ena ura do idia karaia neganai, taunimanima iboudiai ese namo do idia davaria, Iehova Dirava ena hahekau idia badinaia dainai. Ogogami, raskol karadia, bona drag ania kava karadia do idia doko. Gorere, buruka, bona mase ese taunimanima do idia hadikadia lou lasi. Taunimanima do idia goevadae, iseda tubudia roboadia be Dirava ena sisiba idia do dadaraia lasi neganai idia goevadae hegeregerena.

Apokalupo 21:​4, 5 ese Dirava ena hahekau idia abia dae taudia edia moale ia gwauraia, ia gwau: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” Bena hamomokanilaia herevana ia gwauraia, ia gwau: “Harihari be gau ibounai lau karaia matamata inai.” Ma ia gwau: “Inai hereva . . . be maoromaoro bona momokani.”

Dirava ia ura dahaka do ita karaia, inai hahenamo do ita abidia totona? Paulo ia gwau Dirava ena ura be “taunimanima ibounai ese mauri do idia davaria, bona hereva momokani do idia diba.” (1 Timoteo 2:4) Iehova ena Witness taudia ese oi idia noia, Baibel stadilaia namonamo karana amo hereva momokani do oi dibaia. Dirava ena ura tahua namonamo karana amo, oi danu do oi davaria diba Dirava ena aonega sibona ese ita ia hakaua namonamo diba, hari inai nega dikana ai. Nega ia kwadogi, unai dainai gau badana be Dirava ena hahekau oi badinaia!