Herahera Nadinadidia Idia Hereadia

Taunimanima momo ese inai bamona gaudia davara ai idia hoalaidia mai edia moale ida.

Davara negarina lalonai idia nahu taudia ese gwarume momo herea mai edia kala idauidau be idia itadia. To mani oi itaia, unai davara nadidia, gwarume be idia bogaragidiai idia rere gaudia, be mai edia hairai, edia kala idauidau dainai.

Unai nadi edia oromadia bona edia kala be idauidau momo. Idaunegai taudia danu ese idia lalodia bada, bona herahera nadidia mai hairaidia be idia karalaidia. Baibel torea taudia ese idia gwauraidia, golo, siliva, bona herahera nadinadidia idaudia ida. (Hereva Lada-isidia 3:​14, 15; Esekiel 27:16) Ita idia durua, unai nadinadi edia hairai bona edia davana idia hereadia gaudia do ita lalodia totona.

Idia hahedinaraia unai gau hereadaedia do ita lalodia bada be namo. Idia ta be ia gwau: “Gaukara diba hahinena be daika ese ia davaria diba? Ena namo ese herahera nadinadidia edia namo ia hereaia.” (Hereva Lada-isidia 31:10) Oi be headava tauna a? Mani inai davara nadidia oi itadia lou, bona oi laloa emu adavana be unai bamona oi laloa bada eiava.

Herevana ita be tatau o hahine o memero o kekeni, to inai nadi namo hereadia ita itadia neganai, namona be aonega, lalo-parara bona diba ita lalodia bada. Baibel ia gwau: “Aonega ia davaria tauna ese moale ia abia, bona lalo-parara ia abia tauna danu; badina be unai gau amo idia abia ahuna ese siliva amo idia abia ahuna ia hereaia, bona ena davana ese golo ia hereaia. Ena davana ese herahera nadidia edia davana ia hereaia, bona oi moalelaia gaudia iboudiai be ia ida do idia hegeregere lasi.”​—Hereva Lada-isidia 3:​13-15; 8:11.

Herevana hari nadi be davara lalonai ita itadia o foto ai ita itadia, to namona be edia hairai bona inai lalohadai namodia ita lalodia.