Tomadiho ese Oi Ia Durua Eiava?

HODAHODA, ranu, aniani, ruma​—taunimanima iboudiai idia diba unai gau do ita abidia be namo, do ita mase garina. To gunaguna, Israel gunalaia tauna Mose ese mauri durulaia gauna idauna ta ia herevalaia, aniani bona ranu ia hereadia gauna unai. Mose ia gwau: “Taunimanima be aniani sibona amo idia mauri lasi, to Iehova ena uduna amo idia lasi herevadia iboudiai amo danu.”​—Deuteronomi 8:​3.

Unai hereva dobudia amo, Mose ese ia hahedinaraia tomadiho ai o lauma dalanai ita abidia gaudia be mai anina bada, badina be idia dainai ita mauri diba! Lagani 40 lalodiai Israel taudia be tano gagaena ai idia laolao neganai, idia be “Iehova ena uduna amo idia lasi herevadia” amo idia mauri. Unai hereva bema lasi neganai, idia mase ore. Dirava ena hahegani dainai, aniani ladana mana be guba amo ia diho. Ranu be nadi amo ia aru lasi, edia inuinu gauna. Tauanina dalanai sibona lasi, to dala ma ta ai danu Dirava ese ia naridia. Mose ia gwau: “Tamana ese natuna ena matana ia hakania bamona, Iehova, emu Dirava, ese emu matana ia hakania.”​—Deuteronomi 8:​4, 5; Esodo 16:​31, 32; 17:​5, 6.

Dirava ese Israel taudia ia kahudia nege lasi, idia sibodia be dahaka be namo bona dahaka be kerere do idia lalohadailaia totona. Ia sibona ese ia hadibadia. Mose ena amo Taravatu ia henidia, unai amo aniani namonamo dalana, noho goeva dalana, bona kara maoromaoro bona tomadiho maoromaoro daladia ia hadibalaidia. Unai amo ia ese Israel be tauanina ai bona lauma ai ia hanamodia. Idia be “Iehova ena uduna amo idia lasi herevadia” amo idia mauri.

Unai dainai Israel be idau, bese haida hegeregeredia lasi. Mose ena negai Aigupito ena siahu be bada, bona unai tano ai tomadiho idia goadalaia. World Book Encyclopedia ia gwau: “Idaunegai Aigupito taudia idia laloa dirava idauidau ese gau iboudiai bona taunimanima edia kara iboudiai idia biagudia. Unai dainai dirava momo idia tomadiho henidia. . . . Aigupito ena hanua ta ta iboudiai lalodiai, sibodia edia dirava ta ta idia tomadiho henidia, bona dirava badadia danu.”

Unai tomadiho ese Aigupito taudia lauma dalanai ia durudia a? Lasi. Aigupito tanona be babalau karadia bona matabodaga karadia ai ia honu. Edia mauri dalana ese ia hamauridia lasi, to “gorere dikadia” ia havaradia. (Deuteronomi 7:15) Unai dainai Baibel ia gwau Aigupito ena dirava be kaivakuku “dika rohorohodia.”​—Esekiel 20:​7, 8.

Hari inai negai be unai hegeregerena. Ena be taunimanima momo be mai edia tomadiho bona idia gwau Dirava idia abidadama henia, to tomadiho ese taunimanima momo lauma dalanai ia durudia momokani lasi. Bema idia be momokani “Iehova ena uduna amo idia lasi herevadia iboudiai amo” idia mauri, tuari, idau bese taudia badu henidia karana, hitolo bada, bona ogogami be hari inai negai do idia vara a? Lasi vaitani! To taunimanima momo be edia tomadiho haidaua dalana idia laloa lasi. Haida idia ura lasi tomadiho do idia herevalaia eiava tomadiho herevadia matamatadia do idia kamonaidia.

Unai hegeregerena, Ghana, West Africa ai, tau ta ese Keristen haroro tauna ta ia hamaoroa, ia gwau: “Lau laloa emai hahelaga taudia mai siahudia edia amo Dirava be sibona ia hahedinaraia ai Africa taudia dekenai, Iuda taudia edia peroveta taudia edia amo sibona ia hahedinarai henidia hegeregerena. Madi, ai Africa taudia haida be sibomai emai hahelaga taudia ai matauraidia lasi, to Iesu, Muhammad, bona ma haida ai herevalaidia.”

Africa besedia momo lalodiai, idia laloa Keristen tomadihona be tau kurokurodia edia tomadiho, dika momo ia havaraia gauna. To bema emu lalona oi koua, unai ese oi do ia durua, lauma dalanai oi do idia durua gaudia do oi abidia totona a? Africa taudia edia hereva ta be inai: “Ena be oi hitolo, to emu imana ruaosi be aniani disina lalonai oi atodia lasi.” Unai aniani dalana be hemataurai lasi dalana bona dika ia havaraia diba. To taunimanima momo ese edia tomadiho idia abia hidi, idia tahua namonamo guna dainai lasi, to sibodia edia ura o edia bese edia ura hegeregerena.

Emu tomadiho ese oi do ia durua momokani totona, namona be oi karaia mai emu “lalo-parara” ida. (Roma 12:1, NW) Oi abia hidi mai emu diba ida be namo. Africa ai tomadiho abia hidi dalana mani ita tahua. To hereva gabena be duahia taudia gabu iboudiai ese do idia moalelaia.

[Picture on page 3]

Mose ese ia hahedinaraia lauma dalanai ita idia durua gaudia ita abidia be mai anina bada

[Picture on page 4]

Kerisendom ena misinari taudia edia kara dainai, Africa taudia haida idia ura lasi Baibel ena hereva do idia kamonaia