Herevana Oi be Edena Bamona Oi Tomadiho, to Unai be Idau Lasi A?

DINA tubua ai dina ese Africa hanuana maragina ta ia raraia. Koura ta ai taunimanima be gaba idia botadia lalo-dika, ane idia abidia, bona imadia idia patapatadia mai moaledia ida. To unai be pati ta lasi. Sene dalanai idia tomadiho. To pentekostal dubuna lalonai tomadiho taudia be hoa karadia amo gorere taudia idia “hanamodia” bona idau gadodia ai idia hereva. Hanua ena duduna ai be tomadiho dalana idauna ma ta. Muesin ena gadona ese Muslim taudia ia boiridia do idia mai guriguri.

Oibe, Africa hanuadia momo lalodiai tomadiho daladia idauidau be momo herea. Gunaguna, nega daudau lalonai Africa taudia ese edia sene tomadiho daladia idia badinadia. Bena Kerisendom ena misinari taudia be European besedia idauidau edia tuari oreadia murinai idia ginidae, bona taunimanima iboudiai be “Keristen taudia” ai idia halaodia toho mai edia dagedage ida.

Unai dainai Africa taudia haida ese edia sene herevadia bona karadia be unai idia vareailaidia tomadihodia ida idia mikisidia. “Keristen” taudia momo ese babalau gaudia idia gaukaralaidia, ema bona hari. To Kerisendom ena misinari taudia ese Keristen tomadihona momokanina idia hahedinarai henidia maoromaoro lasi, bona badu idia havaraia. Unai dainai hari inai negai Africa taudia haida ese Baibel idia abia dae lasi.

To, “Keristen tomadihona” daladia idauidau be gabu momo ai idia badinadia. Vanegai, momo be pentekostal tomadiho oreadia ai idia vareai; abidadama amo idia hahemauri oreadia be idia momo daekau. Taunimanima momo ese unai orea idia ura henidia ena badina be niuspepa torea hahinena ta ese ia herevalaia, ia gwau: ‘Africa taudia idia laloa edia ura gaudia be edia tomadiho amo do idia abidia diba be namo. Bema Africa tauna ta ia laloa gau iboudiai lalodiai lauma gaudia do ia gaukaralaidia be namo, lauma [abidadama amo hahemauri] tomadiho oreadia edia gaukara dalana be ena mauri dalana hegeregerena.’ To, madi, pentekostal tomadiho oreadia momo be bisinesi hegeregeredia idia haginidia.

Hari inai negai, tomadiho oreadia 6,000 mai kahana be Africa ai idia gaukara. Reana oi laloa unai tomadiho oreadia iboudiai ese hahemauri dalana idia kehoa. To henanadai badana be inai, Dirava ese edena bamona ia lalodia?

Dirava ese Tomadiho Iboudiai Ia Moalelaidia A?

Momokani, guba bona tanobada ia karadia Diravana ese unai ita ia hadibalaia be namo. (Amos 3:7; Kara 17:​26, 27) Bona gau momo ese idia hahedinaraia Baibel lalonai ita ia hadibaia. Ena be haida ese Baibel be tau kurokurodia edia buka idia gwauraia, to tau ta lasi​—koremana o kurokurona​—ese ia havaraia. Timoteo Iharuana 3:16 ia gwau: “Buka Helaga ena hereva ibounai be Dirava ena Lauma ese ia havaraia.” Baibel ena hahediba herevadia be momokani, ia be idaunegai gauna, ena be idia hadikaia ore toho to ia boio lasi, ena peroveta herevadia iboudiai be maoro, bona tanobada hegegemadai momo herea idia halasidia​—unai ibounai ese ia hahedinaraia goevagoeva Dirava ese ia havaraia.

Unai buka ese ita dahaka ia hadibaia? Ita ia hamaoroa “Dirava momokani” be tamona. (Ioane 17:3) Unai hegeregerena, hereva momokani be tomadiho iboudiai lalodiai ia noho diba lasi, ani? Dirava be daika bona ena kara be edena bamona be tomadiho oreadia ese idia hepapahuahulaia ani? Baibel torea tauna Iakobo ese tomadiho “goevagoeva bona momokani” ia herevalaia. (Iakobo 1:​27) Bema tomadiho momokanina ita dibaia be namo, anina be tomadiho koikoi danu ia noho. Inai ese ia hahedinaraia tomadiho haida be Dirava kahirakahira lao henia daladia lasi.

Dirava ena Tomadiho Taravatudia

Dirava tomadiho henia dalana maorona be dahaka? Baibel ia gwau tomadiho momokanina ena badina be diba maoromaoro. Peroveta tauna badana Iesu Keriso ese Samaria hahinena ta ia hamaoroa, ia gwau: “Umui tomadiho henia tauna be umui diba lasi.” (Ioane 4:22) Reana oi be unai bamona a? Oi idia hadibaia vadaeni Siahu Ibounai Diravana ena ladana be Iehova, a? (Salamo 83:18) Iena palani taunimanima bona tanobada totona be oi diba a? (Mataio 6:​9, 10; Efeso 1:​9, 10; 3:11) Emu tomadiho dainai oi be mai emu helaro korikorina nega vaira ena, a? Bema oi laloa oi be Keristen tauna ta, oi abidia dae herevadia be Baibel amo oi gwauraidia diba a, eiava idia be emu tamana sinana edia amo oi abidia herevadia, oi tahudia namonamo lasi herevadia, a?

Bema diba maoromaoro ai oi dabu, Dirava ena Hereva, Baibel, tahua karana amo do oi abia diba. Iehova Dirava ia ura ia idia tomadiho henia taudia momokanidia be unai Buka Helaga ena hereva do idia diba. Bona ia ura edia mauri lalodiai do idia badinaia. Namona be iseda lalohadai be salamo torea tauna ena hegeregerena ai do ia lao; ia gwau: “Emu hereva be lauegu aena ena lamepa, bona egu dala ena diari.” (Salamo 119:105) Emu tomadiho ese oi ia durua dainai Baibel oi diba bona oi lalo-pararalaia, eiava lasi?

Tomadiho momokani ena kahana badana ma ta be Iesu Keriso abidadama henia karana; anina be ita abia dae ia be peroveta tauna badana mo sibona lasi, to ia be Dirava ena Natuna, ia sibona ese ia havaraia Tauna tamona. Baibel ese ia hahedinaraia goevagoeva Iesu be “mauri ia havaraia Tauna.” (Kara 3:15; 4:12) Momo idia gwau Iesu idia abidadama henia, to edia abidadama be momokani eiava? Keriso ia abidadama henia momokani tauna ese ena hahegani ia badinadia. Dirava ia gwau: “Inai be lauegu Natuna. Lau lalokau henia, umui kamonai henia.” (Mareko 9:7) Unai dainai tomadiho momokani taudia be Iesu ena aena gabudia ai idia raka namonamo toho. (1 Petero 2:​21) Haroro gaukarana idia karaia, ia ese ia hamatamaia gaukarana unai. (Mataio 4:17; 10:​5-7) Emu tomadiho ese oi ia hagoadaia unai gaukara do oi karaia totona, a?

Lalokau danu be tomadiho momokani ena kara korikorina ta. Baibel ia gwau Iehova Dirava be lalokau, bona Iesu ese ena orea taudia ia hamaorodia, do idia lalokau heheni dainai taunimanima do idia diba idia be iena hahediba taudia. (Ioane 13:​34, 35; 1 Ioane 4:8) Hari inai negai taunimanima milion momo idia gwau idia be Keristen taudia, unai dainai tanobada be lalokau ai ia honu be namo, ani? To, madi, tanobada ai lalokau be lasi. Tuari dainai taunimanima milion momo idia mase. Taravatu utua karadia bona dagedage karadia idia momo daekau. Vadaeni, mani sibomu oi henanadai, ‘Bema iboudiai ese egu tomadiho idia badinaia, tanobada ai lalokau do ia bada, eiava?’

Ma Baibel ese ia hahedinaraia, namona be tomadiho momokani taudia be tanobada, Dirava ia diba lasi gauna, amo do idia gini siri. Gunaguna Dirava ese Israel besena na tomadiho goevana naria taudia ai ia halaodia neganai, ia sisiba henidia, idia gegedia besedia dikadia ida do idia hebamo heheni lasi. (Deuteronomi 7:​1-6) Unai hegeregerena, Ioane 17:​16 ai Keriso Iesu ese ena hahediba taudia ia gwauraidia, ia gwau: “Idia be tanobada ena lasi, lau hegeregerena, lau be tanobada ena lasi.” Dirava idia tomadiho henia mai edia momokani ida taudia ese politik karadia, matabodaga karadia, mataganigani bisinesi karadia, eiava Dirava ena ladana hadikaia karadia, be idia karaia lasi. (Ioane 18:36; 1 Ioane 2:​15-17) Roma 12:2 ena hahegani idia badinaia: “Inai tanobada taudia edia kara bamona do umui karaia lasi.” Emu tomadiho ese oi ia hagoadaia unai hahegani do oi badinaia totona, a?

Heduru Oi Abia Diba

Oibe, Dirava ese emu tomadiho dalana ia laloa. Ia vairanai tomadiho momokanina be tamona mo. (Efeso 4:​4-6) Baibel ena hereva badadia haida ai gwauraidia vadaeni. Ma haida do oi dibadia toho be namo, ani?

Herevana emu tomadiho dalana be dahaka, Iehova ena Witness taudia ese oi idia durua diba. Tanobada hegegemadai Baibel idia hahedibalaia. Bese idauidau taudia bona tomadiho idauidau taudia iboudiai idia durudia toho, Baibel do idia lalo-pararalaia totona. (Hereva Lada-isidia 2:​1-6) Baibel idia gwauraia namonamo bukadia be idia halasidia. Do idia mai, emu ruma lalonai Baibel be oi do idia hadibalaia, davana lasi. Hari inai negai, tanobada hegegemadai, taunimanima milion milion be unai bamona idia hadibadia dainai namo idia davaria. Oi danu be unai namo do oi davaria be namo, ani? Unai be gau badana, badina be emu tomadiho dalana be mai anina bada.

[Picture on page 5]

Kerisendom ena misinari taudia ese Keristen tomadihona momokanina idia hahedinaraia maoromaoro lasi

[Picture on page 5]

Pentekostal oreadia momo be bisinesi bamona oreadia

[Picture on page 6]

Iesu abidadama henia karana be tomadiho momokani ena kahana badana ta

[Picture on page 7]

Baibel stadi amo Iehova ena Witness taudia ese taunimanima milion milion edia ruma ai diba maoromaoro idia hadibalaidia, davana lasi