Iehova Ena Witness Taudia Idia Gima Noho Ena Badina
“Umui gima noho, badina be emui Lohiabada do ia mai negana be umui diba lasi.”—MATAIO 24:42, NW.
BAIBEL ena hahegani, “Umui gima noho,” be mai anina Dirava ena hesiai taudia iboudiai dekediai, herevana idia matamata o idia buruka, eiava vanegai sibona Dirava idia gwauhamata henia o lagani momo lalodiai iena hesiai idia lao henia vadaeni. (Mataio 24:42, NW) Dahaka dainai ia be mai anina bada?
2, 3. (a) Iesu ese dahaka toa ia gwauraia, bona ena hereva hegeregerena idia vara gaudia ese dahaka idia hahedinaraia? (b) Mataio 24:42 ai dahaka ia gwauraia, bona unai ese eda abidadama ena momokani be edena bamona ia tohoa?
2 Iesu be mai Basileia siahuna ida ia noho hehuni negana toana be ia ese ia perovetalaia goevagoeva, bona ena hereva hegeregerena idia vara gaudia ese idia hahedinaraia lagani 1914 ai Pavapava siahuna ia abia guba ai. (Mataio, karoa 24 bona 25) Ia ese danu iseda abidadama ena momokani do ia tohoa gauna ta ia herevalaia. Hisihisi bada hereana neganai kara dika taudia edia davana do ia henidia negana ia herevalaia, ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.” Unai ia laloa bena ia gwau: “Umui gima noho, badina be emui Lohiabada do ia mai negana be umui diba lasi.”—Mataio 24:36, 42, NW.
3 Hisihisi bada hereana do ia matamaia dinana bona horana be ita diba lasi dainai, bema ita gwau ita be Keristen taudia, namona be dina dina iboudiai Keristen taudia korikoridia hegeregeredia do ita noho. Oiemu mauri oi gaukaralaia dalana dainai, hisihisi bada hereana do ia ginidae neganai Lohiabada ese oi do ia lalo namo henia a? Eiava, bema oi mase guna, oi do ia laloatao, badina be mai emu momokani ida Iehova ena hesiai oi lao henia ela bona oi mase, a?—Mataio 24:13; Apokalupo 2:10.
Hahediba Taudia Ginigunadia Idia Gima Toho
4 Iesu Keriso ena haheitalai be hereadae, badina be lauma dalanai ia gima noho. Ena Tamana ia guriguri henia loulou mai ena goada ida. (Luka 6:12; 22:42-44) Hedibagani idauidau ia davaridia negadiai, Buka Helaga ena hahekau dekenai ia tabekau momokani. (Mataio 4:3-10; 26:52-54) Iehova ese ia henia gaukarana amo ta ese ia veria siri diba lasi. (Luka 4:40-44; Ioane 6:15) Sibodia be Iesu ena orea idia gwauraia taudia be unai bamona idia gima noho eiava?
5. (a) Dahaka dainai Iesu ena aposetolo be nega haida idia gini goada lasi? (b) Ia toreisi lou murinai, Iesu ese dahaka heduru ia henidia?
5 Nega haida Iesu ena aposetolo idia gini auka lasi. Gau haida idia lalohadailaidia kerere dainai, gabeai idia lalohisihisi. (Luka 19:11; Kara 1:6) Iehova dekenai idia do tabekau momokani lasi neganai, hedibagani idia davaridia haraga neganai idia daradara. Haida ese Iesu idia dogoatao neganai, ena aposetolo idia heau oho. Unai hanuaboi ai, nega toi Petero ese Iesu ia gorea, ia gari dainai. Aposetolo ese Iesu ena sisiba idia do laloa bada lasi; ia gwau: “Umui gima noho bona umui guriguri loulou.” (Mataio 26:41, 55, 56, 69-75, NW) Ia toreisi lou murinai, Buka Helaga ia gaukaralaia, edia abidadama hagoadaia totona. (Luka 24:44-48) Bona toana be idia haida ese Iesu ia henidia gaukarana do idia tahua guna lasi neganai, ia hagoadadia, unai mai anina bada gaukarana do idia tahua guna totona.—Ioane 21:15-17.
6. Guna, Iesu ese edena idoa rua be ena hahediba taudia ia sisibalai henidia?
6 Guna, Iesu ese ena hahediba taudia ia hamaorodia idia be tanobada ena lasi. (Ioane 15:19) Ia sisiba henidia ta ese ta do ia biagua lasi, to tadikaka hegeregeredia do idia gaukara hebou. (Mataio 20:25-27; 23:8-12) Ena sisiba idia badinaia a? Ia henidia gaukarana idia tahua guna a?
7, 8. (a) Keristen taudia ginigunadia edia sivarai ese edena bamona ia hahedinaraia Iesu ena sisiba idia badinaia? (b) Dahaka dainai lauma dalanai idia gima noho be mai anina bada?
7 Aposetolo idia do mauri noho negana lalonai, ekalesia idia naria noho. Idaunegai sivaraidia ese idia hahedinaraia Keristen taudia ginigunadia be Roma Basileiana ena politik ai idia vareai lasi bona edia orea ena dagi taudia ese sibodia idia abidia isi lasi. Idia be Dirava ena Basileia harorolaia goadagoada taudia. Lagani 100 C.E. vairanai, Roma Basileiana ibounai lalonai idia haroro vadaeni; Asia, Europe, bona North Africa ai taunimanima be hahediba taudia ai idia halaodia vadaeni.—Kolose 1:23.
8 Ena be unai haroro gaukarana badana ai idia kwalimu, to lauma dalanai do idia gima noho be do mai anina bada idia dekediai. Iesu do ia lou mai negana be do daudau. Bona lagani 100 C.E. murinai, Keristen taudia edia abidadama idia hadikaia diba gaudia idia vara.
Idia Gima Noho Lasi Taudia
9 Ekalesia ai idia vareai taudia haida ese edia lalohadai be Greek aonega herevadia amo idia gwauraidia, tanobada taudia ese do idia abidia dae haraga totona. Bena, tomadiho koikoi herevadia, hegeregere, Toi Tamona Diravana herevana bona mase diba lasi laumadia herevana, be idia abidia dae dainai, lagani 1,000 helarona idia haboioa. Badina be idia laloa edia tauanidia do idia mase murinai edia lauma ese Keriso ena Basileia ena hahenamo be lauma gabunai do idia abidia. Unai dainai idia laloa do idia gima noho bona Keriso be Basileia siahuna ai do ia mai negana do idia naria noho be anina lasi.—Galatia 5:7-9; Kolose 2:8; 1 Tesalonika 5:21 itadia.
9, 10. (a) Aposetolo idia mase murinai, dahaka ese ia hahedinaraia sibodia idia gwauraia Keristen taudia momo be idia gima noho lasi? (b) Edena siri inai paragraf ai ese ia durudia diba, lauma dalanai do idia goada noho totona?
10 Ma gau haida danu ese idia hakereredia. Tatau haida, sibodia idia gwauraia Keristen naria taudia, ese edia kongregesen idia gaukaralaidia, ladana bada do idia abia totona. Idia gwau sibodia edia lalohadai bona edia hahediba herevadia be Baibel ena hereva ida idia hegeregere eiava idia hereadia. Dala ia hekeho neganai, unai ekalesia, dala maorona amo ia raka siri oreana, ese politikol gavamanina ena gaukara ia durua.—Kara 20:30; 2 Petero 2:1, 3.
Gima Namonamo Dainai Idia Vara Gaudia
11 Lagani handred handred lalodiai Roman Katolik Oreana ese kerere idauidau ia karadia, bena lagani 1500 C.E. murinai haida ese unai kerere idia hamaoromaorodia toho. To tomadiho momokanina idia lou henia lasi. Badina be dahaka?
11, 12. Dahaka dainai Protestan oreadia be tomadiho momokani idia lou henia lasi?
12 Ena be Protestan oreadia idauidau be Roma ena siahu henuna amo idia siri, to ena hahediba herevadia kereredia momo bona ena kara kereredia momo idia abidia hanai; hegeregere, tomadiho oreana ena dagi taudia bona orea taudia oredia hapararadia karana, Toi Tamona Diravana herevana, mase diba lasi laumadia herevana, bona mase murinai hisihisi ania ela bona hanaihanai herevana. Bona, Roman Katolik Oreana bamona, idia be do tanobada ena, bona politikol oreadia ida idia gaukara hebou. Unai dainai, Keriso be mai ena Pavapava siahuna ida do ia mai negana be idia laloa bada lasi.
13. (a) Dahaka ese ia hahedinaraia taunimanima haida ese Dirava ena Hereva idia laloa bada? (b) Lagani 1800 murinai, sibodia idia gwauraidia Keristen taudia haida ese dahaka idia laloa bada? (c) Dahaka dainai momo idia lalohisihisi?
13 To, Iesu ia gwau aposetolo do idia mase murinai, Basileia do idia abia taudia korikoridia (uiti bamona) bona Keristen koikoi taudia (ava dikadia bamona) do idia tubu hebou ela bona uiti utua negana. (Mataio 13:29, 30) Uma Biaguna ese uiti bamona ia lalodia taudia iboudiai be ita gwauraidia diba lasi. To lagani 1300 C.E. amo ela bona lagani 1600 C.E., tatau haida, ena be idia diba edia kara dainai reana do idia guidia o do idia hamasedia, to Baibel be edia bese taudia edia gado ai idia torea hanai. Taunimanima ma haida ese Baibel idia abia dae Dirava ena Hereva, bona Toi Tamona Diravana herevana idia dadaraia danu, idia gwau unai be Baibel ena hereva ta lasi. Haida idia gwau mase diba lasi laumadia herevana bona hel lahina ai hisihisi ania herevana be Dirava ena Hereva hegeregerena lasi. Bona lagani 1800 C.E. murinai, United States, England, Germany, bona Russia ai, Baibel idia tahua goadagoada dainai, orea haida idia gwau idia laloa Keriso ena lou mai negana be kahirakahira. To edia helaro momo dainai gabeai edia lalodia idia hisihisi. Badina be taunimanima dekediai idia tabekau bada bona Buka Helaga dekenai idia tabekau maragi.
Inai Idia Gima Noho
14 Bena, lagani 1870 ai, Charles Taze Russell bona ena bamona haida ese Baibel stadi oreana ta idia haginia, Allegheny, Pennsylvania ai. Baibel ena hereva momokanidia, idia abidia dae herevadia, momo be idau taudia ese guna idia davaridia herevadia, to idia stadi negadiai, hereva ta idia gwauraidia siridia iboudiai idia tahudia namonamo. Sibodia edia lalohadai hamomokania herevadia idia tahudia lasi, to unai siri iboudiai ida idia hegeregere lalohadaidia idia tahudia.
15. (a) Russell mo sibona lasi to ma haida danu ese dahaka idia lalo-pararalaia? (b) Dahaka ese ia hahedinaraia Bible Student taudia be idia hegeregeredia lasi?
15 Idia gunalaidia taudia haida edia lalodia idia parara Keriso be lauma ai do ia lou mai hehuni. Haida idia diba Keriso do ia lou mai, tanobada do ia gabua ore bona taunimanima iboudiai do ia hamasedia ore totona lasi, to tanobada besedia iboudiai do ia hanamodia totona do ia mai. Ma haida be guna idia diba Idau Bese Edia Nega be lagani 1914 ai do ia ore. To, Bible Student taudia, Tadikaka Russell idia bamoa taudia, be unai gau idia herevalaidia hebou sibona lasi, to unai hereva momokanidia be edia mauri lalodiai idia badinadia bona tano idauidau ai idia gwauraidia hedinarai badabada.
16. Lagani 1914 ai, dahaka dainai Tadikaka Russell ia gwau: “Hari be hetoho negana”?
16 To idia gima noho be namo. Badina be, ena be idia diba Baibel ena peroveta herevadia ese lagani 1914 idia duanaia, to idia diba goevagoeva lasi dahaka be unai lagani ai do ia vara. Unai ese ia tohodia. The Watch Tower, November 1, 1914 gauna ai, Tadikaka Russell ia gwau: “Namona be ita laloatao hari be hetoho negana. . . . Bema badina ta dainai ta ese Lohiabada bona ena Hereva Momokani ia rakatanidia bona Iena Gaukara dainai sibona ena ura ia dadaraia noho lasi, anina be ia ese Lohiabada ia laloa, Dirava ia ura henia dainai sibona lasi, to gau idauna ta dainai; reana ia laloa nega be kwadogi; ena gwauhamata Dirava dekenai be mai ena nega.”
17 Unai neganai haida ese Iehova ena gaukara idia rakatania. To A. H. Macmillan be unai bamona ia karaia lasi. Gabeamo ia gwau: “Nega haida aiemai helaro lagani ta dekenai ese Baibel ena hereva ena anina ia hanaia.” Vadaeni, dahaka dainai lauma dalanai ia goada noho? Ia gwau, ia diba “ia larodia gaudia idia vara lasi neganai, unai ese Dirava ena palani ia haidaua lasi.” Ma ia gwau: “Unai dainai lau diba, namona be eda kerere do ita gwauraidia hedinarai bona Dirava ena Hereva do ita tahua noho, lalo-diari abia totona.” Dirava ena Hereva ese unai Bible Student taudia edia lalohadai ia hamaoromaoroa neganai, unai idia abia dae mai edia lalo-manau ida.—2 Timoteo 3:16, 17.
18. Keristen taudia idia gima noho dainai, unai ese edena bamona ia durudia, tanobada amo idia gini siri totona?
18 Unai murinai idia gima noho be do mai anina. Idia diba Keristen taudia be inai tanobada ena lasi. (Ioane 17:14; Iakobo 4:4) Unai dainai, ena be Kerisendom ia gwau League of Nations oreana ese politikol dalanai Dirava ena Basileia ia hahedinaraia tanobada ai, to unai hereva idia abia dae lasi. To Keristen taudia edia noho siri karana idia lalo-pararalaia goevagoeva lasi, ela bona lagani 1939.
19. Orea ia gima noho dainai, kongregesen naridia dalana ai dahaka hahenamo idia vara?
19 Idia be mai edia pasto oreana lasi, to vouti amo idia abidia hidi elda taudia haida be idia laloa edia gaukara tamona be kongregesen lalonai haroro gaukarana. To orea naria taudia idia ura bada Baibel ena hereva hegeregeredia do idia karaia, unai dainai Buka Helaga ena hereva elda taudia edia gaukara dekenai idia tahua loulou, bena idia davaridia herevadia be The Watchtower magasin ai idia toredia. Baibel ena hereva hegeregeredia, kongregesen naridia dalana idia haidaua.
20-22. Orea ibounai be edena bamona idia hegaegaelaia, tanobada hegegemadai Basileia sivaraina harorolaia gaukarana do idia karaia guguru totona?
20 Orea ibounai idia hegaegaelaia, Dirava ena Hereva ese iseda nega totona ia gwauraia gaukarana do idia karaia guguru totona. (Isaia 61:1, 2) Iseda nega lalonai sivarai namona be edeseniai do idia harorolaia? Iesu ia gwau: “Sivarai Namo bese ibounai dekenai be do idia haroro henia guna.” (Mareko 13:10) Taunimanima edia matadia ai, unai gaukara karaia dalana be lasi.
21 To, ekalesia ena Kwarana, Keriso, idia abidadama henia dainai, hesiai tauna mai ena kamonai bona mai ena kara maoromaoro oreana taudia idia raka vaira. (Mataio 24:45) Iehova ena orea taudia ese do idia karaia gaukarana be idia hamaorolaidia mai edia kamonai bona mai edia goada ida. Lagani 1919 amo ema, ruma ta ruma ta gaukarana idia gwauraia momo. Idia momo ese idia davaria unai gaukara be auka idia dekediai. (Kara 20:20) To stadi herevadia, hegeregere, “Gari Lasi Taudia Idia Namo” (1919 ai) bona “Emu Lalona Do Ia Goada” (1921 ai) ese haida idia durudia, haroro gaukarana do idia karaia matamaia mai edia abidadama ida.
22 Lagani 1922 ai idia gwau, “Pavapava bona ena basileia, umui harorolaia, harorolaia, harorolaia.” Unai ese tadikaka ia hagoadadia, unai gaukara do idia laloa bada totona. Lagani 1927 amo, elda taudia haida, idia ura lasi Baibel ese ia gwauraia gaukarana do idia karaia taudia, edia dagi idia kokia. Unai neganai, Society ese ena gwaukau taudia ladadia pilgrim taudia be sekit ena haroro gaukarana naria taudia ai ia halaodia, bena ruma ta ruma ta gaukarana be pablisa taudia idia hadibalaidia. Haida mo be pioneer gaukarana idia karaia diba, to Saturday bona Sunday ai momo be daba momokani amo ela bona adorahi momokani idia haroro; dina tubua ai idia laga-ani sisina paraoa ania totona. Unai lagani be mai anina bada, badina be idia lalodiai Dirava ena orea ia goada ia lao, bona Iehova ese iena orea taudia ia hakaudia dalana bema ita laloa lou, unai ese ita ia durua bada. Hari ia do hakaudia noho, bona Basileia sivaraina namona harorolaia gaukarana be iena heduru amo do idia hagugurua mai edia kwalimu ida.
Oi Gima Noho Eiava?
23 Iehova ena hahekau ia badinaia dainai, iena orea ese ita ia hadibaia noho edena kara bona edena lalohadai be inai tanobada ena, badina be unai kara bona lalohadai bema ita abidia dae, inai tanobada do ia ore neganai ia ida do ita boio. (1 Ioane 2:17) Namona be ita ta ta ibounai do ita gima noho bona Iehova ena hahekau do ita badinaia. Iehova ese danu eda noho hebou dalana bona eda gaukara hebou daladia be ita ia hadibalaia. Iena orea ese ita ia durua dainai, Keristen lalokauna ena anina ita laloa bada. (1 Petero 4:7, 8) Ita gima noho, anina be inai sisiba ita badinaia mai eda momokani ida, herevana ita goevadae lasi.
24, 25. Edena dala amo ita gima noho be namo, bena nega vairai dahaka do ita davaria diba?
24 Hesiai tauna mai ena kamonai bona mai ena kara maoromaoro ese ita ia hamaoroa loulou, ia gwau: “Iehova oi abidadama henia mai emu lalona ibounai ida, bona oi sibomu emu lalo-parara oi abidadama henia lasi.” (Hereva Lada-isidia 3:5) “Nega ibounai do umui guriguri.” (1 Tesalonika 5:17) Ita ia sisiba henia, namona be Dirava ena Hereva hegeregerena iseda lalodia do ita hadaidia, bona unai hereva be ‘iseda aena ena lamepa bona eda dala ena diari’ ai do ita halaoa. (Salamo 119:105) Ita ia hagoadaia, Dirava ena Basileia ena sivarai namona harorolaia gaukarana, Iesu ese ia perovetalaia gaukarana, do ita tahua guna totona.—Mataio 24:14.
25 Oibe, hesiai tauna mai ena kamonai bona mai ena kara maoromaoro be momokani ia gima noho. Namona be ita ta ta ibounai danu do ita gima noho. Bena taunimanima ena Natuna be hahemaoro davana henia totona do ia mai neganai, ia vairanai do ita gini mai eda maoro ida.—Mataio 24:30; Luka 21:34-36.
Inai Oi Laloa Lou
◻ Mataio 24:42 ena hereva hegeregerena, dahaka dainai do ita gima noho be namo?
◻ Dahaka dainai Iesu bona ena hahediba taudia ginigunadia be lauma dalanai idia gima noho diba?
◻ Iehova ena hesiai taudia idia gima noho dainai, lagani 1870 amo ema, dahaka dahaka idia vara?
◻ Dahaka ese do ia hahedinaraia ita ta ta ita gima noho?
1. Inai sisiba, “umui gima noho,” be mai anina daidia dekediai?
4. Iesu be lauma dalanai ia gima noho karana ese ita dahaka ia hadibaia?
14. C. T. Russell bona ena bamona be Baibel idia tahua dalana mani oi gwauraia.
17. Dahaka dainai A. H. Macmillan bona ia bamona taudia be lauma dalanai idia goada noho?
23. Keristen lalokauna ai bona tanobada amo gini siri karana ai, edena bamona ita hahedinaraia diba ita gima noho?
[Picture on page 23]
Iesu be ena Tamana ese ia henia gaukarana ia goadalaia. Ia guriguri goadagoada danu
[Picture on page 24]
Charles Taze Russell, ia buruka neganai
[Picture on page 25]
Tanobada hegegemadai taunimanima 4,700,000 mai kahana ese Basileia sivaraina idia harorolaia