‘Iesu Keriso be Lohiabada’—Edena Bamona Bona Edena Negai?

“LOHIABADA ese lauegu Lohiabada dekenai ia hamaoroa, ia gwau, ‘Lauegu idiba kahana dekenai oi helai. Ela bona oi dekenai idia tuari taudia be oiemu aena atoa gauna dohore lau halaoa.’ ” Taravatu Matamatana lalonai, Salamo 110:1 ena hereva be Kara 2:​34, 35 ai unai bamona idia torea hanai. Unai bamona ia hereva ‘Lohiabadana’ be daika, bona ia ese daika ia hereva henia?

Unai Salamo ena hereva be Mataio 22:44 ai idia torea hanai maoro dainai, henanadai ginigunana ena haere ita davaria haraga diba. Unai siri ia gwau: “Iehova ese egu Lohiabada dekenai ia hamaoroa . . . ” Ia hereva ‘Lohiabadana’ be siahu ibounai Diravana, Iehova. Inai daradara be gunaguna ia vara matama, badina be Septuagint Baibel be Heberu gado amo Greek gado ai idia torea hanai murinai, unai Baibel gabedia lalodiai dagi ladana “Lohiabada” be Dirava ena ladana korikorina יהוה (YHWH) ena gabunai idia torea. Diba tauna ta ladana A. E. Garvie ia gwau: “Inai lada Lohiabada [kyʹri·os] idia torea, badina be Iuda taudia edia dubu ai Buka Helaga idia duahia hedinarai negadiai idia hatoa, Dirava sibona ese ia hatoa ladana Yahveh [Iehova] be idia hatoa lasi.”

Baibel ese Iehova ia gwauraia “Siahu Ibounai Lohiabadana.” (Genese 15:​2, 8; Kara 4:24; Apokalupo 6:10) Ma ia gwauraia “Lohiabada korikorina” bona “tanobada ena Lohiabada.” (Esodo 23:17; Iosua 3:13; Apokalupo 11:4) “Lohiabada” ma ta, Salamo 110:1 ese ia gwauraia tauna, be daika, bona dahaka dainai Iehova ese ia gwauraia “Lohiabada”?

Iesu Keriso be “Lohiabada”

Evanelia haniosi lalodiai, Iesu idia hereva henia taudia ese idia gwauraia “Lohiabada.” Unai neganai, unai lada idia hatoa be hemataurai toana, “Tau badana” hegeregerena. (Ioane 12:​21; 20:​15) Mareko ena Evanelia ai, Iesu idia hereva henia negadia momo ai ena ladana idia hatoa, “Hadibaia tauna,” o Rabouni. (Mareko 10:51 be Luka 18:41 ida oi hahegeregerea.) Damaseko dalanai Saulo ena henanadai, “Lohiabada e, oi be daika?” be hemataurai herevana. (Kara 9:5) To Iesu murinai idia raka taudia ese edia Biaguna idia dibaia namonamo neganai, ena ladana idia hatoa “Lohiabada” be hemataurai toana sibona lasi.

Mase amo ia toreisi lou murinai to gubai ia do daekau lasi neganai, Iesu be ena hahediba taudia dekediai ia hedinarai, ia gwau: “Siahu ibounai guba dekenai bona tanobada dekenai be lau dekenai ia henia vadaeni.” (Mataio 28:18) Bena Pentekoste dinana ai lauma helaga ese Petero ia rohea neganai, Salamo 110:1 ia gwauraia, ma ia gwau: “Inai dekenai Israela bese taudia ibounai idia diba momokani be namo, inai Iesu, satauro dekenai umui hamasea tauna, Dirava ese Lohiabada bona Keriso ia halaoa vadaeni.” (Kara 2:​34-36) Iesu ese Dirava ia badinaia ela bona mase, unai dainai Dirava ese ia hatorea isi lou bona davana hereadaena ia henia. Guba ai lohia siahuna ia abia.

Aposetolo Paulo ese Petero ena hereva ia hamomokanidia, ia gwau Dirava ese “guba dekenai Keriso ia atoa, ia be Dirava ena idiba kahana dekenai ia helai. Keriso ese guba ena lohia taudia ibounai, gunalaia taudia ibounai, gavana taudia ibounai, bona siahu taudia ibounai ia ese idia ia hereaia. Iena ladana ese danu ladana ibounai inai tanobada mauri lalonai bona gabeai maurina lalonai danu ia hanaia momokani.” (Efeso 1:​20, 21) Iesu Keriso ena lohia dagina ese lohia dagidia iboudiai ia hereadia, bona nega matamatana ai danu unai dagi do ia dogoatao. (1 Timoteo 6:15) Dirava ese ia abia isi, “gabu bada herea momokani ia henia” bona “ladana ibounai ia hanaia” ladana ia henia, unai amo “taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.” (Filipi 2:​9-11) Salamo 110:1 ena kahana ginigunana ia momokani unai, bona “aneru bona lohia bona siahu taudia” be Iesu ena lohia siahuna henunai idia noho.​—1 Petero 3:22; Heberu 8:1.

Heberu Revarevadia ai, inai hereva “lohia edia Lohia” amo Iehova mo sibona idia gwauraia. (Deuteronomi 10:17; Salamo 136:​2, 3) To Dirava ena siahu amo Petero ese Keriso Iesu be “taunimanima ibounai edia Lohiabada” ia gwauraia. (Kara 10:36) Momokani, ia be “mase taudia bona mauri taudia edia [Lohiabada].” (Roma 14:​8, 9) Keristen taudia idia abia dae Keriso Iesu be edia Lohiabada bona edia Biaguna, bona idia badinaia, badina be ena rarana hereadaena amo ia hoidia. Bona Pentekoste 33 C.E. amo Iesu Keriso ese ena ekalesia ia lohiaia; ekalesia dekenai ia be pavapava edia Pavapava bona lohia edia Lohia. To lagani 1914 ai Dirava ese pavapava siahuna ia henia, unai dagi ai do ia lohia bona ena inai taudia be ‘ena aena atoa gauna’ ai do ia halaodia. Nega ia ginidae, idia ‘bogaragidiai do ia kwalimu,’ Salamo 110:​1, 2 ena hereva hamomokania totona.​—Heberu 2:​5-8; Apokalupo 17:​14; 19:16.

Iesu be ena mase vairanai ia gwauraia herevana, “gau ibounai be lauegu Tamana ese lau ia henia vadaeni,” ena anina be dahaka? (Mataio 11:​25-27; Luka 10:​21, 22) Evanelia Mataio bona Luka ese idia hahedinaraia, Iesu ese diba ia herevalaia unai. Unai diba be Dirava ese tanobada ena aonega taudia edia amo ia hunia, to Iesu ena amo ia hahedinaraia, badina be “Tamana ia diba” guguru. Ranu ai ia bapatiso bona Dirava ese ena lauma Natuna ai ia halaoa neganai, Iesu ese ena noho gunana guba ai bona unai neganai Dirava ese ia hamaoroa herevadia iboudiai be ia lalodia lou diba; to unai be idau, bona gabeai ia abia lohia siahuna be ma idau.​—Ioane 3:​34, 35.

Iesu Keriso Idia Gwauraia Lohiabada

Baibel haida ai, Heberu Revarevadia edia siri, “LOHIABADA,” Iehova Dirava, idia gwauraia siridia, be Keristen Greek Revarevadia ai idia toredia hanai neganai, hekwakwanai ta ia vara. Mani Luka 4:19 bona Isaia 61:2 oi itadia. Taunimanima haida idia gwau inai lada “Lohiabada” be Iehova ena amo ia hanai Iesu dekenai bona Iesu be tauanina ai ia noho neganai ia be Iehova, to Baibel ese unai ia hamomokania lasi. Baibel lalonai, Iehova Dirava bona ena Natuna, Iesu Keriso, idia haidaudia. Iesu ese ena Tamana ena ladana ia hahedibalaia bona ena ladanai ia gaukara.​—Ioane 5:​36, 37.

Inai Heberu Revarevadia siridia be Greek Revarevadia ai idia toredia hanai dalana be mani oi laloa. Kara 4:​24-27 ese Iehova Dirava bona ena Mesia, ia horoa tauna unai, ia gwauraidia; unai hereva be Salamo 2:​1, 2 amo. Roma 11:​33, 34 ese aonega bona diba ibounai be iena amo idia mai Diravana ia herevalaia bona Isaia 40:​13, 14 ena hereva ta ia gwauraia lou. Paulo ese Korinto taudia ia tore henidia neganai, unai hereva ia gwauraia lou, ia gwau: “Daika ese [Iehova] ena laloa ia diba?” Bena ia gwau: “To, ita be Keriso ena laloa ita abia vadaeni.” Lohiabada Iesu ese Iehova ena lalohadai mai anina bada gaudia momo dekediai be ia murinai idia raka taudia ia hahedinarai henidia.​—1 Korinto 2:16.

Heberu Revarevadia siridia haida ese Iehova idia herevalaia, to Ia ese goada bona siahu be Iesu Keriso ia henia dainai, unai siri edia anina be Iesu dekenai idia vara. Hegeregere, Salamo 34:8 ia gwau: “Umui mamia toho, bena do umui diba, Iehova be namo.” Petero ese Lohiabada Iesu Keriso unai bamona ia gwauraia, ia gwau: “Lohiabada ena bogahisihisi ena mamina umui abia vadaeni.” (1 Petero 2:3) Ia hahedinaraia unai hereva be momokani Iesu Keriso dekenai danu. Bema Iehova Dirava bona Iesu Keriso idia dibadia bona unai diba hegeregerena idia kara, Keristen taudia ese hahenamo badadia be Tamana bona Natuna edia amo idia abidia diba. (Ioane 17:3) Petero ena hereva ese ia hahedinaraia lasi Pavapava Badana, Lohiabada Iehova, bona Lohiabada Iesu Keriso be Dirava tamona.

Aposetolo Paulo ese Iehova Dirava bona ena Natuna, Iesu Keriso, edia dagi ia gwauraidia goevagoeva, ia gwau: “Ita be mai iseda Dirava tamona, ia be Tamana, gau ibounai ia dekena amo idia vara. Ia dainai ita mauri noho. Bona Lohiabada danu be tamona, Iesu Keriso. Ia ese gau ibounai ia karaia. Ia ese mauri ita dekenai ia henia noho.” (1 Korinto 8:​6; 12:​5, 6) Keristen kongregesen Efeso ai ia tore henia neganai, Paulo ese ‘Lohiabada tamona,’ Iesu Keriso, ia gwauraia idau, bona ‘Dirava tamona, ita ibounai eda Tamana’ ia gwauraia ma idau.​—Efeso 4:​5, 6.

Iehova ese Iboudiai Ia Hereadia

Lagani 1914 amo, Apokalupo 11:15 ena hereva ena anina ia vara: “Tanobada biagua siahuna be iseda Lohiabada [Iehova Dirava] bona ena Keriso idia abia vadaeni. Bona ia ese tanobada do ia biagua momokani ela bona hanaihanai.” The New International Dictionary of New Testament Theology (Buka 2, rau 514) ia gwau: “Keriso ese siahu ibounai do ia hadarerea murinai (1 Kor. 15:25), sibona be Tamana Dirava henunai do ia atoa. Iesu ena lohia siahuna ena anina do ia guguru vaitani, bona Dirava be gau iboudiai edia biaguna momokanina ai do ia lao (1 Kor. 15:28).” Ena Lohia Laganidia 1,000 negana dokonai, Keriso Iesu ese ena Tamana, Siahu Ibounai Diravana, ena amo ia abia goadana bona siahuna do ia haloudia. Vadaeni, hairai ibounai be Iehova, “iseda Lohiabada Iesu Keriso ena Dirava,” do idia henia bona ia mo sibona do idia tomadiho henia.​—Efeso 1:17.

Ena be hari inai negai Iesu be lohia edia Lohia, to Baibel ese ia na dirava edia Dirava ia gwauraia lasi. Iehova ese iboudiai ia hereadia. Inai dala ai, Iehova be “gau ibounai edia biaguna momokani do ia lao.” (1 Korinto 15:28) Iesu be mai ena lohia siahuna dainai ia be Keristen ekalesiana ena Kwarana ai ia lao be maoro. Ena be tanobada gavamanidia ai “lohia” mai siahudia be momo, to ita ese lohia edia Lohia ita abidadama henia noho. Ena be Dirava ese Iesu Keriso ia abia isi bona dagi badana ia henia, to Iesu be ena Tamana ena siahu henunai ia do noho, unai dainai Dirava be “gau ibounai edia biaguna momokani do ia lao.” (1 Korinto 15:28) Iesu ese lalo-manau ia hahedinaraia goevagoeva. Namona be ia murinai idia raka taudia ese ena kara idia tohotohoa bona idia abia dae ia be edia Lohiabada!

[Box on page 30]

“Taravatu Matamatana torea taudia ese Dirava idia gwauraia neganai, iseda Lohiabada Iesu Keriso ena Dirava bona ena Tamana idia gwauraia unai. Iesu Keriso idia gwauraia neganai, idia gwau lasi ia be Dirava bona unai idia laloa lasi danu. Ia be Dirava ena Keriso, Dirava ena Natuna, Dirava ena Aonega, Dirava ena Hereva. Ena be Evanelia Ioane ena Matamana Herevana ena toana be taina Nicene Hahediba Herevana bamona, to ta ese ia duahia neganai, namona be Evanelia ena hereva iboudiai ia lalodia, badina be idia hahedinaraia goevagoeva Keriso be ena Tamana ena siahu henunai ia noho.”​—“The Divinity of Jesus Christ,” John Martin Creed ese ia torea.