Abraham—Inisenai Idia Guria, To Ia Mauri Noho, A?

Lagani handred momo lalodiai, Iuda taudia, Muslim taudia, bona Keristen taudia be inai gabu dekenai idia mai.

Oi vadivadi henia diba, idaunegai idia haginia hanuana Heberona dekenai, Ierusalem ena amo saut kahanai. Unai gabu idia gwauraia Haram el-Khalil bona Iduhu Kwaradia edia Guria Gabuna. Oibe, taunimanima momo ese idia abia dae unai be iduhu kwaradia, Abraham, Isako, bona Iakobo idia guridia gabuna; edia adavadia Sara, Rebeka, bona Lea be unuseniai idia guridia danu.

Namona be oi laloatao, Baibel ia gwau iena lalokau adavana, Sara, ia mase neganai, Abraham be Heberona kahirakahira ai, Makapela tanona ta bona kohua ta ia hoia, mase guria gabuna totona. (Genese 23:​2-20) Gabeai, Abraham be unai gabu ai idia guria, bona iena ruma bese taudia haida danu. Lagani handred momo murinai, unai guria gabuna dekenai, Heroda Badana be ruma bada hereana ta ia haginia; gabeai, unai gabu dekenai idia kwalimu tuari taudia ese idia haidaua bona idia habadaia, idia abia dae tomadiho ena toana hegeregeredia.

Oi vareai neganai, cenotaph 6 oi itaia (unai be mase tauna ladana matauraia totona idia haginia gaudia eiava mase tauanina lasi guria gabudia). Laulau lalonai, Abraham natuna, Isako, totona idia haginia cenotaph be maua amo ai makaia. Ia kahirakahira ai be kohua ena henuna kahanai matu idia karaia, bona unai dala amo henunai gabu ai idia vareai diba. Unai gabu idia tahua taudia ese daiutu haida idia davaria, bona reana guna idia lalodiai be idaunegai idia mase taudia edia turia momo idia noho.

To Abraham be edena bamona? Bema unai gabu henunai ia noho kohua lalonai idia guria, ia be idaunegai ia mase vadaeni, ani? Vadivadi taudia momo be unai hereva do idia abia dae. To Abraham ia hereaia peroveta tauna ta ia gwau, dala idauna ta ai Abraham ia mauri noho. Edena bamona? Bona ena anina be dahaka emu abidadama dekenai?

Mani emu kara, “Emu Lalokau Mase Taudia​—Edeseniai Idia Noho?” (Rau 3) sivaraina oi duahia. Unai peroveta tauna badana ena hereva, Abraham ia mauri noho, ena sivarai ia gwauraia, bona unai hereva be mai anina bada oi bona emu ruma bese taudia dekenai.