Ia Parara Tomadiho Oreana—Ena Dika Ena Bada be Dahaka?

“IDIA be ruma bese badana ta taudia idia hoa neganai bamona, toana ia dika ruma gunana lalonai idia noho, bona ena vaira haba ia moru; daiutu iboudiai lalodiai idia helogohelogo bamona​—Iesu ladana idia gwauraia momo taudia be gaba idia botaia, bona silk dabua koremadia idia karaia England ena Katolik geli-geli tataudia idia boiboi henidia bada mai badu danu.”​—The Sunday Times, London, April 11, 1993.

Unai ruma besena be Church of England. Idia hepapahuahulaia gauna be inai: hahine be pris dagina idia abia diba eiava lasi. Atai paragraf lalonai ai gwauraia dalana ese idia parara karana ia haheitalaia namo herea, bona unai hereva be Kerisendom ibounai dekenai ia momokani danu. Orthodox Oreana edia hahelaga tatau badadia bona pope danu idia gwau hahine be pris dagina idia abia be namo lasi, unai dainai ripoti ta ia gwau, ia vara gauna anina be “Kerisendom ibounai ida do idia hebou tamona karana ena dala be ia koua noho.”

Tomadiho Oreana be Ia Parara Momokani, A?

Mataio 7:21 dekenai ita duahia, ia gwau taunimanima momo do idia gwau idia abidadama Iesu Keriso be edia Lohiabada, to iena ‘Tamana ena ura’ idia karaia lasi. Maclean’s magasin ia gwau: “Hahemauri idia tahua taudia be Mataio idia duahia neganai, madi, Dirava ena ura be dahaka idia daradaralaia, badina Keristen taudia, bona edia dubu oreadia, be unai kara dekenai hereva idauidau idia gwauraia.” Canada taudia idia henanadai henidia neganai, unai kara idia tahua taudia idia davaria “Canada ena Keristen taudia edia hahediba herevadia bona edia kara be idauidau​—tomadiho orea ta ta lalodiai edia hahediba hereva be idauidau bona momo herea, ena be tomadiho orea ta ena hahediba hereva be ma tomadiho orea ta ena amo ia idau, to unai be tomadiho orea ta ta lalodiai hahediba hereva bona lalohadai idauidau ena bada hegeregerena lasi.”

Taunimanima idia henanadai henidia neganai, ena be edia dubu orea ese ia taravatua, to Katolik taudia iboudiai amo 91 pesen idia gwau rogorogo lasi totona gau ta idia gaukaralaia be namo; 78 pesen idia laloa hahine be pris dagina idia abia be namo; bona 41 pesen idia gwau, “nega haida” bogana lalonai natuna hamasea karana be ia namo. Tomadiho orea idauidau lalodiai, “tomadiho ena hahediba dekenai henanadai momo” idia hepapahuahulaia dainai, Maclean’s magasin ia gwau, “tomadiho orea badadia idia parara ena badina ia hahedinaraia bada.”

Taravatu Idia Hagagevaia

Mauri ena kara goeva taravatudia idia hagagevaia, bona taravatu idaudia idia karaia danu. Taunimanima haida idia gwau Baibel ena taravatu idia badinaia, to ma haida ese idia utudia. Hegeregere, Metropolitan Church of Toronto lalonai, Idia Mahuta Hebou Hahinedia rua edia “headava” idia karaia be Dirava ena ura hegeregerena, a? Unai hahine rua be unai bamona idia laloa. Idia gwau, “Ai ura taunimanima vairadiai bona Dirava vairanai emai lalokau ai moalelaia.”

Niuspepa toretore tauna ta ia gwau, “ena be leta momo amo, Katolik bisop badana ta dekenai, memero ida idia mahuta hebou pris taudia edia kara idia samania, to unai pris taudia be ma dubu ta dekenai idia siaidia sibona, bona edia kara dika be dubu lalonai idia hesiai memerodia ma haida dekenai idia karaia.” Pris tauna Andrew Greeley ia laloa, pris taudia 2,000 ia lao 4,000 bamona be reana lagani maragi memerodia 100,000 bamona idia hadikadia, bona nega momo tomadiho orea ese gau ta ia karaia lasi.

Tomadiho orea ia parara neganai, ena taunimanima idia parara. Balkan gabudia ai, “Keristen” Serb taudia bona Croat taudia idia laloa Keriso be idia ida edia tuari “maorona” lalonai, bona ia ese ia durudia. Tuari lalonai, idia momo be korosi idia loalaia, bona ripoti ia gwau, ta be “nega ibounai tuari ia siahu momokani neganai, iena korosi be iena uduna lalonai ia dogoatao.”

“Umui Parara Lasi”

Momokani, Baibel ia gwau gau haida be ita sibona eda lalona ena mamina hegeregerena ita karaia diba, to ia gwau lasi ita parara diba. Aposetolo Paulo ena hereva ia hedinarai namonamo, ia gwau: “Umui parara lasi. Hereva tamona do umui gwauraia, bona do umui gaukara hebou mai laloa tamona danu.”​—1 Korinto 1:10; Efeso 4:​15, 16.

Aposetolo Paulo ese unai hereva ia torea negana amo, lagani daha rua murinai, “Keristen oreadia” edia kara ita tahua namonamo neganai, henanadai badadia idia vara. Dahaka dainai “Keristen” taudia idia parara momokani? Unai bamona tomadiho oreana ia parara neganai, ia gini noho diba, a? Keristen oreadia do idia lalo-tamona diba, eiava? Murina sivaraina ese unai henanadai edia anina do ia herevalaidia.

[Picture on page 3]

Bogana lalonai natuna hamasea karana idia dadaraia totona pris taudia ese badu idia hahedinaraia

[Credit Line]

Cover and above: Eleftherios/Sipa Press