Matadia Idia Kehodia Sivarai Namona Dekenai

“ENA be matakepulu tauna ese ia itaia diba lasi, to guba padana ena kala be bulu.” Unai be Denmark taudia edia hereva ta. Dina iboudiai ita bisi lalonai, guba padana ena kala ita itaia a? Ita laloa nega vairai namo do ia vara a? Dirava ena Hereva, Baibel unai, ese ia gwauraia sivaraina namona be ita abia dae momokani a?

Inai magasin ena hereva ginigunana ai, matakepulu ai herevalaia. To hari ita ese ita-ita dalana idauna mai anina bada do ita tahua. Ia dainai ita bona eda lalokau taudia do ita moale hanaihanai diba.

Momokani, hari inai negai “metau dikadia momo” ita davaridia. (2 Timoteo 3:1) Taunimanima be moni abia totona idia hekwarahi, bona gorere, ruma bese edia hekwakwanai, kara gagevagageva bona lalokau lasi karadia idia haheaukalaidia lalonai, dahaka ia vara? Madi, idia momo ese taunimanima, tomadiho, bona gavamani idia abidadama henidia lasi. Idia laloa idia hegeregere lasi edia hekwakwanai do idia kokidia. Brazil ena niuspepa ladana Jornal da Tarde lalonai, Jacob Pinheiro Goldberg ia gwau: “Idia vara kereredia dainai taunimanima edia lalodia idia hisihisi, unai dainai idia laloa namonamo lasi, bona babalau dekenai idia tabekau.” To kerere idia vara negadiai danu, do ita laloa namonamo be namo, ani?

Mani inai oi laloa: Bema oi ura ruma ta do oi hoia oi bona emu ruma taudia emui, bona bema ena davana oi laloa momo lasi, reana oi lao gabu idauidau, ruma idauidau itadia totona. Ena be ruma hoihoilaidia bisinesi taudia ese oi ura henia rumana idia tahua, to madi idia davaria diba lasi. To, emu ruma bese edia namo oi laloa dainai, oi do tahua noho, ani? Vadaeni, oi ura henia rumana be gabeai oi davaria neganai, emu moale be bada herea, ani?

Nega oi atoa ruma matamatana do oi davaria totona; unai hegeregerena, namona be Baibel oi tahua emu hekwakwanai kokidia dalana do oi davaria totona, ani? Ruma ita hoia gwauraia neganai gau idauidau ita lalohadailaidia namonamo; unai hegeregerena, Dirava ena Hereva lalonai ita duahia herevadia ita lalohadailaidia namonamo danu be namo. Ruma ita davaria ena namo be maragi, to Iehova Dirava bona Iesu Keriso herevadia momokanidia ita lalo-pararalaidia bona ita abidia dae ena namo be bada. Iesu ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.”​—Ioane 17:3.

To, bema Baibel ena hereva be mai anina bada, badina be dahaka taunimanima momo ese ena sivarai namona idia lalo-pararalaia lasi? Badina ta be “Satani ese tanobada taudia ibounai ia gunalaia noho.” (1 Ioane 5:19) Unai dainai ia ese “edia lalona ia hadiburaia. Vadaeni Keriso ena hairaina bona iena Sivarai Namona ena diari idia itaia diba lasi.” (2 Korinto 4:4) Eda matadia amo gau ita itadia, to kwara harana ese mata lalonai ia vareai diarina ena anina ia dibaia. Unai dainai, bema ta ena lalona ia parara diba lasi eiava ia ura lasi ena lalona do ia parara, ia be matakepulu tauna idia gwauraia.

Matakepulu tauna ese ia vairanai ia noho gauna ia itaia diba lasi, unai dainai reana bero do ia davaria. Matakepulu taudia momo edia matadia hanamodia dalana be lasi, to lauma dalanai edia matadia idia kepulu taudia iboudiai idia namo lou diba.

Lauma Matakepuluna Hanamoa Dalana

Miro ese mata ia hadikadia diba hegeregerena, kara miro taudia edia hebamo ese lauma matakepuluna ia havaraia diba. Bona Iesu Keriso ese taunimanima edia hahediba herevadia bona edia taravatu edia kerere ia sisibalaia. Ia hahedinaraia goevagoeva tomadiho gunalaia taudia iena negai ese taunimanima idia hakaudia kerere; ia gwau: “Idia be matakepulu taudia, bona matakepulu taudia idia hakaua lao noho. Bema matakepulu tauna ese matakepulu tauna do ia hakaua, idia ruaosi guri dekenai do idia moru.”​—Mataio 15:14.

Hahekau taudia matakepuludia ese idia koidia lasi to sibodia edia matadia idia kehodia Dirava ena Basileia ena sivarai namona do idia lalo-pararalaia totona taudia, be idia moale bada! Iesu ia gwau: “Kota henia totona inai tanobada dekenai lau mai vadaeni, unai dainai matakepulu taudia be edia matana do idia kehoa, bona matana idia kehoa taudia be edia matana do idia kepulu.” (Ioane 9:39) Lauma dalanai edia matadia idia kepulu taudia be edena bamona do idia itaia diba? Vadaeni, matakepulu korikorina do ita herevalaia lou sisina.

Hari inai negai matakepulu taudia durulaidia gaudia idauidau momo idia noho. To gunaguna be inai bamona lasi. Idia durudia toho momokani lasi, ela bona lagani 1784 ai Valentin Haüy ese sikuli ta ia haginia, matakepulu taudia edia. Gabeai, Louis Braille ese revareva idaudia ia lalodia davari, unai revareva amo matakepulu taudia be mai edia dala do idia duahiduahi.

Lauma dalanai idia matakepulu taudia be edena bamona? Lagani haida lalodiai Iehova ena Witness taudia be dala idia tahua goadagoada, sivarai namona be tanobada ena gabu daudaudia ai do idia harorolaia totona. (Mataio 24:14) Idia ese helaro namona be edia matadia korikoridia idia kepulu taudia bona lauma dalanai idia matakepulu taudia dekediai idia laohaia mai edia moale ida.

Brazil hahinena ta ia gwau: “Ena be egu matana idia kepulu, to lauma dalanai lau itaia diba. Dirava be namo herea! Ita moale, badina be ita diba ‘Iehova ese ena imana do ia kehoa, mauri gaudia iboudiai edia ura gaudia do ia henidia.’ ” (Salamo 145:16) Matakepulu tauna ta ladana Jorge ia gwau: “Egu mauri negana ena kahana ruaosi be inai: Witness taudia lau do diba lasi negana bona idia lau diba negana. . . . Idia dainai, tanobada ai idia vara gaudia lau itadia goevagoeva diba. Lau be kongregesen taudia iboudiai ida ai hetura heheni namo herea.” Unai sivarai be namo, to Baibel ena gwauhamata ese ia hereaia; ia gwau kahirakahira matakepulu tauna ta be lasi​—tauanina dalanai eiava lauma dalanai. Unai be edena bamona do ia vara? Inai hereva, “Iehova ese matakepulu taudia edia matadia ia kehodia” herevana, be edena bamona do ia momokani, tanobada ibounai lalonai?​—Salamo 146:8.

Do Ia Hanamodia Vaitani Gauna—Dirava Ena Basileia

Ena be doketa taudia edia diba be ia bada ia lao, to gorere idauidau ese matakepulu, hisihisi, bona mase idia havaradia noho. Dahaka ese malniutrisen bona miro, mata idia hadikadia bona moale idia koua gaudia unai, do ia haoredia diba? Iesu ese matakepulu taudia bona gorere taudia ia hamauridia neganai, dala maragina ai ia hahedinaraia ia be vaira negana ai dahaka do ia karaia. Ena hahediba bona ena hahemauri gaukaradia ese Dirava ena Basileia gavamanina henunai tanobada ibounai lalonai do idia vara hahenamodia idia hahedinaraidia.

Unai hahemauri negana be kahirakahira.a Aposetolo Ioane ese ia gwauraia, ia gwau: “Aneru ese mauri ranuna ena sinavai lau dekenai ia hedinaraia. Ia be galasi bamona ia diari, bona iena ranu be Dirava bona Mamoe ena Natuna edia helai gabuna badana dekena amo ia aru lao. . . . Sinavai ena kahana kahana be mauri auna ia gini. Inai mauri auna ese lagani ta lalonai huahua ia atoa nega 12, hua ta ta ibounai lalonai huahua ia atoa. Inai au ena rauna ese bese idauidau idia hanamoa noho.”​—Apokalupo 22:​1, 2.

Inai hereva, “mauri ranuna” bona “mauri auna,” ese idia hahedinaraia, hari inai nega dikana do ia doko murinai, Dirava ena Basileia ese taunimanima do ia hanamodia ela bona do idia goevadae. Iesu ena boubou, mauri davalaia boubouna, dainai, edia dika do ia gwauatao vaitani, bona Iesu Keriso bona ena Tamana do idia dibadia dainai, edia tauanina do idia goevadae bona mauri hanaihanai do idia abia.​—Ioane 3:16.

Moale, Dirava Ena Tanobada Matamatana Ai

Mani inai oi laloa: Raskol karadia, miro, bona ogogami do idia ore murinai, oi mai emu ruma bese ida be maino ai do umui noho diba, Paradaiso matamatana ai. (Isaia 32:​17, 18) Unai neganai taunimanima be edia lalodia bona matadia goevadaedia amo kala idauidau do idia itadia diba mai edia moale bada ida!

Faber Birren ia gwau: ‘Taunimanima edia noho korikorina lalonai, diari, kala, bona gau edia toadia idia senisi loulou. Tanobada ai idia noho gaudia edia toadia be tamona lasi, unai dainai ta ese ia hesikulaidia lasi. Gau momo be mai edia kala dainai, taunimanima be vaia kala idauidau idia moalelaidia.’

Taunimanima ese gau idia itadia diba be namo herea! Tauanina dalanai eiava lauma dalanai idia matakepulu taudia edia matadia do idia papa neganai, moale bada do ia vara!

Oibe, Paradaiso matamatana ai, matakepulu bona gorere idauidau ese lalohisihisi do idia havaraia lasi! Ta ese ma ta do ia hakaua kerere lou lasi. Lalokau korikori do ia bada, unai dainai lauma dalanai taunimanima iboudiai edia matadia do idia papa. Unai, bona ma gau momo, be nega daudau lasi murinai do idia vara, to hari, namona be do ita kara, Dirava ese ita do ia lalo namo henia totona. Iena gwauhamata, “Unai neganai matakepulu taudia edia matadia do idia papa,” be do ia hamomokania!​—Isaia 35:5.

[Footnotes]

[Picture on page 7]

Unai neganai matakepulu taudia edia matadia do idia papa!