Ethiopia Ena “Dirava Ena Hahediba” Hebouhebouna—Moale Bada Negana

IA BE gavamani ese ena taravatu ia kokia murinai Ethiopia ai idia karaia distrik hebouhebouna ginigunana lasi, to ia be idau. Ia be Iehova ena Witness taudia be Ethiopia ena steidiam bada hereana, City Stadium, lalonai idia hebou negana ihatoina, gavamani ese edia gaukara be November 11, 1991 ai idia gwaumaorolaia negana murinai. Program be dina toi lalodiai idia karaia, Thursday ela bona Saturday, January 13-15, 1994 ai, badina be steidiam be Sunday ai idia abia diba lasi bona gabu badana idauna ta idia davaria diba lasi.

Unai dina toi lalodiai dina ia siahu lasi bona guba padana ena toana be namo herea, bona hebou taudia ese “Dirava Ena Hahediba” amo lalo-diari idia abia danu. Platfom ena vairana kahana be palaoapalaoa amo idia haheraia bona hebouhebou ena sinado, Amharic revarevadia amo idia torea gauna, idia atoa.

To dahaka dainai hari hebouhebou be idau? Program namo hereana idia kamonai bona taunimanima iboudiai be inai danu idia laloa: Bese idauidau taudia be tadikaka bamona idia noho hebou mai edia lalokau ida, bona ia hedinarai goevagoeva Dirava ese ena orea taudia ia hanamodia, badina be Basileia gaukarana be ia bada ia lao. Taunimanima 270 be tano idaudia 16 amo idia mai; unai tano rua be Djibouti bona Yemen. Idia momo be keru gabudia, Europe bona North America, amo idia mai. Idia rua be Iehova ena Witness taudia edia Hakaua Oreana taudia, Lloyd Barry bona Daniel Sydlik.

Ena be vadivadi taudia be gado idaudia taudia, to Ethiopia taudia edia heabidae karana dainai bona edia tadikaka idia lalokau henidia bada dainai, idia moale hebou diba. Idia hedavari heheni negadiai, imadia idia udeudedia mo sibona lasi, to idia rosidia bona idia kisi henidia, nega 6 bamona! Vadivadi taudia momo idia diba edia tadikaka Ethiopia ai be hetoho idauidau, dibura bona dagedage karadia idauidau, idia haheaukalaidia vadaeni mai edia abidadama ida. To idia hoa, badina be memero kekeni momo idia itadia, idia moale bona idia hemataurai danu. Ethiopia taihudia momo ese dabua kurokurodia mai revarevadia idia hahedokilaidia, bona unai danu ese moale ia havaraia.

Friday ai bapatiso idia moalelaia. Idia gwauhamata matamata taudia 530, edia lagani be 10 ia lao 80, be laini latana ai idia gini, steidiam ena gadara gabuna ai. Unai idia hoalaia, badina anina be Ethiopia ena Witness taudia 7 7 amo ta ta ese bapatiso idia abia unai. Unai ese ia hahedinaraia goevagoeva Iehova ese ena orea taudia unuseniai ia hanamodia! Unai idia moalelaia bada dainai momo idia tai, bona edia moale habadaia gauna ma ta be Italy amo idia mai taudia 40 edia ane namona. Momo ese peroveta herevana Isaia 60:5 ai idia laloa: “Unai neganai do oi itaia, bena emu vairana do ia hairai, bona emu lalona do ia haragaharaga moale dainai; badina be davara ena anina be oi dekenai do ia mai; bese idauidau edia kohu be oi dekenai do ia mai.”

Inai Dainai Idia Moale Bada

Iehova ena hahenamo sivaraidia be Friday ai idia gwauraidia. Misinari taudia ginigunadia, lagani 1950 murinai bona 1970 murinai unuseniai idia haroro taudia, ese edia sivarai idia gwauraia hedinarai. Basileia gaukarana Ethiopia ai ena matamana maragina be idia sivarailaia. September 14, 1950 ai Addis Ababa ai idia ginidae taudia, Ray Casson, John Kamphuis, bona Haywood Ward, ese edia sivarai, Baibel hahedibalaia gaukarana sivaraina, idia gwauraia neganai, hebou taudia 8,000 mai kahana idia kamonai. Edia gaukara idia hamatamaia neganai, gavamani ia haganidia duahiduahi bona toretore bona ma gau haida be taunimanima do idia hadibalaidia. Unai dainai taoni ai sikuli ta idia haginia, tatau bona hahine be gau idauidau hadibalaidia totona. Sikuli ai idia gaukara lasi negadiai, Dirava ena hereva do idia hahedibalaia dalana idia tahua. Amharic gadona aukana mai ena leta 250 dibaia karana ai idia hekwarahi bada. Hua 6 idia ore murinai edia Baibel stadi ginigunana be ta ena ruma ai idia karaia. Hari hebouhebou ai edia Baibel stadi taudia gunadia momo idia hedavari henidia neganai, idia moale bada. Abidadama ai idia gini auka noho, bona lauma dalanai edia natudia bona tubudia ai idia lao taudia be idia dekediai idia hakaudia lao idia hedavari totona.​—1 Tesalonika 2:​19, 20.

Unai misinari taudia gunadia edia sivarai bona ma sivarai haida bona hahenamo herevadia, vadivadi taudia ese Britain, Canada, Germany, Israel, Italy, Kenya, Netherlands, bona United States amo idia mailaidia herevadia, be hebou taudia ese idia hakala henidia mai edia moale ida murinai, edia imadia idia patapatadia daudau. Unai danu ese ia hahedinaraia tanobada hegegemadai Dirava ena orea taudia be tadikaka bamona idia noho mai edia lalokau ida. Hebouhebou ena hereva badadia, Hakaua Oreana ena horoa taudia ese idia henidia herevadia, bona edia guriguri herevadia danu, be hebou taudia ese idia lalodia bada. Memero bona kekeni ese drama ta, edia Dirava idia laloatao memerodia bona kekenidia edia, be idia itaia neganai, idia laloa idia be unai bamona taudia. Buka matamatadia English gado ai bona ma toi Amharic gado ai idia halasidia negadiai, hebou taudia idia moale bada herea.a

Dina tubua ai bona nega idaudia ai danu, hebou taudia be mai edia dala, taunimanima namodia momo idia hedavari henidia. Idia ta be pablisa buruka hereana ta, ladana Tulu Mekuria. Lagani gunanai, ena lagani be 113 neganai, bapatiso ia abia bona Iehova ena Witness tauna ta ai ia lao. Hari hebouhebou ai ia moale, badina be ena adavana, lagani 80 hahinena, ese ena kara ia tohotohoa, unai amo lauma dalanai iena taihuna ai ia lao. Tulu be program negana ibounai lalonai ia helai, bona unai ese memero kekeni ia hagoadadia. Idia ta be Yohanes Gorems; ena lagani be 16 bona ia do sikuli, to idia hanai laganidia hani lalodiai regular pioneer gaukarana ia karaia. Ia bona ma pioneer taudia haida, ia murinai idia vara bona idia do sikuli noho taudia unai, ese nega idia atoa, sikuli ai idia lao negadiai, eiava dina tubua ai, bona sikuli horadia murinai do idia haroro totona.

Kara Maoromaoro Badinaia Taudia

Idia hebou taudia handred handred be gavamani gunadia ese dibura rumadia ai idia koudia bona idia hahisidia taudia. Mandefro Yifru be guna lagani ima dibura rumana ai ia noho, to hari ia be Addis Ababa ai opesi matamatana lalonai ia gaukara mai moalena ida. Ia ida ia gaukara hebou tauhauna ta, Zecarias Eshetu, ese kara maoromaoro ia badinaia noho. Lagani 8 gunanai ena tamana idia alaia mase, badina be lagani toi dibura rumana ai idia koua lalonai, Keristen taravatuna hegeregerena tanobada ena kara amo ia gini siri. Meswat Girma bona ena taihuna, Yoalan, lagani 20 idia do abia lasi bona idia do sikuli noho taudia, be idia maragi herea neganai, haida ese edia tamana idia alaia mase, badina be tanobada ena kara amo ia gini siri dainai. Iena foto sibona amo ia idia laloatao. Ena kara, Dirava badinaia karana, ese ia hagoadadia, unai dainai idia ruaosi be regular pioneer gaukarana idia karaia, edia tamana be ena mauri dokonai ia karaia hegeregerena.

Kara maoromaoro badinaia tauna ma ta be Tamirat Yadette, hari ia be special pioneer gaukarana ia karaia Rift Kourana ai. Keriso ena hahegani hegeregerena tanobada ena kara amo ia siri, unai dainai lagani toi lalodiai dibura rumadia idauidau 7 lalodiai idia koua, nega ta ta ai seini amo ena aena bona ena imana idia kwatudia bona idia dadabaia dikadika. To, dibura rumadia ai ia ese taunimanima 12 bamona ia durudia, Dirava ena Basileia do idia abia dae bona do idia badinaia totona.

Tesfu Temelso, hari sekit naria gaukarana ia karaia tauna, be guna special pioneer gaukarana ia karaia lalonai, nega 17 dibura rumana ai idia koua. Idia dadabaia dainai, ena kopina be do mai ena kipara, to ia moale, badina be guna ia gaukara gabudia ai kongregesen haida be hari idia noho. Akaki Kongregesen ena tadikaka bona taihu momo idia dagedage henidia bona dibura rumana ai idia koudia, to kongregesen ia bada ia lao, bona hari, pablisa be 100 mai kahana. Kingdom Hall ginigunana Ethiopia ai idia haginia. Not kahana hanuana ladana Dese amo Witness taudia ima idia mai. Guna haida ese idia hamasedia gwauraia bona edia tadikaka ta be hahisia karana dainai ia mase neganai unai idia itaia. Idia ta be Maseresha Kasa, elda tauna ta, lagani 6 lalodiai dibura rumana ai ia haheauka. Ia gwau Iehova dekenai ia tabekau dainai ia haheauka diba.​—Roma 8:​35-39; ma danu Kara 8:1 itaia.

Vanegai danu, haida be hetoho lalodiai idia haheauka mai edia kamonai ida. Ethiopia kahirakahira tanona ta amo Witness taudia momo be hebouhebou idia mai henia. Unai tano ai tanobada ena kara amo idia gini siri dainai, heduru be gavamani amo idia abia diba lasi bona moni gaukarana idia davaria diba lasi. Tuari be Mesewa hanuana kahirakahira dekenai ia vara neganai, kongregesen taudia iboudiai 39, idia haida be memero bona kekeni, be hua hani lalodiai tano gagaena ai nesehanai ta henunai idia noho, badina be gavamani ese edia ruma idia hadikadia ore. Unai gabu ai siahu be bada bona gau momo ai idia dabu, to daba daba iboudiai dina ena siri idia herevalaia bona hebou ma haida idia karadia, unai amo goada idia abia bona Iehova idia badinaia bona idia hetura heheni. Special pioneer hahinedia rua, Blue Nile sinavaina gabunai idia gaukara, ese Otodoks Tomadiho Oreana ia havaraia dagedagena idia haheaukalaia, bena edia Baibel stadi taudia haida idia itadia, hari hebouhebou ai bapatiso idia abia.

Tadikaka ta ia gwau ia be tano kaukauna ladana Ogaden ai, tadikaka idia noho lasi gabuna ai, moni gaukarana ia karaia. Lauma dalanai do ia goada noho totona, ia haroro bona kamonai taudia ida hebou idia karadia. Idia haida be doketa taudia; Dirava ena hahediba ese ia durudia, bona hari idia ese ma haida idia hadibadia. Kara maoromaoro ia badinaia tauna ma ta be special pioneer tauna ta Addis Ababa ai. Lagani 1992 ai Otodoks fada taudia edia lalo-ani dainai haida ese idia dadabaia dikadika ela bona idia laloa ia mase. To ia namo lou, bona unai gabu ai haroro gaukarana ia do karaia noho. Ena kiri ese ia hahedinaraia ia badu lasi. Ia bona hetoho ai idia kwalimu taudia oredia bona matamata taudia danu ese “Dirava Ena Hahediba” Hebouhebouna idia moalelaia bada.

Hebouhebou idia naria namonamo dainai, vadivadi taudia idia laloa unai gaukara be lagani momo ai idia manadalaia vadaeni. To gauna be, idia hanai laganidia rua mo ai idia dibaia haraga. Saturday ai taunimanima 9,556 idia hebou. Televisen, reidio, bona niuspepa taudia ese hebouhebou sivaraina idia gwauraia namo. Iboudiai idia itaia Iehova ese ena orea taudia be lauma dalanai ia hatagadia. Hebou taudia momo be kamonai matamata taudia, “Dirava Ena Hahediba” amo hahenamo idia davaria matamaia taudia. Taunimanima 50 milion bamona be Ethiopia ai idia noho, unai dainai Iehova ena Witness taudia ese momo idia haroro henidia diba, bona hari hebouhebou ese iboudiai ia hagoadadia, inai tanobada oromana ena nega orena ai lalo-maoromaoro taudia do idia durudia, Dirava ena hahediba amo hahenamo do idia davaria totona.

[Footnotes]

[Picture on page 23]

Addis Ababa, January 13-​15, 1994

[Picture on page 24]

Pioneer taudia haida Addis Ababa ai (idiba kahanai); kara maoromaoro badinaia taudia, guna dibura rumana ai idia koudia (henuai); mauri laganidia 113 Witness tauna bona ena adavana