Basileia Haroro Ripoti
“Satani Do Umui Tuari Henia, Vadaeni Umui Dekena amo Do Ia Heau Boio”
APOSETOLO edia negai, “meamea taudia momo” Efeso ai ese Keristen herevana idia abia dae, bena edia meamea bukadia be taunimanima vairadiai idia gabudia. (Kara 19:19) Unai buka edia davana be siliva monidia 50,000. Bema Baibel ese ia gwauraia monina be denarius, Roma taudia edia siliva monina ta, unai buka edia davana be K37,000!
Hari inai negai taunimanima momo, guna idia be mai edia meamea o babalau bukadia, to idia hahedinaraia edia lalohadai be unai Efeso taudia edia hegeregerena. Inai sivarai Canada amo mani oi laloa.
Lagani ima bamona idia ore vadaeni, Iehova ena Witness hahinena ta be ruma ta ruma ta ai ia haroro neganai, hahine ta ladana Nora ese ena ruma lalonai ia veria vareai. Nora be lagani momo lalodiai tomadiho bona babalau bukadia handred momo ia gogodia vadaeni, to ia ura ia diba Baibel ese mase taudia edena bamona ia gwauraidia. Witness hahinena ese pepapepa ta ia henia, ena ladana be Helaro Namona Mase Taudia Totona be Ia Noho A? Unai ese Nora ena henanadai ia haerelaidia, bona ia ese Gima Kohorona bona Noga! sabskripsen ia abidia.
Gabeai ia lao gabu idauna, bena Iehova ena Witness taudia ia itadia lou lasi. To Gima Kohorona bona Noga! ia abidia noho. Idia gwauraidia bukadia ma haida ia oda karaia danu. Nega taina daudau murinai, Iehova ena Witness hahinena ta be ena ruma ai ia ginidae. Witness taudia edia kara, henanadai be Baibel amo idia haerelaidia karana, be Nora ese ia laloa bada dainai, ia ese hari hahine ia abia dae bona ia noia do ia lou mai, do idia herevahereva lou totona.
To Witness hahinena ese Nora ia davaria lou be auka. Hora idauidau ai bona dina idauidau ai ia lou henia, to ia davaria lasi. Gabeai ena hekwarahi ena davana namona ia abia. Nora ia davaria lou, Baibel stadi ia hamatamaia, bena Nora ena noinoi dainai pura momo ai nega toi idia stadi. Ia dibaia gaudia be ena turana bona ena varavara ia hamaorolaidia, bena idia toi idia gwau idia ura Iehova ena Witness taudia ida Baibel do idia stadilaia.
Ena stadi amo Nora ia diba, ena be tomadiho koikoidia bona peroveta taudia koikoidia be momo, to mauri ia lao henia dalana be tamona mo. Guna, lagani momo lalodiai ena henanadai edia haere be tomadiho koikoi ai ia tahudia, to Baibel ese demoni ia gwauraidia herevadia ia dibaia neganai, idaunegai Efeso taudia, Kara 19:19 ese ia gwauraidia taudia, hegerergeredia ia kara. Ena buka daha ta mai kahana, meamea, babalau, bona tomadiho herevadia koikoidia idia herevalaidia bukadia, be ia gabudia. Unai buka hani edia davana be K800 mai kahana!
Toana be demoni ese Nora ena kara idia badulaia, badina be pura rua lalodiai idia hahisia. To ena lalona idia ania diba lasi, Baibel stadilaia karana bona Iehova ena orea taudia bamodia karana do ia hadokoa.
Inai bamona sivaraidia ese inai Baibel herevana idia hamomokania: “Dirava ena ura do umui karaia. Satani do umui tuari henia, vadaeni umui dekena amo do ia heau boio.”—Iakobo 4:7.