“Hoa dalanai lau oi karaia”

“EDESENI amo lau mai?” Inai be memero kekeni maragidia momo edia henanadai ta. Idia bada idia lao neganai, edia henanadai be mai dobuna; idia gwau: “Mauri be edeseni amo ia mai?” Lagani daha momo lalodiai taunimanima ese unai henanadai idia herevalaia, bona hari inai negai saiens taudia momo idia laloa mauri be evolusen dalana amo ia vara. Evolusen herevana idia abia dae taudia idia gwau mauri be ia vara kava.

Lagani 3,000 bamona gunanai, King David ese Dirava ia guriguri henia, ia gwau: “Hahegari bona hoa dalanai lau oi karaia.” (Salamo 139:14) Iseda diba mauri dekenai be ia bada ia lao neganai, iena hereva ita hamomokania vaitani diba. Saiens tauna ta ladana Fred Hoyle ia gwau: “Baiokemis taudia ese mauri ena badina idia tahua neganai, idia davaria ena kahana idauidau momo herea be hoa dalanai idia gaukara hebou. . . . Unai ese ia hahedinaraia mauri ia vara kava dalana be lasi.”

Vadaeni, mauri be edena bamona ia matama? Inai magasin ena hereva ginigunadia ruaosi ese inai henanadai idia haerelaia. Bema oi ura ma diba haida do oi abia, mani IBSA oi tore henia, Box 636, Boroko, N.C.D. dekenai.