Emu Hesiai Gaukarana Helagana Oi Laloa Bada
ITA tahua gauna mai anina bada do ita abia totona, namona be eda lalona idia hegeregere gau haida do ita negedia. Ta be doketa ai ia lao totona, lagani momo bona moni momo be doketa gaukarana stadilaia karana ai ia haoredia. Spot gadara ai ia kwalimu tauna ese ena nega bada ia haorea, unai gadara do ia manadalaia goevagoeva totona. Gita hataia diba momo tauna danu be unai bamona ia karaia.
To gau ta ena namo ese ena davana ia hanaia momokani. Gauna be, Atai Herea Diravana, Iehova, ena hesiai tauna dagina namona. Herevana hora hida, o moni hida, o goada hida be ena hesiai lao henia karadia ai ita haorea, to ena davana ese unai ibounai ia hereaia. Aposetolo Paulo ena hereva be momokani: “Tauanina hagoadaia kara be namo sisina sibona. To lauma hagoadaia kara be namo bada herea, badina be Dirava ena durua be bada inai mauri lalonai, bona iena gwauhamata gaudia be bada herea mauri gabeai dekenai danu.” (1 Timoteo 4:8) Unai ia momokani dalana mani ita laloa.
Dirava Ita Dibaia Matama Neganai
Sivarai namona idia abia dae bona Baibel idia stadilaia matama taudia momo be reana idia diba lasi unai ese edia mauri do ia haidaua vaitani. Baibel stadilaia tauna matamatana ena turana haida ese do idia rakatania reana, badina be idia diba lasi dahaka dainai ia bamodia noho lasi, to gauna be, hari ia diba edia kara be Dirava hahemaraia karadia. (1 Petero 4:4) Reana idia haida edia varavara ese do idia badu henidia, bona reana edia lalodia do idia metau, badina be idia lalokau henidia taudia ese Iehova idia inai henia. (Mataio 10:36) Unai be hetoho aukana.
Gaukara gabuna ai eiava sikuli ai danu, gau haida do idia idau. Baibel stadilaia tauna matamatana ena diba ia bada ia lao neganai, pati bona aria ai do ia vareai lasi. Ia ida idia gaukara hebou eiava idia sikuli hebou taudia edia hereva mirodia do ia kamonaidia lou lasi bona hevaseha herevadia mirodia do ia hamaorodia lasi. To, Efeso 5:3, 4 ena sisiba do ia badinaia toho: “Umui be Dirava ena taudia dainai heudahanai bona matabodaga bona kohu ura dikadika kara, be do umui herevalaia lasi. Lebulebu hereva, hereva kavakava, hevaseha hereva mai miro danu be namo lasi.”
Baibel stadilaia tauna ese unai kara ia hadokodia dainai, ena bamona gunadia ese do idia dadaraia reana. Sikuli ai dina momo idia hahelagadia, evolusen herevana idia hahedibalaia, bona memero kekeni edia lalodia idia anidia loulou, hutuma edia kara do idia tohotohoa totona; unai dainai namona be Keristen memerodia bona kekenidia idia goada karaia noho, abidadama lalonai do idia gini auka totona. Dirava ena dala idia badinaia dainai do idia idau, unai dainai reana edia sikuli bamodia bona edia tisa ese do idia kirikirilaidia. Haisikuli laganidia lalodiai unai idia haheaukalaia be auka herea, to unai bamona idia karaia be namo, Dirava ena lalo-namo do idia davaria totona.
Gau Namona ta Idia Haboioa A?
Haida ese kuku o drag idaudia ania loulou o kekero muramurana inua loulou karadia idia hadokodia be auka, to idia kwalimu neganai, namo idia davaria! (2 Korinto 7:1) Edia tauanidia idia hadikadia karadia idia hadokodia dainai, edia mauri idia namo idia lao! Ma haida ese edia headava idia hamaoromaorodia. Idia noho hebou kava taudia ese edia bamodia idia adavadia eiava idia rakatanidia be namo. (Heberu 13:4) Mai ena hahine momo tauna ese ena eregabe neganai ia adavaia hahinena sibona ia dogoatao be namo. (Hereva Lada-isidia 5:18) Unai senisi edia anina be idia ura henidia gaudia idia negedia, to unai amo edia ruma lalodiai maino idia havaraia.
Mani Hahenamo Oi Lalodia
Momokani, Iehova ena taravatu idia badinadia taudia iboudiai ese hahenamo idia davaria. Baibel stadilaia tauna matamatana ese guriguri lalonai Dirava ena ladana, Iehova, ia hatoa matama. (Salamo 83:18) Iehova ena heduru karadia namo hereadia ia diba neganai, ia lalokau henia. Mase taudia be idia mahuta bona toreisi lou negana idia naria herevana ia diba neganai, mase taudia gari henidia karana ia hadokoa. (Kohelete 9:5, 10) Iehova ese taunimanima be hel lalonai ia hahisidia hanaihanai lasi herevana ia diba neganai, ena lalona ia goada lou! Oibe, hereva momokani ese ia ruhaia nege.—Ioane 8:32.
Stadi tauna ese Iehova ena taravatu ia badinaia goevagoeva neganai, ena lalona ia goeva bona sibona ena kara ia lalo-namolaia. Keristen dalana korikorina ia badinaia neganai, ena ruma bese ia naria namonamo diba, bena unai dainai ia moale bada. Kingdom Hall ai, hebou lalodiai moale bada ia davaria! Hebou taudia ese lalokau bada idia hahedinaraia, Dirava ena orea taudia edia toana ta unai. (Salamo 133:1; Ioane 13:35) “Dirava ena hoa gaudia idia herevalaia” negadiai, edia hereva be hahegoada herevadia goevadia. (Kara 2:11) Oibe, “Keristani taudia ibounai” edia orea ia davaria neganai, moale danu ia davaria. (1 Petero 2:17) Unai hebamo namona ese ia durua, ‘mauri matamata do ia atoa, dabua matamata ia atoa bamona. . . . Inai mauri matamata ena kara be maoromaoro, helaga bona momokani.’—Efeso 4:24.
Dirava Ia Gwauhamata Henia
Ta ena diba ia bada ia lao neganai, Iehova lalokau henia mamina ese ia doria dainai, ena mauri be ia dekenai ia gwauhamatalaia bona bapatiso ia abia. (Mataio 28:19, 20) Iesu ia gwau, ena hahediba taudia ese unai idia do karaia lasi neganai, davana idia laloa guna be namo. (Luka 14:28) Iehova ia gwauhamata henia vadaeni tauna ese Iena ura ia tahua guna bona sibona ena tauanina ena ura ia dadaraia. “Tauanina ena kara” ia negedia toho bona lauma huahuana ia havaraia toho. (Galatia 5:19-24) Roma 12:2 ena sisiba ia badinaia goevagoeva: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, do idia matamata, bona idau momokani. Unai dekena amo Dirava ena ura be do umui diba momokani.” Vadaeni, Dirava ia gwauhamata henia Keristen tauna be unai bamona ia karaia neganai, ena mauri be mai anina matamatana.
Ia abidia hahenamodia be mani oi lalodia: Ia be guba bona tanobada ia karadia Diravana ida idia hetura heheni, badina be Dirava ese kara maoromaoro tauna ia gwauraia, ena turana ai ia halaoa totona! (Iakobo 2:23) Dirava ia hereva henia negadiai, ena hereva, “aiemai Tamana e, guba dekenai oi noho,” be mai anina dobuna. (Mataio 6:9) Ia diba mauri be mai ena anina, bona unai anina hegeregerena ai ia noho. (Kohelete 12:13) Iesu hegeregerena ia ese Dirava ia badinaia noho; unai amo Diabolo ena hereva ia hakoikoia diba. Unai ese Iehova ena lalona ia hamoalea bada!—Hereva Lada-isidia 27:11.
To, Keristen tauna be kamonai dalanai ia haheauka noho lalonai, gau ma haida ia negedia o ia haoredia. Baibel be ruma ai bona kongregesen ai stadilaia karadia ai ena nega bada ia haorea. (Salamo 1:1-3; Heberu 10:25) Sibona ena ura karadia haida ia negedia, ruma ta ruma ta ai do ia haroro totona. (Efeso 5:16) Iehova ena Witness taudia edia kongregesen, sekit, bona distrik heboudia lao henidia totona ena nega bona ena goada ia henia. Kingdom Hall naria gaukarana bona haroro gaukarana tanobada hegegemadai be moni amo durua totona sibona ena ura haida do ia negedia reana. To, Keristen taudia milion haida idia gwau unai gaukara durua karana amo moale idia davaria. Iesu ia gwau: “Henia kara ena moale be bada, abia kara ena moale be maragi.”—Kara 20:35.
Iehova ena gaukara durua karana amo ita abidia hahenamodia ese ita negedia gaudia idia hereadia momokani. Lauma dalanai ita tubu daekau lalonai, iseda haroro gaukarana ena anina bona ena moale be idia bada idia lao. Baibel amo ita stadi henia tauna ese Iehova ia tomadiho henia matama neganai, iseda moale be bada. Bona bema ia be iseda varavara ta, reana iseda natuna ta, ‘Lohiabada ena hadibaia hereva ita hadibaia’ merona, iseda moale be hereadae. (Efeso 6:4) Dirava ida do ita gaukara hebou totona ita hekwarahi neganai, ita itaia ia ese ita ia hanamoa bada.—1 Korinto 3:9.
Davana Namodia Ma Haida
Momokani, inai tanobada oromana ia do noho lalonai, hekwakwanai do ita davaridia. Bona Diabolo ena nega ia kwadogi ia lao lalonai, do idia metau idia lao reana. Reana haida ese ita do idia dagedage henia eiava do idia dibagania. To ita diba Dirava be ita dekenai, unai dainai ita haheauka diba. (1 Korinto 10:13; 2 Timoteo 3:12) Keristen taudia haida be lagani momo lalodiai dagedage idia haheaukalaia, badina be Dirava idia lalokau henia. Hedibagani idauidau idia haheaukalaidia mai edia kwalimu ida taudia edia hemami be aposetolo edia hegeregerena; haida ese aposetolo idia dadabadia murinai, “kaunsolo idia rakatania mai moale bada danu. Edia moale badina be Dirava ese idia ia abia hidi vadaeni Iesu ena ladana dainai hisihisi do idia abia.”—Kara 5:41.
Hari inai negai danu, haheauka ena davana ese ena hekwarahi ia hereaia. Bona mani oi laloa, Dirava badinaia karana be mai “ena gwauhamata” “inai mauri lalonai” sibona lasi, to “mauri gabeai dekenai danu.” (1 Timoteo 4:8) Ia haheauka tauna ena helaro be namo herea! Bema Dirava oi badinaia, inai tanobada oromana dokona ai do ia vara hisihisina bada hereana amo do oi roho mauri. Eiava bema oi mase guna, ia murinai do ia vara tanobadana matamatana lalonai do oi toreisi lou. (Daniel 12:1; Ioane 11:23-25) Unai neganai do oi abia moalena mani oi laloa. Do oi gwau diba: “Iehova ena heduru dainai lau kwalimu vadaeni!” Unai tanobada ai emu ahuna do oi abia be moale bada gauna. “Iehova dibaia karana amo do ia honu, davara ia honuhonudae bamona.”—Isaia 11:9.
Oibe, Dirava ena hesiai ita lao henia totona gau haida ita negedia. To unai amo ita abidia hahenamodia be momo herea. (Filipi 3:7, 8) Iena hesiai taudia ia durulaidia karadia bona gabeai do ia durulaidia karadia dainai, salamo torea tauna hegeregerena ita gwau: “Dahaka Iehova do lau henia, lau ia henia gaudia iboudiai edia davana?”—Salamo 116:12.