Duahia Taudia Edia Henanadai

Hari inai hekwarahi bada negana lalonai, moni ita davaria be ia auka, taunimanima bona kampani idia gwau idia bankrap, edia abitorehai monina idia henia lou diba lasi unai. Unai taunimanima edia kampani edia namba ia bada ia lao. Keristen taudia be taravatu taudia idia hadibadia idia bankrap neganai, Baibel ese unai kara ia gwauraia maoro, a?

Unai henanadai ena haere ese ia hahedinaraia Dirava ena Hereva ese ita ia durua, hari inai negai idia vara gaudia dekenai dala maorona ita diba totona. Tano momo dekenai bankrap dalana naria taravatudia idia noho. Tano idauidau edia taravatu be idauidau, bona Keristen kongregesen be siahu lasi unai taravatu dekenai sisiba idia henia totona. To namona be bankrap dalana ena taravatu ita gwauraidia hedinarai.

Gavamani ese dala idia kehoa taunimanima bona bisinesi idia gwau diba idia bankrap. Unai dala idia kehoa ena badina ta be moni idia henia torehai eiava credit idia henia taudia ia naria bema taunimanima eiava bisinesi be moni idia abitorehai to unai moni idia henia lou diba lasi neganai. Idia dekenai idia abitorehai taudia be reana idia laloa abitorehai tauna idia samania bona kota ese do ia gwau ia bankrap be dala namona, badina unai neganai abitorehai tauna ena kohu idia abia diba unai abitorehai davana sisina abia lou totona.

Ma dala ta dekenai bankrap karana ma ta ese abitorehai taudia ia naridia, bema idia ese moni idia abia torehai to idia be dala lasi idia henia lou neganai. Abitorehai tauna ese taravatu taudia ia hadibadia diba ia bankrap, unai neganai moni idia henia torehai taudia ese iena kohu haida do idia abia diba. To, reana taravatu taudia do idia gwau ena ruma eiava kohu haida idia abia diba lasi, bona unai negana amo moni idia henia torehai taudia garina ia gari lasi bona edia siahu iena kohu dekenai be lasi.

Vadaeni, ia hedinarai goevagoeva, moni bona bisinesi karana dekenai unai taravatu idia noho henitorehai taudia bona abitorehai taudia naridia totona. To, namona be Baibel ese ita ia henia heduru bona sisiba herevadia ita tahua.

Baibel ena hereva ibounai bema oi duahia, do oi davaria ita ia sisiba henia ita abitorehai lasi totona. Sisiba ta be Hereva Lada-isidia 22:7 dekenai, ia gwau: “Taga tauna ese ogogami tauna ia biagua, bona moni ia abia torehai tauna be henitorehai tauna ena hesiai tauna ai ia lao.”

Danu, namona be Iesu ena parabole herevana oi laloa, Mataio 18:​23-34 dekenai ia ese hesiai tauna ta mai ena abitorehai bada ia gwauraia. “Ena biaguna ese ia hereva, ia bona adavana bona ena natuna do idia hoia, iena abitorehai ena davana totona,” to murinai unai biaguna, ia be pavapava ta, ese ena hereva ia haidaua, unai hesiai tauna ia hebogahisi henia. To gabeai unai hesiai tauna ia hahedinaraia ia be hebogahisi lasi tauna, unai dainai pavapava ena oda dainai “dibura dekenai [idia] atoa vareai, do idia panisia ela bona ena abitorehai davana do ia haorea.” Vadaeni, ia hedinarai goevagoeva, ita abitorehai lasi be namo.

Idaunegai Israel dekenai, Dirava ena hesiai taudia be taunimanima danu bisinesi idia karaia, bona nega haida moni idia abia torehai bona idia henia torehai. Idia dekenai Iehova ena sisiba be dahaka? Bema tau ta ia ura bisinesi ta ia haginia eiava ia habadaia dainai moni ia abia torehai, taravatu dekenai Heberu tauna ese interest ia gwauraia be maoro. To, Dirava ese iena taunimanima ia hagoadadia sibodia edia ura idia tahua guna lasi, ia ogogami Israel tauna dekenai moni idia henia torehai neganai; hekwakwanai ia davaria dainai namo lasi interest idia atoa kau edia moni habadaia totona. (Esodo 22:25) Deuteronomi 15:​7, 8 dekenai ia gwau: “Emu varavara ta bema ia ogogami . . . , emu lalona oi ha-aukaia lasi, bona emu imana oi koua lasi, oiemu varavara ogogamina dekenai.”

Unai bamona hebogahisi bona taunimanima durua taravatuna ia gwau moni idia henia torehai taudia be abitorehai taudia dekena amo mauri durua gaudia, hegeregere ruma bese ena uiti moia nadina eiava hanuaboi neganai keru ia koua dabuana idia abia diba lasi.​—Deuteronomi 24:​6, 10-13; Esekiel 18:​5-9.

To, Iuda taudia haida be unai hebogahisi taravatudia, edia Hahemaoro bona Taravatu Karaia Tauna Badana amo idia abia gaudia, idia abia dae lasi bona idia badinaia lasi. (Isaia 33:22) Mataganigani Iuda taudia haida be edia varavara taudia idia kara auka henidia. Danu, hari inai negai, moni idia henia torehai taudia haida be idia dekenai ia abitorehai Keristen tauna dekenai idia badu, bona idia kara auka henia bema hekwakwanai ia vara dainai nega ta ia hegeregere lasi abitorehai davana ia henia lou totona. (Kohelete 9:11) Moni idia henia torehai tanobada taudia idia hebogahisi lasi, bona idia dekenai ia abitorehai tauna idia doria dainai, abitorehai tauna ese kara ta do ia karaia sibona do ia naria totona. Dahaka ia karaia? Nega haida dala tamona be taravatu taudia ia hamaorodia ia bankrap. Vadaeni, bema Keristen tauna ia mataganigani lasi eiava ia hekwarahi bada ena abitorehai davana ia henia lou totona to ia hegeregere lasi, reana taravatu taudia do ia hadibadia ia bankrap.

To, namona be inai hereva ita laloa. Reana Keristen tauna be moni ia abia torehai, to ia haheauka lasi dainai, moni bada ia negea bona ena bisinesi gaukara dekenai ia abia hidi daladia ia laloa namonamo lasi dainai ena abitorehai davana ia henia lou diba lasi. Iena abitorehai monina be gau maragina do ia laloa, bona dala ia abia hidi kerere dainai, karaharaga heduru do ia abia totona, ia gwau ia bankrap; unai dala amo taunimanima dekenai hisihisi ia havaraia be maoro, a? Baibel ia gwau moni bona kohu naria namonamo lasi karana be maoro lasi. Ia ese Dirava ena hesiai tauna ia hagoadaia, bema ia gwau oibe anina be oibe momokani. (Mataio 5:37) Danu, inai oi laloatao, Iesu ia gwau kohoro rumana oi do haginia lasi neganai, ena davana oi laloa guna. (Luka 14:​28-30) Unai hereva hegeregerena, namona be Keristen tauna be ia do abitorehai lasi neganai, namona be idia vara diba hekwakwanaidia do ia laloa namonamo guna. Abitorehai monina ia abia neganai, namona be ena maduna ia huaia bona taunimanima eiava kampani be ia dekenai moni idia henia torehai dainai, unai moni ia henia lou be gau badana. Bema taunimanima idia itaia Keristen tauna be ena maduna ia huaia lasi eiava ia idia abidadama henia diba lasi, reana iena ladana namona ia hadikaia diba bona Witness lasi taudia ese ia do idia gwauraia tau namona lasi.​—1 Timoteo 3:​2, 7.

Namona be Salamo 15:4 oi laloa, ita ia hadibaia Iehova ese edena bamona tauna ia moalelaia. Ita duahia, ia gwau: “Ia [Dirava ese ia moalelaia tauna] sibona hadikaia gwauhamatana ia gwauraia neganai, do ia haidaua lasi.” Oibe, Dirava ia ura Keristen taudia ese idia dekenai idia abitorehai taudia idia kara namo henidia, hegeregere idia ura ma taunimanima haida ese idia sibodia idia kara henidia bamona.​—Mataio 7:12.

Vadaeni, hereva orena be inai, hekwakwanai bada ia vara neganai, Keristen tauna be gavamani ena taravatu hegeregerena taravatu taudia ia hadibadia diba ia bankrap. To, Keristen taudia be idia koikoi lasi bona edia maduna idia huaia be gau badana; namona be unai karadia ai, taunimanima momo amo idia idau momokani. Unai dainai, bema moni idia abia torehai, gau badana be mai edia ura ibounai ida idia henia lou toho.