“Ramuna Do Idia Ragaia Diba Lasi”

TANOBADA dekenai idia mauri gau badadia bona idia mauri daudau gaudia be California dekenai idia tubu sequoia audia. Unai au badadia haida edia lata be mita 90 bamona idia tubu doko neganai, bona lagani 3,000 bamona idia mauri noho diba.

Ena be sequoia auna oi itaia neganai oi hoa, to oi itaia diba lasi ramudia bema oi itaia diba do oi hoa danu. Sequoia auna ena ramudia be dobu lasi to 1.2-1.6 hectare idia koua. Unai ramudia idia koua gabuna be bada herea dainai, ena be abata ia mai eiava lai-gubana badadia idia toa, to unai au do ia moru lasi. Ena be tano ia mareremarere bada, to sequoia auna ia do gini noho diba!

Pavapava Solomon ese ena aonega hereva tamona lalonai au ena ramu goadadia be laulau dalanai ia herevalaia. Ia gwau: “Kara dika ese tau ta ia haginia auka lasi, to kara maoromaoro tauna ena ramuna do idia ragaia diba lasi.” (Hereva Lada-isidia 12: 3) Oibe, kara dika taudia be idia gini goada diba lasi. Ena be toana be idia kwalimu to daudau lasi murinai idia moru, badina Iehova ia gwauhamata, ia gwau “kara dika taudia edia helaro do ia ore.”​—Hereva Lada-isidia 10:28.

Unai be sisiba herevana sibodia idia gwauraia idia be Keristen taudia dekenai, badina Iesu ia gwau taunimanima haida be “ramuna lasi” taudia dainai do idia hekwakwanai. (Mataio 13:21) Danu, aposetolo Paulo be ena toretore lalonai ia gwau “koikoi taudia edia hahediba hereva . . . be lai bamona, [taunimanima] ia doria lao, doria mai.” (Efeso 4:14) Unai kara do ia vara garina dahaka ita karaia diba?

Sequoia au ena ramudia be tano namona amo aniani idia abia bona tano bada herea ia koua, unai hegeregerena, namona be iseda darana bona lalona be Dirava ena Hereva dekenai do idia diho bona ia dekena amo mauri havaraia ranuna do ita abia. Unai ese ita do ia durua iseda abidadama ena ramuna ia goada totona. Momokani, lai-gubana bamona hetoho idia mai neganai, mamina do ita abia. Bona dagedage do ia mai neganai, au bamona reana do ita mareremarere. To bema iseda abidadama be ia goada, iseda “ramuna do idia ragaia diba lasi.”​—Heberu 6:19 itaia.