Dirava Ena Hesiai Taudia Idia Gaukara Hebou mai Edia Moale Ida
“Ena Dirava be Iehova besena be ia moale!”—SALAMO 144:15.
1, 2. (a) Dahaka dainai Iehova ese ena hesiai taudia be taravatu ia henidia be maoro? (b) Dahaka kara rua Iehova ena be ita tohotohodia be namo?
IEHOVA be siahu ibounai Diravana, gau iboudiai ia karadia bona ia biagudia Diravana. (Genese 1:1; Salamo 100:3) Unai dainai, ia ese ena hesiai taudia be taravatu ia henidia be maoro, badina be edia namo havaraia bada dalana ia diba. (Salamo 143:8) Bona iena kara be hereadae dainai, do idia tohotohodia be namo. Aposetolo ta ia gwau: “Dirava ena kara bamona do umui karaia be namo.”—Efeso 5:1.
2 Dirava ena kara ta, do ita tohotohoa be namo karana, be inai: Ia ura lasi heiriheiri be ena orea lalonai do ia vara. (1 Korinto 14:33) Ia karadia gaudia ita itadia namonamo neganai, ita diba gau iboudiai ia naridia namo herea momokani. To inai danu, ia ura ena hesiai taudia be ia hegeregerena do idia moale, badina be ia be “moale Diravana.” (1 Timoteo 1:11, NW) Unai dainai, ena orea ia biagua namonamo lalonai moale ia koua lasi.
3. Guba hisiudia ese edena bamona idia hahedinaraia Dirava ese ia gaukaralaidia hebou diba?
3 Iehova Dirava ese ia karadia gaudia iboudiai, bada hereadia amo ela bona maragimaragidia, ese idia hahedinaraia ia be gau gaukaralaidia hebou namonamo Diravana. Mani guba oi laloa. Ia lalonai be hisiu bilion bilion. To Dirava ese ia hakarohodia kava lasi. Hisiu edia toana tahua tauna, George Greenstein, ia gwau: “Hisiu be edia orea lalodiai idia noho.” Dirava ese orea ladana galeksi lalodiai ia haboudia, unai orea haida ta ta lalodiai be hisiu handred bilion. Bona diba taudia idia gwau galeksi bilion momo idia noho! Galeksi danu be edia orea ta ta lalodiai idia noho hebou. Bona diba taudia idia laloa unai galeksi oreadia badadia haida be ma orea bada hereadia lalodiai idia noho hebou.—Salamo 19:1; Isaia 40:25, 26.
4, 5. Dirava ese tanobada ai ia karadia gaudia haida edia oromadia mani oi gwauraidia.
4 Taunimanima ese idia itaia diba gubana lalonai sibona lasi, to tanobada ai danu, Dirava ese ia karadia gaudia edia oromadia namo hereadia idia hedinarai, badina be tanobada ai be mauri gaudia momo herea. Inai ibounai be profesa ta ladana Paul Davies ese ia gwauraia, ia gwau edia oromadia idia tahudia namonamo taudia ese idia “hoalaidia” bada.—Salamo 104:24.
5 Mauri gaudia haida edia oromadia namo hereadia mani oi lalodia. Doketa ta ladana Joseph Evans ese taunimanima ena kwarana harana bona ena hemami varovarona badana, ena kwarana harana amo ena doruna lalonai ia diho gauna, be ia herevalaidia, ia gwau: “Edia oromadia namo hereadia ai itadia neganai, emai lalona be kahirakahira idia boio.” Mauri gaudia edia kahadia maragimaragidia ia tahudia tauna, H. J. Shaughnessy, ia gwau: “Idia be hoa dalana mai hairaina ai idia gaukara hebou, unai dainai toana be Dirava ese ia karadia.” Bona unai bamona tauna ma ta, Michael Denton, ese mauri tauna o gauna ena tauanina ena kahana maragimaragidia ladana sel lalodiai ia noho gauna ladana DNA, be inai bamona ia gwauraia: ‘Ena anina be bada herea dainai, tanobada ai idia mauri noho gaudia besedia iboudiai edia toadia amo sipuni maragina ta do idia hahonua diba lasi.’—Salamo 139:16 itaia.
6, 7. Dahaka ese ia hahedinaraia Dirava ese lauma taudia edia orea ia haheaua namonamo, bona idia ese ia edena bamona idia hanamoa?
6 Guba ai bona tanobada ai ita itadia diba gaudia sibodia mo lasi, to guba ai ia havaradia laumadia danu be Dirava ese ia gaukaralaidia hebou. Daniel 7:10 ia gwau aneru ‘ten tausen ten tausen be Iehova vairanai idia gini.’ Aonega bada Diravana sibona mo be hegeregere, unai lauma taudia goadadia wan handred milion ta ta ena gaukara ena gaukara do ia henidia bena unai gaukara ai do ia biagudia! Baibel ia gwau: “Iehova ena aneru mai emui goada e, ia umui hanamoa, ena hereva umui badinaia noho, bona ena hereva umui kamonai noho. Iehova ena [aneru emui] tuari oreadia iboudiai e, Iehova umui hanamoa, umui be ena hesiai taudia, ena ura karaia taudia.”—Salamo 103:20, 21; Apokalupo 5:11.
7 Dirava ese ia karadia gaudia be dala namo hereana amo ia gaukaralaidia hebou dainai, lauma taudia goadadia ese guba ai idia hanamoa mai edia hemataurai bada bona mai edia kamonai ida. Idia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai oi do idia henia, bona oiemu siahu henunai do idia noho. Badina be gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.”—Apokalupo 4:11.
8. Daidia edia sivarai ese idia hahedinaraia Iehova ese ena hesiai taudia tanobada ai ia hagaukaradia hebou?
8 Iehova ese danu ena hesiai taudia tanobada ai ia gaukaralaidia hebou. Noa ena negai, lagani 2370 B.C.E. lalonai, Abata Badana ia halasia neganai, Noa bona ma taunimanima 7 be edia ruma bese oreana lalonai idia roho mauri. Lagani 1513 B.C.E. lalonai, Iehova ese ena bese taudia milion haida be Aigupito ena igui hesiai gaukarana amo ia hakaudia oho, bona taravatu momo ia henidia, dina dina iboudiai do idia karaia karadia ai bona edia tomadiho ai do ia hakaudia totona. Gabeai, Gwauhamata Tanona ai, idia 38,000 be hesiai gaukarana helagana ai ia hagaukaradia, dubu helagana ai. (1 Sisiga 23:4, 5) Aposetolo edia negai, Keristen kongregesen idia haginidia, Dirava ese ia hakaudia hegeregerena: “Haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia. Inai bamona harihari gaudia ia henia, be Dirava ena taudia ibounai do ia durua . . . ena hesiai gaukara do idia karaia namonamo” totona.—Efeso 4:11, 12.
Hari Inai Negai Ena Hesiai Taudia Ia Hagaukaradia Hebou
9 Unai hegeregerena, hari inai negai danu Iehova ese ena hesiai taudia ia hagaukaradia hebou, iena Basileia ena sivarai namona do idia harorolaia guna, bena gabeai inai tanobada ena oromana dikana do ia haorea. (Mataio 24:14) Inai gaukara, tanobada hegegemadai idia karaia gaukarana, ena anina mani oi laloa. Taunimanima milion haida, tatau, hahine, memero, bona kekeni, be Baibel ena hereva gwauraidia dalana idia hadibalaidia. Inai gaukara durua totona, Baibel momo bona Baibel ena anina gwauraia bukadia momo idia printadia. Idia printadia negadia ta ta ai, Gima Kohorona 16 milion be gado 118 ai idia printadia, bona Noga! 13 milion bamona be gado 73 ai idia printadia. Idia momo edia anina be hegeregere dainai, kahirakahira Iehova ena hesiai taudia iboudiai be nega tamona unai diba idia abia.
9, 10. Hari inai negai Iehova ese ena orea taudia edena bamona ia hagaukaradia hebou?
10 Inai danu, tanobada ibounai lalonai, Iehova ena Witness taudia edia kongregesen 73,000 bamona lalodiai, dala ia karaia, do idia hebou loulou Baibel hahedibalaia totona. (Heberu 10:24, 25) Bona hebouhebou badadia tausen haida, sekit bona distrik hebouheboudia, be lagani iboudiai idia karadia danu. Kingdom Hall, Assembly Hall, Betele rumadia, bona Baibel bukadia karadia faktoridia, matamatadia idia haginidia bona gunadia idia hanamodia. Watchtower Bible School of Gilead lalonai misinari taudia idia hadibadia, bona tano momo lalodiai pioneer taudia be Pioneer Gaukara Sikulina ai idia hadibadia.
11. Orea lalonai gaukara hebou namonamo dalana be hari ita dibaia dainai, dahaka namo be nega vairai do ita davaria?
11 Iehova ese ena orea taudia ia hagaukaradia hebou namonamo, ena aneru edia heduru amo ‘edia dagi karadia iboudiai do idia karadia namonamo’ totona. (2 Timoteo 4:5; Heberu 1:13, 14; Apokalupo 14:6) Orea lalonai do idia gaukara hebou dalana be hari ia hadibalaidia, unai amo ia hahegaegaedia, inai tanobada ena dokona amo do idia roho mauri murinai, tanobada matamatana lalonai iena hahekau henunai Paradaiso do idia karaia matama hebou. Bona do idia hegaegae momokani, Dirava ena taravatu iboudiai be mase amo do idia toreisi lou taudia bilion momo do idia hadibalaidia.—Isaia 11:9; 54:13; Kara 24:15; Apokalupo 20:12, 13.
Orea Lalonai Idia Gaukara Mai Edia Moale Ida
12 Iehova be gaukara momo Diravana bona orea biagua bona haheaua namonamo Diravana, to ia be kara auka Diravana lasi. Ia be moale bona lalokau Diravana, bona ia ura do ita moale. Petero Ginigunana 5:7 ia gwau: “Ia ese umui ia naria noho.” Taunimanima durudia totona ia karadia gaudia ese idia hahedinaraia ia ura ena hesiai taudia do idia moale. Hegeregere, taunimanima goevadaedia, tau bona hahine, ia karadia neganai, moale paradaisona lalonai ia atodia. (Genese 1:26-31; 2:8, 9) Hamoaledia gaudia iboudiai ia henidia, do idia moale hisidae totona. To idia gwau-edeede henia dainai, unai ibounai idia haboioa. Edia kara dika dainai ita ese dika bona mase be idia edia amo ita abia.—Roma 3:23; 5:12.
12, 13. Dahaka dainai ita diba Iehova ia ura ena orea taudia do idia moale?
13 Ena be ita taunimanima ita goevadae lasi, to Dirava ese ia karadia gaudia be ita moalelaidia diba; gaudia be inai: ororo badadia; gohu, sinavai, davara bona kone mai hairaidia; palaoapalaoa mai edia kala bona mai bonadia namodia, bona tubutubu gaudia idauidau momo herea; aniani idauidau momo mai gaihodia; dina ia diho toana namo hereana, ita hesikulaia diba lasi gauna unai; guba hisiudia, hanuaboi ai ita lalodia mai eda moale ida gaudia unai; animal idauidau bona edia natudia edia gadara; miusik namona; gaukara namona mai anina; tura namodia. Ia hedinarai unai gau ia karadia Diravana be moale Diravana, taunimanima hamoaledia karadia ia moalelaidia Diravana.
14. Iehova ia ura dahaka dala rua amo ia do ita tohotohoa?
14 Anina be, Iehova ia ura lasi ena hesiai taudia be gaukara karaia namonamo hebou dalana sibona do idia tahua. Ia ura do idia moale danu, ia moale hegeregerena. Ia ura lasi gaukara sibona mo do idia goadalaia dainai edia moale do ia boio. Namona be ia hegeregerena do idia gaukara mai edia diba bona mai edia moale ida danu, badina be ena lauma helaga mai siahuna ia noho gabuna ai, moale danu ia noho. Galatia 5:22 ese ia hahedinaraia Dirava ena lauma helaga, iena orea taudia dekediai ia gaukara laumana, ena huahua iharuana be “moale.”
Lalokau ese Moale Ia Havaraia
15 Mani inai oi laloa: Baibel ia gwau: “Dirava be lalokau.” (1 Ioane 4:8, 16) Ia gwau lasi: “Dirava be orea haheaua namonamo siahuna.” Lalokau be Dirava ena kara badana, bona namona be ena hesiai taudia ese unai ena kara do idia tohotohoa. Unai dainai Paulo be Galatia 5:22 ai ia gwau, Dirava ena lauma ena huahua ginigunana be “lalokau” bona iharuana be “moale.” Lalokau ese moale ia havaraia. Taunimanima ita kara henidia karadia lalodiai Iehova ena lalokau ita tohotohoa neganai, moale ia vara, badina be lalokau taudia be moale taudia.
16. Iesu ese edena bamona ia hahedinaraia lalokau be mai anina bada?
16 Iesu ese ia hahedinaraia Dirava ena lalokau do ita tohotohoa be gau badana. Ia gwau: “Tamana ese lau dekenai ia hadibaia hegeregerena lau hereva.” (Ioane 8:28) Ena Tamana ese dahaka ia hadibalaia badabada bena ia ese ma haida ia hadibalaidia? Gauna be inai: Taravatu hereadaedia ruaosi be, Dirava do ita lalokau henia bona iseda dekena tauna danu. (Mataio 22:36-39) Iesu ese unai bamona lalokauna ia hahedinaraia. Ia gwau: “Tamana lau lalokau henia,” bona unai ia hamomokania, Dirava ena ura ia karaia ela bona mase neganai. Bona taunimanima dainai ia mase neganai, ia hahedinaraia ia lalokau henidia. Aposetolo Paulo ese Keristen taudia Efeso ai ia hamaorodia, ia gwau: ‘Keriso ese umui ia lalokau henia bona ia sibona ena mauri ia atoa diho umui dainai.’ (Ioane 14:31; Efeso 5:2) Unai hegeregerena, Iesu ese ena hahediba taudia ia hamaorodia, ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena.”—Ioane 15:12, 13.
17. Paulo ese edena bamona ia hahedinaraia lalokau ita hahedinaraia be gau badana?
17 Paulo ese ia hahedinaraia inai bamona lalokauna be mai anina bada; ia gwau: “Bema taunimanima edia gado idauidau lau hereva diba, aneru edia gado danu, to lauegu lalokau be lasi neganai, lauegu hereva be auri idia botaia, o gaba idia toua kava bamona. Bema peroveta siahuna lau abia, bona Dirava ena hunia gaudia lau diba, aonega ibounai danu, bona bema lauegu abidadama dekena amo ororo lau kokia diba, to lauegu lalokau be lasi neganai, lau be anina lasi gauna bamona. Bema lauegu kohu ibounai ogogami taudia dekenai lau henia, . . . to lauegu lalokau be lasi neganai, lau be namo lasi. . . . Inai gau toi idia noho hanaihanai: abidadama, bona Dirava ena nega namona naria noho kara, bona lalokau. To namo herea momokani gauna be lalokau.”—1 Korinto 13:1-3, 13.
18. Ita moale, badina be ita diba Iehova ese ita edena bamona do ia kara henia?
18 Iehova ena lalokau ita tohotohoa neganai, ita diba momokani ita ia lalokau henia, kerere ita karadia negadiai danu, badina be ia be ‘hebogahisi bona hariharibada Diravana; ia badu haraga lasi, ena hebogahisi bona ena kara momokani be bada herea.’ (Esodo 34:6) Bema iseda kerere ita helalolaidia kerehai momokani, ia gwaudiatao mai ena lalokau ida. (Salamo 103:1-3) Oibe, Iehova be “mai ena bogahisihisi, bona iena hariharibada be bada herea.” (Iakobo 5:11) Inai ita diba dainai ita moale.
Moale, Hari Inai Negai
19 To, hari inai negai, Satana ena tanobada be kara dika bona gorere bona mase ai ia honudae neganai, ita moale diba a? Momokani, hari ita moale diba lasi, Dirava ena tanobada matamatana lalonai do ita moale bada hegeregerena. Unai moale be Baibel lalonai ia gwauraia, ia gwau: “Lau ese guba matamatana bona tanobada matamatana lau karadia inai; gau gunadia do idia lalodia lou lasi, do idia lalodiatao lasi. To umui moale, umui moale hanaihanai, lau karadia gaudia umui moalelaidia.”—Isaia 65:17, 18.
19, 20. (a) Dahaka dainai hari ita moale guguru diba lasi? (b) Baibel ese edena bamona ia hahedinaraia moale be hari ita davaria diba?
20 Hari inai negai Dirava ena hesiai taudia idia moale, badina be iena ura bona ena tanobada matamatana ena paradaiso lalonai do ia havaradia hahenamodia be idia diba goevagoeva. (Ioane 17:3; Apokalupo 21:4) Unai dainai Baibel ia gwau: “Guba oreadia edia Iehova e, oi ia abidadama henia tauna ia moale,” “Iehova garina idia gari bona iena dala ai idia raka taudia iboudiai idia moale,” “dagedage lasi taudia be idia [moale], badina tanobada do idia abia.” (Salamo 84:12; 128:1; Mataio 5:5) Unai dainai, ena be hari inai nega dikana lalonai ita hekwarahi, to ita moale bada diba. Dika ita davaria negadiai danu, ita lalohisihisi lasi, Iehova idia diba lasi bona mauri hanaihanai idia helarolaia lasi taudia bamona.—1 Tesalonika 4:13.
21. Iehova ena hesiai taudia edia henia karadia ese edia moale edena bamona idia habadaia?
21 Iehova ena hesiai taudia idia moale badina ma ta be, Baibel ena hereva be haida hadibalaidia karadia ai, idia ese nega, goada, bona moni idia haorea. Unai amo idia ese Satana ena tanobada ena ‘kara dika rohorohodia iboudiai idia taitailaidia’ taudia idia durudia bada. (Esekiel 9:4) Baibel ia gwau: “Ogogami tauna ia kara henia mai ena hebogahisi ida tauna be ia moale; hekwakwanai dinana ai Iehova ese do ia harohoa mauri. Iehova ese do ia gimaia bona do ia hamauria. Tano ai do idia gwau ia moale.” (Salamo 41:1, 2) Iesu ia gwau: “Henia kara ena moale be bada, abia kara ena moale be maragi.”—Kara 20:35.
22. (a) Moale ai, Dirava ena hesiai taudia ese ena hesiai idia lao henia lasi taudia edena bamona idia hereadia? (b) Dahaka dainai ita diba moale ita davaria diba?
22 Unai dainai, ena be Dirava ena hesiai taudia idia laloa lasi hari do idia moale hisidae, to moale idia davaria, Dirava ena hesiai idia lao henia lasi taudia ese idia davaria lasi moalena unai. Iehova ia gwau: “Itaia! Lauegu hesiai taudia do idia boiboi mai edia moale ida, edia lalo-namo dainai, to umui be do umui taitai, emui kudouna idia hisihisi dainai, bona do umui taitai, umui lalohisihisi bada herea dainai.” (Isaia 65:14) Bona Dirava ena hesiai taudia be hari idia moale, badina badana be ena lauma helaga idia abia, ‘Dirava ese iena kamonai taudia ia henidia’ laumana unai. (Kara 5:32) Bona Dirava ena lauma ia noho gabunai, moale danu ia noho.—Galatia 5:22.
23. Stadi gabena ai dahaka do ita stadilaia?
23 Hari inai negai, Dirava ena hesiai taudia edia orea lalonai, “ekalesia gunalaia taudia,” elda taudia unai, edia kara be mai anina bada, badina be Iehova ena orea taudia edia moale idia habadaia. (Tito 1:5) Vadaeni, edia gaukara bona edia tadikaka bona taihu orea lalonai be edena bamona idia lalodia be namo? Hereva gabena ese inai henanadai do ia haerelaia.
Edena Bamona Oi Haere?
◻ Iehova ese ia karadia gaudia ese edena bamona idia hahedinaraia ia naridia namo herea?
◻ Gunaguna bona hari inai negai danu, Iehova ese ena hesiai taudia edena bamona ia hagaukaradia hebou?
◻ Iehova ia ura ita be edena bamona do ita kara namonamo?
◻ Iseda moale havaraia karana ai, lalokau ena anina be ede badana?
◻ Hari inai negai dahaka moale ita davaria diba?
15. Dahaka dainai, do ita moale totona, gau badana be lalokau do ita hahedinaraia?
[Picture Credit Line on page 10]
Top: Courtesy of ROE/Anglo-Australian Observatory, photograph by David Malin