Gabu Momo ai Mase Taudia Idia Gari Henidia

Dina be hora momo ia diho vadaeni. Oi ura haraga ruma dekenai oi giroa, to hari sibona oi lao. Unai gabu ena gara gabuna oi raka hanaia neganai, emu kudou ia heau haraga sisina. Hanuaboi ia dibura bona regerege be bada lasi, unai dainai rege sisina ia vara neganai oi kamonaia haraga diba. Gabu daudau amo rege ta oi kamonai dainai oi hoa bona oi gari. Ruma dekenai oi noho namo totona oi raka haraga​—emu kudou ena rara ia heau haragaharaga danu.

GARA gabuna ai eiava gara gabuna kahirakahira ai oi lao neganai, oi lalo-hekwarahi, a? Bema oibe, tanobada ibounai dekenai taunimanima momo ese idia abia dae tomadiho lalohadaina ta be reana oiemu lalona ia veria​—unai lalohadai be mase taudia ese mauri taudia idia durudia eiava idia hadikadia diba.

Taunimanima idia laloa mase taudia be mauri taudia edia heduru idia tahua eiava idia laloa mase taudia idia badu neganai mauri taudia idia hadikadia diba, unai dainai, gari ese ia havaraia karadia momo idia vara. Hegeregere, Latin America tanodia haida dekenai, taunimanima momo be bada lasi rumana ta mai ena korosi idia haginia aksiden dainai ta ia mase gabuna dekenai. Taunimanima be unuseniai kandolo idia araia bona flaoaflaoa idia atoa badina idia ura idia hahedinaraia mase tauna ena souli eiava lauma idia laloa eiava idia durua. Nega haida, sivarai idia gwau “hoa” dalana ai taunimanima edia guriguri edia haere idia abia, bona unai dainai taunimanima be animita idia vadivadi henia momo; animita be mase tauna ena souli eiava lauma ia noho bada lasi rumana. Unuseniai mandas, eiava gwauhamata, idia karaia; idia gwau, bema mase tauna ese ia durua gau ta idia karaia eiava abia totona​—reana hoa dalana ai gorere ia hanamoa​—idia be dala badana ai edia moale karana do idia hahedinaraia. Eiava, reana sivarai idauna ma ta idia gwauraia, idia gwau hanuaboi neganai, mase tauna ena souli ia hedinarai, bona unai taudia ia hagaridia. Taunimanima momo idia gwau unai souli be penando, guna idia vara gaudia dainai mauri taudia idia hahisidia noho.

Tano momo lalodiai, taunimanima idia hekwarahi bada mase taudia edia “lauma” idia hamoaledia totona. Aria badadia idia karaia, boubou gaudia idia henia, lauma hamanaua herevadia idia gwauraidia​—unai ibounai idia karaia, mase tauna ena lauma ese ia hadikadia garina. Idia laloa, bema lauma idia hamoalea, vadaeni, idia mauri noho taudia be dava namodia bona hahenamo do idia davaria.

“Taunimanima momo idia laloa gau iboudiai idia ‘vara kava eiava idia vara sibona’ lasi,” unai be Africa dekena amo ripoti ta ena hereva. “Herevana dahaka ia vara​—gorere, gau dikana, gabani, moni hekwarahi, medu bada eiava dina ia siahu momo, aksiden, ruma bese lalo-tamona lasi karana, mase​—idia laloa, ita itaia diba lasi laumadia ese unai kara iboudiai idia havaraia, bona idia laloa unai lauma edia siahu ese taunimanima edia siahu ia hereaia.” Ma ripoti ta ia gwau: “Taunimanima idia laloa sene taudia edia lauma be guba dekenai idia noho, bona idia ese edia varavara tanobada dekenai idia naridia hanaihanai. Idia laloa sene taudia edia siahu be taunimanima edia siahu ia hanaia, bona varavara be mase taudia idia matauraidia eiava idia lalodia boio hegeregerena, unai siahu idia gaukaralaia diba edia varavara tanobada dekenai idia hanamodia bona idia naridia eiava idia panisi henidia totona.”

To unai be Dirava ena Hereva hegeregerena, a? Emu lalohadai be dahaka?

[Picture on page 4]

Chile dekenai “Animita” ta