Iesu be Dirava Ia Abidadama Henia Diba, A?

Toi Tamona Idia Abia Dae Taudia Edia Hekwakwanai

“IESU be edena bamona Dirava ia abidadama henia diba? Ia be Dirava; ma ta dekenai ia lao lasi to gau iboudiai ia diba bona ia itaia. Abidadama karana be ma ta dekenai oi tabekau bona oi gwau oi itaia diba lasi gauna ia noho momokani; unai dainai, Iesu-Dirava be mai ena abidadama be anina lasi herevana.”

France dekenai tomadiho stadilaia tauna Jacques Guillet ena hereva hegeregerena, unai be Katolik taudia momo edia lalohadai. Unai hereva dekenai oi hoa, a? Reana oi laloa Iesu be gau ibounai dekenai Keristen taudia edia haheitalai namona dainai, anina be abidadama ia haheitalaia namo herea. Bema unai oi laloa, anina be Kerisendom ese ia hahedibalaia Toi Tamona herevana oi laloaboio.

Toi Tamona idia abia dae Katolik, Protestan, bona Otodoks tomadiho stadilaia taudia haida idia laloa Toi Tamona be “Keristen abidadama bona mauri dalana ena hehuni hereva badana”; bona Iesu ena abidadama be idia daradaralaia momokani gauna.a To iboudiai lasi idia gwau Iesu be abidadama lasi. Ena be Jacques Guillet ia gwau “ita itaia momokani Iesu be mai ena abidadama,” to Guillet ia gwau Toi Tamona hahediba herevana dainai, unai be “hereva idauna.”

France Jesuit tauna Jean Galot, bona ia bamona tomadiho stadilaia taudia momo, edia hereva ia hedinarai namonamo, ia gwau: “Ia be Dirava momokani bona tanobada tauna momokani dainai, . . . Keriso be sibona dekenai ia abidadama henia diba lasi.” La Civiltà Cattolica magasin ia gwau, “Abidadama karana be ma ta ia kamonai henia, sibona ia kamonai henia lasi.” Vadaeni, Toi Tamona hahedibana dainai ita hekwarahi ita abia dae Iesu be mai ena abidadama, badina ia hedinarai namonamo unai lalohadai rua edia hereva be idau.

Tomadiho stadilaia taudia idia gwau, “Evanelia herevadia dekenai nega ta lasi Iesu ena abidadama idia herevalaia.” Hegeregere, Keristen Greek Revarevadia lalodiai idia gwauraidia herevadia pi·steuʹo (hereva abia dae, mai ena abidadama) bona piʹstis (abidadama) be nega momo idia gaukaralaia hahediba taudia ese Dirava eiava Keriso idia abidadama henidia karana ia herevalaia, unai hereva idia gaukaralaia lasi Iesu ese ena guba Tamana dekenai ia abidadama henia karana idia gwauraia neganai. Unai dainai, ia namo ita laloa Dirava ena Natuna ena abidadama be lasi? Iena kara bona ena hereva amo dahaka ita diba? Revareva Helagadia be dahaka idia gwau?

Abidadama Lasi Guriguridia?

Iesu be guriguri tauna. Nega iboudiai ia guriguri​—bapatiso ia abia neganai (Luka 3:21); iena aposetolo taudia 12 ia do abidia hidi lasi hanuaboina ibounai lalonai (Luka 6:​12, 13); bona ororo dekenai aposetolo Petero, Ioane, bona Iakobo ida ia noho, iena toana be hoa dalana ai ia do idau lasi neganai. (Luka 9:​28, 29) Iena hahediba taudia ese idia noia: “Guriguri oi hadibaia ai dekenai” neganai ia guriguri, unai dainai Lohiabada ena Guriguri ia hadibadia (“Aiemai Tamana” gurigurina). (Luka 11:​1-4; Mataio 6:​9-13) Daba momokani ia be sibona ia noho neganai ia guriguri bona ia guriguri daudau (Mareko 1:​35-39); adorahi neganai, ororo dekenai, iena hahediba taudia ia siaidia lao murinai (Mareko 6:​45, 46); iena hahediba taudia ida ia noho neganai bona idia totona ia guriguri. (Luka 22:32; Ioane 17:​1-26) Oibe, guriguri be anina bada gauna Iesu ena mauri lalonai.

Hegeregere hoa karadia ia do karadia lasi neganai, iena turana Lasaro ia do hatorea isi lou lasi neganai, ia gwau: “Egu Tamana e, lau hanamoa oi, badina be oi ese lau oi kamonai henia noho. Lau diba oi be nega ibounai oi kamonai henia lau. Gau tamona, inai taunimanima lau dekenai idia gini hagegea lau laloa. Idia dainai lau hereva inai bamona, lau be oi ese oi siaia, do idia abia dae totona.” (Ioane 11:​41, 42) Ia laloa momokani ena Tamana ese unai guriguri do ia haere henia dainai, ia hahedinaraia iena abidadama ia goada bada. Dirava guriguri henia be mai anina Dirava abidadama henia karana dekenai be Iesu ese ia hamomokania iena hahediba taudia dekenai inai hereva ia henia neganai: “Dahaka gau umui ura, guriguri dekenai umui noia neganai, bema umui abidadama henia momokani be do umui abia, vadaeni, umui ese do umui abia.”​—Mareko 11:24.

Bema Iesu ena abidadama be lasi, dahaka dainai Dirava ia guriguri henia? Toi Tamona hahediba herevana be Baibel amo lasi, to Kerisendom ese ia hahedibalaia Iesu be nega tamona taunimanima bona Dirava dainai, unai ese Baibel ena sivarai ia hagagevaia. Unai ese taunimanima ia hahekwakwanaidia bona Baibel ena auka lasi herevadia bona ena siahu idia lalo-pararalaia lasi. Unai tau Iesu be daika ia guriguri henia? Sibona a? Ia diba lasi ia be Dirava, a? Bema ia be Dirava bona unai ia diba, dahaka dainai ia guriguri?

Tanobada dekenai iena mauri dina ginigabena ai Iesu ena guriguri amo, iena guba Tamana ia kamonai henia momokani karana ita lalo-pararalaia bada diba. Ia hahedinaraia ia be mai ena helaro bona ia diba unai helaro do ia vara momokani, unai dainai ia noinoi, ia gwau: “Egu Tamana e, harihari oiemu hairai dekena amo do oi hanamoa lau dekenai, tanobada do ia vara lasi neganai, oiemu vairana dekenai lau abia hairaina.”​—Ioane 17:5.

Ia diba iena hetoho badadia bona iena mase be kahirakahira dainai, Olive Ororona dekenai Getesemane umana lalonai ia noho hanuaboina ai, “ena lalona ia metau bada herea, ena kudouna danu ia hisihisi bada,” bona ia gwau: “Lau be egu lalona ia hisihisi bada, kahirakahira lau mase.” (Mataio 26:​36-38) Bena ia tui diho bona ia guriguri: “Egu Tamana e, oiemu lalona bema ia hegeregere inai kapusi be lau dekena amo do oi kokia, to lauegu ura lasi, oiemu ura sibona.” Bena “aneru ta guba dekena amo ia dekenai ia ginidae, ia dekenai goada henia totona.” Dirava ese iena guriguri ia kamonai henia. Iena lalona ia hekwarahi bada bona iena hetoho ia dika bada dainai, “ena kopina ia siahu ranuna be rara bamona ia moru tano dekenai.”​—Luka 22:​42-44.

Iesu be hisihisi ia abia, goada ia tahua, bona iena noinoi ese dahaka idia hahedinaraia? Jacques Guillet ia toretore, ia gwau: ‘Gau tamona ita diba momokani, Iesu ia guriguri, bona iena mauri bona ena kara dekenai guriguri be mai anina bada. Taunimanima bamona ia guriguri, bona taunimanima totona ia guriguri. Vadaeni, bema taunimanima edia abidadama be lasi idia guriguri diba lasi. Iesu be abidadama lasi neganai ia guriguri diba, a?’

Ia do mase lasi bona hisihisi auna dekenai ia do noho neganai, Iesu be gado badana amo ia boiboi, David ena salamo herevadia ia gwauraia. Bena mai ena abidadama ida, gado badana amo, ena noinoi ginigabena ia boiboilaia: “Egu Tamana e, egu lauma be oiemu imana dekenai lau atoa.” (Luka 23:46; Mataio 27:46) Italy gado ai, tomadiho idauidau ese idia hahanaia Baibel, Parola del Signore, ia gwau Iesu be Tamana dekenai ‘ena mauri ia henia.’

Jacques Guillet ena hereva be inai: “Ita dekenai idia hahedinaraia Keriso be korosi dekenai ia mase, Israel ena salamo herevadia amo ena Tamana dekenai ia boiboi, unai dainai, Evanelia torea taudia be ita dekenai idia hamomokania unai boiboi, Ia havaraia Natuna tamona sibona boiboina, hisihisi bada boiboina, tabekau momokani boiboina, be abidadama boiboina, unai be abidadama dekenai ia mase boiboina.”

Unai abidadama be dala badana dekenai ia hedinarai momokani dainai, tomadiho stadilaia taudia haida idia ura abidadama bona “tabekau” edia idau idia gwauraia. To unai idau hahedinaraia dalana ena badina be lasi Revareva Helagadia dekenai.

To ia haheaukalaidia hetoho badadia be Iesu ena abidadama dekenai dahaka ia hahedinaraia?

‘Iseda Abidadama Ia Durua Ela Bona Dokona Tauna’ Ia Abidadama Ela Bona Dokona

Heberu 11 taudia dekenai iena revareva ena karoa 11 lalonai, aposetolo Paulo ese Keristen edia nega ia do mai lasi neganai idia noho ori bamona abidadama tatau bona hahine hutuma ia herevalaidia. Ena hereva ena dokona ai, abidadama ena haheitalai badana bona goevadaena ia gwauraia, ia gwau: “Iseda matana Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua ela bona dokona. Iesu be satauro dainai ia hesiku lasi. Lasi momokani. Ia diba guba ena moale be ia vairanai ia noho dainai ia ese satauro ena hemarai bona ena mase ia laloa lasi. . . . Iesu ena hisihisi do umui laloa namonamo. Kara dika taudia ese mai badu danu ia idia dagedage henia. To ia goada noho. Unai dainai do umui hesiku lasi, bona do umui manoka lasi.”​—Heberu 12:​1-3.

Tomadiho stadilaia taudia momo idia gwau inai siri dekenai “Iesu ena abidadama” ia herevalaia lasi, to ia be “abidadama ia havaraia eiava ia be abidadama ena badina” ia herevalaia. Unai hereva dekenai Greek herevana te·lei·o·teś ese goevadae tauna ia herevalaia, gau ta ia hamomokania eiava ia karaia ela bona dokona tauna. Ia be ia karaia “ela bona dokona” Tauna dainai, Iesu ese abidadama ia hagugurua badina tanobada dekenai ia mai Baibel peroveta herevadia ia hagugurudia bona unai amo abidadama ena badina namona ia haginia. To anina be ia ena abidadama be lasi, a?

Rau 15 mauana dekenai be Heberu taudia ia tore henidia revarevana ena hereva haida, bona unai hereva dainai ita daradara lasi. Iesu be iena hisihisi bona iena kamonai dainai ia abidadama ela bona dokona. Ena be ia be goevadae tauna vadaeni, to ia davaria gaudia dainai ia goevadae bona gau iboudiai dekenai ia namo vadaeni, abidadama dekenai dainai, Keristen momokani taudia be hahemauri idia abia totona edia Hahelaga Tauna Badana ai ia hegeregere momokani ai ia lao danu. Iena Tamana ia noia “mai taitai bona mai matana ranu danu,” “Dirava ena ura ia badinaia,” bona ia be “Dirava henunai ia manau noho.” (Heberu 3:​1, 2; 5:​7-9) Heberu 4:15 ia gwau, “ia danu ese hedibagani ena mamina [iboudiai, NW] ia abia, ita ese ena mamina ita abia hegeregerena,” anina be, “hedibagani idauidau” ia haheaukalaia abidadama Keristen tauna be ena abidadama dainai ia haheauka hegeregerena. (Iakobo 1:​2, 3) Ia maoro ita gwau Iesu murinai idia raka taudia ese idia abia hedibagani be iena abidadama dekenai ia abia lasi neganai idia “hegeregerena” hedibagani ia abia, a?

Guriguri, kamonai kara, hisihisi, hetoho, Dirava ena ura karaia noho kara, bona Dirava gari henia karadia ese idia hamomokania Iesu ena abidadama ia namo vaitani. Unai gaudia ese idia hahedinaraia ela bona dokona ia abidadama noho murinai sibona, ia be “iseda abidadama do ia durua ela bona dokona” tauna ai ia lao diba. Ia hedinarai goevagoeva, ia be Toi Tamona hahediba herevana ese ia gwauraia Natuna Diravana lasi.​—1 Ioane 5:5.

Dirava Ena Hereva Ia Abia Dae Lasi, A?

Toi Tamona hahedibana ese tomadiho stadilaia taudia edia lalohadai ia veria momo, unai dainai hereva idau momokani idia gwauraia, idia gwau Iesu be “Dirava ena Hereva bona ena sivarai ia abia dae diba lasi,” badina “ia be Dirava ena Hereva dainai, ia be unai hereva ia harorolaia diba sibona.”​—Angelo Amato, Gesù il Signore, dubu ena gwaumaoro maka danu.

To Iesu be hanaihanai Revareva Helagadia amo ia hereva dainai, unai ese dahaka ia hahedinaraia? Hedibagani ia abia neganai, ia be nega toi Revareva Helagadia amo ia hereva. Iena haere ihatoina dekenai Iesu ese Satana ia hamaoroa Dirava sibona ia tomadiho henia. (Mataio 4:​4, 7, 10) Nega momo Iesu ese sibona idia herevalaia peroveta herevadia ia gwauraidia, bona ia hahedinaraia idia guguru dalana ia abidadama henia. (Mareko 14:​21, 27; Luka 18:​31-33; 22:37; Luka 9:22; 24:​44-46 itaia danu.) Unai siri tahua karana amo ita diba Iesu be ena Tamana ena lauma helaga amo idia mai Revarevadia ia diba, mai abidadama ida ia badinadia, bona iena hetoho, hisihisi, mase, bona toreisi lou idia gwauraidia guna peroveta herevadia edia guguru dalana dekenai ia abidadama momokani.

[Footnotes]

Iesu Ena Abidadama Haheitalaina Ita Tohotohoa

Iesu ese abidadama ena tuari ia tuarilaia ela bona dokona, iena Tamana ia tabekau henia noho bona ‘tanobada ia halusia’ totona. (Ioane 16:33) Abidadama lasi neganai, unai bamona kwalimu ia abia diba lasi. (Heberu 11:6; 1 Ioane 5:4) Unai abidadama amo ia kwalimu dainai, ia be haheitalai namona ia murinai idia raka abidadama taudia dekenai. Dirava momokanina dekenai ia be momokani mai ena abidadama.

[Box on page 15]

Iesu, ‘Abidadama Do Ia Durua Ela Bona Dokona Tauna,’ Ia Abidadama Ela Bona Dokona

Heberu 2:​10, NW: “Ia totona gau iboudiai idia vara tauna bona iena amo gau iboudiai idia vara tauna ese natuna momo dekenai hairai ia henia neganai, edia mauri ena Biaguna be hisihisi amo ia hagoevaia ia maoro.”

Heberu 2:​17, 18: ‘Ia be kara ibounai dekenai iena tadina taudia hegeregerena momokani do ia lao. Badina unai dala dekena amo Iesu be Boubou Helaga Karaia Tauna Badana do ia lao, bona Dirava ena hesiai gaukara mai momokani bona mai hebogahisi danu do ia karaia. Bona unai dala dekena amo danu taunimanima edia kara dika Dirava ese ia gwauatao diba. Iesu ese hedibagani bona hisihisi ena mamina ia abia dainai, ia ese taunimanima ia durua diba, edia hedibagani neganai.’

Heberu 3:2: ‘Dirava ese Iesu ia abia hidi vadaeni inai dagi do ia karaia totona, bona Iesu ese Dirava ena ura ia badinaia. Mose ese Dirava ena dubu gaukara ia badinaia namonamo bamona, Iesu danu Dirava ena ura ia badinaia namonamo.’

Heberu 4:15: ‘Ita be manoka dainai karadika ese nega momo ita ia hamorua. To iseda Boubou Helaga Karaia Tauna Badana ese ita ia hebogahisi henia diba. Badina be ia danu ese hedibagani ena mamina iboudiai ia abia, ita ese ena mamina ita abia hegeregerena. To Iesu ese kara dika ta ia karaia lasi.’

Heberu 5:​7-9: ‘Tanobada dekenai ia noho neganai Iesu ese Dirava ia guriguri henia mai taitai bona mai matana ranu danu. Ia noinoi badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura ia noia lasi, bona ia be Dirava henunai ia manau noho dainai. Iesu be Dirava ena Natuna, to ia ese hisihisi ia abia, bona unai hisihisi ese Dirava kamonai henia dalana ia hadibaia. Ela bona ia be namo momokani vadaeni, iena namo ese ibounai edia namo ia hanaia. Unai dainai ia be hegeregere vadaeni ia dekenai idia kamonai henia taudia ibounai mauri hanaihanai do ia henidia. Dirava ese inai dala ia havaraia.’