Gilead Sikuli Taudia Idia Ura Bada Sivarai Namona Idia Harorolaia
“IA BE namo herea momokani.” Unai hereva amo Anders bona Amalia Groth ese misinari sikuli dekenai idia hadibaia dalana idia herevalaia. Idia edia lalohadai be Watchtower Bible School of Gilead ena klas 97 ena kosi idia haorea taudia 48 edia lalohadai hegeregerena, idia gwau: “Gilead dekenai ai idia hadibaia dalana amo ai idia hagoadaia bona ai idia hegaegaelaia dainai, hari ai ura bada ai idia siaia gabuna matamatana dekenai ai lao.”
Sikuli taudia be kosi idia haorea ena program idia herevalaia neganai edia moale ia hedinarai; September 4, 1994 ai, taunimanima 6,420 idia mai unai hebou dekenai.
David Abel bona ena adavana, Kelli, idia gwau: “Program kehoa totona Hakaua Oreana tauna ta Theodore Jaracz ena hereva ladana be ‘Iehova ese Ita Ia Hadibaia.’ ” Ma idia gwau: “Ai laloaboio diba lasi herevana be inai, Tadikaka Jaracz ia gwau: ‘Sibona ita gwauraia maragi bona Iehova ita gwauraia bada be gau badana,’ bona unai ia haheitalaia totona ia ese Iobu karoa 38 bona 39 ena sivarai ia kikilaia. Tadikaka Jaracz ese ia hahedinaraia ena be Gilead Sikuli dekenai iseda diba Baibel dekenai ita habadaia, to henanadai haida edia haere ita do diba lasi. Dirava ena Hereva ita stadilaia noho be gau badana.”
Christian bona Angele Coffy be idia hereva, idia gwau: “Max Larson ia henia hereva ai moalelaia, ena ladana be ‘Badina Aukana Ena Namo be Dahaka?’ Ia gwau ita be ruma bamona, tano ia mareremarere neganai bema ruma ena badina aukana be tano ena dobu momokani ai ia noho, ruma do ia moru lasi. Stadi goadagoada karana amo Iehova ita turana henia namonamo diba, bona iseda abidadama be diba dobuna ena badina aukana dekenai ita haginia diba, bena hekwakwanai idia vara neganai do ita moru lasi.”
Gary bona Lynn Elfers idia gwau: “Sikuli ena presiden, Milton Henschel, ia henia hereva ai laloaboio haraga diba lasi, ena ladana be ‘Uma Ena Anina Idia Kurokuro Utua Totona.’ ” Ma idia gwau: “Ia kikilaia Baibel siri badana be Ioane 4:35-38, bona ia hahedinaraia goevagoeva haida ese idia hadoa vadaeni umana dekenai ita vareai gaukara totona be hahenamo ta. Unai ese ita ia hasiahua do ita gaukara goadagoada totona.” Jan bona Sirpa Vaahtola be unai hereva idia hamomokania danu, idia gwau: “Tadikaka Henschel ese Baltic State gabudia dekenai ia do noho uma anina gogoa gaukarana ena ripoti ia gwauraia neganai, emai lalona ia veria momokani. Estonia dekenai 51 pesen, Latvia dekenai 106 pesen, bona Lithuania dekenai 51 pesen amo gaukara ia bada daekau. Unai be moale gauna momokani! Unuseniai tadikaka ese Biaguna idia noia goadagoada gaukara taudia ma haida do ia siaidia totona. Unai ai kamonai neganai ai moale bada herea badina ai idia siaia Estonia dekenai do ai haroro totona!”
Kevin bona Evelyn Cortina idia laloa lou, idia gwau: “Joel Adams ia henia hereva ena ladana be ‘Iehova Abidadama Henia.’ ” Ma idia gwau: “Ia ese ai ia sisiba henia, ia gwau namo lasi umui laloa nega haida Iehova dekenai umui abidadama bona nega haida umui sibona emui aonega dekenai umui abidadama diba. Haroro totona do umui lao henia gabudia dekenai hekwarahi idauidau momo do umui davaria, hegeregere: gorere, aniani, gado, kastom, bona ma gau haida. Unai gaudia dainai Iehova umui abidadama henia be gau badana.”
Murinai, Gerrit Lösch, Hakaua Oreana ena memba tauna ta, be hereva kwarana, “Iehova Ena Hebogahisi Hahedinaraia Hanaihanai” ia kikilaia. Alen bona Ann Maria Gokavi idia gwau: “Ia ese ia hahedinaraia bema iseda misinari bamodia dekenai eiava sivarai namona ita haroro henia taudia dekenai hebogahisi karana ita hahedinaraia, unai be lo Keristen tauna ena toana. Tano idauna ta dekenai ita lao haroro neganai iseda ura gaudia haida ita reaia, to bema ita hebogahisi lasi, unai gaudia ita reaia be anina lasi.” (Mataio 9:13) Peter bona Fleur Hupston ese unai hereva idia habadaia, idia gwau: “Tadikaka Lösch ia gwau namona be iseda tadikaka bona taihu ita hebogahisi henidia be gau badana danu, ia gwau namo lasi edia kerere maragidia be kerere badadia ita gwauraia, binocular amo gau ta ita raraia ia habadaia bamona, to namona be unai kerere maragidia be anina bada lasi gaudia ita gwauraia.”
Mickey bona Sherry Minsky idia gwau: “Jack Redford, Gilead ena hahediba tauna ta, ese ia henia hereva ena ladana be ‘Sisiba Hereva Oi Abia Dae Diba, A?’ ” Ma idia gwau: “Ia hahedinaraia bema ita hekokoroku, sisiba hereva ita abia dae be ia auka, bona sisiba ita abia neganai bema ita badu, unai heduru ena namo do ita reaia. Murinai, Rohe-ahu Bukana 3:27-31 amo, sisiba ita abia dae karana dekenai, ita badinaia diba heduru hereva haida ia henia.” Charles bona Joan Held danu idia gwau: “Nega momo ita siboda eda kerere ita itaia lasi; unai dainai, sisiba ita abia dae be gau badana badina unai dala amo iseda matana ia kehoa bona guna ita itaia lasi gauna ita itaia diba. Iehova ese heduru hereva eiava sisiba hereva ita ia henia neganai ia hahedinaraia ita ia lalokau henia.”
Kenneth bona Lisbeth Ardkäll idia gwau: “Hahediba tauna ma ta, Ulysses Glass, ese hereva ena sinado ‘Mauri Hanaihanai Dekenai Oi Ia Hakaua Bona Oi Badinaia Diba Aonegana Oi Abia’ ia henia. Ia gwau: ‘Umui idia hadibaia herevadia be edena bamona do umui gaukaralaidia?’ ” Ma idia gwau: “Bena Hereva Lada-isidia 30:24-26 amo haheitalai herevana ta ia gwauraia, ia gwau Iehova ese migu dekenai aonega haida ia henia ia mauri diba totona. To, ita be idau, ita lalonai aonega be ia noho hegaegae vadaeni lasi, unai dainai, ita aonega totona gau badana be ita hekwarahi. Ita aonega totona Iehova ese ita ia henia heduru gaudia be momo. Bema lalokau dekenai Iehova bona iseda tadikaka ita lao henidia kahirakahira neganai, gaukara idauidau momo ita karaia diba.”
Hereva Badana
Jay bona Gwen Abraczinskas idia gwau: “Tadikaka Karl F. Klein, Hakaua Oreana ena memba tauna ta, be mai moale danu Salamo karoa 19 ia kikilaia, ena hereva ladana be ‘Dava Bada Gauna Dava Bada Gaudia Huanai.’ ” Ma idia gwau: “Ia hahedinaraia salamo torea tauna David be Iehova ia laloa bada bona Dirava ena Hereva ia ura henia bada.” Keith bona Donna Hornback idia gwau: “Tadikaka Klein ese unai salamo be kahana toi dekenai ia hapararaia.” Ma idia gwau: “Kahana 1 (Sa 19 siri 1-6) ese ia hahedinaraia David be Dirava ese ia havaraia gaudia ia moalelaidia, kahana 2 (Sa 19 siri 7-10) ese David ena moale Dirava ena taravatu dekenai ia hahedinaraia, bona kahana 3 (Sa 19 siri 11-14) be ita ia hadibaia, namona be David hegeregerena ita ura Iehova ita tura henia momokani.”
David bona Raylene Long idia gwau: “Ia hahedinaraia dika karadia do ita dadaraidia totona Iehova garina ita gari be gau badana, unai hereva ai moalelaia. Unai ese ita ia veria iena matanai kara goeva ita karaia totona.” Frank bona Vibeke Madsen be unai hereva idia habadaia, idia gwau: “Tadikaka Klein ena hereva lalonai ia gwau Iehova ese ita ia henia sisiba, taravatu, bona hahegani amo namo ita davaria, bona Gilead Sikuli dekenai ai diba gaudia ia hamomokania.” Ma idia gwau: “Bona ai ia hagoadaia dina vairai Dirava ena Hereva do ai badinaia noho, bona dava bada gaudia amo ia honu mauana bamona do ai kara henia.”
Hereva badana ia ore murinai, sikuli taudia be kosi idia haorea pepana idia abia, bona do idia lao henia tanona idia gwauraia hedinarai. Aniani ania totona idia laga-ani murinai, adorahi kahanai idia hebou lou. Kosi idia haorea taudia be Gima Kohorona Stadi kwadogina lalonai henanadai idia haerelaidia.
Bob bona Shannon Lakatos idia gwau: “Bena stiuden edia program ‘Ai Idia Hadibaia Tanobada Hegegemadai Basileia Ai Harorolaia Totona,’ ena hereva ai abia.” Ma idia gwau: “Unai program ena kahana ginigunana be sikuli ena hua ima lalodiai stiuden edia ekspiriens haida haroro gaukara dekenai idia gwauraia hedinarai. Henanadai gaukaralaia mai aonega ida karana ia hahedinaraia namonamo. Haida idia nanadaidia, bona edia haere amo misinari edia hekwakwanai bona noho gabudia idauidau dekenai edena bamona idia kwalimu diba idia hahedinaraia. Slaid piksa Costa Rica, India, bona Malawi amo ese Iehova ena tanobada hegegemadai oreana ena kahana ai dekenai ia hahedinaraia.”
Jesse bona Michelle Duncan idia gwau: “Unai murinai idia karaia drama ladana Tiokratik Dalana Badinaia, Tanobada Dalana Badinaia Lasi, be sibodia edia ura idia tahua guna Witness lasi varavara taudia ese idia havaraia diba hekwakwanai ia hahedinaraia.” Wenzel bona Kelly Koula ese unai drama idia herevalaia, idia gwau: “Keristen taudia be Tiokratik oreana ena hakaua bona heduru herevadia idia badinaia be mai anina bona mai ena namo.”
Hebou be ane bona guriguri amo idia koua. Sikuli taudia idia lao gwauraia tano idauidau 18 dekenai, bona Tommi bona Jael Kauko ese edia lalohadai idia hedinaraia namo herea edia hereva ginigabena amo, idia gwau: “Ai ura bada aiemai gaukara gabuna matamatana dekenai ai lao bona ai stadilaia gaudia do ai gaukaralaidia. Gau momo ai abia vadaeni—harihari aiemai henia negana ia ginidae.”
[Box on page 26]
Watchtower Bible School of Gilead Ena Klas Namba 97
Henuai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be lauri kahana amo ela bona idiba kahana. (1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.