Kerisimasi Ena Anina Oi Dekenai be Dahaka?

Edena bamona oi haere? Kerisimasi be (1) emu famili ida umui hebou negana; (2) pati momo negana; (3) tomadiho negana; (4) lalo-hekwarahi negana; (5) nega gunana laloa lou negana; (6) hoihoi momo negana.

HOA gauna be inai: Britain ai taunimanima 1,000 bamona be Kerisimasi idia nanadailaidia neganai, 60 bamona mo idia gwau idia laloa Kerisimasi be tomadiho negana. To 480 bamona idia gwau idia laloa Kerisimasi be edia famili ida idia hebou negana. Idia momo idia gwau unai be edia natudia edia dina badana. Kekeni ta idia nanadaia, Kerisimasi ai dahaka ia ura henia bada; ia haere, ia gwau: “Ena moale, [bona] harihari gaudia henia karana.” Unai hegeregerena, buka ladana The Making of the Modern Christmas be ia gwau: “Taunimanima be ‘vaia’ Kerisimasi ai edia famili bona edia natudia idia lalodia bada.”

Unai kara be bada, Kerisendom ena west kahana ai; unuseniai, taunimanima be vaia Kerisimasi neganai edia varavara ida idia hebou bona idia harihari heheni. Isten Otodoks Tomadiho Oreana ena siahu be bada tanodia ai, ena be Ista idia laloa bada, to Kerisimasi danu be holide negana ta.

“Bisinesi Gaukarana” Ta

The New Encyclopædia Britannica ia gwau Kerisimasi be ‘hoihoi goadalaia negana ai idia halaoa’ vadaeni. Japan ai unai hereva be momokani vaitani.

Washington ena Daily Record ia gwau: “Japan taudia ese tomadiho koikoilaia karadia iboudiai idia hadokodia bona Kerisimasi be bisinesi gauna sibona ai idia halaoa vadaeni.” Ma ia gwau, Japan ai Kerisimasi ena “moale bada dinana ai bisinesi idia goadalaia bona tomadiho idia laloa maragi.”

Keristen tanodia idia gwauraidia tanodia ai danu, tomadiho ena toana ia hedinarai goevagoeva lasi. Lagani 40 bamona idia lao vadaeni, pepapepa ta ia gwau: “Kerisimasi be bisinesi oreadia ese idia abia isi. Lagani ta lalonai moni momo davaria negana be unai. Bisinesi taudia, sibodia be Keristen idia gwauraia taudia, ese Kerisimasi idia naria mai edia ura ida, Keriso dainai lasi, to moni do idia davaria dainai.” Hari inai negai unai hereva be momokani vaitani! Tano momo dekenai, hua toi idia do noho ela bona Kerisimasi negana, bisinesi taudia ese ita idia hadibaia matama dina hida idia do noho, idia lalodiai Kerisimasi harihari gaudia do ita hoidia diba. Lagani ena dokona ai, Kerisimasi be kahirakahira neganai, edia hoihoi be bada herea.

Herevana Kerisimasi ena anina oi dekenai be dahaka, to reana oi henanadai, edena bamona ia matama. Baibel ese Kerisimasi harihari gaudia henia karana ia gwauraia namo, a? Kerisimasi karadia be momokani Keristen karadia, a? Mani ita tahua.