Mauri Oi Laloa Bada, A?

TAUHAU ta be floa namba 8 ruma badana dekenai ia daekau bena ia roho diho bona ia mase. Ia duahia bukana ta lalonai atai gabuna amo ta ia roho diho ena mamina ia gwauraia “hisihisi lasi, eiava lalo-hekwarahi lasi, eiava gari lasi; to, ena mamina be namo.” Unai buka be Japan dekenai idia halasia, bona ia torea tauna ia gwau ia torea badina ia laloa “sibona hamasea karana be mauri lalonai abia hidi dalana ta.”

Hari inai nega lalonai, sibodia idia hamasea taudia be mauri idia laloa bada lasi. To idia mo sibodia lasi. Motuka taria kerere taudia danu be mauri idia laloa bada lasi. Motuka taria taudia haida idia inuinu bona motuka idia taria, idia momo be mase dekenai idia heau lao haraga.

Ma haida edia lalohadai moale karadia dekenai ese ia hahedinaraia edia mauri idia laloa bada lasi. Kuku ania taudia idia ura lasi unai kara idia hadokoa, ena be kuku ania karana ese mase ia havaraia diba, bona taunimanima ese unai kara idia gwauraia sisina sisina sibodia hamasea karana. Hari inai tanobada be sihari kava karana amo ia honu, bona taunimanima momo idia kara goeva lasi, idia ese sihari kava karana idia karaia bona nega momo unai ese mase ia havaraia.

Ena be idia diba lasi, to haida be idia aniani bada, idia inuinu bada, idia eksasais namonamo lasi, bona moale karadia idia tahua dainai, edia mauri idia hakwadogia. Buka torea Japan tauna, Shinya Nishimaru ia sisiba, ia gwau: “Aniani bada karana ese tauanina ena gaukara dalana haida ia hadikaia, bona ura bona moale kara mo sibona karaia ese taunimanima edia goada ia hamaragia.” Taunimanima haida edia lalohadai be idaunegai taudia hegeregeredia, idia gwau: “Ita aniani bona ita inuinu, badina be kerukeru do ita mase.”​—Isaia 22:13; 1 Korinto 15:32.

Oibe, hari inai negai, taunimanima momo be mauri idia laloa bada lasi. Unai dainai, inai bamona ita henanadai be maoro, Mauri oi laloa bada, a? Herevana dahaka do ia vara ita mauri be gau badana, a? Hari ita mauri be dava bada gauna, to ma gau ta ese do ia hanaia diba, a?