Mauri Korikorina Oi Laloa Bada

INAI mauri sibona do ita abia eiava? Baibel ese ita ia hagoadaia “mauri korikorina do ita dogoatao auka” totona, unai ese ia hahedinaraia ma gau ta ia noho. (1 Timoteo 6:​17-19, NW) Bema hari ita mauri be mauri korikorina lasi, dahaka be mauri korikorina?

Ita duahia vadaeni sirina ena karoa ena hereva ibounai ese ia hahedinaraia Dirava ia gari henia tauna be “mauri hanaihanai” do ia dogoatao auka be gau badana. (1 Timoteo 6:12) Taunimanima momo dekenai, unai ena anina be mauri hanaihanai tanobada dekenai do idia davaria. Adam, tau ginigunana, be tanobada paradaisona dekenai mauri hanaihanai ia abia diba. (Genese 1:​26, 27) Do ia mase bema “kara namona bona kara dikana hadibaia au ena huahua” ia ania neganai. (Genese 2:17) To Adam bona ena adavana, Eva, idia gwau-edeede bona unai au ena huahua idia ania dainai, Dirava ia gwau do idia mase. ‘Idia ania dinana lalonai,’ Dirava ena matana dekenai idia mase vadaeni, bona sisina sisina edia tauanina be mase dalanai idia lao. Guna edia mauri idia moalelaia bada, murinai idia moalelaia bada lasi.

“Mauri Korikorina” Abia Dalana

“Mauri korikorina” do idia abia totona, Iehova Dirava ese dala ia hegaegaelaia taunimanima ia hamauridia totona. Unai dala do ita lalo-pararalaia totona namona be faktori maragina ta ita laloa. Faktori lalonai masini iboudiai be mai edia dika bona unai masini idia gaukaralaia taudia idia hekwarahi bada, badina lagani momo gunanai, gaukara tauna ginigunana ese masini gaukaralaia dalana ia gwauraia bukana ia dadaraia, bena masini iboudiai ia hadikadia. Hari inai negai, unai masini sibodia idia noho dainai, gaukaralaia taudia idia hekwarahi noho. Faktori biaguna be gaukara taudia ia durudia totona, ia ura unai masini do ia hanamodia, bona unai do ia karaia totona ia ese moni ia haboua noho.

‘Masini gaukaralaia tauna’ ginigunana, Adam, be ia abia maurina ia laloa bada lasi. Unai dainai, ena natudia dekenai goevadae lasi maurina ia henidia, unai masini dikadia hegeregerena. (Roma 5:12) Unai faktori dekenai gabeai idia gaukara taudia ese masini idia hanamoa diba lasi hegeregerena, Adam ena natudia be sibodia mauri korikorina idia havaraia diba lasi. (Salamo 49:7) Unai dala lasi taudia durudia totona, Iehova ese ena vara guna natuna ia siaia tanobada dekenai taunimanima edia mauri hanaihanai do ia hoia lou totona. (Luka 1:35; 1 Petero 1:​18, 19) Taunimanima durudia totona ena mauri ia bouboulaia karana amo, Dirava ena vara guna natuna, Iesu Keriso, ese davana ia henia​—Adam ia haboioa maurina ia hoia lou. (Mataio 20:28; 1 Petero 2:22) Unai davana bada boubou karana dainai, harihari dala ia noho Iehova ese taunimanima dekenai mauri korikorina do ia henidia totona.

Iesu ese ia henia boubou karana ena anina be abidadama taudia be mauri hanaihanai tanobada paradaisona dekenai do idia abia diba. (Salamo 37:29) “Siahu Ibounai Diravana ena Dina Badana,” Aramagedono amo do idia roho mauri taudia iboudiai ese unai helaro idia abia. (Apokalupo 16:​14-16) Ia ese tanobada dekena amo kara dika ibounai do ia kokia. (Salamo 37:​9-11) Dirava ese ia laloatao taudia, bema unai dina ia do ginidae lasi neganai idia mase taudia, be tanobada dekenai do idia havaraia lou Paradaisona dekenai do idia toreisi lou, bona Dirava ena taravatu idia badinaia taudia iboudiai hegeregeredia, mauri korikorina do idia moalelaia.​—Ioane 5:​28, 29.

Hari Iseda Mauri Ita Laloa Bada be Namo

Ia maoro lasi bema ita gwau hari iseda mauri ita laloa bada lasi be gau ta lasi. Bema gaukara tauna be masini ia naria namonamo lasi, faktori biaguna be nega bona moni do ia negea masini hanamoa totona, a? Reana lasi, to biaguna ese ia hanamoa masini be masini gunana ia naria namonamo tauna dekenai do ia henia, ani?

Mauri be harihari gauna namona Iehova dekena amo. Unai harihari gauna be mai ena ura namona danu ia henia dainai, ia ura ita laloa bada. (Salamo 36:9; Iakobo 1:17) Iehova ese tanobada taudia ia lalodia bada karana ia herevalaia neganai, Iesu ia gwau: “Emui kwarana huina ibounai ia duahia ore.” (Luka 12:7) Iehova ese Israel taudia ia haganidia do idia ala-ala lasi, anina be sibona idia alaia lasi danu. (Esodo 20:13) Unai ese ita ia durua bena ita lalo-parara sibona ita alaia be maoro lasi.

Dirava garina idia gari taudia idia diba Iehova be mai ena lalokau ida iseda namo ia tahua dainai, idia ese edia mauri lalonai Baibel ena taravatu idia badinadia. Hegeregere, taravatu ia gwau Keristen taudia be ‘tauanina bona lauma hamiroa karadia ibounai do idia hadokoa, bona Dirava vairanai do idia noho namonamo, mai goeva bona mai gari danu,’ unai dainai idia ese kuku ania bona lalohadai hadikaia bona tauanina do ia biagua drag dikadia idia dadaraidia.​—2 Korinto 7:1.

Ita diba Dirava ese taunimanima edia mauri ia laloa bada badina ia sisiba henidia idia “lalo-manau” bona sihari kava karadia idia dadaraidia totona. (Hereva Lada-isidia 14:30; Galatia 5:​19-21) Unai mauri ena taravatu ita badinaia neganai, iseda tauanina idia hadikaia diba gaudia, hegeregere badu, bona sihari kava karadia amo idia vara goreredia do ita davaria lasi.

Ia hedinarai goevagoeva Iehova ese iena taunimanima edia namo ia tahua, badina ia sisiba henidia idia aniani bada lasi bona idia inuinu bada lasi totona. (Deuteronomi 21:​18-21; Hereva Lada-isidia 23:​20, 21) Keristen taudia be sisiba amo idia hadibadia, idia diba mataganigani taudia bona inuinu kekero taudia be Dirava ena Basileia lalonai do idia vareai lasi, unai ena anina be mauri korikorina ena mamina do idia abia lasi. (1 Korinto 6:​9, 10; 1 Petero 4:3) Iehova ese ita ia hadibaia iseda kara iboudiai do ita sikeledia namonamo, unai amo sibona ita hanamoa dalana ita ia hadibaia.​—Isaia 48:17.

Dirava ia gwauraia mauri taravatudia ita badinadia neganai, ita hahedinaraia hari iseda mauri ita laloa bada. To momokani, unai ena namo ia hanaia gauna be mauri korikorina. Unai mauri korikorina do ia noho ela bona hanaihanai, unai dainai, Keristen momokani taudia ese hari mauri idia laloa bada, to gabeai maurina idia laloa bada herea. Iesu Keriso ese ena mauri ia bouboulaia neganai, ia ese Iehova ena ura ia badinaia. Iena Tamana ena hereva ia badinaia ia laloa bada, iena mauri tanobada dekenai ia laloa maragi. Iesu ena kara dainai, ia toreisi lou bona guba dekenai mase diba lasi maurina ia abia. (Roma 6:9) Ia henia boubou karana idia abidadama henia taudia danu ese mauri hanaihanai do idia abia diba.​—Heberu 5:​8, 9; 12:2.

Taravatu Badana Rara Dekenai

Vaia, Iesu ena hahediba taudia be ia hegeregerena idia laloa. Edia kara iboudiai dekenai idia ura Dirava idia hamoalea, Keriso ia karaia hegeregerena. Unai ese ia hahedinaraia dahaka dainai idia dekenai rara henia hanai karana idia dadaraia, ena be doketa taudia idia gwau unai kara amo idia hamauridia diba. Hari ita ese tau ta be edena bamona ia hahedinaraia mauri korikorina ia laloa bada dainai ia ese rara henia hanai karana ia dadaraia ita laloa.

Iesu Keriso hegeregerena, Keristen momokani taudia idia ura Dirava matana dekenai idia mauri, unai ia vara totona Dirava idia kamonai henia momokani be gau badana. Dirava ena Hereva ese Keriso ena hahediba taudia ia haganidia, ia gwau: “Kaivakuku vairana dekenai idia atoa aniani umui ania lasi, rara umui ania lasi, aiona idia gigia gaudia edia hidio umui ania lasi, bona heudahanai kara umui karaia lasi.” (Kara 15:​28, 29) Dahaka dainai unai taravatu rara dekenai be Keristen taudia idia badinaia taravatudia lalonai idia atoa?

Israel taudia idia abia Taravatu ta ia gwau rara idia ania lasi. (Levitiko 17:​13, 14) Keristen taudia be Mose ena Taravatu henunai idia noho lasi. To, idia lalo-parara Mose ena Taravatu ia do noho lasi neganai rara ania lasi taravatuna ia noho; utu-utu ia ore murinai Dirava ese Noa dekenai rara taravatuna ia henia. (Genese 9:​3, 4; Kolose 2:​13, 14) Unai hahegani be mai anina Noa ena natudia iboudiai dekenai; idia dekena amo tanobada besedia iboudiai idia vara. (Genese 10:32) Danu, Mose ena Taravatu ese ita ia durua bena ita lalo-parara dahaka dainai Dirava ia ura rara ia helaga be gau badana. Dirava ese Israel taudia dekenai rara ania lasi ena taravatu ia henidia murinai, ia gwau: “Hidio ena mauri be rara ai, bona boubou patana latanai lau atoa emui mauri hagoevaia totona, badina be rara be hagoevaia gauna, badina ia lalonai be mauri.” (Levitiko 17:11) Dirava ia gwau rara be boubou patana sibona dekenai idia gaukaralaia. Iena taravatu rara ia helaga dalana dekenai ese ia hahedinaraia tanobada ibounai dekenai ia be mai ena siahu mauri gaudia iboudiai dekenai. (Esekiel 18:4; Apokalupo 4:11) Iehova ena itaia dalana amo iseda mauri ita laloa neganai, ita lalo-parara Dirava ese unai mauri ia biagua to ita ia henia do ita naria totona.

Guna ita gwauraia haheitalai herevana lalonai, gaukara tauna ena maduna be ia gaukaralaia masini ia naria, unai hegeregerena, iseda maduna be hari iseda mauri ita naria namonamo. Bema oiemu masini be ia dika bona mekaniki tauna ia gwau do ia hanamoa, to hanamoa totona bema ia atoa gwauraia gaudia be masini ena buka ese ia taravatudia, dahaka do oi karaia? Reana oi ese mekaniki taudia ma haida do oi tahudia masini ena buka ia gwauraia gaudia hegeregeredia do idia atoa totona, ani? Taunimanima edia mauri be gau badana bona iseda tauanina be hoa gauna, masini ia gaukara dalana ia hanaia momokani. Ita ia Havaraia Tauna ese ena Hereva lalonai taunimanima idia mauri noho diba dalana be ena lauma helaga amo ia torea, bona ia gwau ita mauri noho totona rara ita gaukaralaia be taravatu. (Deuteronomi 32:​46, 47; Filipi 2:16) Unai buka ena hereva ita badinaia be laloa maoromaoro karana, ani?

Oibe, Keristen taudia idia gorere neganai bona rara lasi gaudia amo do idia durudia dalana idia herevalaia neganai, idia ese medikal heduru ibounai idia dadaraia lasi. To idia ura idia abia heduruna amo ia hedinarai edia mauri idia matauraia​—hari maurina bona gabeai maurina danu. Mai edia lalo-goada ida Keristen taudia edia ura idia matauraia, bona edia ura hegeregerena ai, idia durudia doketa taudia be dahaka namo ia vara idia gwauraia hedinarai. Guna, taunimanima dekenai rara ia henia hanai momo ivaia doketa ta ia gwau: “Iehova ena Witness taudia lau davaridia dainai, hari mauri ena taravatu matamatadia lau diba.” Hari, bema mai ena dala ia ese Witness lasi taudia danu ia durudia neganai rara ia gaukaralaia lasi.

Mauri Namona Laloa Bada

Iehova ena Witness taudia ia hanamodia toho ivaia doketa tauna ese edena mauri ena taravatu matamatadia ia diba? Hari ia lalo-parara, gorere tauna hanamoa be mai anina bada, gorere ese ia hadikaia tauanina ena kahana dekenai sibona lasi, to unai tau dekenai danu. Gorere tauna be sibona ena tauanina, ena goada lauma dalana ai, bona ena lalona ena ura idia namo totona, heduru namona ia tahua be maoro, ani?

Lagani 15 kekenina ena ladana be Kumiko, ena rara dekenai kensa gorere dikana ia abia, bona doketa idia gwau rara henia hanai karana amo idia durua, to ia ura lasi momokani. Unai dala amo ena mauri do idia halataia diba pura haida, hua haida, eiava lagani haida, to ena vaira dinadia ena mauri hanaihanai ia haboioa be dika. Ia ese ena mauri be Iehova Dirava dekenai ia gwauhamatalaia, ia be iena Witness kekenina ta, bona mauri bona rara be helaga gaudia dainai ia matauraidia bada. Ena be ena tamana bona ena varavara taudia be iena ura idia abia dae lasi momokani, to ia gini goada. Nega ta ena doketa be ia dekenai ia henanadai, ia gwau: “Bema oiemu Dirava ese kerere ia gwauatao, rara henia hanai karana ena kerere do ia gwauatao danu, ani?” Kumiko ia ura lasi kara maorona ia rakatania bona unai amo ia abia dae Baibel herevana ia dadaraia. Ia gini goada: “Mauri herevana ia dogoatao auka.” (Filipi 2:​16, NW) Guna ena Witness lasi tubuna hahinena ia gwau, “Kumiko ese ena abidadama ia rakatania diba lasi.” Gabeai, tamana bona tubuna hahinena bona idia durua doketa taudia edia kara idia haidaua.

Kumiko be Iehova Dirava dekenai ia abidadama bada, ia diba mase amo do ia hatorea isi lou diba, bona ena abidadama dainai taunimanima momo edia kudouna ia hamareredia. Ia do mauri noho lalonai, ena tamana ia noinoi henia bada, ia gwau: “Ena be do lau mase, to Paradaiso dekenai do lau toreisi lou. To Aramagedono ai bema oi mase, oi do lau itaia lou diba lasi. Unai dainai mani emu kara Baibel oi stadilaia.” Ena tamana ia hereva loulou, ia gwau: “Oi namo lou neganai, unai do lau karaia.” To ena gorere bada dainai Kumiko ia mase neganai, ena tamana be mase mauana lalonai revareva ta ia atoa, ia gwau: “Kumiko, Paradaiso lalonai do ita hedavari.” Mase ena hereva ia ore neganai, ia ese idia mai taudia ia hereva henidia, ia gwau: “Kumiko lau gwauhamata henia, lau gwau Paradaiso dekenai do ai hedavari. Ena be lau stadi daudau lasi dainai unai hereva lau do abia dae lasi, to egu lalona lau hadaia vadaeni unai hereva do lau tahua namonamo totona. Mani emui kara lau umui durua.” Iena ruma bese taudia ma haida dekenai Baibel stadi idia karaia danu.

Kumiko be mauri ia matauraia bada bona ia ura ia mauri. Ena mauri idia hadaudaua totona doketa taudia idia hekwarahi bada bona unai dainai ia moale. To, Havaraia Tauna ena buka lalonai ia noho herevana ia badinaia dainai, ia hahedinaraia do ia abia mauri korikorina ia laloa bada. Taunimanima milion momo hegeregerena, unai ena anina be tanobada paradaisona lalonai mauri hanaihanai do idia abia. Oi be idia huanai do oi noho, a?