Iehova Ia Henia Moalena be Iseda Goada Gabuna

“Inai dina be helaga iseda Lohiabada ena, bona umui lalohisihisi lasi, badina be Iehova moalelaia karana be emui goada gauna.”​—NEHEMIA 8:10.

1, 2. (a) Goada gabuna be dahaka? (b) David be edena bamona ia hahedinaraia Iehova be iena hahemauri gabuna?

IEHOVA be iseda goada gabuna hereadaena. Bona goada gabuna be dahaka? Ia be idia ha-aukaia gabuna, noho namona eiava hahemauri gabuna. Idaunegai tauna David ia gwau Dirava be iena goada gabuna. Hegeregere, David be Atai Herea Diravana ia anelaia herevana, mani oi laloa, ia gwau “Iehova ese ena inai taudia iboudiai, [Israel Pavapavana] Saulo danu, edia imana amo ia hamauria.”​—Salamo 18, NW, ataiai ia noho herevana.

² David ese unai hebogahisi anena be inai hereva amo ia hamatamaia: “Iehova e, egu goada, oi lau lalokau henia. Iehova be egu nadi badana, egu magu, egu hahemauri tauna; egu Dirava, egu nadi aukana, lau abidadama henia tauna; egu kesi, egu mauri doana, bona egu kohoro.” (Salamo 18:​1, 2) Ena be ia maoro lasi bona Pavapava Saulo ese ia gwauraia kara dika tauna bona ia lulua, to kara maoromaoro tauna David ena hahemauri gabuna be Iehova, dika ia vara neganai tau ta be magu goadana lalonai ia heau bena ia mauri bamona.

3. Esera ena nega lalonai, dahaka dainai Iuda taudia idia “moale bada”?

³ Iehova ese iena dala dekenai idia raka abidadama taudia dekenai, ia henia moalena be edia goada gabuna aukana. (Hereva Lada-isidia 2:​6-8; 10:29) Momokani, Iehova ia henia moalena idia abia totona, taunimanima be Dirava ena ura idia karaia be gau badana. Unai dainai, namona be lagani 468 B.C.E. ai, Ierusalem dekenai ia vara gauna oi laloa. Toretore tauna, Esera bona ma haida be Taravatu duahia namonamo karana amo taunimanima idia hadibaia bena idia lalo-parara. Bena taunimanima idia hagoadadia, idia gwau: “Umui lao, digara gaudia do umui anidia bona uaina ranu gaihona do umui inua, ena aniani idia hegaegaelaia lasi tauna dekenai ena ahuna umui siaia; badina inai dina be helaga iseda Lohiabada ena. Bona umui lalohisihisi lasi, badina be Iehova moalelaia karana be emui goada gauna.” Iuda taudia ese idia kamonai gaudia idia gaukaralaidia neganai “idia moale bada” bona mai moale ida Kalaga Ariana idia karaia. (Nehemia 8:​1-12) ‘Iehova moalelaia be edia goada gauna’ ai idia halaoa taudia be goada idia abia iena tomadiho bona hesiai gaukara karaia totona. Unai neganai Iehova ia henia moalena be edia goada gabuna dainai, ita diba hari inai negai danu Iehova ena taunimanima be do idia moale. Vadaeni, hari inai negai idia moale ena badina haida be dahaka?

“Moale Bada Herea”

⁴ Ita moale ena badina badana ta be Iehova ese dala ia lailaia do ita hebou totona. Hari inai negai, Iehova ena Witness taudia be edia hebouhebou maragidia bona badadia amo moale idia davaria, Israel taudia ese lagani ta ta iboudiai idia karaia ariadia idia moalelaia hegeregerena. Israel taudia idia hamaorodia, idia gwau: “Dina 7 lalodiai [kalaga ariana] do umui karaia, Iehova emui Dirava ena, Iehova ese do ia abia hidi gabuna ai. Badina be Iehova, emui Dirava, ese umui do ia hanamoa, emui biru ai bona emui imana gaukaradia iboudiai lalonai; bena do umui moale bada herea.” (Deuteronomi 16:​13-15) Oibe, Dirava ia ura idia “moale bada herea.” Unai be ia momokani Keristen taudia dekenai danu, badina aposetolo Paulo be ia ida idia abidadama hebou taudia ia hagoadaia, ia gwau: “Nega ibounai do umui moale, Lohiabada lalonai umui noho dainai. Ma lau gwau lou: do umui moale.”​—Filipi 4:4.

5. (a) Moale be dahaka, bona Keristen taudia ese edena bamona idia davaria diba? (b) Herevana hetoho ita abia to edena bamona ita moale diba?

⁵ Iehova ia ura ita moale, unai dainai ita ia henia lauma helaga ena huahua ta be moale. (Galatia 5:​22, 23) Vadaeni, moale be dahaka? Unai be ita abia hemami namona, badina ita diba ita ese gau namona do ita abia eiava gau namona ita abia vadaeni. Anina be ita noho mai moale korikorina ida, mai moale goadana ida. Hetoho ita davaria neganai, Dirava ena lauma helaga ena huahua, moale, ese ita ia durua ita goada noho totona. “Moale be ia vairanai ia noho dainai [Iesu] ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” (Heberu 12:​2) Hahediba tauna Iakobo ia toretore, ia gwau: “Lauegu varavara e, bema hedibagani idauidau ese umui dekenai ia ginidae neganai inai bamona do umui laloa be namo: inai be moale gauna sibona. Badina be umui diba hedibagani o hisihisi ese emui abidadama idia tohoa neganai, goada bona haheauka idia havaraia noho.” To bema hedibagani ta ita davaria bona ita diba lasi edena bamona do ita hanaia, dahaka do ita karaia? Unai neganai, guriguri amo aonega ita noia, kara maorona ita karaia totona. Guba amo ia mai aonegana ita gaukaralaia neganai, hekwakwanai ita hanaia diba eiava ita haheaukalaia, to Iehova ese ia henia moalena do ita haboioa lasi.​—Iakobo 1:​2-8.

6. Moale bona tomadiho momokanina be edena bamona idia noho hebou?

⁶ Iehova ese ita ia henia moale karana ese ita ia hagoadaia tomadiho momokani dalana ita habadaia totona. Nehemia bona Esera edia nega lalonai unai ia vara. Unai nega ena Iuda taudia dekenai Iehova ia henia moalena be edia goada gauna, unai dainai goada idia abia tomadiho momokani dalana habadaia totona. Bona Iehova tomadiho henia karana idia habadaia neganai, edia moale ia bada danu. Unai be ia momokani hari inai nega lalonai danu. Iehova ita tomadiho henia dainai, ita moale bada be mai ena badina. Hari ita moale ena badina be momo, namona be unai badina ma haida ita lalodia.

Dirava Tura Henia Dalana Keriso Ena Amo

⁷ Iehova ita tura henia namonamo dainai taunimanima iboudiai amo ita be moale bada taudia. Keristen taudia ai ita do lao lasi neganai, ita be kara maoromaoro lasi taudia edia kahanai ita noho, unai neganai iseda ‘laloa be dibura bona Dirava ena mauri be ita davaria lasi.’ (Efeso 4:18) Ita moale badina hari Iehova dekena amo ita daudau lasi! To, ita ia lalo-namo henia noho totona ita gaukara goada be gau badana. Namona be “Keriso do ita abidadama henia noho, bona do ita gini goada. Sivarai Namona ena hereva do ita dogoatao namonamo.” (Kolose 1:​21-23) Ita moale badina Iehova ese ita ia veria iena Natuna dekenai, unai be Iesu ena hereva hegeregerena, ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” (Ioane 6:44) Keriso dekena amo Dirava ita tura henia kara namona bema ita laloa bada, do ita naria namonamo gau ta ese do ia hadikaia garina.

8. Iesu be edena bamona ita ia durua ita moale totona?

⁸ Iesu ena boubou gauna dekenai ita abidadama ese kara dika ia gwauatao bona unai be moale ena badina badana ta, badina unai amo Dirava ida ita hetura diba. Mai ena ura ida kara dika ia karaia dainai, iseda tamana ginigunana Adam be mase ia mailaia tanobada taudia iboudiai dekenai. To, aposetolo Paulo ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai Keriso be ita dainai ia mase.” Paulo ma ia gwau: “Tau tamona ena kara dika ese taunimanima ibounai ia hadikaia. Unai bamona danu, tau tamona ena kara maoromaoro ese taunimanima ibounai edia kerere davana ia kokia, vadaeni mauri idia abia. Bona tau tamona ese Dirava ia kamonai henia lasi dainai taunimanima hutuma be kara dika taudia idia halaoa, unai bamona danu, tau tamona ena kamonai dainai hutuma be do idia maoromaoro Dirava vairanai.” (Roma 5:​8, 18, 19) Ita moale bada badina unai lalokau karana idia abia dae taudia, Adam ena natudia unai, be Iehova Dirava ese mai moalena ida ia hoidia lou!

Tomadiho Ura-Kwalimuna Bona Diarina

⁹ Babulono Badana, tomadiho koikoi ibounai oreana, amo ita ia ruhaia be moale ena badina ma ta danu. Dirava ena hereva momokani ese ita ia ruhaia vadaeni. (Ioane 8:32) Bona unai tomadiho ariara hahinena amo ita ia ruhaia ena anina be iena kara dika dekenai ita vareai lasi, ena dika davana do ita davaria lasi, bona ia ida mase do ita davaria lasi. (Apokalupo 18:​1-8) Unai dika iboudiai amo ita roho mauri dainai ita lalohisihisi lasi!

10. Ita be Iehova ena taunimanima dainai dahaka lalo-parara ita abia?

¹⁰ Dirava ena Hereva ita lalo-pararalaia bena iseda mauri lalonai ita badinaia be moale bada ena badina. Tomadiho koikoi ena siahu amo ita gini siri dainai, ita ese ia diari ia lao noho lauma aonegana ita moalelaia. Iseda guba Tamana ese unai aonega be “hesiai tauna mai ena kamonai bona mai ena kara maoromaoro” amo ita ia henia. (Mataio 24:​45-47) Tanobada dekenai idia noho taudia iboudiai amo, Iehova sibona idia tomadiho henia taudia sibodia ese iena lauma helaga idia abia bona iena Hereva bona ena ura idia lalo-pararalaia. Hegeregere Paulo ia gwau: “Dirava ese iena Lauma dekena amo ita dekenai [ia abia hegaegae gaudia, ia idia lalokau henia taudia edia] ia hedinaraia. Oibe, Lauma Helaga ese gau ibounai ia tahua noho, Dirava ena laloa dobu gaudia danu.” (1 Korinto 2:​9, 10) Ita be ia diari ia lao lalo-pararana ita abia noho dainai ita tanikiu bada bona ita moale diba. Hereva Lada-isidia 4:18 ese unai lalo-parara ia herevalaia, ia gwau: “Kara maoromaoro taudia edia dala be daba matana bamona; ena diari ia bada ia lao ela bona dina ia hedinarai momokani.”

Basileia Helarona Bona Mauri Hanaihanai

¹¹ Iseda Basileia helarona ese ita ia hamoalea danu. (Mataio 6:​9, 10) Ita Iehova ena Witness taudia, be nega daudau lalonai Dirava ena Basileia ita harorolaia bona ita gwau ia be tanobada taudia iboudiai edia helaro tamona. Mani, lagani 1931 ita laloa, unai neganai mai moale ida ita ese unai ladana Iehova ena Witness taudia ita abia dae tanobada ena hebouhebou idauidau 51 dekenai. (Isaia 43:​10-12) Unai gwau-bou herevana bona J. F. Rutherford (unai nega ai ia be Watch Tower Society ena presiden) ena hebou hereva badana ta be buklet ladana The Kingdom, the Hope of the World lalonai idia halasia. Unai buklet lalonai unai hebouhebou ena gwau-bou herevana ma ta ia noho danu. Unai gwau-bou herevana be Kerisendom ia gwauraia dika badina tomadiho momokani ia negea bona Iehova ena sisiba ia matauraia lasi dainai. Unai buklet danu ia gwau: “Tanobada ena helaro be Dirava ena Basileia, bona ma helaro ta ia noho lasi.” Hua momo lasi lalodiai, Iehova ena Witness taudia ese unai buklet milion ima idia haria tanobada ena kahana iboudiai lalodiai. Unai nega amo ema bona hari ita ese unai Basileia be nega momo ita gwauraia taunimanima edia helaro tamona sibona.

12. Iehova ena hesiai taudia vairanai dahaka gau namodia idia noho?

¹² Ita moale danu, badina Basileia ena lohia siahuna henunai do ita mauri hanaihanai diba. Horoa Keristen taudia, ‘seri maragina’ taudia unai, be mai edia moale guba helarona. Aposetolo Petero ia gwau: “Dirava, iseda Lohiabada Iesu Keriso ena Tamana do ita hanamoa bada. Iena [hebogahisi] ia bada herea. Ia ese Iesu Keriso mase dekena amo ia hatorea isi lou. Bona unai dainai ita be matamata vadaeni, ita vara lou. . . . Dirava ese ita ia abia hidi, guba dekenai mauri do ita abia. Inai mauri ia noho hanaihanai, ia be goevagoeva, ia bodaga diba lasi. Inai mauri be guba dekenai umui totona ia noho hegaegae.” (Luka 12:32; 1 Petero 1:​3, 4) Hari inai negai, Iehova ena Witness taudia kahirakahira iboudiai ese mauri hanaihanai Paradaiso dekenai, Basileia ena siahu henunai, idia naria noho. (Luka 23:43; Ioane 17:3) Tanobada taudia ma haida ese ita abia mauri helarona idia abia lasi. Namona be ita ese unai helaro ita moalelaia bada!

Tadikaka Oreana Namona

¹³ Dirava ese ia hanamoa tanobada ibounai oreana lalonai ita noho be mai ena moale bada. Gau namona ta be ita be mai eda bamodia namo hereadia. Iehova Dirava be iseda nega ia laloa bona ia gwau: “Bese iboudiai do lau haheudeheudedia, bena bese iboudiai edia kohu namodia do idia vareai mai; bena inai dubu be hairai amo do lau hahonua.” (Hagai 2:7) Momokani, Keristen taudia iboudiai idia goevadae lasi. To, ia sibona dekenai Iehova ese unai taunimanima ia veridia lao Iesu Keriso amo. (Ioane 14:6) Badina Iehova ese ia gwauraidia namo taudia ia sibona dekenai ia veridia, iseda moale do ia bada bema ita lalokau henidia tadikaka bamona, idia ita hanamodia, edia gaukara Dirava dekenai ita durua, hetoho idia davaria neganai ita hagoadadia bona idia totona ita guriguri.

14. Petero Ginigunana 5:​5-11 amo dahaka hagoadaia hereva ita abia?

¹⁴ Unai ibounai ese iseda moale do ia habadaia. Momokani, Iehova ena moale ita dekenai, be iseda lauma tadikaka oreana ena goada gabuna tanobada ibounai dekenai. Io, ita ibounai ese dagedage bona ma gau aukadia haida ita davaria. To namona be unai ese ita ia hatamonaia bona ita diba ita be Dirava ena tanobada oreana momokanina tamona lalonai ita noho. Petero ia hereva bamona, ita be Dirava ena imana goadana henunai ita manau be namo, iseda lalo-hekwarahi ibounai ia dekenai ita atoa badina ita diba ia ese ita ia lalokau henia. Namona be ita gima namonamo badina Diabolo ese ita ia ania gwauraia, to ita sibona lasi, badina Petero ma ia gwau ‘emui abidadama dekenai do umui gini goada, vadaeni Satana do umui koua, namona be umui diba, emui ekalesia varavara tanobada kahana ibounai dekenai, be hisihisi inai bamona idia abia noho.’ Bona unai tanobada ibounai tadikaka oreana mai ena moale be do ia moru diba lasi, badina ita idia hadibaia ‘nega sisina do ita hisihisi, vadaeni gabeai harihari bada ibounai Diravana ese umui do ia hanamoa momokani, umui do ia haginia goada, bona badina korikori latanai umui do ia haginia.’ (1 Petero 5:​5-11) Mani, unai ita laloa. Iseda tadikaka oreana mai moalena do ia noho hanaihanai!

Mauri mai Badina Ta

¹⁵ Inai lalohisihisi tanobadana dekenai ita moale, badina iseda mauri be mai ena badina. Ita ese iseda hesiai gaukarana ta Dirava amo ita abia bona unai gaukara ese ita bona ma haida ia hamoalea. (Roma 10:10) Dirava ida ita gaukara hebou be hahenamo mai moalena. Unai dekenai Paulo be ia gwau: “Apolo be daika? Bona Paulo be daika? Ai be Dirava ena hesiai taudia sibona. . . . Bona aiemai gaukara dekena amo umui be Dirava dekenai umui abidadama henia. Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua. Hadoa tauna bona dairia tauna edia gaukara be herevana, badina Dirava sibona ese hadoa gauna ia hatubua. Hadoa tauna bona dairia tauna ruaosi be hegeregere. Dirava ese ta ta edia gaukara davana do ia henia, edia hekwarahi hegeregerena. Badina ai ruaosi be Dirava ena gaukara ai karaia hebou noho. Umui be Dirava ena uma gabu, bona Dirava ena ruma danu.”​—1 Korinto 3:​5-9.

16, 17. Dahaka haheitalai ese idia hahedinaraia Iehova ena taunimanima edia mauri be mai ena badina bona mai ena moale?

¹⁶ Haheitalai momo ese idia hahedinaraia mai kamonai danu Iehova ena hesiai gaukara ita karaia karana ese mauri mai badina namona ia havaraia, unai ese ita ia hamoalea bada. Inai bamona hereva ita kamonai momo: “Ia honu Kingdom Hall lalonai idia noho tadikakadia lau raraidia [idia hahelagaia dinanai] bona lauegu ruma bese 8 lau itadia, unai be lau bona lauegu adavana, bona emai natuna toi bona edia adavadia. . . . Lauegu adavana bona lau be Dirava ena hesiai gaukara ai karaia dainai, emai mauri be mai ena badina bona mai ena moale.”

¹⁷ Danu ita moale badina ita diba herevana tau ta ena lagani be bada eiava maragi, to Iehova ena hesiai gaukara lalonai mauri mai ena badina namona bona mai ena moale ia abia diba. Haheitalai be, hahine buruka ta, ena lagani be 102 neganai, ia ese hospital lalonai Baibel ena hereva momokani ia davaria bena ia bapatiso bona Iehova ena Witness hahine ta ai ia lao. Unai amo ena mauri orena be mai ena badina bona mai moalena, ia ese ‘Dirava momokanina garina ia gari bona iena hahegani ia badinadia.’​—Kohelete 12:13.

Ia Moru Diba Lasi Goada Gabuna

¹⁸ Abidadama taudia dekenai Iehova ia henia moalena be edia moru diba lasi goada gabuna. To, unai moale ita davaria dainai ita gwau lasi lalohisihisi negadia haida do ita davaria lasi; Getesemane ai Iesu dekenai ia vara gauna dainai ia gwau: “Lauegu [souli] be ia hisihisi bada mase bamona.” (Mareko 14:​32-34) Reana lalohisihisi ia vara badina siboda eda mataganigani karadia ita karaia momo dainai. Vadaeni, iseda mauri dalana ita haidaua be namo. Bema iseda moale ia maragi ia lao badina Baibel ia gwauraia maduna metauna ta be mai lalokau danu ita huaia, reana dala ita tahua iseda maduna ita haharagaia sisina bona iseda moale ita habadaia lou. Ma danu, Iehova ese ita ia hanamoa bona moale ita davaria bema ia ita hamoalea toho, bona mai goada danu kara dika ia ura tauanina, tanobada dikana, bona Diabolo ita dadaraia.​—Galatia 5:24; 6:14; Iakobo 4:7.

¹⁹ Ita gwauraidia vadaeni gaudia dainai, bona ma gau haida dainai danu, ita moale bada. Ena be ita be kongregesen pablisa taudia eiava ful-taim hesiai gaukarana ta lalonai ita noho, ita ibounai be Lohiabada ena gaukara lalonai ita gaukara goada diba, bena unai ese iseda moale do ia habadaia. (1 Korinto 15:58) Herevana dahaka gaukara namodia ita abia Iehova ena orea lalonai, namona be mai tanikiu danu ita gaukara bona mai moale danu iseda lalokau bona moale Diravana ena helaga hesiai gaukarana ita karaia noho.​—1 Timoteo 1:11.

20. Iseda hahenamo hereana be dahaka, bona dahaka ita daradaralaia lasi?

²⁰ Iseda moale ena badina badana be, Iehova ena ladana badana ita huaia, ena Witness taudia ai ita lao dainai. Oibe, ita be goevadae lasi taudia, bona hetoho momo ita davaria, to Iehova ena Witness taudia ai ita lao dainai ita davaria hahenamo gaudia namo hereadia ita laloaboio lasi. Bona ita laloatao, iseda lalokau guba Tamana ese ita do ia rakatania diba lasi. Ita daradara lasi, bema Iehova ia henia moalena be iseda goada gabuna ai ita halaoa, hahenamo do ita davaria hanaihanai.

Edena Bamona Do Oi Haere?

◻ “Iehova ese ia henia moalena” be dahaka?

◻ Keristen taudia ese moale korikori be edena bamona idia davaria?

◻ Iehova ena Witness taudia idia moale ena badina haida be dahaka?

◻ Dahaka dainai Iehova ia henia moalena be ia moru diba lasi goada gabuna?

4. Iehova ena taunimanima idia moale ena badina badana ta be dahaka?

7. Keristen taudia edia moale ena badina Iehova dekenai be dahaka?

9. Tomadiho dalana ai dahaka dainai ita moale?

11. Unai moale Basileia helarona be edena bamona idia gwauraia hedinarai ma taunimanima haida dekenai?

13. Iseda tanobada ibounai tadikaka oreana be edena bamona do ita laloa?

15. Dahaka dainai Iehova ena Witness taudia edia mauri be mai ena badina?

18. Lalohisihisi ita haorea bona moale ita habadaia totona reana dahaka do ita karaia?

19. Dirava ena orea ese ita ia henia gaukara namodia be edena bamona ita lalodia be namo?