Dirava Ena Hakaua Dalana Ia Badinaia

BEMA natuna goevadaena ta oi idia henia bona idia ura dala maorona dekenai oi naria, unai be mai hekwarahi bada gaukarana! Edena dala ai goevadae lasi tauna ese unai ia karaia diba? Dirava ena hakaua dalana ia abia dae bona ena mauri lalonai ia badinaia sibona amo.

Iesu ena heubu tamana, Iosepa, be unai bamona ia karaia. Sene hereva lalonai Iosepa ena sivarai idauidau idia gwauraia, to Baibel lalonai, Iesu ia maragi neganai iena tamana ena manau karana ena sivarai ia gwauraia momo lasi. Ita diba Iosepa bona ena adavana, Maria, be Iesu bona edia natudia memero hani, bona kekeni danu idia naridia.​—Mareko 6:3.

Iosepa be Israel ena Pavapava David ena bese tauna, ia be Solomon ena iduhu lalonai ia vara. Ia be Iakobo ena natuna bona ia be Heli ena ravana. (Mataio 1:16; Luka 3:23) Galilea dekenai ia be Nasareta ena siti dekenai kamuta gaukara ia karaia, to ia be taga tauna lasi. (Mataio 13:55; Luka 2:​4, 24; Levitiko 12:8 itaia danu.) To lauma dalanai ia be taga tauna. (Hereva Lada-isidia 10:22) Ia be Dirava ena hakaua dalana ia abia dae dainai ia taga.

Ita daradara lasi, Iosepa be manada bona manau Iuda tauna. Dirava ia abidadama henia bona ia ura dala maorona ia badinaia. Revareva Helagadia lalonai iena sivarai sisina idia torea ese ia hedinarai ia be hanaihanai Iehova ena hahegani hereva ia badinadia. Unai be ia momokani, herevana Iosepa be Taravatu amo hahegani ia abia eiava aneru ese maoromaoro idia hereva henia neganai.

Kara Maoromaoro Tauna mai Ena Hekwakwanai Haida

Dirava ia gari henia tauna be hekwakwanai badana ia abia neganai dahaka do ia karaia be namo? Namona be unai ‘metau gauna be Iehova dekenai ia tahoa kau’ bona Dirava ena hakaua dalana ia badinaia! (Salamo 55:22) Iosepa be unai bamona ia karaia. Maria danu ia maoheni, ‘to idia ruaosi nega ta idia do mahuta hebou lasi neganai, lauma helaga amo Maria ia rogorogo.’ Bona Iosepa be “kara maoromaoro tauna, bona hahine dekenai hemarai henia karana ia ura lasi, unai dainai hunia dala dekenai ia negea gwauraia.” Iosepa ese ia vara gauna ia laloa namonamo murinai, Iehova ena aneru be nihi dekenai ia hedinarai bona ia gwau: “Iosepa Davida e, oiemu adavana Maria abia totona oi gari lasi, badina be inai mero, Maria ena bogana dekenai ia noho be, Lauma Helaga ese ia henia vadaeni. Ia be mero ta do ia abia, ena ladana do umui hatoa Iesu, badina be ia ese ena bese taudia edia kara dika dekena amo do ia hamauridia.” Ia noga neganai, Iosepa be Iehova ena “aneru ese ia hamaoroa hegeregerena ia karaia. Ena adavana Maria ia abia dae. To Maria danu nega tamona idia mahuta lasi, ela bona ena natuna ia abia. Vadaeni mero ena ladana ia hatoa Iesu.” (Mataio 1:​18-25) Iosepa be Dirava ena hakaua dalana ia badinaia.

Kaisara Augusto ese taravatu herevana ta ia siaia lao, taunimanima iboudiai be edia vara hanuadia dekenai edia ladana do idia torea totona. Unai hereva badinaia totona, Iosepa bona Maria be Bethlehem, Iudea dekenai idia lao. Unuseniai Maria ese Iesu ia havaraia bona boromakau edia aniani rumana dekenai ia atoa badina noho gabuna ma ta be lasi. Unai hanuaboina ai, mamoe naria taudia be aneru amo idia kamonai unai natuna idauna ia vara, bona idia lao itaia totona. Dina 40 bamona murinai, Taravatu idia badinaia totona, Iosepa bona Maria be Ierusalem ena dubu dekenai Iesu idia abia lao bona boubou gauna ta idia henia danu. Buruka tauna Simeon ese Iesu do ia karaia hoa karadia ia perovetalaia neganai, idia ruaosi be mai edia hoa danu idia kamonai.​—Luka 2:​1-33; Levitiko 12:​2-4, 6-8 itaia danu.

Luka 2:39 ena hereva dainai haida idia laloa Iosepa bona Maria be Iesu idia laohaia dubu dekenai bona murinai maoromaoro Nasareta dekenai idia lao, to unai siri ese sivarai haida sibona ia gwauraia. Ia hedinarai dubu dekenai idia lao bena nega daudau murinai Asia ena hisiu toana idia tahua (Magi) taudia be Bethlehem ena ruma ta dekenai Iosepa bona Maria idia vadivadi henidia. Dirava ese ia naria dainai, unai taudia edia vadivadi karana amo Iesu ia mase lasi. Unai Magi taudia idia raka siri murinai, Iehova ena aneru be nihi amo Iosepa dekenai ia hedinarai bona ia hamaoroa, ia gwau: “Heroda ese mero maragina ia tahua noho, ia alaia mase gwauraia.” Vaia ena kara hegeregerena, Iosepa be Dirava ena hereva ia badinaia bona ena ruma bese taudia ia abidia lao Aigupito dekenai.​—Mataio 2:​1-14.

Heroda ia mase neganai, Aigupito dekenai aneru be nihi lalonai Iosepa dekenai ia hedinarai, ia gwau: “Oi toreisi, mero maragina, ena sinana danu oi abia, Israela tano dekenai umui lao.” Iosepa ia kamonai Heroda ena natuna Akelao be ena tamana ena gabu dekenai ia lohia, unai dainai Iudea dekenai do ia giroa lao garina ia gari. Nihi dekenai Dirava ese ia henia herevana ia badinaia dainai, ia lao Galilea dekenai bona Nasareta siti dekenai ia noho.​—Mataio 2:​15-23.

Lauma Gaudia Ia Laloa Tauna

Iosepa ese dala ia hegaegaelaia namonamo bena iena ruma bese taudia be Dirava ena hereva idia badinaia bona lauma dalanai aniani idia abia. Lagani ta ta iboudiai ia ese ena ruma bese taudia iboudiai ia abidia lao Ierusalem dekenai Paseka ariana dekenai. Unai nega ta ai, Iosepa bona Maria be Nasareta dekenai idia giroa lao noho, bona Ierusalem idia rakatania dina tamona ena laolao hegeregerena murinai, idia itaia lagani 12 merona Iesu be ia noho lasi. Ierusalem dekenai idia giroa lao, bona idia tahua goadagoada, bena dubu dekenai idia davaria, unuseniai hahediba taudia edia hereva ia kamonai bona henanadai ia henidia noho.​—Luka 2:​41-50.

Ia hedinarai gau haida dekenai Iosepa be ena adavana ia koua lasi. Hegeregere, Ierusalem dekenai idia giroa lao neganai bona dubu dekenai Iesu idia davaria neganai, Maria ese ena natuna maragina ia hereva henia. (Luka 2:​48, 49) Ia tubu noho lalonai, “kamuta tauna ena natuna,” Iesu, be lauma dalanai sisiba ia abia. Danu Iosepa ese kamuta gaukara ia hadibaia, badina Iesu idia gwauraia ‘kamuta tauna, sinana ladana be Maria.’ (Mataio 13:55; Mareko 6:3) Hari inai negai, Dirava garina idia gari tama sina be nega idia gaukaralaia edia natudia idia hadibadia namonamo totona, lauma dalanai idia hadibadia namo herea.​—Efeso 6:4; 2 Timoteo 1:5; 3:​14-16.

Iosepa Do Ia Davaria Diba Gaudia

Revareva Helagadia ese Iosepa ena mase idia gwauraia hedinarai lasi. To gau badana ta be Mareko 6:3 ese Iesu ia gwauraia “Maria ena natuna,” ia gwau lasi Iosepa natuna. Unai amo ia hedinarai Iosepa ia mase vadaeni. Danu, bema Iosepa ia mauri ela bona lagani 33 C.E. ai, idia hasatauroa neganai reana Iesu ese Maria be aposetolo Ioane ena henari henunai do ia atoa lasi.​—Ioane 19:​26, 27.

Unai dainai, Iosepa be taunimanima ena Natuna ena gadona do idia kamonaia mase taudia edia orea lalonai do ia noho, bona do ia toreisi lou. (Ioane 5:​28, 29) Iehova ese ia karaia mauri hanaihanai abia dalana do ia kamonaia neganai, Iosepa ese mai moale danu do ia abia dae bona guba Pavapava badana, Iesu Keriso, ena manau hesiai tauna ai do ia lao, lagani 1,900 gunanai Dirava ena hakaua herevana ia badinaia hegeregerena.

[Picture on page 31]

Iosepa be Iesu dekenai lauma gaudia bona kamuta gaukara danu ia hadibaia