Iehova Ena Witness Taudia Tanobada Hegegemadai—Zambia
ZAMBIA be tano ta, Africa ena saut kahana bogaraginai. Inai tano lalonai be taora lababadia, davara amo idia be mita 1,200 ataiai. Notist kahanai be Muchinga Ororodia, edia lata be mita 2,100. Inai tano ena hetoana saut kahanai be Zambezi Sinavaina, ena ranu be mai regerege bada ida ia aru diho haraga Victoria Falls dekenai. Bese idauidau 70 mai kahana idia noho. Gado badadia 8 idia gadolaia, bona gado idauidau ma momo danu.
Lagani 1911 ai, Zambia lalonai taunimanima haida ese gado idauna ta idia dibaia matamaia, bena unai murinai momo ese idia dibaia. Vadivadi taudia ese Studies in the Scriptures bukadia be Zambia lalonai idia vareailaia, bena unai nega amo Iehova ena Witness taudia ese Baibel ena hereva momokani ena ‘gado goevadaena’ be idia abia lao toho, Zambia ena kahana idauidau dekenai. (Sepanaia 3:9) Hekwakwanai badana ta be taunimanima edia lalohadai mase taudia dekenai, Baibel ese ia hamomokania lasi lalohadaina unai. Hereva momokani idia dibaia bona gari kava ese ia guidia dalana idia lalo-pararalaia neganai, unai ese ia ruhadia nege!—Ioane 8:32.
Hegeregere, taihu ta mai ena kamonai ia gwau: “Egu vavana ia mase haraga neganai, egu sinana, Zambia ena United Church ena memba goadana ta, ia daradara. Pura ta ibounai lalonai guria karadia idia karaia murinai, hanua lau lou henia, badina be lau ura diba egu sinana be edena bamona. Lau ginidae neganai, tau burukana ta be ruma lalonai lau davaria, bena ia raka oho murinai, egu tubuna lau nanadailaia. Ia gwau ia be meamea tauna ta. Egu sinana ia ura moni be hari tau do ia henia, ena taihuna ia alaia mase tauna do ia alaia mase totona, bena ena taihuna ena lauma do ia laga-ani diba. Ia laloa ena lauma be ‘ia loaloa kava sibona.’
“Egu tubuna ese lau ia hamaoroa lauegu vadivadi be hahenamo ta, badina be varavara ese moni idia tahua, meamea tauna ena davana karaia totona. Lau ia noia moni do lau henia, to mai egu hemataurai ida lau hamaoroa lau be Keristani hahinena, unai kara lau durua diba lasi. Salamo 146:4 ena hereva lau hamaorolaia; unai hereva ese ia hahedinaraia mase taudia be mai edia lalohadai lasi—unai dainai lauma be ‘ia loaloa kava’ lasi. Roma 12:19 ai herevalaia danu; ia hahedinaraia dika ena davana be Iehova ese do ia karaia, ita be lasi. Unai murinai, lau ese toreisi lou helarona, Iesu ese Ioane 5:28, 29 dekenai ia gwauraia gauna, be egu sinana lau hamaorolaia. Dirava ena gwauhamata lau abidadama henidia goada karana be ia ese ia hoalaia. Nega daudau lasi, Witness hahinena ta ida ia stadi matamaia bena ia goada ia lao haraga. Ena tomadiho gunana ia negea vaitani bena bapatiso ia abia, ena mauri be Dirava dekenai ia gwauhamatalaia vadaeni toana unai. Hari, ia be Iehova ena Witness hahinena ta.”
Taihu ma ta ena sivarai be inai: “Egu vavana ena adavana ena mase gurigurina dekenai lau lao. Lau ginidae neganai, lau davaria egu vavana bona ena natuna idia hitolo mase. Egu vavana ena adavana ia mase dinana amo idia aniani lasi. Edia kara lau nanadailaidia neganai, idia gwau sene taudia edia hereva hegeregerena, nanadu totona lahi idia gabua be taravatu. Lau hamaorodia do lau nanadu, to egu varavara haida idia gari; idia laloa bema unai sene taravatuna do lau utua, unai ese iboudiai do ia hakavadia!
“Lau hamaorodia, lau be Iehova ena Witness hahinena ta, unai dainai Baibel ena hereva Levitiko 18:30 dekenai lau matauraia bona sene karadia, Baibel ena hereva utua karadia, be do lau badinaia lasi. Unai murinai buklet ta ladana Mase Taudia Edia Lauma lau hahedinaraia idia dekenai. Unai neganai edia gari ia maragi ia lao, bena aniani lau nadua egu vavana ena bona taunimanima oredia edia. Mase hahinena ena varavara ese egu goada idia laloa bada bona edia lalona be hegeregere Baibel do idia stadilaia noho. Hari idia be bapatiso lasi pablisa taudia, bona unai ruma bese ibounai edia ura be nega daudau lasi bapatiso do idia abia.”
Tomadiho herevadia koikoidia, kerere lasi taudia edia lalona idia guia auka masemase herevadia, ese daradara idia havaraia, to hereva momokani ena gado goevadaena ese unai daradara ia kokia neganai, ita moale bada herea, ani? Iehova ena hahenamo dainai, gado goevadaena be Zambia ena kahana idauidau dekenai ia lao, tanobada ena kahana idauidau dekenai ia lao hegeregerena.—2 Korinto 10:4.
[Box on page 9]
TANO RIPOTINA
Hesiai Laganina 1994
HARORO TAUDIA EDIA NAMBA BADANA: 82,926
WITNESS TAUNA TAMONA INAI NAMBA AI: 107
MEMORIAL AI IDIA HEBOU TAUDIA: 363,372
PAINIA TAUDIA EDIA AVERES: 10,713
BAIBEL STADI EDIA AVERES: 108,948
BAPATISO ABIA MATAMATA TAUDIA: 3,552
KONGREGESEN EDIA MOMO: 2,027
BRENS OPESI: LUSAKA
[Pictures on page 9]
Watch Tower ena brens rumadia, Lusaka kahanai
[Pictures on page 9]
Lusaka ena saut kahanai, Shimabala ai, idia haroro