Iehova Gari Henia Karana Moalelaia Dalana Ita Dibaia

“Umui mai, lau dekenai do umui kamonai. Lohiabada dekenai do umui gari dalana do lau hadibaia.”​—SALAMO 34:11.

1. Dirava ena Basileia ese gari edena bamona do ia kokia, to unai ena anina be gari ibounai do ia haorea, a?

GABU iboudiai taunimanima idia ura ta ese gari amo do ia ruhadia​—dagedage garina, gaukara lasi garina, bona gorere metauna garina unai. Dirava ena Basileia henunai unai do ia vara momokani negana be dahaka namo! (Isaia 33:24; 65:​21-23; Mika 4:4) To, unai neganai gari ibounai do ia ore lasi, bona namona be hari ita ese gari ibounai be iseda mauri amo do ita negea toho lasi. Gari ta be namo bona gari ta be dika.

2. (a) Edena bamona garina be dika, bona edena bamona garina be namo? (b) Dirava gari henia karana ena anina be dahaka, bona inai paragraf lalonai ai torea siridia ese unai edena bamona idia hahedinaraia?

² Gari ta ese poisini bamona taunimanima ta ena darana ia hadikaia diba, bena ia laloa namonamo diba lasi. Ena boga auka ia hamanokaia diba bona ena helaro ia haorea diba. Ena inai tauna ese ia hagaria neganai, unai gari mamina ia abia diba. (Ieremia 51:30) Bema ta ia laloa kerere, ia laloa ladana bada taudia edia lalo-namo ia abia be gau badana, reana unai bamona gari mamina ia abia. (Aonega Herevadia 29:25) To gari ma ta be namo, ia ese ita ia koua, do ita kara kerere garina eiava ita be siboda do ita hadikaia garina. Dirava gari henia mamina ena anina be unai sibona lasi. Anina be Iehova ita matauraia bada bona do ita habadua garina ita gari. (Salamo 89:7) Dirava do ita habadua garina ita gari, badina be ena lalokau, ena hebogahisi, bona ena kara namo ita laloa bada. (Salamo 5:7; Hosea 3:5) Badina ma ta be ita diba ia be Kota Biaguna Badana bona Siahu Ibounai Diravana, bona ia be mai ena siahu, ia idia kamonai henia lasi taudia do ia panisia; reana unai ena anina be do ia hamasedia.​—Roma 14:​10-12.

3. Iehova gari henia karana be edena bamona ia idau, dirava koikoidia haida gari henia karana hegeregerena lasi?

³ Dirava gari henia karana be mai ena namo, ia dika lasi. Taunimanima ia hagoadaia, kara maoromaoro do idia goadalaia bona kara dika do idia karaia lasi totona. Inai gari be idaunegai Greek taudia edia dirava Phobos idia gari henia taudia edia gari hegeregerena lasi; idia gwau ia be dirava dikana ta, taunimanima ia hagaria bada diravana. Bona inai gari be Hindu diravana hahinena Kali idia gari henia taudia edia gari hegeregerena lasi; idia gwau ia be ala-ala diravana mai dagedagena, bona ia ese sibona ena tauanina be mase tauanidia bona gaigai bona kwara koukoudia amo ia heralaia. To Iehova Dirava ita gari henia, badina be ita lalokau henia bona ita laloa bada dainai. Inai gari ese ita ia doria oho lasi, to ita ia veria, Dirava dekenai do ita raka kahirakahira lao.​—Deuteronomi 10:​12, 13; Salamo 2:11.

Haida ese Dirava Garina Idia Gari Bona Haida be Lasi Ena Badina

⁴ Taunimanima momo herea be inai gari ese ia ha-uradia lasi. Roma 3:9-18 ai, aposetolo Paulo ese ia hahedinaraia taunimanima idia goevadae lasi, matamana neganai idia goevadae hegeregerena. Ia gwau iboudiai be kara dika ena siahu henunai idia noho, bena Salamo bukana ena hereva ta ia gwauraia, ia gwau: “Kara maoromaoro tauna be ta lasi, lasi bona lasi momokani.” (Salamo 14:1 itaia.) Bena taunimanima edia kara dikadia ia gwauraia, ia gwau Dirava idia tahua lasi, kara namo idia karaia lasi, idia hereva koikoi, taunimanima hadikaia herevadia idia gwauraia, bona idia ala-ala. Tanobada ena toana hari inai negai ia hedinarai be ia ese ia gwauraia goevagoeva unai! Taunimanima momo ese Dirava bona ena palani idia laloa lasi. Idia momo be nega ta ta mo hebogahisi idia hahedinaraia, sibodia edia gau tahua totona. Idia momo idia koikoi bona hereva mirodia idia gwauraia. Ala-ala karadia idia hahedinaraia, niusi ai sibona lasi, to taunimanima hamoalea totona danu. Dahaka dainai unai bamona idia kara? Momokani, ita ibounai be kara dika tauna Adamu ena bese taudia, to taunimanima ese Paulo ia gwauraia karadia idia karaia loulou be unai sibona dainai lasi. Siri 18 ese edia kara edia badina ma ta ia gwauraia, ia gwau: “Dirava dekenai gari henia kara idia laloa lasi.”​—Salamo 36:1 itaia.

5. Dahaka dainai taunimanima haida ese Dirava idia gari henia, to haida ese idia gari henia lasi?

⁵ To, badina be dahaka taunimanima haida ese Dirava garina idia gari bona haida be lasi? Badina be haida ese inai gari mamina habadaia dalana idia tahua, to haida be lasi. Ita vara neganai unai gari be ita ta lalonai ia noho lasi, to ita ibounai be mai eda dala do ita abia. Namona be Dirava garina ita dibaia. Vadaeni, iseda mauri lalonai ia be mai ena siahu ida ita do ia ha-uraia totona, ita habadaia be namo.

Ita Ia Boiria

⁶ Salamo 34 lalonai ta ese ita ia boiria Iehova gari henia karana do ita dibaia. Davida ena salamo ta be unai. Vadaeni, Davida ese daika ena toana ia hahedinaraia guna? Tauna be Lohiabada Iesu Keriso. Peroveta herevana ta, Davida ese hari salamo ena Salamo 34 siri 20 lalonai ia torea, be aposetolo Ioane ese ia gwauraia, ia gwau ena anina be Iesu dekenai ia vara. (Ioane 19:36) Hari inai negai, Salamo 34 siri 11 ena hereva hegeregerena ita ia boiria tauna be Iesu; ia gwau: “Umui mai, lau dekenai do umui kamonai. [Iehova] dekenai do umui gari dalana do lau hadibaia.” Inai ese ia hahedinaraia goevagoeva Iehova gari henia dalana ita dibaia diba, bona Iesu Keriso be ia hegeregere momokani ita do ia hadibaia. Dahaka dainai?

7. Dahaka dainai Iesu be hegeregere momokani, Dirava gari henia karana be ia ena amo do ita dibaia?

⁷ Iesu Keriso ia diba Dirava gari henia karana be mai anina bada. Heberu 5:7 ia gwau: “Ia be tanobada dekenai ia noho neganai, Iesu ese Dirava ia guriguri henia, mai taitai bona mai matana ranu danu. Ia noinoi, badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura gauna ia noia lasi, bona ia be Dirava henunai ia manau noho dainai.” Guna, satauro dekenai Iesu Keriso ena mase be kahirakahira neganai, ia hahedinaraia ia ese Dirava unai bamona ia gari henia. Mani inai oi laloa, Aonega Herevadia karoa 8 lalonai, torea tauna ese Dirava ena Natuna ia gwauraia, ia be aonega ena anina korikori. Bona Aonega Herevadia 9:10 ai ia gwau: “[Iehova] gari henia kara be aonega ena hamatamaia dalana.” Anina be, gunaguna momokani, nega daudau ia do noho ela bona ia be tanobada dekenai ia mai neganai, Dirava ena Natuna ese Dirava ia gari henia noho, badina be unai be iena kara korikori.

8. Isaia 11:​2, 3 ena hereva hegeregerena, Dirava gari henia karana ena toana be edena bamona?

⁸ Ma danu, Isaia 11:​2, 3 ese Iesu, Mesia Pavapavana, be inai bamona ia gwauraia: “[Iehova] ena Lauma ese, ia dekenai do ia kamokau, bona inai bamona do ia hanamoa: Aonega bona laloa kehoa ena Lauma do ia henia. Sisiba namona henia dalana, bona siahu ena Lauma do ia henia, diba maorona, bona [Iehova] gari henia kara, ena Lauma be do ia henia. Mai moale bada danu, ia ese [Iehova] ena ura do ia karaia.” Hereva mai hairaidia unai! Iehova gari henia karana be dika lasi. Unai gari ese taunimanima ia hanamoa bona ia hagoadaia. Keriso ese do ia lohiaia tanobadana ibounai lalonai unai gari do ia noho. Keriso be hari ia lohia noho, bona iena siahu henunai do idia noho totona ia gogoa taudia be ia ese Iehova gari henia karana ia hadibalaidia noho. Edena dala amo?

9. Iesu Keriso ese Iehova gari henia karana be edena bamona ita ia hadibalaia noho, bona ia ura dahaka do ita dibaia?

⁹ Iseda kongregesen edia hebou bona hebouhebou badadia idauidau amo, Iesu, ekalesia Kwarana bona Mesia Pavapavana, ese ita ia durua, Iehova gari henia karana ena anina bona ena namo bada do ita lalo-pararalaia totona. Unai amo ita ia durua, Iehova gari henia karana do ita laloa bada bena unai gari do ita moalelaia diba, ia ese ia moalelaia hegeregerena.

Do Oi Tahua Goadagoada A?

¹⁰ To, momokani, ena be Baibel ita duahia o Kingdom Hall dekenai ita lao loulou, to reana Dirava do ita gari henia lasi. Dirava gari henia karana do ita lalo-pararalaia momokani totona do ita karaia be namo karadia mani oi laloa. Aonega Herevadia 2:​1-5 ia gwau: “Egu natuna e, lau, aonega, egu hadibaia hereva do oi tahua, bona egu oda do oi laloaboio lasi. Aonega herevadia do oi kamonai, bona oiemu kudouna ese laloa kehoa do ia ura henia. Bema oi ese aonega totona oi noinoi, bona bema laloa kehoa totona oi boiboi goada, bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona, unai neganai Lohiabada gari henia kara do oi diba, bona Dirava do oi diba.” Unai dainai, hebou lalonai do ita helai negadiai, namona be hereva do ita kamonaia namonamo, hereva badadia do ita laloa namonamo toho bona do ita laloatao toho, bona inai do ita laloa namonamo: Iehova ita matauraia bada dainai, ita idia henia sisibana be iseda lalona ai edena bamona do ita abia dae be namo. Unai amo Iehova gari henia karana do ita lalo-pararalaia.

11. Dirava gari henia mamina do ita habadaia totona, namona be dahaka do ita karaia loulou mai iseda lalona ibounai ida?

¹¹ Salamo 86:11 ese mai anina bada gauna ma ta ia gwauraia, guriguri unai. Salamo torea tauna ia guriguri, ia gwau: “Lohiabada e, oiemu dala lau dekenai do oi hadibaia, bona lau be oiemu momokani lalonai do lau raka. Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.” Iehova ese unai guriguri ia abia dae dainai, Baibel lalonai do idia torea dalana ia karaia. Dirava gari henia karana do ita habadaia totona, namona be ita danu ese Iehova do ita noia goadagoada loulou ita do ia durua.—Luka 18:​1-8.

Emu Lalona ai Oi Manadalaia

¹² Salamo 86:11 ena hereva ma ta do ita laloa be namo. Torea tauna ese Dirava ia noia lasi, do ia durua ena darana sibona ai Dirava gari henia karana do ia lalo-pararalaia totona. Ia ese sibona ena lalona ia gwauraia. Iseda lalona ai Dirava gari henia karana ita manadalaia be namo, badina be lalona ena toana be iseda kara iboudiai lalonai ia hedinarai, bona ia lalonai iseda lalohadai, iseda ura, iseda kara edia badina, bona iseda palani be idia vara.

13. (a) Reana dahaka ese ia hahedinaraia ta ena lalona be tamona lasi? (b) Dirava gari henia mamina ita habadaia noho lalonai, dahaka ita tahua be namo?

¹³ Baibel ese ita ia hadibaia reana ta ena lalona be tamona lasi. Ena lalona ese ia koia diba. (Salamo 12:2; Ieremia 17:9) Reana iseda lalona ese ita idia doria kara namodia do ita karaia totona​—kongregesen heboudia dekenai do ita lao bona haroro gaukarana do ita karaia​—to reana ia ese danu tanobada ena kara haida ia ura henia. Reana unai ese ita ia koua, bena Basileia gaukarana ita karaia lasi mai eda lalona ibounai ida. Reana iseda lalona ese ita idia koia, bena ita laloa ita karaia gaukarana ena bada be momo ese idia karaia gaukarana ena bada hegeregerena. Eiava, sikuli ai eiava iseda moni gaukara gabuna ai, reana taunimanima gari henia mamina ese iseda lalona ia hakererea, bena unai dainai unai gabu ai ita hahedinaraia lasi ita be Iehova ena Witness taudia, bona reana Keristani lasi karadia haida ita karaia. Gabeai, iseda lalona ese ita idia hahekwarahia. Ita ura lasi ita be unai bamona taudia ai do ita lao. Unai dainai ita be salamo torea tauna ida Iehova ita guriguri henia, ita gwau: “Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.” Ita ura iseda lalona, iena toana be iseda kara iboudiai lalonai ia hedinarai gauna, ese do ia hahedinaraia ‘Dirava ita gari henia bona iena oda ita badinaia.’​—Hadibaia Tauna 12:13.

14, 15. (a) Israela besena be Babulonia amo do ia ruhaia bena do ia hanamoa lou negana ia perovetalaia neganai, Iehova ia gwau ia ese dahaka be ena bese taudia do ia henia? (b) Dirava gari henia mamina be edia lalona ai do ia atoa totona, Iehova be dahaka ia karaia? (c) Dahaka dainai Israela besena be Dirava ena dala amo idia raka siri?

¹⁴ Iehova ia gwauhamata, ia ese unai bamona lalona, Dirava gari henia lalona, be ena bese taudia do ia henia. Ieremia 32:​37-39 dekenai ia ese Israela taudia hanamoa lou karana ia gwauraia, ia gwau: “Lau ese do lau haboudia lou inai gabu dekenai, bona iniseni be noho namo do lau henidia lou. Idia be lauegu bese do idia lao, bona lau be edia Dirava do lau lao. Lalona tamona, bona dala tamona idia dekenai do lau henia, bona lau dekenai do idia gari nega ibounai, idia bona edia murinai do idia vara natudia danu ese namo do idia davaria totona.” Ie 32 Siri 40 lalonai, Dirava ese ena gwauhamata ia gwauraia lou, ia gwau: “Ura namodia idia dekenai do lau henia, vadaeni idia ese lau dekenai do idia gari nega ibounai. Unai dainai, idia ese lau dekena amo do idia raka siri lasi.” Lagani 537 B.C.E. lalonai, ena gwauhamata hegeregerena Iehova ese ia hakaudia lou Ierusalema dekenai. To unai gwauhamata orena​—‘lalona tamona idia dekenai do ia henia, bona ia dekenai do idia gari nega ibounai’ herevadia, be edena bamona? Iehova ese idaunegai Israela besena be Babulonia amo ia loulaia murinai, dahaka dainai idia be ia dekena amo idia raka siri, bena unai dainai edia dubu be lagani 70 C.E. lalonai idia hadikaia ore, bena idia haginia lou lasi?

¹⁵ Unai be Iehova ena kerere dainai lasi. Momokani, Iehova ia kara, Dirava garina be edia lalona ai do ia atoa totona. Ia hebogahisi henidia dainai, Babulonia amo ia hamauridia bona edia tano ai ia hanohodia lou, unai dainai ia garina idia gari mai edia hemataurai bada ida be namo. Unai sibona lasi, to Dirava ese danu peroveta taudia Hagai, Sekaraia, bona Malaki, bona hadibaia tauna Esera, bona Gavana Nehemia, bona Ia sibona ena Natuna edia amo, hadibaia herevadia bona sisiba herevadia ia henidia. Nega haida unai taunimanima idia kamonai. Idia kamonai dainai, Hagai bona Sekaraia edia hereva hegeregeredia idia ese Iehova ena dubu idia haginia lou, bona Esera ena negai edia adavadia, idau hahinedia, be idia hadihoa. (Esera 5:​1, 2; 10:​1-4) To nega momo idia kamonai lasi. Sisiba idia abia dae hanaihanai lasi; edia lalona idia kehoa noho lasi. Israela taudia ese Dirava gari henia mamina idia habadaia lasi, unai dainai unai mamina be siahu lasi edia mauri lalonai.​—Malaki 1:6; Mataio 15:​7, 8.

16. Iehova ese Dirava gari henia mamina be daidia edia lalona ai ia atoa?

¹⁶ To, Iehova ena gwauhamata, Dirava garina be ena bese taudia edia lalona ai do ia atoa gwauhamatana, be ia moru lasi. Ia ese gwauhamata matamatana be lauma Israelana dekenai ia karaia; unai bese be Keristani taudia, guba helarona ia henidia taudia. (Ieremia 31:33; Galatia 6:16) Lagani 1919 lalonai, Babulonia Badana, tomadiho koikoi basileiana tanobada hegegemadai ena igui amo ia hamauridia. Ia gari henia ena mamina be edia lalona ai ia atoa namonamo. Unai ese idia bona hutuma bada herea taudia, edia helaro be Basileia henunai mauri be tanobada ai do idia abia taudia, ia hanamodia bada. (Ieremia 32:39; Apokalupo 7:9) Iehova gari henia mamina be edia lalona ai danu ia noho.

Dirava ese Ia Gari Henia Mamina Iseda Lalona ai Ia Atoa Dalana

¹⁷ Iehova Dirava ese ia garina ena mamina be iseda lalona ai edena bamona ia atoa? Ena lauma helaga amo ia atoa. Vadaeni, lauma helaga amo ia havaraia bena ita abia gauna be dahaka? Gauna be Baibel, Dirava ena Hereva unai. (2 Timoteo 3:​16, 17) Iehova ese gunaguna ia karaia karadia amo, bona ena peroveta Herevana hamomokania totona hari inai negai ena hesiai taudia dekenai ia karaia karadia amo, bona gabeai do idia vara gaudia perovetalaia herevadia amo, unai gari ena badina aukana ia atoa, ia latanai do ita habadaia totona.​—Iosua 24:​2-15; Heberu 10:​30, 31.

18, 19. Hebouhebou badadia bona kongregesen heboudia ese ita edena bamona idia durua, Dirava gari henia mamina do ita abia totona?

¹⁸ Inai danu ita laloa be namo: Deuteronomi 4:​10 ena hereva hegeregerena, Iehova ese Mose ia hamaoroa, ia gwau: “Israela taudia do oi haboua lauegu vairana dekenai, lauegu hereva do idia kamonai, vadaeni tanobada dekenai idia noho dinadia ibounai, lau dekenai do idia matauraia bona kamonai henia.” Unai hegeregerena, hari inai negai, Iehova ese heduru bada be iena orea taudia ia henia, ia gari henia dalana do idia dibaia totona. Iseda hebouhebou badadia dekenai bona iseda kongregesen heboudia dekenai, Iehova ena hebogahisi bona ena kara namo sivaraidia ita herevalaia. Tau Hereadaena bukana ita stadilaia neganai, unai bamona ita karaia. Unai buka oi stadilaia dainai, emu lalohadai Iehova dekenai be edena bamona? Iseda Tamana guba dekenai ia noho ena kara namo hereadia idauidau edia toana be iena Natuna ese ia hahedinaraia; unai oi dibaia neganai, emu ura, Dirava habadua karana do oi karaia lasi urana, be ia hagoadaia, ani?​—Kolose 1:15.

¹⁹ Iseda hebou lalodiai, ita ese danu Iehova ese ena bese taudia be gunaguna ia hamauria sivaraidia be ita stadilaia. (2 Samuela 7:23) Baibel bukana Apokalupo be buka ladana Apokalupo​—Ena Hagugurua Negana Ia Kahirakahira! ena heduru amo ita stadilaia neganai, ita ese peroveta mata hanaidia, edia anina be hari inai nega lalonai idia vara vadaeni gaudia, be ita dibaia, bona hagaria gaudia ma haida danu, gabeai do idia vara gaudia unai. Dirava ena kara unai bamona iboudiai, be Salamo 66:5 ese inai bamona ia gwauraia: “Umui mai, Dirava ena kara do umui itaia. Iena kara taunimanima edia huanai be mai garina karadia.” Oibe, Dirava ena kara bema ita lalodia maoromaoro, idia ese Iehova gari henia mai hemataurai bada ida mamina be iseda lalona ai idia atoa. Unai amo ita diba Iehova ese ena gwauhamata ta be edena bamona ia hamomokania; gauna be inai: “Ura namodia idia dekenai do lau henia, vadaeni idia ese lau dekenai do idia gari nega ibounai. Unai dainai, idia ese lau dekena amo do idia raka siri lasi.”​—Ieremia 32:40.

20. Dirava gari henia mamina be iseda lalona ai do ita abia momokani totona, dahaka do ita karaia be namo?

²⁰ To ia hedinarai, bema Dirava gari henia mamina ita tahua lasi, iseda lalona ai do ia vara kava lasi. Iehova ese ita ia durua ita abia totona. Unai hegeregerena, namona be Dirava gari henia mamina be iseda lalona ai do ita habadaia toho. (Deuteronomi 5:29) Israela besena gunana be unai bamona idia karaia lasi. To lauma Israela taudia bona edia bamodia be Iehova dekenai idia tabekau dainai, hahenamo momo idia abia noho, Dirava gari henia taudia ese idia abia gaudia unai. Unai hahenamo momo be hereva gabena lalonai do ita tahua.

Edena Bamona Do Oi Haere?

◻ Dirava gari henia karana ena anina be dahaka?

◻ Iehova ese ita edena bamona ia hadibaia, ia gari henia karana do ita moalelaia totona?

◻ Dirava do ita gari henia totona, dahaka do ita karaia be namo?

◻ Dahaka dainai Dirava do ita gari henia mai iseda lalona ibounai ida be namo?

4. Aposetolo Paulo ese ia hahedinaraia hegeregerena, taunimanima edia kara be edena bamona, bona dahaka dainai unai bamona idia kara?

6. Davida be Salamo 34:​11 ai ia torea herevana amo daika ese ita ia boiria, bona inai siri ese edena bamona ia hahedinaraia Dirava gari henia karana ita dibaia be namo?

10. Keristani heboudia lalonai ita helai negadiai, dahaka do ita karaia be namo, Dirava gari henia karana ena anina do ita lalo-pararalaia totona?

12. Dahaka dainai iseda lalona do ita naria namonamo be namo, bona unai ena anina be dahaka?

17. Iehova ese iseda lalona ai Dirava gari henia mamina be edena bamona ia atoa?

[Picture on page 13]

Iehova gari henia karana do ita lalo-pararalaia totona, namona be do ita stadi namonamo