Dirava Momokanina Gari Henia Karana Ena Namo

“Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.”​—ISAIA 48:17.

1. Dirava gari henia karana ese dahaka kerere badadia ia koua diba?

BEMA Adamu ese Dirava garina mamina ia habadaia, unai gari ese ia koua diba, bena kara dikana ta ia karaia lasi; unai kara dainai mase hanaihanai ia abia bona lagani tausen momo lalonai ena bese taudia edia lalona idia hisihisi. Bema idaunegai Israela besena be Iehova ena sisiba hegeregerena ia idia gari henia bona idia lalokau henia, edia inai taudia ese idia guidia lasi bona Babulonia dekenai idia laohaidia lasi, bona gabeai idia ese Dirava ena Natuna idia dadaraia lasi bona idia alaia mase lasi. Bema hari inai negai tanobada taudia ese Dirava idia gari henia, kerere be gavamani bona bisinesi lalonai idia vara lasi, raskol karadia be lasi, bona tuari be lasi.​—Aonega Herevadia 3:7.

2. Dahaka dainai, ena be tanobada be dika, to Iehova gari henia karana do ita habadaia be namo?

² Herevana tanobada taudia be dahaka idia karaia, to ita ta ta, mai eda ruma bese bona mai eda kongregesen taudia ida, bema Dirava momokanina gari henia karana ita habadaia, namo do ita davaria. Unai be Mose ena hereva hegeregerena; ia ese Israela taudia ia hereva henia, ia gwau: “Lohiabada emui Dirava do umui gari henia, bona iena dala ibounai do umui raka. Lohiabada emui Dirava do umui lalokau henia, bona iena hesiai gaukara do umui karaia, mai emui lalona ibounai, bona mai emui lauma ibounai. Ma Lohiabada ena oda . . . , lau ese umui hanamoa totona hari dina lau gwauraia gaudia, do umui badinaia.” (Deuteronomi 10:​12, 13) Vadaeni, Iehova, Dirava momokanina, ita gari henia neganai ita abia hahenamodia haida be dahaka dahaka?

Aonega​—Golo Ia Hereaia Gauna

³ Ginigunana be aonega korikori. Salamo 111:10 ia gwau: “Lohiabada gari henia kara be aonega hamatamaia ena dala.” Unai ena anina be dahaka? Aonega tauna ese ena diba ia gaukaralaia mai ena kwalimu ida, hekwakwanai kokidia totona, dika koua totona, bona ena ura haida hagugurua totona. Gau idauidau ia lalohadailaia maoromaoro. Unai bamona aonegana ena matamana bona ena badina be Iehova gari henia karana. Badina be dahaka? Badina be ia ese gau iboudiai ia havaraia, bona iena ura dainai idia noho. Ia ese ura kwalimu taunimanima ia henidia, to bema do ia hakaudia lasi neganai sibodia edia raka dalana do idia naria diba totona, diba ia henidia lasi. (Iosua 24:15; Ieremia 10:23) Inai hereva ita lalo-pararalaia bona ita badinaia karana sibona amo do ita kwalimu hanaihanai diba. Iehova ita diba dainai, bema ita diba momokani iena ura be momokani do ia kwalimu bona iena gwauhamata hegeregerena ia ese ia idia badinaia taudia edia davana namona do ia henidia diba, vadaeni, ia ita gari henia dainai, do ita kara mai eda aonega ida.​—Aonega Herevadia 3:​21-26; Heberu 11:6.

4, 5. (a) Dahaka dainai tauhau ta be iunivesiti dekenai diba ia tahua neganai aonega korikori ia davaria lasi? (b) Gabeai ia bona ena adavana ese aonega korikori edena bamona idia davaria, bona unai ese edia mauri edena bamona ia haidaua?

⁴ Unai kara sivaraina ta mani oi laloa. Lagani 60 bamona idia lao vadaeni, Canada dekenai tauhau ta be Saskatchewan ena Iunivesiti dekenai diba ia tahua. Baioloji ia stadilaia, bona evolusen herevana idia hadibalaia. Ena kosi ia haorea murinai, atomik fisiks sibona ia stadilaia momo, bona skolasip ia abia, Toronto ena Iunivesiti dekenai unai do ia stadilaia noho totona. Ia stadilaia noho lalonai, ia ese diba ena toana be atom edia oromana lalonai ia itaia. To inai henanadai edia haere ia davaria lasi: Daika ese unai ibounai ena oromana ia laloa guna bena ia karaia? Edena negai ia karaia? Bona dahaka dainai? Vadaeni, unai neganai, tanobada besedia idia tuari heheni noho neganai, iena diba be edena bamona do ia gaukaralaia mai ena aonega ida? Dahaka ese do ia hakaua? Ena bese ena ladana abia isi urana ese, a? Eiava moni ura henia urana ese, a? Ia be momokani aonega korikori ia abia vadaeni, a?

⁵ Unai tau matamatana ese unai kosi ia haorea bena nega daudau lasi ia bona ena adavana be Baibel idia stadilaia matamaia, Iehova ena Witness taudia ida. Guna idia abia lasi haeredia be Dirava ena Hereva amo idia abia. Gau iboudiai ia karaia Diravana, Iehova, idia dibaia. Mose be Davara Kakakaka dekenai ia karaia karadia bona Daniela bona ena bamona taudia be Babulonia dekenai idia karaia karadia edia sivarai idia stadilaia neganai, idia diba gau badana be taunimanima do idia gari henia lasi to Dirava mo sibona do idia gari henia. (Esodo 14:​10-31; Daniela 3:​8-30) Iehova Dirava be unai bamona idia gari henia bona idia lalokau henia momokani dainai, nega daudau lasi edia mauri dalana ibounai idia haidaua. Unai tau matamatana ese Dirava bona ena palani ia lalo-pararalaia matamaia, Iena ima karakara gaudia be baioloji lalonai ia stadilaia bona Iena aonega ena toana be fisiks lalonai ia itaia Diravana unai. Vadaeni, ena diba ia gaukaralaia lasi taunimanima hamasea gaudia karaia totona, to ia bona ena adavana idia ura ma haida do idia durua, Dirava bona edia dekena taudia do idia lalokau henia totona. Dirava ena Basileia harorolaia taudia ai idia lao, nega ibounai do idia harorolaia totona. Gabeai, idia be Watchtower Bible School of Gilead dekenai idia lao. Unuseniai misinari taudia ai idia halaodia bena idia siaidia lao.

6. Dirava gari henia karana amo ia vara aonegana bema ita abia, dahaka anina maragi gaudia do ita tahua lasi, bona dahaka do ita karaia?

⁶ Momokani, haida mo be misinari taudia ai idia lao diba. To ita ibounai ese aonega ita abia diba, Iehova gari henia karana amo ia vara aonegana unai. Bema unai aonega ita habadaia, mauri ena anina idia gwauraia kava sibona taudia edia lalohadai do ita abia dae lasi mai eda ura ida. Mauri ibounai ena Badina, Iehova Dirava, ese ena lauma amo ia havaraia bukana, Baibel, do ita stadilaia goadagoada. (Salamo 36:9; Kolose 2:8) Bisinesi oreadia, do idia dika haraga diba gaudia, edia igui hesiai taudia ai do ita lao lasi, to bema ita be mai eda aniani bona dabua neganai, Iehova ena sisiba hegeregerena do ita gwau unai be hegeregere, bona ia do ita badinaia dalana do ita tahua guna. (1 Timoteo 6:​8-12) Nega vairai do ita noho namonamo totona moni bona kohu do ita tahua lasi, to Iehova ena Hereva do ita abia dae; ia gwau, tanobada mai ena ura ida be kahirakahira do ia ore, to Dirava ena ura ia karaia tauna be ia noho ela bona hanaihanai.​—1 Ioane 2:17.

7. (a) Aonega Herevadia 16:16 ese ita edena bamona ia durua, mai anina bada gaudia ita laloa bada totona? (b) Bema Dirava ena ura karaia dalana ita tahua guna, dahaka davana namodia do ita abia?

⁷ Aonega Herevadia 16:16 ese iseda lalona ia hagoadaia, ia gwau: “Aonega [Iehova gari henia karana amo ia matamaia aonegana unai] ena namo ese, golo ena namo ia hereaia noho. Laloa kehoa ena namo ese, siliva ena namo ia hereaia noho.” Unai bamona aonegana bona lalo-pararana ese ita idia ha-uraia, Dirava ena ura karaia dalana be iseda mauri lalonai do ita tahua badabada totona. Vadaeni, Dirava ese ena Witness taudia ia henia hari inai negai do idia karaia gaukarana be dahaka? Gauna be inai: Iena Basileia do idia harorolaia bona lalo-momokani taudia do idia durudia, Iesu Keriso ena hahediba taudia momokanidia ai do idia lao totona. (Mataio 24:14; 28:​19, 20) Unai gaukara ena davana namona be inai: Idia karaia taudia edia lalona idia hegeregere momokani bona idia moale bada. Unai hegeregerena, Baibel ia gwau: “Aonega ia davaria tauna be mai moale danu.”​—Aonega Herevadia 3:13.

Ita Ia Naria, Kara Dika Do Ita Karaia Garina

⁸ Dirava gari henia karana ena hahenamo ma ta be, ita ia naria, kara dika do ita karaia garina. Dirava idia matauraia bada taudia be sibodia edia lalona idia hadaia lasi dahaka be namo bona dahaka be dika. Idia laloa lasi Dirava ese ia gwauraia namo karadia be dika, bona idia laloa lasi ia gwauraia dika karadia be namo. (Salamo 37:​1, 27; Isaia 5:​20, 21) Inai danu, Dirava gari henia mamina ese ia ha-uraia tauna be Iehova ese dahaka ia gwauraia namo bona dahaka ia gwauraia dika be ia diba sibona lasi; Iehova ese ia ura henia karadia be unai tau ese ia ura henia, bona Iehova ese ia inai henia karadia be ia ese ia inai henia. Unai dainai, ia be Dirava ena taravatu hegeregeredia ia kara. Aonega Herevadia 16:​6 ena hereva hegeregerena, “Lohiabada oi gari henia neganai, oi be kara dika dekena amo oi siri noho.” Ta ese Dirava unai bamona ia gari henia neganai, unai gari ese ia ha-uraia mai ena siahu dainai, ia ese sibona ena goada amo ia karaia diba lasi karana be reana do ia karaia diba.

9. Mexico ai hahine ta ia ura bada Dirava do ia habadua lasi, unai dainai ia be edena bamona ia kara, bena unai dainai dahaka ia vara?

⁹ Ena be ta ese Dirava ia gari henia matamaia mo, to reana unai gari ese ia hagoadaia dainai, kara kererena ta ia karaia lasi; unai kara bema ia karaia, reana gabeai iena mauri negana orena ibounai lalonai do ia lalohisihisilaia. Unai hegeregerena, rogorogo hahinena ta Mexico ai ese beibi be sinana bogana lalonai hamasea karana be Iehova ena Witness hahinena ta ia nanadailaia. Witness hahinena ese Baibel siridia haida ia duahia ia dekenai, bena ia gwau: “Gau iboudiai ia karaia Diravana vairanai, mauri be mai anina bada, idia do vara lasi taudia edia mauri danu.” (Esodo 21:​22, 23; Salamo 139:​13-16) Kliniki taudia ese idia sekea neganai, idia gwau reana ena beibi do ia dika. To, Dirava ena Hereva lalonai ia itaia gaudia dainai, ia laloa ena beibi do ia abia be namo. Unai dainai ena doketa ia ura lasi do ia itaia lou, bona ena adavana ese ia hamaoroa do ia rakatania, to ena lalona ia auka. Gabeai, kekeni ta ia abia​—ia namo bona mai hairaina. Unai hahine ia ura Dirava do ia tanikiu henia, unai dainai Witness taudia ia tahua, bena idia ese Dirava ena Hereva idia hadibalaia matamaia. Lagani ta ia do ore lasi neganai, ia bona ena adavana be bapatiso idia abia. Lagani haida murinai, distrik hebouhebouna ta dekenai, idia moale bada, badina be Witness hahinena ta, matamanai ia hereva henia hahinena, idia davaria, bona edia natuna, lagani hani kekenina mai hairaina, idia hahedinaraia ia dekenai. Momokani, bema ta ese Dirava ia matauraia maoromaoro bona ia ura bada do ia habadua lasi, unai be mai ena siahu bada iena mauri lalonai.

10. Dirava gari henia mamina ese taunimanima ia hagoadaia dainai, dahaka kara dikadia idia rakatania diba?

¹⁰ Dirava gari henia mamina ese ita ia hagoadaia, kara dikadia idauidau momo do ita dadaraia totona. (2 Korinto 7:1) Bema ta ese unai mamina ia hatubua maoromaoro, ia durua diba, ena kara dikadia hehunidia, ia bona Iehova sibodia mo idia diba karadia, do ia hadokoa totona. Ia durua, kekero muramurana inua momo karana o drag iusilaia kerere karana edia igui amo do ia roho mauri totona. South Africa ai drag be guna unai bamona ia gaukaralaia kerere tauna ta ia gwau: “Dirava lau dibaia noho lalonai, egu gari, ia ena lalona do lau hahisia o ia do lau habadua garina, be ia bada ia lao. Lau diba ia ese lau ia raraia, bona lau ura lau do ia lalo-namo henia. Unai dainai egu drag be toilet lalonai lau negea.” Dirava gari henia karana ese ma taunimanima tausen momo unai bamona ia durua vadaeni.​—Aonega Herevadia 5:21; 15:3.

Ita Ia Naria Dainai, Taunimanima Ita Gari Henia Lasi

¹¹ Dirava gari henia maoro karana ese danu ita ia naria, taunimanima do ita gari henia garina. Taunimanima momo ese taunimanima idia gari henia; haida ese idia gari henidia bada, haida ese idia gari henidia maragi. Getesemane umana lalonai tuari taudia ese Iesu Keriso idia dogoatao neganai, iena aposetolo ese idia heautania. Gabeai, hahelaga tauna badana ena magu lalonai, Petero ia daradara bona ia gari dainai ia gwau ia be Iesu ena hahediba taudia ta lasi bona ia diba lasi ia. (Mareko 14:​48-50, 66-72; Ioane 18:​15-27) To gabeai aposetolo ese heduru idia abia dainai, lauma dalanai idia goada lou. King Iehoiakimi ena nega lalonai ia vara gauna be idau; Iehova ena peroveta tauna Uria Semaia be ia gari bada dainai, ena peroveta gaukarana ia hadokoa bona tano ia heautania, to idia dogoatao bena idia alaia mase.​—Ieremia 26:​20-23.

12. (a) Aonega Herevadia 29:25 ese ia hahedinaraia dahaka ese ita do ia naria bena taunimanima do ita gari henia lasi? (b) Dirava abidadama henia karana be edena bamona ita habadaia?

¹² Dahaka ese ta do ia durua bena taunimanima do ia gari henia lasi? Aonega Herevadia 29:25 ia gwau: “Taunimanima do oi gari henia neganai, dika do oi davaria, tarapu lalonai oi moru bamona. To bema Lohiabada oi abidadama henia neganai, mauri do oi davaria diba.” Iehova abidadama henia karana be mai anina bada. Unai abidadama be diba bona kara amo ia vara. Iehova ena Hereva ita stadilaia neganai, iena dala edia maoro hahedinaraia gaudia ita itaia. Iena kara sivaraidia ita dibaia; unai kara amo ia hahedinaraia ia dekenai idia tabekau taudia ia durua bona ena gwauhamata (toreisi lou gwauhamatana danu) be momokani; ma ena lalokau bona ena siahu bada be unai kara amo ia hahedinaraia. Unai iseda diba hegeregerena ita kara neganai, Iehova ena hahegani karadia ita karaia, bona ia gwauraia dika karadia ita dadaraia mai eda goada ida. Unai neganai ia ese ita ia naria matamaia mai ena lalokau bona mai ena momokani ida. Iseda matana amo ita itaia iena siahu ia gaukaralaia ena ura hagugurua totona. Iseda abidadama bona iseda lalokau ia dekenai be idia bada idia lao, bona ita ura bada do ita habadua lasi. Unai abidadama be ena badina aukana latanai ita haginia. Ita ia naria, taunimanima do ita gari henia garina.

13. Dirava gari henia mamina ese ita edena bamona ia durua, iseda moni gaukara gabuna dekenai, ruma dekenai, bona sikuli dekenai?

¹³ Iehova ita abidadama henia bona ita gari henia dainai, bema iseda bosi ese ita ia hasakia gwauraia badina be bisinesi karadia koikoidia ita karaia lasi dainai, kara maoromaoro do ita badinaia noho. (Mika 6:​11, 12 itaia.) Keristani taudia tausen momo ese Dirava unai bamona idia gari henia dainai, ena be edia ruma bese taudia, murimuri taudia, ese idia badu henidia, to tomadiho momokani lalonai idia haheauka noho diba. Unai gari dainai, sikuli memerodia bona kekenidia edia lalona idia goada; idia be sibodia idia gwauraia hedinarai idia be Iehova ena Witness taudia, bona edia klas taudia, Baibel ena hahegani idia laloa maragi taudia, edia hevaseha herevadia idia haheaukalaia. Unai hegeregerena, Witness kekenina ta ia gwau: “Edia lalohadai be herevana. Iehova ena lalohadai be gau badana.”

14. Dahaka dainai Iehova ena hesiai taudia idia kwalimu, haida ese idia hamasedia gwauraia negadiai danu?

¹⁴ Keristani taudia momokanidia be unai bamona idia laloa dainai, idia ese Iehova ena dala idia badinaia noho, haida ese idia hamasedia gwauraia negadiai danu. Idia diba tanobada ese do ia dagedage henidia. Idia diba haida ese aposetolo idia dadabadia bona kara dika taudia ese Iesu Keriso idia dadabaia bona idia hamasea. (Mareko 14:65; 15:​15-39; Kara 5:40; ma danu Daniela 3:​16-18 itaia.) To Iehova ena hesiai taudia ese ia idia abidadama henia momokani dainai, idia laloa do ia hagoadadia diba do idia haheauka totona, bona iena heduru dainai do idia kwalimu; ma idia laloa Iehova ese ia idia badinaia taudia edia davana be momokani do ia henidia​—reana anina be do ia hatoredia isi lou, ena tanobada matamatana lalonai do idia mauri totona. Dirava idia lalokau henia bona idia gari henia; unai lalokau bona gari ese ia ha-uradia, habadua karadia iboudiai amo do idia raka siri totona.

¹⁵ Unai dainai Iehova ena Witness taudia ese Nazi taudia edia dibura rumadia lalonai hisihisi bada herea idia haheaukalaia, lagani 1936 amo ela bona lagani 1945. Iesu ena sisiba Luka 12:​4, 5 dekenai be idia abia dae; ia gwau: “Egu turadia e, lau hamaoroa umui dekenai, tauanina do idia alaia diba, to mase murinai gau ta do idia karaia diba lasi taudia dekenai do umui gari lasi. To lau hamaoroa umui dekenai, daika dekenai do umui gari: Umui do ia alaia mase murinai, ia be mai siahu, mase gabuna [Gehena] dekenai umui do ia negea diho Diravana, ia dekenai do umui gari.” Unai hegeregerena, Witness tauna ta ladana Gustav Auschner, guna Sachsenhausen dibura rumana lalonai ia noho tauna, be ia gwau: ‘SS taudia ese August Dickmann idia pidia mase, bona idia gwau emai abidadama dadaraia herevana pepana bema ai sainia lasi, ai ibounai do idia pidia mase. Ai ta lasi ia sainia. Iehova habadua karana ai garilaia bada, edia buleti ai garilaidia maragi.’ Taunimanima ia gari henia tauna ese dala maorona amo ia raka siri, to Dirava ia gari henia tauna ese kara maoromaoro ia goadalaia.

Hahemauri

¹⁶ Abata Badana ia do vara lasi neganai, Noa be unai tanobada gunana ena dina gabedia ai ia noho. Taunimanima edia kara dika dainai Iehova ese unai tanobada dikana ia hadikaia ore gwauraia. To, Noa be unai ia naria noho lalonai, ia be unai tanobada dekenai ia noho; dagedage karadia, matabodaga karadia, bona Dirava ena ura laloa lasi karadia ai ia honudae tanobadana unai. Ena be Noa ese kara maoromaoro ia harorolaia, to “taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao.” (Mataio 24:39) To Noa ese Dirava ese ia henia gaukarana ia hesikulaia lasi. Ia “ese unai bamona ia karaia, Dirava ena hereva ibounai hegeregere.” (Genese 6:22) Dahaka dainai Noa ese dala maorona ia rakalaia noho ela bona Abata Badana ia ginidae? Heberu 11:7 ena haere be inai: “Noa ese Dirava ia abidadama henia, vadaeni Dirava ese dohore idia vara gaudia Noa dekenai ia hadibaia guna. Vadaeni Noa ese Dirava ia kamonai henia.” Unai dainai, Dirava ese ia mai ena adavana bona ena natuna memero bona edia adavadia ida be Abata Badana amo ia hamauria.

17. (a) Ena be tanobada taudia idia kara dika noho, to ita be edena bamona do ita kara be namo? (b) Dahaka dainai Iehova idia gari henia taudia sibodia mo idia moale momokani?

¹⁷ Dala momo dekenai hari inai nega be Noa ena nega hegeregerena. (Luka 17:​26, 27) Dirava ese taunimanima ia hadibaia lou. Apokalupo 14:​6, 7 ese aneru ta ia gwauraia, guba padanai ia roho, bese iboudiai, iduhu iboudiai, gado iboudiai ia hadibaia, namona be ‘Dirava do idia gari henia, ia do idia hanamoa bada.’ Herevana tanobada taudia be dahaka idia karaia noho, to namona be unai hereva oi kamonaia bena ma haida oi boiria. Noa hegeregerena, oi kara mai emu abidadama ida bona oi hahedinaraia Dirava oi gari henia. Bema unai bamona oi kara, emu kara dainai Dirava ese oi do ia hamauria bona ma taunimanima momo do ia hamauria danu. Dirava momokanina idia gari henia taudia ese idia abia hahenamodia ita laloa neganai, salamo torea tauna ta ena hereva ita hamomokania; ia gwau: “Lohiabada dekenai ia gari tauna be namo. Lohiabada ena taravatu ia moalelaia noho tauna danu be namo.”​—Salamo 112:1.

Edena Bamona Do Oi Haere?

◻ Dirava momokanina idia gari henia taudia be dahaka hahenamo badadia idia abia?

◻ Dirava gari henia karana amo ia vara aonegana ese ita edena bamona ia naria diba?

◻ Dahaka dainai Dirava gari henia karana ese kara dika amo ita ia hakaua siri?

◻ Dirava gari henia karana ese ita edena bamona ia naria dainai taunimanima ita gari henia lasi?

◻ Bema Dirava ita gari henia, dahaka be nega vairai do ita davaria?

3. (a) Dirava gari henia karana ena hahenamo ginigunana be dahaka? (b) Salamo 111:10 ena anina be dahaka?

8. (a) Dirava gari henia karana ena hahenamo iharuana be dahaka? (b) Unai gari ese ita ia naria, dahaka dika do ita karaia garina? (c) Dirava gari henia mamina ese ta edena bamona ia ha-uraia mai ena siahu ida?

11. Bema Dirava be dala maorona ai ita gari henia, unai ese ita do ia naria, bena dahaka tarapu lalonai do ita moru lasi?

15. Dahaka dainai Iehova ena Witness taudia ese kara maoromaoro idia badinaia noho diba Nazi dibura rumadia lalonai?

16. Dahaka dainai Noa be nega daudau lalonai dala maorona ia rakalaia noho diba ela bona Abata Badana ia ginidae, bona unai ena anina be dahaka, ia bona ena ruma taudia dekenai?

[Picture on page 16]

“Lohiabada dekenai ia gari tauna be namo. Lohiabada ena taravatu ia moalelaia noho tauna danu be namo.” ​—Salamo 112:1