Iehova ese Tanobada Hadikaia Karadia Do Ia Koua

MALDIVE motumotudia ta dekenai, peleini idia diho gabuna ta be dina ta ta iboudiai hora haida lalonai idia koua. Badina be dahaka? Badina be davara ia bada neganai, abata ese peleini edia diho gabuna ia koua dainai, bema idia diho reana do idia dika. Saiens taudia haida ese idia laloa momo gauna be inai: Reana vaira laganidia 100 lalonai davara bada ena maka Maldive motumotudia dekenai be mita ta do ia daekau. Ena be unai be bada lasi, to unai ranu ese motumotu besedia 7 do ia hadikaia ore diba. UN Chronicle magasin ia gwau bema davara bada ena maka be mita rua do ia daekau, abata ese unai motumotu 1,200 bamona do ia koudia!

Badina be dahaka davara bada ena maka ia daekau? UN Environment Program ia gwau badina be inai: Tanobada ena hodahoda be gasi amo idia hamiroa dainai, siahu gabudia ai davara ia bada ia lao, bona aisi bada gabudia ai aisi ia veve dainai davara ia daekau. London dekenai ia noho oreana, Panos Institute, be idia gwau reana hodahoda hamiroa karana ese “dika bada herea ta ia hamatamaia; unai dika ese tanobada bona davara edia hetoadia be metairametaira ia haidaua.”

Tanobada ibounai ia siahu ia lao eiava lasi be saiens taudia ese idia do hepapahuahulaia noho. To, ita diba tanobada hadikaia karadia ese Dirava ena palani do idia koua lasi. Baibel ia gwau: “Tanobada be ia gini goada noho, haida ese do idia hamarerea diba lasi, ela bona nega ibounai.” (1 Sivarai 16:30) Iehova ese tanobada ia biagua, bona ita moale diba, badina be kahirakahira ia ese tanobada hadikaia karadia do ia koua bona taunimanima do ia hamauridia.​—Salamo 24:​1, 2; 135:6; 2 Petero 3:13.

[Picture Credit Line on page 31]

Drawing based on NASA photo