Iehova Ena Witness Taudia Tanobada Hegegemadai—Sweden

SWEDEN tanona be Scandinavia tano ena ist kahana ibounai bona unai amo ia lao ela bona Arctic Circle ia hanaia momokani. Tanobada hegegemadai idia diba Sweden be mai ena pain uda badadia, gohu bona ororo momo herea; bona Europe tanodia iboudiai amo, Sweden dekenai idia noho taudia be momo lasi. To herevana, Iehova ena Witness taudia be lagani 1898 murinai hereva momokani idia ura taudia idia davaria mai kwalimu ida. Mani vanegai ia vara haheitalai ta ita laloa.

Hahine ta be Iehova ena Witness taudia ida Baibel ia stadilaia, to ena adavana be unai ia ura lasi. Ena adavana ia hamaoroa stadi do ia hadokoa, bena ena adavana ese stadi ia rakatania. Unai tauna be bia idia atoa sitoa dekenai ia gaukara. Nega ta taraka ia taria tauna ta bona ena tubuna merona, ena lagani be 10, idia lao unai sitoa dekenai. Mero maragina tubuna ese unai tau ia hamaoroa ena tubuna ia naria, taraka dekenai ena kohu ia udaia lalonai. Idia herevahereva totona, unai tau ese mero maragi ia nanadaia vanegai ena vara dinana dekenai dahaka harihari gaudia ia abidia. To unai tau ia hoa, badina mero maragi ia gwau ia bona ena famili taudia be vara dinana idia moalelaia lasi, badina idia be Iehova ena Witness taudia. Bona ia hamaoroa danu, lagani ta ta lalonai nega idauidau ai harihari gaudia ia abia bona gau ta ia reaia lasi, badina ena famili be hebogahisi bona lalokau taudia. Ma ia gwau, harihari gauna ta ese ena famili ena hebogahisi bona lalokau karana ia hanaia diba lasi.

Unai mero maragina be nega haida ena tubuna danu ia giroa lao. Unai nega ta ta iboudiai, unai tau ese henanadai momo ia henia mero maragina dekenai, bona mero maragina be mai daradara lasi ida haere momokani bona maoromaoro ia henia dainai, unai tau ia hoa dikadika. Mero maragina ese kara maoromaoro ia ura henia dainai unai tau ia hoa danu. Hanuaboi ta, unai tau ese tanobada dekenai idia vara gau dikadia ia hahedinaraia televisen program ta ia raraia murinai, ia lalo-parara namona be lauma gaudia ia tahua matamaia. Guna ena adavana ia stadi henia Witness hahine ia rini henia bona ia noia ia lou mai totona. Daudau lasi murinai, Witness tauna ese unai tau ia stadi henia, bona lauma dalanai ia goada ia lao haraga. April 10, 1994 ai ia bapatiso. Ena adavana danu be hari ia bapatiso vadaeni.

Momo Dainai Ruma Matamatadia Idia Haginia

Sweden dekenai, edia tano amo idia heau siri taudia momo idia noho, bona Sweden ena Witness taudia be idia dekenai idia haroro neganai anina namona idia havaraia. Unai tano dekenai haroro gaukara ese anina namona ia havaraia dainai orea ia bada bona idia ura Kingdom Hall matamatadia idia haginidia. Lagani 1986 ema bona 1993, Kingdom Hall 37 be haginia haraga konstraksen dalana ai idia haginia bona 8 be idia habadaia bona idia hanamoa. Lagani 1994 sibona lalonai, Kingdom Hall matamatadia 7 idia haginia bona toi idia hanamoa.

Hari, kongregesen ibounai 65 be Kingdom Hall matamata, eiava edia Kingdom Hall habadaia eiava hanamoa totona idia naria noho. Volantia taudia 2,500 bamona be mai lalokau ida unai bamona gaukara idia karaia, bona kongregesen taudia ese edia heduru idia abia dae.

Sweden ena not kahana, ia lao ela bona Arctic Circle ia davaria be nega haida idia gwauraia hanuaboi momokani ena dina tanona. Unai bamona idia hereva badina siahu negana ena kahana ai, dina ia diho diba lasi. To Sweden ena tano ibounai lalonai, hereva momokani ena diari danu be ia diari ia lao noho. Iehova ena hahenamo dainai unai lauma diarina be do ia bodo lasi to do ia diaridiari noho.

[Box on page 8]

TANO RIPOTINA

Hesiai Laganina 1994

HARORO TAUDIA EDIA NAMBA BADANA: 24,246

WITNESS TAUNA TAMONA INAI NAMBA AI: 362

MEMORIAL AI IDIA HEBOU TAUDIA: 40,372

PAINIA TAUDIA EDIA AVERES: 2,509

BAIBEL STADI EDIA AVERES: 11,306

BAPATISO ABIA MATAMATA TAUDIA: 850

KONGREGESEN EDIA MOMO: 358[6]

BRENS OPESI:ARBOGA

[Pictures on page 9]

Brens opesi bona Betele Ruma Arboga dekenai

[Pictures on page 9]

Witness gunadia Hjo ai be inai basi maragina idia gaukaralaia teritori ena bada 5,000 sq km dekenai haroro totona