Himalaya Ororodia Ia Hanaia Ororona Dekenai Idia Daekau
HIMALAYA! Unai hereva dainai dahaka oi lalohadailaia? Ororo ataiai idia noho aisi bona unuseni idia mai lai goadadia, a? Tanobada ena ororo lata hereana dorina ai oi gini negana ai do oi abia kwalimu mamina, a? Ita momo be Mount Everest dekenai, Nepal ena Himalaya Ororodia lalonai, ita daekau lao be hegeregere lasi. To, hari Nepal dekenai taunimanima momo be Himalaya Ororodia ia hanaia ororona dekenai idia daekau lao. Unai ororo badana dekenai idia daekau lao karana ita do tahua lasi lalonai, mani ita ese Nepal Basileiana mai ena hairai ita herevalaia.
Nepal—Ororo Basileiana
Nepal Basileiana be idau badina tanobada hegegemadai ai pavapava ese ia lohiaia tanodia oredia momo lasi amo, ia be ta. To ia be tomadiho basileiana. Tanobada hegegemadai ai Nepal sibona be Hindu tanona. Unuseniai idia noho taudia milioni 20 amo, kahana bada herea be Hindu tomadiho taudia. To ena taunimanima edia mai dalana bona gado be idauidau. Not kahanai, ororo gabuna dekenai, idia noho taudia momo be Tibet-Burma besedia amo, to saut kahana ena taora dekenai idia noho taudia kahirakahira ibounai be Indo-Aryan besedia amo. Nepali be unai tano ena gado badana bona unai tano taudia 60 pesen edia gado korikorina. Taunimanima oredia be bese idauidau 18 edia gado dekenai idia hereva.
Nepal tanona ena hetoana be maua latana ta bamona, ist amo ia lao west kahana ena daudau be kilomita 880 bona not amo ia diho lao saut kahana ena daudau be kilomita 200. Unai hoa havaraia Himalaya Ororodia be not kahana ena tano hetoana dekenai. Unuseniai, Mount Everest, tanobada ena ororo lata hereana, ena lata be mita 8,848 bona ma ororo 8, edia lata be mita 8,000 ia hanaia, idia noho danu. Nepal tanona ena ihuana be ororo maragidia, gohu bona koura gabuna. Ia diho lao saut kahana dekenai, India tanona danu idia karaia hetoana dekenai, be tano namona Tarai ia noho, edia biru gabuna badana.
Kathmandu, edia siti badana ihuana kahanai, be vadivadi loaloa taudia ese idia moalelaia gabuna. Unuseni amo peleini be ororo edia ataiai amo idia roho lao, taunimanima be animal idia noho gabudia dekenai idia lao diba, bona unai hanua ena gabu momo idia itaia diba. Nega haida Nepal idia gwauraia dirava edia koura, badina unai gabu taudia edia mauri lalonai tomadiho be mai anina bada. Tanobada hegegemadai ai taunimanima milioni momo danu be tomadiho dainai Himalaya Ororodia ia hanaia “ororona” dekenai idia daekau lao.
Lagani 2,700 gunanai, Heberu peroveta tauna Isaia be siahu ia abia dainai inai ia perovetalaia: “Nega gabeai . . . Lohiabada ena Dubu Helagana ia gini ororona, be ataiai momokani ororona ai do ia lao. . . . Bona edia taunimanima do idia gwau, ‘Umui mai, Lohiabada ena ororo dekenai do ita daekau . . . Ia ese iena kara ita dekenai do ia hadibaia, bona ita ese unai Dirava ena dala dekenai do ita raka.’ ” (Isaia 2:2, 3) Unai siri ai Iehova, gau ibounai Havaraia bona Lohiaia Tauna Badana, tomadiho henia karana goevadaena be ororo ta bamona idia gwauraia, ororo bamona tomadiho daladia iboudiai edia ataiai momokani dekenai ia noho. Unai be tanobada hegegemadai ai hadibaia gaukarana ta ena badina, hereva momokani hitolona idia abia taudia ia durua Iehova ena dala idia diba totona. Nepal dekenai unai gaukara be edena bamona ia matamaia?
Hamatamaia Daladia
Tanobada Ibounai Tuarina Iharuana lalonai British Army ena tuari tauna ta be tomadiho momokanina ia tahua. Iena Nepali tama sina, Hindu tomadiho taudia, be Katolik tomadihona lalonai idia vareai. Ia tubu daekau neganai, ia itaia kaivakuku tomadiho henia be kavakava karana. Hahediba haida, hegeregere hel hahedibana ia dadaraia, bena Protestan dubudia ese idia abia dae herevadia ia tahua namonamo. To ena lalona ia hegeregere lasi.
Guna idia gwauraia Rangoon, Burma dekenai, Japan taudia ese idia abia bona dibura tauna ai idia halaoa neganai, unai ami tauna ia guriguri, unai dibura kamepa ena hisihisi amo do ia roho mauri bena tomadiho momokani do ia tahua noho. Gabeai, ia heau mauri bena sikuli tisa ta ese ia durua; unai tau ena ruma dekenai J. F. Rutherford ese ia torea buklet Where Are the Dead? ia itaia. Hereva momokani ena mamina ia abia dainai, Iehova ena Witness taudia ese Rangoon dekenai 1947 ai idia vadivadi henia neganai ia ura dikadika ia stadi. Hua haida sibona murinai, bapatiso ia abia, bona daudau lasi murinai iena adavana ia bapatiso. Edia lalona idia hadaia bena India dekenai idia giroa, edia gabu Kalimpong, notwest kahana ororodia dekenai, idia noho. Unuseniai edia natuna ruaosi idia vara bona idia sikuli. March 1970 ai, Kathmandu dekenai idia lao.
Nepal ena taravatu ese tomadiho haidaua karana ia taravatua. Bema tomadiho idauna ta ena hahediba ia herevalaia loaloa tauna ta idia davaria, dibura ruma ai lagani 7 do idia koua diba, bona unai tomadiho ta lalonai ia vareai tauna be lagani toi dibura ruma dekenai do idia koua bona fain moni bada herea do ia henia. Unai dainai haroro gaukara idia karaia mai aonega ida. Anina be ruma-ta-ruma-ta gaukarana ai, gabu ta dekenai ruma ta idia karaia bena idia lao ma gabu ta dekenai ruma ta idia karaia. Unai dainai, nega bona dala idauidau ai haroro gaukarana be edia dala badana, sivarai namona halasia totona.
Gaukara ena anina be metairametaira ia tubu. Taunimanima ibounai be milioni 10 dainai, toana be hesiku do ia havaraia bamona. Hereva momokani ena uhe be unai ruma bese tamona ese idia hadoa; turadia, idia davaria taudia, edia gaukara biagudia, bona gaukara hebou taudia idia haroro henidia. Hanaihanai edia ruma dekenai idia hebou bona kamonai taudia idia boiria mai. Bena gabeai, March 1994 ai, lagani 4 lalonai idia dairia bona hadoa loulou murinai, huahua ginigunana Nepal ai ia hedinarai—bona unai huahua be ita laloa lasi gabuna amo ia mai!
Pablisa ta be ruma ta ia vadivadi henia neganai, taga tauna ta ia hereva henia, ia be lohia besena tauna ta ena seketere. Ia gwau “Egu natuna oi hereva henia.” Iena natuna ia ura Baibel stadi do ia abia. Gabeai ia ese ena gaukara ia haidaua badina kasi rumana dekenai ia gaukara. Iena tamana, Hindu tomadiho goadalaia tauna, ese ia koua. To, unai tau matamata be Iehova dainai ia gini goada. Unai dainai dahaka ia vara? Iena tamana be gabeai ia ia koua lasi, bona ena varavara haida be Baibel ena hereva momokani idia abia dae. Hari ia be Keristani kongregesen lalonai elda gaukarana ia karaia.
Lauma dalanai idia goada noho totona bona Baibel ena hahegani, edia hebou karana idia negea lasi haheganina, idia badinaia totona, unai grup maragina Kathmandu dekenai be ta ena ruma dekenai idia hebou loulou. To, nega momo tadikaka be hebouhebou badadia idia lao henia diba lasi. Idia lao diba taudia be India dekenai hebouhebou totona idia lao—unai laolao ena davana be bada bona ia be daudau, ororo gabudia amo idia hanaia lao.
Edia hebou rumana dekenai distrik hebouhebou ena program ibounai idia abia neganai idia moale bada herea! Mani oi laloa, tadikaka hani, ta be India ena brens tauna ta, ese kahana ibounai idia naria! Baibel drama idia itaia danu. Edena dala ai? India dekenai mai edia drama kohudia ida drama idia karaia toho neganai slaid piksa idia karaia. Nepal dekenai, unai slaid idia halasia neganai teipi dekenai hereva danu idia gadaralaia. Helai taudia ese idia moalelaia. Edia namba be hida? Taunimanima 18!
Ma tano haida amo Witness taudia edia heduru haroro gaukara dekenai idia abia be auka. Dala be lasi misinari gaukara karaia totona, bona tano ma haida taudia ese moni gaukara idia davaria be auka. To, Witness taudia rua India amo, be nega idaudia ai moni gaukara idia davaria bena lagani haida Kathmandu ai idia noho bona unai kongregesen matamata idia hagoadaia. Lagani 1976 ia abia neganai, Basileia harorolaia taudia Kathmandu dekenai be 17. Lagani 1985 ai tadikaka ese edia Kingdom Hall idia haginia. Idia haorea neganai, lagani ta ta ena distrik hebouhebou be unuseniai idia abia hanaihanai. Unai ruma be tomadiho goevadaena gabuna, unai ororo gabuna dekenai.
Hekwakwanai Idia Vara to Gaukara Idia Habadaia
Haroro gaukara idia hamatamaia laganidia ai, edia gaukara be mai aonega ida idia karaia dainai, gavamani taudia ese idia do dibaia lasi. To, lagani 1984 ia ore gwauraia neganai, taravatu haida idia atoa. Tadikaka ta bona taihu toi idia abia bena dina 4 idia dogoatao murinai idia siaia bona idia hamaoroa edia gaukara idia karaia lou lasi. Hanua ta dekenai, taunimanima 9 be edia ruma lalonai Baibel stadi idia karaia noho lalonai idia dogoatao. Idia 6 be dibura rumana lalonai dina 43 idia noho. Ma haida danu idia dogoatao, to idia kota henia lasi.
Lagani 1989 ai, tadikaka bona taihu ibounai Kongregesen Buka Stadi ta lalonai be idia abia, dina toi idia dogoatao, bena idia siaia. Nega haida, idia hamaorodia pepa ta, ia gwau do idia haroro lasi, do idia sainia. To idia sainia lasi. Haida be pepa ma ta idia sainia murinai idia ruhaia. Unai pepa ena hereva ia gwau, bema idia haroro lou bona idia davaridia, edia lalona idia hadaia unai ena davana do idia abia.
Herevana unai hekwakwanai idia vara, to tadikaka be mai edia ura bada ida Basileia sivarai namona idia harorolaia. Hegeregere, lagani 1985 ai, gavamani ese edia gaukara idia koua toho matamaia laganina murinai, haroro taudia edia namba be 21 pesen amo ia bada daekau. Unai pablisa 35 ese taunimanima dekenai tomadiho goevadaena idia herevalaia horana ena averes hua ta ta lalonai be hora 20.
Nega ia hanaia lalonai, Nepal dekenai politik lalohadaidia haida idia haidaua. Gavamani taudia idia lalo-parara Iehova ena Witness taudia be dika ta do idia havaraia lasi. To, edia Baibel hadibaia gaukarana be mai ena namo taunimanima edia diba habadaia dalana dekenai, unai amo unai tano taudia namodia ai idia lao. Gavamani taudia idia diba kara maoromaoro, gaukara goada, bona mauri ena kara goevadia be idia herevalaia bada, bona unai idia gwauraidia Iehova tomadiho henia taudia edia kara badadia.
Hindu tomadihona goadalaia hahinena ta be Witness hahinena ta ai ia lao bona rara abia karana ia dadaraia neganai, Witness taudia edia sivarai ia hedinarai namonamo. Ena lalona ia hadaia goada mai ena diba bada ida dainai, doketa taudia idia hoa. Unai hahine be Mauri Hanaihanai Tanobada Dekenai Oi Abia! buklet amo idia durua hereva momokani ia diba totona. Herevana ena ruma bese ese idia koua bona hevasehalaia, to lagani 1990 ai ena mauri lagani be kahirakahira 70 ia abia neganai, ia bapatiso. Gabeai ena aena ia hamakohia bona ma metau haida ia davaria danu dainai, operesen badana do ia abia be namo. Wiki rua lalonai doketa bona varavara ese idia doria, rara abia totona, to ia haheauka. Gabeai, doketa taudia ese rara idia gaukaralaia lasi to operesen idia karaia namonamo. Ena be unai taihu, mai ena abidadama taihuna, be hari ia loaloa momo diba lasi, to ia be daba ibounai ena geiti vairanai ia helai bona idia raka hanai taudia ia boiridia ia danu idia helai bena sivarai namona mai mamina do idia kamonaia.
Nepal, Hari Inai Nega Ai
Hari inai nega ai Nepal be edena bamona? Iehova ena Witness taudia unuseniai be mai edia dala, edia tadikaka tanobada hegegemadai ai hegeregerena, tomadiho karana idia moalelaia diba. Ororo daekau taudia ta o rua be tomadiho momokani ororona dekenai idia daekau taudia ida idia lao negana amo, hari edia namba ia bada noho taudia be idia gwau, ‘Umui mai, Iehova ena ororo dekenai do ita daekau.’ Lagani 1989 ai haroro gaukara idia karaia taudia edia namba ena averes hua ta ta lalonai be 43, bona unai lagani lalonai Keriso ena mase ena Memorial hebouna dekenai taunimanima ibounai 204 idia hebou.
Bena, Iehova be ena gwauhamata hegeregerena, ena ruma dekenai hereva momokani tahua taudia haboudia gaukarana ia haharagaia. (Isaia 60:22) Vanegai Kathmandu dekenai kongregesen iharuana idia karaia, bona hari unai siti ena murimuri ai be grup rua idia noho. April 1994 ai, Keristani taudia 153 idia haroro—lagani 5 ia do abia lasi lalonai 350 pesen amo edia namba ia bada daekau unai! Baibel stadi 386 be kamonai taudia ida idia karaia. Lagani 1994 ena Memorial dekenai, taunimanima 580 idia hebou. Dina tamona hebouhebouna ta dekenai, taunimanima 635 be ruma badana ta idia hahonua, bona idia amo 20 be bapatiso idia abia. Tanobada hegegemadai ai Iehova ena Witness taudia edia namba ia bada noho hegeregerena, Nepal dekenai ia vara noho danu.
Vanegai idia hanaia laganidia amo Nepali gado ai idia hahanaia bukadia edia namba ia bada daekau. Unai ese manau taudia ia durua hereva momokani idia dogoatao auka totona. India ena brens opesi dekenai gado hahanaia daladia bona kompiuta gaukaralaia dalana idia hadibadia gado hahanaia taudia be hari Kathmandu dekenai ful-taim hesiai gaukara idia karaia noho. Tiokratik dalanai Nepal ena ororo daekau taudia be idia daekau noho; idia hegaegae gaukara habadaia totona!
Oi Daekau, Himalaya Ororodia Oi Hanaia
Oi danu be Himalaya ororodia ia hanaia ororona dekenai oi daekau diba. Bema unai oi karaia, oi be Nepal dekenai idia daekau taudia sibona lasi, to taunimanima milioni momo, “bese idauidau, iduhu idauidau, kopina idauidau, bona gado idauidau” amo do oi bamodia. (Apokalupo 7:9) Oi be idia ida ororo namo hereadia, Nepal dekenai idia noho ororodia bamona, ia Havaraia Diravana ese do ia hadibaia. Gau iboudiai ia Havaraia Tauna ese gau ibounai “do ia hamaoromaoroa” be do oi itaia, bona oi be tanobada goevana bona mai hairaina dekenai mauri hanaihanai do oi naria diba.—Isaia 2:4.
[Picture on page 25]
Kathmandu dekenai Kingdom Hall murimurina ai
[Picture on page 26]
Nepal taudia momo be Baibel stadi amo namo bada idia davaria