Iehova Ena Witness Taudia Tanobada Hegegemadai—Brazil

DALA idauidau ai Brazil be tano badana ta. Tanobada hegegemadai, tano ena lababa ai, bona taunimanima edia namba ai, ia be tano badana namba 5. Brazil be South America tanona ena tano kahana badana ta, bona Brazil dekenai idia noho taunimanima edia namba be South America ena tano ibounai edia namba ia hanaia. Tanobada hegegemadai, Brazil ena uda be bada herea. Unai uda badana lalonai, tanobada dekenai ia noho goada bada sinavaina ia aru​—Amazon Sinavai.

Brazil be ma dala ta amo ia bada danu. Dirava ena Basileia idia harorolaia pablisa taudia edia namba be kahirakahira 400,000 bona lagani 1994 lalonai Iesu ena mase Anibouna dekenai idia lao taudia be 1,000,000. Basileia harorolaia gaukarana dainai inai tano ena toana be namo herea. Vanegai idia vara ekspiriens ese unai ia hahedinaraia.

Haroro Taudia Lasi Gabunai Idia Gaukara

Antonio bona ena adavana ese edia lalona idia hadaia, São Paulo dekenai edia varavara bona dava bada gaukara do idia rakatania. Idia lao Minas Gerais provinsi dekenai, badina unuseniai Basileia harorolaia taudia be momo lasi. Edia teritori lalonai be suga faktori dekenai idia gaukara taudia edia hanua ta ia noho. Dina ginigunana unuseniai idia haroro neganai, Baibel stadi 9 idia hamatamaia. Hua 18 idia hanaia lalonai, idia ese Baibel stadi ibounai 40 idia karaia noho!

Guna, edia hebou be faktori dekenai idia karaia. To, pablisa matamatadia idia ura Kingdom Hall momokanina idia itaia. Unai dainai basi ta idia rentaia, taunimanima 75 be kahirakahira ia noho kongregesen dekenai ia abidia lao totona. Gabeai, hebouhebou negana ia ginidae bona Baibel stiuden matamatadia ibounai 45 idia lao, bona program dekenai idia henanadai henidia. Unai hebouhebou dekenai idia 15 idia bapatiso. Oibe, idia moale dainai mata ranu idia diho!

Unai basi kampani idia gaukaralaia loulou hebouhebou haida dekenai idia lao totona, bona basi taudia ese davana idia hadihoa. Unai idia moalelaia dainai, Antonio ese basi kampani biaguna dekenai Baibel stadilaia bukana ta ia henia. Unai tau ia gwauhamata, unai adorahi ai Baibel do ia stadilaia matamaia, bona hua haida lalonai Baibel ia stadilaia namonamo murinai ia bapatiso. Guna, ena adavana be unai stadi dainai ia dagedage henia, to gabeai ia manau. Hari, ia danu be ia bapatiso vadaeni Iehova ena Witness taihuna ta.

February 1992 lalonai, kongregesen ta mai ena pablisa taudia ibounai 22 idia havaraia. Lagani 1994 ai unai namba ia daekau lao 42, bona ful-taim sivarai namona harorolaia taudia o regula painia taudia be hani. Unai dainai, Antonio ia gwau: “Lau bona egu adavana ai diba bema Malaki 3:10 ena hereva hegeregerena ai ‘Iehova ai tohoa’ neganai, ‘ia ese gau namodia momo herea ai dekenai do ia bubua diho.’ ”

Baibel Buka Idia Hariharilaia

Reana Brazil dekenai haroro gaukara ia bada ena badina ma ta be Witness taudia ese dala idauidau ai, Baibel idia hadibalaia bukadia idia hariharilaia hanaihanai dainai. Haheitalai ta be, kongregesen ta ese Watch Tower Society ena brens opesi ia tore henia bona Memero Kekeni Edia Henanadai Haere Maorodia buka 250 totona idia noinoi. Dahaka dainai oda bada herea idia karaia?

Unai leta ese ia hahedinaraia, ia gwau: ‘Taoni ena sikuli ta ia ura unai buka idia gaukaralaia natudia idia hadibaia totona. Sikuli biagudia ese unai lalohadai idia abia badina Iehova ena Witness tama sina bona sikuli ena supavaisa ta ese nega bona gabu idauidau ai idia haroro dainai. Iehova ena hesiai taudia ese hadibaia gaukara namona inai buka amo idia karaia lalonai, Ia hanamodia noho be namo.’ Oibe, bona namona be Iehova ese Brazil tano badana lalonai, Basileia harorolaia gaukarana ia hanamoa noho.

[Box on page 8]

TANO RIPOTINA

Hesiai Laganina 1994

HARORO TAUDIA EDIA NAMBA BADANA: 385,099

WITNESS TAUNA TAMONA INAI NAMBA AI: 404

MEMORIAL AI IDIA HEBOU TAUDIA: 1,018,210

PAINIA TAUDIA EDIA AVERES: 38,348

BAIBEL STADI EDIA AVERES: 461,343

BAPATISO ABIA MATAMATA TAUDIA: 24,634

KONGREGESEN EDIA MOMO: 5,928

BRENS OPESI: CESÁRIO LANGE

[Picture on page 9]

Lagani 1940 bamona, Sao Paulo dekenai mai ena spika motuka idia gaukaralaia

[Picture on page 9]

Rio de Janeiro ena Botanical Garden dekenai idia haroro

[Picture on page 9]

Brens opesi Cesário Lange dekenai