Iehova ese Ia Hadibaia Ema Bona Hari
“Lohiabada Dirava ese, dahaka do lau hereva gauna ia hadibaia lau dekenai.”—ISAIA 50:4.
ENA natuna ginigunana ia havaraia negana amo, Iehova Dirava be Hadibaia Tauna ai ia lao. Iena natuna haida idia gwau-edeede murinai, iena amo diba ia tahua tauna ta, ena Natuna Roboana, ia ura henia bada tauna unai, be tanobada ai do ia karaia gaukarana totona ia hahegaegaea. (Aonega Herevadia 8:30) Isaia karoa 50 ia peroveta, unai diba tahua tauna be inai bamona do ia hereva: “Lohiabada Dirava ese, dahaka do lau hereva gauna ia hadibaia lau dekenai, vadaeni unai dainai lau ese manoka taudia lau hagoadaia diba.” (Isaia 50:4) Tanobada ai ia noho neganai ena Tamana ena hahediba hegeregerena ia kara dainai, Iesu ese “tauanina manokamanoka bona gaukara metau taudia ibounai” ia hagoadaia.—Mataio 11:28-30.
2 Iesu be tanobada ai ia noho neganai siahu karadia momo ia karaia. Matakepulu taudia edia matadia ia kehoa bona mase taudia ia hatorea isi danu, to unai negai idia noho taudia ese idia laloa bada gauna be, ia be hadibaia tauna ta. Ia murinai idia raka taudia bona idia inai henia taudia danu ese idia gwauraia hadibaia tauna. (Mataio 8:19; 9:11; 12:38; 19:16; Ioane 3:2) Iesu ese ia hadibaia herevadia ia heagilaia lasi, to mai ena manau ida ia gwau: “Lauegu hadibaia herevadia be lauegu lasi, to lau ia siaia Diravana ena.” “Tamana ese lau dekenai ia hadibaia hegeregerena lau hereva.”—Ioane 7:16; 8:28; 12:49.
Hadibaia Tauna Bona Diba Tahua Tauna Edia Kara
3 Hadibaia tauna hereadaena ese ia hadibaia taudia edia namo ia tahua bona ia lalodia mai ena momokani bona mai ena lalokau ida. Isaia karoa 50 ese ia hahedinaraia Iehova Dirava ese ia hadibaia taudia be unai bamona ia laloa bada. Unai peroveta herevana ia gwau: “Daba ibounai ia ese laloa goada lau dekenai ia henia noho, vadaeni iena hadibaia hereva lau kamonaia namonamo.” (Isaia 50:4) Unai hereva ena mamina be inai bamona hadibaia tauna ta ia herevalaia: Daba momokani ai ia hadibaia taudia ia haoa, do ia hadibaia totona. Baibel tahua namonamo tauna ta ese unai peroveta herevana ena anina ia herevalaia, ia gwau: “Anina be, Hahemauri Tauna be . . . Dirava ena sikuli lalonai ia noho tauna ta; bona ia be hegeregere ma haida do ia hadibaia. . . . Dirava ese ia hadibaia dainai, Mesia be hegeregere momokani taunimanima do ia hadibadia.”
4 Kara maorona be, diba tahua taudia ese ia hadibadia tauna ena hereva idia kamonaia. Ena Tamana ese ia hadibaia neganai, Iesu be edena bamona ia kara? Ena kara be Isaia 50:5 ese ia gwauraia karana bamona: “Lohiabada ese diba bona aonega lau dekenai ia henia, bona lau ese iena hereva lau negea lasi. Lohiabada dekena amo lau raka siri lasi.” Oibe, Iesu ia ura dikadika diba do ia abia. Ia hakala namonamo. Unai sibona lasi, to ena lalona be ia hegeregere, herevana ena Tamana ese dahaka ia hamaoroa, to do ia karaia. Ia gwau-edeede lasi; to ia gwau: “Lauegu ura lasi, oiemu ura sibona.”—Luka 22:42.
5 Unai peroveta herevana ese ia hahedinaraia, Natuna be Dirava ena ura ia karaia dainai ia dekenai do idia vara diba gaudia, be Dirava ese ia hadibaia vadaeni. Diba ia abia tauna ena hereva ese unai ia hahedinaraia, ia gwau: “Egu doruna idia botaia taudia dekenai lau koua gwauraia lasi, bona idia ese lau idia hereva dika henia neganai, edia hereva lau hadokoa gwauraia lasi. Idia ese egu auki huina idia veria, bona egu vairana dekenai idia kanudia neganai, lauegu vairana lau hunia lasi.” (Isaia 50:6) Unai peroveta herevana ese ia hahedinaraia hegeregerena, Iesu be tanobada dekenai ia noho neganai idia dagedage henia. Aposetolo Mataio ia gwau: “Iesu ena vairana latanai idia kanudi, edia imana dekenai idia botaia.” (Mataio 26:67) Lagani 33 C.E. ai, Pasova hanuaboina ai, tomadiho gunalaia taudia edia ura hegeregerena unai bamona idia kara henia. Kerukeru, Roma tuari taudia ese idia botaia mai edia hebogahisi ida lasi neganai, Iesu ese ena doruna be idia botaia taudia dekenai ia henia, unai murinai satauro ai idia taua dae, do ia mase totona.—Ioane 19:1-3, 16-23.
6 Unai Natuna be diba ia abia namonamo guna dainai, nega ibounai ena Hadibaia Tauna ia abidadama henia. Peroveta herevana hegeregerena, ia gwauraia herevana ma ta ese unai ia hahedinaraia, ia gwau: “Idia edia hereva dika ese, lau idia hadikaia diba lasi, badina Lohiabada Dirava ese lau ia durua noho.” (Isaia 50:7) Iesu ese ena Hadibaia Tauna ena heduru ia abidadama henia dainai, davana namona ia abia. Ena Tamana ese ia abia isi, dagi bada herea ia henia, Dirava ena hesiai taudia oredia edia dagi ia hereaia gauna. (Filipi 2:5-11) Bema Iehova ena hahediba ita badinaia bona ia ‘dekena amo ita raka siri lasi,’ ita danu ese hahenamo badadia do ita abia diba. Guna amo ema bona hari, unai hahediba ia henia noho dalana mani ita tahua.
Hadibaia Gaukarana Idia Habadaia
7 Ita davaria vadaeni hegeregerena, Iesu Keriso be Iehova ena amo tanobada dekenai ia mai Tauna, bona Iehova ese ia gaukaralaia, iena hereva hahedibalaia totona. (Ioane 16:27, 28) Iesu ese Dirava ena Hereva ia gwauraia loulou, unai amo ia hahedinaraia iena hahediba herevadia hamomokania gauna be unai; unai amo dala maorona ia hahedinaraia ia hadibaia taudia dekenai. (Mataio 4:4, 7, 10; 21:13; 26:24, 31) Gabeamo, diba idia abia vadaeni taudia ese Iehova ena hahediba herevadia be taunimanima idia hadibadia. Mani oi laloatao, Iesu ese ia haganidia, ia gwau: “Umui lao, bese ibounai be diba tahua taudia do umui halaoa, bona . . . idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Taunimanima be hahediba taudia ai idia halaoa neganai, idia be “Dirava ena orea taudia” ai idia lao; “inai orea be mauri Diravana ena ekalesia.” (1 Timoteo 3:15) Kongregesen ta ta lalodiai idia hebou; unuseniai Iehova ese ia hadibadia. (Kara 14:23; 15:41; 16:5; 1 Korinto 11:16) Dirava be unai dala amo ma haida ia hadibaia ema bona hari eiava?
8 Oibe! Dina toi idia do noho ela bona do idia hamasea negana, Iesu ia peroveta inai tanobada oromana ia do doko lasi neganai, haroro gaukarana badana do idia karaia. Ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” Unai murinai Iesu ese unai haroro gaukarana bona hadibaia gaukarana be tanobada hegegemadai do ia biagua dalana ia herevalaia. ‘Hesiai tauna mai ena kamonai bona mai ena kara maoromaoro’ ia gwauraia, iena amo Iena hesiai taudia be lauma anianina do ia henidia. (Mataio 24:14, 45-47) Iehova Dirava ese unai “hesiai tauna” ia gaukaralaia, Basileia gaudia tanobada ibounai lalonai do ia naridia totona.
9 Hari inai negai, hesiai tauna mai ena kamonai bona mai ena kara maoromaoro be Basileia do idia abia taudia oredia. Idia be horoa Keristani taudia, 144,000 taudia oredia tanobada ai, “Keriso ena taudia,” bona “Aberahamo ena natuna” taudia. (Galatia 3:16, 29; Apokalupo 14:1-3) Hesiai tauna mai ena kamonai bona mai ena kara maoromaoro be edena bamona ita dibaia diba? Edia gaukara amo bona Dirava ena Hereva, Baibel, idia badinaia goevagoeva karana amo.
10 Hari inai negai, Iehova ese unai “hesiai tauna” ia gaukaralaia, iena amo taunimanima do ia hadibadia totona. Lagani 1931 ai, unai hesiai oreana taudia ese inai ladana Iehova ena Witness Taudia idia abia edia. Unai nega amo ema, taunimanima milioni milioni ese idia bamodia bona unai ladana idia abia edia, bona idia danu ese Dirava ena Basileia sivaraina idia harorolaia. “Hesiai tauna” ese inai magasin, Gima Kohorona Iehova Ena Basileia Ia Harorolaia, ia gaukaralaia momo, hadibaia gaukarana lalonai. To, buka, buklet, pepapepa, bona Noga! magasin danu ia gaukaralaia.
11 Unai sibona lasi, to “hesiai tauna” ese sikuli idauidau danu ia gaukaralaia. Sikuli ta be Watchtower Bible School of Gilead; ia lalonai haroro taudia, eregabe taudia unai, be hua ima lalonai idia hahegaegaea, idau tanodia ai misinari gaukarana do idia karaia totona. Ma ta be Hesiai Gaukarana Hadibaia Sikulina; ia lalonai elda taudia bona kongregesen ena hesiai taudia, headava lasi taudia unai, be hua rua lalonai idia hadibaia, tiokratik gaukaradia idaudia do idia karaia totona. Ma ta be Basileia Hesiai Gaukarana Sikulina; nega ta ta idia karaia, Keristani elda taudia bona hesiai taudia be edia gaukara kongregesen lalonai do idia hadibaia totona. Bona ta be Painia Gaukarana Sikulina; ful-taim haroro taudia ia durua, edia haroro gaukarana lalonai anina bada do idia havaraia totona.
12 Hadibaia gaukarana ena kahana ma ta be kongregesen heboudia ima; tanobada hegegemadai ai Iehova ena orea taudia ese pura ta ta lalodiai kongregesen 75,500 lalonai idia karaia. Unai hebou amo heduru bada oi abia, a? Idia hadibaia negadiai, emu hakala namonamo karana amo oi hahedinaraia oi laloa oi be Dirava ena sikuli lalonai oi noho, a? Lauma dalanai oi goada oi lao dalana amo taunimanima idia diba ‘Dirava ese dahaka do oi hereva gauna ia hadibaia oi dekenai,’ a?—Isaia 50:4; 1 Timoteo 4:15, 16.
Kongregesen Heboudia ai Ia Hadibadia
13 Iehova ese inai dala badana amo ena orea taudia ia hadibaia: Pura ta ta lalodiai Baibel be Gima Kohorona ena heduru amo idia stadilaia. Oi laloa unai hebou dekenai Iehova ese oi ia hadibaia diba, a? Ena be Isaia 50:4 be mai anina bada Iesu dekenai, to ia be mai anina Dirava ena heduru idia abia dae taudia iboudiai dekenai danu; ‘Dirava ese dahaka do idia hereva gauna ia hadibaia idia dekenai.’ Oi hahedinaraia Gima Kohorona oi laloa bada dalana ta be, magasin ta ta oi abia negadiai, karaharaga oi duahia. Bena, kongregesen lalonai Gima Kohorona stadilaia negadiai bema oi lao bona oi hegaegae emu helaro do oi gwauraia hedinarai, unai amo Iehova oi hahedinarai henia ena hahediba oi laloa bada.—Heberu 10:23.
14 Hebou lalodiai bema oi haere, unai amo oi danu be Iehova ena hadibaia gaukarana oi karaia—unai oi diba, a? Momokani, ‘lalokau dekena amo kara namodia do ita karaia’ totona ita ha-uraia heheni dalana badana ta be, hebou lalodiai ita haere. (Heberu 10:24, 25) Memero kekeni danu be inai hadibaia gaukarana idia karaia diba eiava? Oibe. Memero kekeni be edia lalona amo idia haere negadiai, unai ese taunimanima badadia ia hagoadaia. Nega haida, memero kekeni edia haere ese iseda hebou dekenai idia mai matamata taudia idia ha-uraia, Baibel ena hereva momokani do idia laloa bada totona. Memero kekeni haida be vaia paragraf amo haere ta idia duahia hedinarai eiava idia badinai ia helai tauna ese ia hamaorodia herevana idia gwauraia lou. To, edia haere bema idia hegaegaelaia namonamo guna, unai ese kamonai taudia ia hagoadaia bada. Haere henia dalana unai bamona ese iseda Hadibaia Tauna Badana bona ena hadibaia gaukarana namona ia hanamoa.—Isaia 30:20, 21.
15 Bema memero kekeni idia ura iseda Dirava do idia hanamoa, unai ita itaia neganai ita moale bada. Iesu ese maragidia edia hereva, Dirava hanamoa herevadia, ia laloa bada. (Mataio 21:15, 16) Keristani elda tauna ta ia gwau: “Lau mero neganai, lau ura Gima Kohorona Stadi dekenai haere do lau henia. Egu tamana ese lau ia durua guna haere ta do lau hegaegaelaia, bena lau ia hamaoroa unai hereva be nega 7 do lau gwauraia, do lau manadalaia totona.” Umui tama sina e, reana emui famili Baibel stadi umui karaia lalonai, emui natuna umui durudia diba, Gima Kohorona ena paragraf haida edia haere be sibodia edia hereva amo do idia hegaegaelaia totona. Iehova ena hadibaia gaukarana lalonai idia danu do idia hadibaia be hahenamo badana ta; umui durudia unai do idia diba totona.
16 Namona be Keristani heboudia oredia dekenai, hadibaia gaukarana be hereva henia taudia bona hereva kamonaia taudia danu ese idia laloa bada. Lagani 50 bona ma haida lalonai, Iehova ese Haroro Sikuli ia gaukaralaia, pura ta ta lalodiai tatau bona hahine milioni milioni be Basileia sivaraina harorolaia namonamo dalana do ia hadibaia totona. Inai bamona taudia be sikuli lalonai hereva idia henia diba: Kongregesen ida idia gaukara hebou taudia, bona vanegai hebou dekenai idia mai matamaia taudia, to gau tamona, namona be Keristani taravatudia be edia mauri lalonai idia badinaia.
17 Hadibaia gaukarana ena kahana ma ta, lagani momo herea lalonai idia karaia gauna, be Pablik Hebouna. Unai hebou idia karaia, Witness lasi taudia be Baibel ena hahediba herevadia badadia do idia hadibaia totona. Unai hegeregerena, namona be haroro tauna ese hereva ia gwauraia goevagoeva, bena edia nega ginigunana ai unai hereva idia kamonaia taudia ese ena anina do idia lalo-pararalaia diba. Namona be inai bamona hereva, “mamoe idaudia,” “tadikaka,” bona “orena taudia,” Witness lasi taudia ese reana idia lalo-pararalaia lasi herevadia, edia anina ia gwauraia hedinarai goevagoeva. Reana Pablik Hebouna dekenai idia mai taudia haida edia lalohadai eiava edia noho daladia be hari inai negai idia noho taudia momo ese idia abia dae, to idia be Baibel ena hereva hegeregerena lasi, unai dainai namona be haroro tauna be nega ibounai ena hereva do ia naria namonamo do ia hahemaraidia garina, bona edia lalohadai eiava edia noho daladia do ia kirikirilaia lasi.—1 Korinto 9:19-23 itaia.
18 Kongregesen Buka Stadi be hebou ta, pura ta ta iboudiai unai hebou dekenai buka bona Baibel idia stadilaia. Unai buka be hesiai tauna mai ena kamonai bona mai ena kara maoromaoro ena hahekau henunai idia karaia. Tano momo lalonai, hari idia ese buka ladana Apokalupo—Ena Hagugurua Negana Ia Kahirakahira! idia stadilaia. Hesiai Hebou ese Iehova ena orea taudia ia durua, Basileia ena sivarai namona harorolaia gaukarana bona taunimanima be hahediba taudia ai halaoa gaukarana do idia goadalaia totona.—Mataio 28:19, 20; Mareko 13:10.
Hebouhebou Badadia ai Ia Hadibadia
19 Lagani 100 bona ma haida lalonai, “hesiai tauna mai ena kamonai” ese hebouhebou idauidau ia hegaegaelaia, Keristani taudia korikoridia hadibaia bona hagoadaia totona. Hari, lagani ta ta lalodiai unai bamona hebouheboudia toi idia karaia. Ta be dina-tamona hebouhebouna; kongregesen haida sekit tamona lalonai be unai hebou idia abia. Ma ta be sekit hebouhebouna; sekit ta ta be edia nega ai dina rua lalonai idia hebou. Bona ma ta be distrik hebouhebouna; sekit haida be nega tamona ai unai hebou idia abia. Lagani haida lalonai, intenesenel hebouheboudia idia karaia. Unai hebouhebou badadia, idia dekenai Witness taudia haida tano idaudia amo idia lao, ese Iehova ena orea taudia edia abidadama idia hagoadaia bada!—Deuteronomi 16:16 itaia.
20 Lagani 1922 ai, taunimanima 10,000 bamona be Cedar Point, Ohio, U.S.A. dekenai idia hebou neganai, haroro tauna ena hereva ese ia hagoadadia; ia gwau: “Hari be dina iboudiai edia dina badana. Itaia, Pavapava ia lohia! Umui be iena hereva gwauraia taudia. Unai dainai Pavapava bona ena basileia umui harorolaia, harorolaia, harorolaia.” Nega iboudiai unai hebouhebou badadia dekenai haroro gaukarana idia herevalaia momo. Hegeregere, lagani 1953 lalonai, New York City dekenai intenesenel hebouhebouna ai, idia gwau kongregesen iboudiai lalodiai ruma-ta-ruma-ta hadibaia gaukarana do idia hamatamaia. Unai hadibaia gaukarana idia karaia dainai, Basileia harorolaia gaukarana idia hanamoa, tano momo lalonai.
Dirava ese Ia Hadibadia Do Idia Hahediba Totona
21 Momokani, hari inai negai Iehova be mai ena hadibaia gaukarana hereadaena tanobada dekenai! Idia abia dae taudia be Dirava ese ia hadibaia, oibe, ‘Dirava ese dahaka do idia hereva gauna ia hadibadia.’ Ta be Dirava ena sikuli lalonai ia noho be hahenamo badana ta! To, unai hahenamo ita abia dae neganai, namo lasi ena anina ita reaia. Iehova ese Iesu ia hadibaia, ma haida do ia hadibadia totona, bona Iesu ese ena hahediba taudia ia hadibaia, ia karaia gaukarana be idia danu do idia karaia totona, to iena kara do idia hereaia karadia do idia karaia. Unai hegeregerena, Iehova ena hadibaia gaukarana lalonai ita idia hadibaia, ma haida do ita hadibadia totona.—Ioane 6:45; 14:12; 2 Korinto 5:20, 21; 6:1; 2 Timoteo 2:2.
22 Mose ia gwau, “Hereva dekenai egu malana be ia haraga lasi,” bona Ieremia ia gwau, “Hereva dalana lau diba lasi”; oi danu be unai bamona oi hereva, a? Iehova ese oi do ia durua, ia ese idia ia durua hegeregerena. Ia ese Mose ia hamaoroa, ia gwau: “Oiemu hereva do lau durua.” Bona Ieremia ia hamaoroa, ia gwau: “Oi gari lasi, badina lau be oi dekenai do lau noho.” (Esodo 4:10-12; Ieremia 1:6-8) Tomadiho gunalaia taudia ese Iesu ena hahediba taudia edia hereva idia koua toho neganai, ia gwau: “Bema idia be mai regerege lasi, inai nadi do idia boiboi.” (Luka 19:40) Unai neganai nadi idia boiboi be anina lasi, bona hari inai negai danu idia boiboi be anina lasi, badina be Iehova ese ia hadibaia taudia ia gaukaralaia, ena Basileia sivaraina do idia harorolaia totona.
Oi Haere Diba A?
◻ Hadibaia Tauna bona diba tahua tauna idia kara heheni dalana namo hereana be Isaia karoa 50 ese edena bamona ia herevalaia?
◻ Edena dala amo Iehova ese hadibaia gaukarana badana ia karaia?
◻ Iehova ena hadibaia gaukarana lalonai dahaka dahaka idia karaia?
◻ Dahaka dainai Iehova ena hadibaia gaukarana lalonai ita danu ita hadibaia be hahenamo badana ta ita dekenai?
[Study Questions]
1, 2. (a) Iehova ese ia hadibaia tauna, ia ura henia bada tauna unai, be dahaka totona ia hahegaegaea, bona dahaka ia vara? (b) Iesu be edena bamona ia hahedinaraia iena hahediba herevadia be Dirava ena amo idia mai?
3. Isaia ena peroveta herevana ese edena bamona ia hahedinaraia Iehova ese ia hadibaia taudia ia laloa bada?
4. Ena Tamana ese ia hadibaia neganai, Iesu be edena bamona ia kara?
5. (a) Dahaka ese ia hahedinaraia Iesu ia diba guna dahaka hisihisi do ia ania tanobada dekenai? (b) Isaia 50:6 ena peroveta herevana be edena bamona ia momokani?
6. Dahaka ese ia hahedinaraia nega ibounai Iesu ese ena Hadibaia Tauna ia abidadama henia, bona unai kara dainai dahaka davana namona ia abia?
7. Iehova ese ena hadibaia gaukarana be edena dala amo tanobada ai ia karaia?
8. Iesu ese ia hahedinaraia, dokona ia do mai lasi neganai haroro gaukarana tanobada dekenai be edena dala amo do ia biagua?
9. Hesiai tauna mai ena kamonai bona mai ena kara maoromaoro be daidia?
10. Hesiai oreana ese dahaka gau ia gaukaralaidia, Iehova ena hahediba herevadia halasia totona?
11. “Hesiai tauna” ese edena sikuli ia gaukaralaidia, bona dahaka totona ia gaukaralaidia?
12. Pura ta ta lalodiai dahaka hadibaia gaukarana idia karaia?
13. (a) Hari inai negai edena dala badana amo Iehova ese ena orea taudia ia hadibaia? (b) Edena dala amo ita hahedinaraia diba Gima Kohorona ita laloa bada?
14. (a) Dahaka dainai hebou lalodiai ita haere be hahenamo badana ta? (b) Edena bamona haere, memero kekeni ese idia henia gaudia, ese ita idia hagoadaia?
15. Tama sina ese edia natudia be edena bamona idia durua diba, do idia haere namonamo totona?
16. Haroro Sikuli ena namo be dahaka, bona daidia be unai sikuli lalonai hereva idia henia diba?
17. (a) Pablik Hebouna be dahaka totona idia karaia? (b) Pablik haroro henia taudia ese dahaka dahaka idia laloatao be namo?
18. Dahaka kongregesen heboudia ma haida be pura ta ta lalodiai idia karaia, bona dahaka totona idia karaia?
19. “Hesiai tauna” ese dahaka hebouhebou badadia be lagani ta ta lalodiai ia hegaegaelaia?
20. Nega iboudiai Iehova ena Witness taudia edia hebouhebou badadia dekenai, dahaka idia herevalaia momo?
21. Dahaka hahenamo do ita abia dae bona ena anina do ita reaia lasi be namo?
22. (a) Mose bona Ieremia edia lalo-hekwarahi be dahaka, to Iehova ese edena bamona ia kokia? (b) Dahaka dainai ita diba momokani Dirava ese dala do ia karaia, Basileia harorolaia gaukarana do idia karaia guguru?
[Picture on page 16]
Memero kekeni be edia lalona amo idia haere negadiai, unai ese taunimanima badadia ia hagoadaia